1, 2. Peteru yange hee kper tugh kaka been yô, lu nyi i er unu?

MBAHENEN mba Yesu utaankaruhar yange ve tsa haan ukper shin Zegemnger u Galilia tugh kaka, kpa ve kôr kwaghmôm ga. Yesu u i nder un shin ku la tile sha kpezegemnger lu kenger ve zulee. Maa a kaa a ve ér: “Wa nen kper ken uwegh ku yanegh ku tsoogh, tsô né zua a mi. Tsô ve wa kper, man ve kera fatyô u kpelan un ga, sha ci u ishu i ngee yum yô.”—Yoh. 21:1-6.

² Yesu ne ve kwaghyan u pepe been cii yô, maa gema kaa a Shimon Peteru ér: “Shimon, wan u Yona, M hemba doon we ishima a mbana?” Yesu yange ver ishigh ér nyi? Peteru soo kwagh u ishu kôron tsung. Ka inja er Yesu yange pine un nahan, sha u una fa kwagh u a hembe doon un ishima yô. Yange Peteru hemba soon ishu man kpenga u kôron ishu la a Yesu man akaa a Yesu tesen laa? Nahan Peteru na mlumun kaa ér: “Een, Tere, U fa er U doom yô.” (Yoh. 21:15) Peteru yange er kwagh u ôr la vough. Hii shighe la je, Peteru tese ér Kristu doo un ishima sha u nan ishima na cii sha tom u geman ior hingir mbahenen la, nahan hingir ityôgh ki nongo u Kristu sha ayange a mbaapostoli la.

3. Ka akaabo a nyi nahan i gbe u Mbakristu vea wa ikyo sha mini?

³ Se fatyô u henen nyi ken mkaanem ma Yesu ôr a Peteru laa?  Gba u se wa ikyo sha er dooshima u se lu a mi sha Kristu la una ndôhôr ga, shi se lumun ser kwaghmôm a dan se u veren akaa a Tartor hiihii ga yô. Yesu yange fa wang ér ka sea tagher a mbamkighir mba tar ne yô, ishima i nyian se. Yesu ôr ken injakwagh na i ortanivor la ér, mbagenev vea lumun “kwaghôron u tartor” la, nahan vea hii u zan ikyura, kpa “anzughul a tar ne a nyian ishima man icugh i inyar” ia “imbishi kwaghôron” shon. (Mat. 13:19-22; Mar. 4:19) Jighilii yô, aluer se wa ikyo ga yô, ishimanyian i sha mbamgbe mba ayange ayange la, ia fatyô u meen se, nahan se hii u vôron ken jijingi. Sha nahan yô, Yesu ta mbahenen nav icin ér: “Ver nen ishima sha ayol a en, asema a en a̱ de yoho sha hua u sha kwaghyan man sha ihyundugh [ki msôrough] man sha akaa a nyian ishima a uma ne ga.”—Luka 21:34.

4. Ka nyi ia wase se ve se fa aluer se mba a dooshima tsung sha Kristu? (Nenge foto u a lu sha mhii u ngeren ne la.)

⁴ Er kwagh u Peteru er shighe u nenge a Yesu u i nder un shin ku la a tese nahan, aluer se ver tom u Yesu a ne se la hiihii ken uma wase yô, se tese ser se kpa se mba a dooshima sha Kristu tsung. Se er nan ve se za hemen u eren kwagh nee? Se fatyô u pinen ayol ase sha ashighe ashighe ser: ‘Ka nyi i hembe doon mo ishima? Ka akaa a taregh ka a hemba nan mo msaanyol shinii, ka akaa a ken jijingii?’ Sha nahan yô, de se nenge nen sha akaa atar a uma ne a se lu a mnenge u akuma akuma sha a ga ve, dooshima u se lu a mi sha Kristu man akaa a ken jijingi la, una ndôhôr yô. Ka akaa shon je ne: Tom man akaa a se eren sha u zuan a msaanyol la, kua uyôughyôughmbaakaav.

