1, 2. Wanem samting i kamap long Pita bihain long ol i painim pis inap nait olgeta?

LONG raunwara Galili, 7-pela disaipel i painim pis inap nait olgeta, tasol ol i no kisim wanpela pis. Jisas i kirap bek pinis, na em i sanap long nambis na lukluk long ol. “Em i tokim ol: ‘Tromoi umben i go long han sut bilong bot na yupela bai kisim sampela.’ Orait ol i tromoi umben, na ol i no inap pulim umben i kam antap, long wanem, i gat planti pis tumas.”—Jon 21:1-6.

² Jisas i givim kaikai long ol, na bihain em i tokim Saimon Pita: “Saimon, pikinini bilong Jon, yu laikim mi moa winim ol dispela samting, o nogat?” Jisas i toktok long wanem ol samting? Pita i laikim tru wok bilong painim pis. Olsem na ating Jisas i laik helpim Pita long luksave olsem em i laikim tru ol pis na bisnis bilong em long painim pis, o em i laikim tumas Jisas na ol samting Jisas i skulim em long en. Pita i tok: “Yes Bikpela, yu save mi laikim yu tumas.” (Jon 21:15) Pita i truim tok bilong em. Kirap long dispela taim, em i soim klia olsem em i laikim tru Krais na em i bisi long mekim wok bilong kamapim ol disaipel, na em i stap olsem pos insait long kongrigesen long taim bilong ol aposel.

3. Ol Kristen i no ken larim wanem ol samting i kamap long ol?

³ Yumi inap kisim wanem skul long ol tok Jisas i mekim long  Pita? Yumi mas was gut na no ken larim ol narapela samting i daunim pasin bilong yumi long laikim Krais, na yumi no tingim wok bilong Kingdom. Jisas i save olsem ol wari bilong laip bai putim presa long yumi. Long tok piksa bilong man i planim sid, Jisas i tok sampela bai harim “tok bilong Kingdom” na kamap strong long bilip, tasol “ol wari bilong laip long dispela taim na strong bilong mani long giamanim man” bai “karamapim tok bilong God.” (Mat. 13:18-22; Mak 4:19) Tru tumas, sapos yumi no was gut, ol wari bilong olgeta wan wan de inap pulim tingting bilong yumi na yumi no givim bel tumas long mekim wok lotu. Olsem na Jisas i tokim ol disaipel: “Was gut long yupela yet, nogut pasin bilong kaikai planti tumas na dring planti na ol wari bilong laip i daunim yupela.”—Luk 21:34.

4. Yumi ken givim wanem ol askim long yumi yet bilong skelim sapos yumi laikim tru Krais o nogat? (Lukim piksa long kirap bilong stadi.)

⁴ Pita i bihainim tok bilong Jisas. Yumi tu i soim olsem yumi laikim tru Krais taim yumi putim wok em i givim i stap namba 1 samting long laip. Olsem wanem yumi inap bihainim yet dispela pasin? Sampela taim yumi ken askim yumi yet: ‘Mi laikim tru wanem samting? Mi save kisim bikpela amamas moa long mekim ol nomol samting long olgeta de, o mi kisim bikpela amamas moa long wok lotu?’ Yumi ken skelim 3-pela samting we inap daunim pasin bilong yumi long laikim Krais na wok lotu sapos yumi no putim ol long ples stret bilong ol. Ol dispela samting em wok mani, pasin bilong kisim amamas, na mani kago.

5. Baibel i tok ol het bilong famili i gat wok long mekim wanem?

⁵ Pita i save amamas long painim pis, na dispela i olsem wok mani bilong em. Long nau, ol het bilong famili i luksave olsem ol i gat wok long lukautim famili long sait bilong klos na kaikai. (1 Tim. 5:8) Ol i mas wok hat long inapim dispela wok. Tasol long dispela haptaim bilong las de, wok mani i putim presa long ol man.