5. Ruamabera na mbayaav tom u nyi?

⁵ Peteru yange eren kpenga u kôron ishu sha u zuan a msaanyol ga, kpa lu tom u u vaan un a inyaregh je la. Mbayaav nyian kpa fa er Ruamabera a tese ér mba a tom u kuren mbamgbe mba icombor ve yô. (1 Tim. 5:8) Nahan gba u vea nôngo kpoghuloo vea er tom ne. Kpa ken ayange a masejime ne, ashighe kpishi tom ka u gema u na ior ishimanyian.

6. Tom ngu van ior a ican i nyi nyiana?

⁶ Ityom i uke ngi di kpuaa tseegh tsô, kpa ior gema ngee kpishi, nahan hanma or yô, nan ngu nôngon tsung ér nana zua a mi. Sha nahan yô, mbatomov kpishi nenge ér vea eren tom i hemban shighe u tom la ken inya, sha er i de deen ve tom ga yô, man ashighe agen je yô, kwagh u ka i kimbi ve la, a gba ikyev ga. Shi er ityom i ikyômpeni i lu seer a seer, kpa mbatomov ve gem ve lu kpuaa yô, kwagh ne ka a na mbatomov ve vôr shi ve ure gayô ve gba angev je kpaa. Mbatomov mba ve kegh iyol u eren kômpeni ve tom za karen ikyaa inya ga la, tom ve ka u lu sha zongo.

7, 8. (a) Ka an i gbe u se hemba eren kwagh a nan sha mimi? (b) Ka kwagh u injaa u nyi nahan anmgbian ugen ken tar u Thailand yange hen sha kwagh u tom na?

⁷ Er se lu Mbakristu yô, or u i gbe u se hemba eren kwagh a nan sha mimi yô, ka Yehova Aôndo, ka or u nan tee se tom la ga. (Luka 10:27) Tom ka kwagh u wasen se u kuren kwagh u se soo la di tsô. Ka se er tom sha er se zua a akaa a hange hange a kwagh a gbe se a mi ken uma la, shi suen tom wase u pasen kwagh la. Nahan kpa, aluer se wa ikyo ga yô, tom ua fatyô u benden a mcivir u se civir Aôndo la. Ikyav i tesen yô, anmgbian ugen ken tar u Thailand kaa ér: “Tom wam u sôron ukômputa la yange u doom kpishi, kpa u gema u yaan mo shighe cica cii. Nahan kwagh la a na yô, m kera lu a shighe u eren akaa a ken jijingi ga. Nahan m mase kaven mer, aluer m soo mer me ver kwagh u Tartor hiihii ken uma wam yô, a gba u me de tom u m eren la.” Nahan anmgbian ne er nyi?

⁸ Anmgbian la pase ér: “Yange m we  agoyol ka nôngon u kuman er inyom i môm nahan yô, m tsua mer me gema teen kwaghnyohon u i yer ér ice cream la sha godobi. M hiin ice cream u teen yô, m kera lu zuan a inyaregh kpishi ga shi iyol i kpem a tom ne je kpaa. Mea za zua vea ior mba ngise m eren tom vea ve la yô, ve sem shi ve pinem er i hii ve m hen mer ice cream u teen hemba doon a tom u sôron ukômputa ken iyou i i we eekôndishen ker yô. Tsô m er msen hen Yehova, m sôn un mer a wasem u nôngon a kwagh ne, sha er me kure awashima wam u eren tom u ua hemba nan mo shighe u eren akaa a ken jijingi la yô. Ica i gbe ga yô, kwagh hii u zan doon. M hemba fan u eren ice cream u una doo mbakasuav av yô, shi m fa tom ne kôr inya kpaa. Nahan hanma iyange m tee ice cream wam m bee cica cii. Jighilii yô, yange m zua a inyaregh i hemba ki m zuan a mi shighe u m eren tom u sôron ukômputa la ica je. Kwagh ne na yô, hemba saan mo iyol sha ci u ishima de u nyian mo, kpa tom wam u ngise la yô, lu nahan ga. Kwagh u hemban cii je yô, m hemba ngun kôôsôô a Yehova hegen.”—Ôr Mateu 5:3, 6.

9. Se fatyô u zan hemen u lun a mnenge u akuma akuma sha kwagh u tom nena?

⁹ Yehova soo ér se eren tom kpoghuloo, sha ci u injar ngi ker. (Anz. 12:14) Nahan cii kpa, er kwagh u anmgbian u se vande teren kwagh na sha heen la a tese nahan, gba u se nengen kwagh u tom akuma akuma. Yesu kaa ér: “Kpa vande keren nen tartor Na man perapera Na, man akaa ne cii [mbamgbe mba hange hange] á seer ne a ye.” (Mat. 6:33) Cii man se fa ser se mba a mnenge u akuma akuma sha kwagh u tom man akaa ken jijingi yô, doo u se pine ayol a ase ser: ‘Tom u m eren la doom ishima shi ka i maam iyol u eren u, kpa ka a gema a lu akaa a ken jijingi yô, m nenge a beelee shinii?’ Aluer se mba gbidyen kwar sha gbenda u se nengen tom man akaa a ken jijingi la yô, kwagh ne una wase se u fan kwagh u a hemba doon se ishima la.

10. Ka kwagh u injaa u nyi Yesu yange tese?

¹⁰ Yesu tese se er se lu a mnenge u akuma akuma sha kwagh u tom, nahan se hemba nan ishima sha akaa a ken jijingi yô. Sha shighe ugen la, Yesu za Maria vea anngô na u kwase Marta inya. Er Marta lu kumbur sha, eren iwer la, Maria di tsua u za teman hen angahar a Yesu, ungwan kwagh u lu ôron la. Marta va gbe ijir ér Maria ngu wasen un ga yô, Yesu kaa a Marta ér: “Maria yô, tsua ci u dedoo u mayange á kera tsue un her a na kera ga yô.” (Luka 10:38-42) Yesu lu tesen Marta kwagh u doon tsung. Aluer se soo ser kwagh u tom a dan se ga, shi se tese ser Kristu hemba doon se ishima yô, gba u se za hemen u tsuan “ci u dedoo,” inja na yô ka u veren akaa a ken jijingi hiihii je la.

11. Ka nyi Ruamabera a tese sha kwagh u memene?

¹¹ Ka se er tom kpoghuloo, nahan gba u se ker shighe se memen. Mkaanem ma Aôndo kaa ér: “Kwaghdoon ugen ngu ga, saa u or nana̱ ya kwagh nana̱ ma kwagh man á kpe uma u nan iyol ken tom u nan u sha ican la.” (Orpa. 2:24) Yesu yange nenge sha shighe ugen la ér doo u or a memen. Kwagen la, Yesu er tom u pasen kwagh kpoghuloo vea mbahenen nav been kera yô, a kaa a ve ér: “Va nen, ne tseegh, hen ijiir i or lu ga yô, va mem nen kpeghee.”—Mar. 6:31, 32.

12. Ka ikyo i nyi i doo u se wa sha kwagh u iemberyolougho? Tese ikyav.

¹² Sha kpôô yô, u eren kwagh u nan se msaanyol la ka kwagh u hange hange. Nahan kpa, kwaghbo u a gem a lu ken kwagh ne yô, ieren ne ia fatyô u ngohol se ishima. Sha ayange a mbaapostoli la, ior kpishi lu a ieren i kaan ér, “se gbaa yan nen akaa man akaa tsô, gadia kper se mba kpen” la. (1 Kor. 15:32) Ka ieren i ior ve lu a mi sha ajiir kpishi ken tar nyian je la. Ikyav i tesen yô, anyom kpishi ken ijime, gumor ugen hen veghertar u Yuropa  hii u zan mbamkombo mba Mbakristu. Nahan kpa, kwagh u iemberyolough gema doo un ishima tsung je yô, de u kohol imôngo vea ior mba Yehova. Kpa shighe kar yô, mase kaven er ishima i na sha kwagh u iemberyolough la na yô, tagher a mbamzeyol shi va ahenge yô. Sha nahan yô, hide hii Bibilo i henen, maa shighe kar yô, kuma u hingir orpasen loho u dedoo. Yange eren batisema cii yô, a kaa ér: “Afanyô a m lu a mi yô, ka er yange m de shighe kar kpishi cii ve m mase kaven mer, u civir Yehova la hembe van or a msaanyol a u keren iemberyolough i tar ne la ye.”

13. (a) Tese ikyav i wasen se u kaven kwaghbo u a lu ken ieren i keren akaa a nan se msaanyol za karen ikyaa inya la. (b) Ka nyi ia wase se ve se lu a mnenge u akuma akuma sha kwagh u eren akaa a nan se msaanyol laa?

¹³ Awashima wase u eren akaa a nan se msaanyol yô, ka u se mem shi se zua a agee iyol. Aluer se soo u zuan a imba msaanyol ne yô, gba u se na shighe wase u memen shi zuan a agee ken iyol a kuma nena? Nenge ase ikyav ne: Se kpishi ka i doo se u yan kwagh u nyohon ashighe agen, kpa se kav ser, aluer se mba yan akaa a nyohon hanma shighe yô, se gba angev. Sha nahan yô, ka se yaan kwagh u una hemba lun se a iwasen ken iyol yô. Kape se kpa aluer se mba hemban eren akaa a nan se msaanyol ken uma ve, se gba angev mbu ken jijingi je la. Aluer se soo ser imba kwagh la i er se ga yô, gba u se eren ityom i Tartor nduuruu. Se er nan ve se fa ser se mba a mnenge u akuma akuma sha kwagh u eren akaa a nan se msaanyol laa? Ken kasua nahan, se fatyô u ngeren ahwa a i tee se u eren akaa a ken jijingi, er u zan mbamkombo shi duen kwaghpasen shi henen Bibilo sha tseeneke wase man vea tsombor wase nahan. Maa se tôô ahwa la se kar sha ahwa a i tee se u eren akaa a nan se msaanyol ken kasua shon la, er anumbe a eren shin u nengen televishen shi gbidyen gyeem i vidio shin eren akaa agen a ka i doo se u eren la nahan. Se been yô, doo u se pine ayol a ase ser: Ka nyi ka i hemba yan se shighe? Se nenge ser, gba u se pande u yan kwaghnyohonoo?—Ôr Mbaefese 5:15, 16.

14. Ka nyi ia fatyô u wasen se u tsuan akaa a nan se msaanyol la sha injaa?

¹⁴ Se asange asange man mbayaav a icombor ve, se mba a ian i tsuan u eren kwagh u una na se msaanyol la, aluer kwagh shon zua sha akaawan a Yehova a i nger ken Bibilo la yô. * Iemberyolough i injaa ka “iyua i Aôndo” je. (Orpa. 3:12, 13) Nahan cii kpa, se kav ser akaa a or ka nan er sha u zuan a msaanyol la, aa fatyô u kahan a orgen. (Gal. 6:4, 5) Nahan cii kpa, hanma iemberyolough i se tsough u eren cii kpa, gba u se er i akuma akuma. Yesu kaa ér: “Ape kwaghinjaa wou a lu yô, ka her man ishima you kpaa ia lu ye.” (Mat. 6:21) Nahan aluer Yesu doo se ishima sha mimi yô, kwagh la una mgbegha se se na ishima yase cii sha u henen shi ôron shi eren ityom i Tartor, a lu akaa a uma a ayange ayange la ga.—Fil. 1:9, 10.

15, 16. (a) Ka sha nyi gbenda nahan uyôughyôughmbaakaav vea fatyô u lun hôn hen Orkristu? (b) Ka kwagh u injaa u nyi Yesu yange wa sha kwagh u uyôughyôughmbaakaava?

¹⁵ Ior kpishi nyian de akaa cii mba zendan fashôn, man uhanseeti man ukômputa kua akaa agen a i sember duen a mi yô. Sha nahan yô, gba u hanma Orkristu nana tôv asaren a nan sha u pinen iyol i nan mbampin, er mban nahan, ér: ‘Uyôughyôughmbaakaav hingir mo zegekwagh je yô, ka m vihi shighe kpishi u tôvon shi henen sha kwagh u umato mba i sember duen a mi shin ufashôn, i hemba shighe u ka m tôô u wan iyol sha mbamkombo mba tiônnongo laa? M hemba nan ishima yam cii sha akaa a uma a  ayange ayange la, je yô, ka m lu a shighe cuku tseegh u eren msen shin ôron Bibilo?’ Aluer se kav ser dooshima u se lu a mi sha uyôughyôughmbaakaav la hemba ngeen a dooshima u se lu a mi sha Yesu la yô, gba u se gbidye kwar sha mkaanem ma Yesu man, ér: “Kura nen ayol a en sha hanma hua.” (Luka 12:15) Yesu yange ta icin tsung nahan, sha ci u nyi?

¹⁶ Yesu yange kaa ér “or môm môm ngu u nana fatyô u eren uter uhar tom ga.” Shi kaa ér: “Ne fatyô u eren Aôndo tom kua inyaregh kpaa ga.” Ka nahan sha ci u “uter” mban cii, hanmô yô, nan soo ér i lu nan tseegh i civir nan ye. Yesu yange kaa ér se fatyô u ‘kôron ugen ihyom, ugen á gema a doo se ishima’ shin ‘varen a ugen, geman lahan ugen.’ (Mat. 6:24) Er se yen yô, se cii gba u se za hemen u nôngon ityav a ‘asaren ase a iyolough’ kua uyôughyôughmbaakaav.—Ef. 2:3.

17. (a) Ka i taver mba kwagh u ken jijingi a gbe ve ishima ga la kpishi u lun a mnenge u akuma akuma sha kwagh u uyôughyôughmbaakaav sha ci u nyi? (b) Ka nyi ka i wase se u nôngon ityav a isharen i uyôughyôughmbaakaava?

¹⁷ Ka i taver mba kwagh u ken jijingi a gbe ve ishima ga la kpishi u lun a mnenge u akuma akuma sha kwagh u uyôughyôughmbaakaav. Sha ci u nyi? Sha ci u mlu ve u ken jijingi la ndôhôr. (Ôr 1 Mbakorinte 2:14.) Mkav ve u ken ishima la ka una eren tom sha inja ga yô, i taver ve kpishi u paven kwagh u dedoo a u bo. (Heb. 5:11-14) Sha nahan yô, ka i sar ve mbagenev tsung u lun a uyôughyôughmbaakaav, man or môm kpa nana fatyô u kuren isharen ne vindi vindi ga. (Orpa. 5:10) Kpa doo se kpishi er se fe icigh ki sôron megh ku uyôughyôughmbaakaav la yô. Icigh ki shon yô, ka u ôron Bibilo i i lu Mkaanem ma Aôndo la hanma shighe. (1 Pet. 2:2) Er Yesu gbidyen kwar sha mimi u Aôndo ve kwagh ne wase un u tilen dông palegh imeen nahan, aluer se kpa se mba dondon akaawan a Bibilo yô, kwagh ne una wase se u nôngon ityav a isharen i uyôughyôughmbaakaav la. (Mat. 4:8-10) Ka sea er nahan yô, se tesen Yesu ser a doo se ishima hemba hanma kwagh u iyolough ugen cii.

18. U kange ishima u eren nyi?

¹⁸ Shighe u Yesu pine Peteru ér: “M hemba doon we ishima a mbana?” la, lu umbur Peteru er gba u una ver akaa a ken jijingi hiihii ken uma na yô. Peteru u inja i iti na i lu “Vegher Vande” la, yange er kwagh u kuma sha iti la vough yô, sha ci u lu a aeren a a lu er vande nahan yô. (Aer. 4:5-20) Se nyian kpa, se kange ishima ser se za hemen u tesen Kristu dooshima tsung, shi lun a mnenge u akuma akuma sha kwagh u tom man akaa a nan se msaanyol kua uyôughyôughmbaakaav. Yô, akaa a se tsough u eren ken uma la a tese ér se mba a mnenge u Peteru, u yange kaa a Yesu ér: “Tere, U fa er U doom” ishima la.