6. Wanem samting i putim presa long ol manmeri long ples wok?

⁶ Long nau i no gat planti wok mani, na ol man i resis long kisim wok, olsem na planti wokman i pilim olsem ol i mas wok ovataim inap planti aua, maski ol i kisim liklik pe tasol. Na tu, ol kampani i wokim planti samting moa na dispela i putim bikpela presa long ol wokman, na ol i tingting planti na bel hevi. Ol inap lusim wok bilong ol sapos ol i no laik lusim bikpela haptaim na strong long sapotim wok bilong kampani.

7, 8. (a) Yumi ol Kristen i mas stap gut long husat? (b) Wanpela brata long Tailan i luksave long wanem samting long sait bilong wok mani?

⁷ Yumi ol Kristen i mas i stap gut long God Jehova, na i no bosman long ples wok. (Luk 10:27) Wok mani i helpim yumi long kisim ol samting yumi nidim. Yumi kisim mani bilong lukautim yumi yet long ol bikpela samting, olsem haus, klos, na kaikai, na tu, em i helpim yumi long sait bilong wok autim tok. Sapos yumi no was gut, wok mani inap pasim yumi long mekim wok lotu. Wanpela brata long Tailan i tok: “Mi save amamas tru long stretim ol kompiuta, tasol mi mas wok inap planti aua. Olsem na mi no gat taim long mekim wok lotu. Bihain, mi luksave olsem mi mas senisim wok bambai mi inap putim wok bilong Kingdom i stap namba 1 samting long laip bilong mi.” Dispela brata i mekim wanem?

⁸ Em i tok: “Insait long 1-pela yia, mi mekim plen long ol samting mi bai mekim, na mi mekim disisen long salim aiskrim long strit. Taim mi kirap long mekim dispela wok, mi bungim hevi long sait bilong mani na dispela i mekim mi bel hevi. Ol wanwok i save  lap long mi na askim mi long wai na mi ting olsem wok bilong salim aiskrim em gutpela wok moa winim wok bilong stretim kompiuta na stap insait long ofis i gat eakon. Mi beten askim Jehova long helpim mi long karim dispela hevi na inapim mak mi putim long lusim bikpela haptaim moa long mekim wok lotu. I no longtaim, gutpela samting i kamap. Mi save gut long laik bilong ol kastama na save bilong mi long wokim aiskrim i kamap gutpela moa. Long olgeta de, ol man i save baim na pinisim olgeta aiskrim. Long nau, mi gat planti mani moa winim mani mi save kisim long wok bilong stretim ol kompiuta. Nau mi amamas moa bikos i no gat ol samting i putim presa long mi na mekim mi tingting planti olsem long bipo. Bikpela samting em olsem, mi inap pas gut moa wantaim Jehova.”—Ritim Matyu 5:3, 6.

9. Olsem wanem yumi inap holim stretpela tingting long wok mani?

⁹ Pasin bilong wok em gutpela, na gutpela samting i save kamap taim man i wok hat. (Snd. 12:14, NW) Olsem dispela brata long Tailan i mekim, yumi mas putim wok mani long ples stret bilong en. Jisas i tok: “Wok yet long painim Kingdom pastaim na stretpela pasin bilong God na em bai givim olgeta dispela samting [ol bikpela samting olsem haus, klos, na kaikai] long yupela.” (Mat. 6:33) Sapos yumi laik painimaut olsem yumi holim stretpela tingting long wok mani na wok lotu, orait yumi ken askim yumi yet: ‘Mi tingim wok mani olsem gutpela samting mi kisim amamas long en na mi tingim wok lotu olsem samting nating i no gat amamas long en?’ Taim yumi skelim tingting yumi holim long wok mani na wok lotu bilong yumi, dispela inap helpim yumi long luksave olsem yumi laikim tru wanem wok.

10. Olsem wanem Jisas i helpim yumi long luksave long wanem samting i mas i stap namba 1 samting?

¹⁰ Jisas i helpim yumi long luksave olsem yumi no ken larim ol narapela samting i pasim yumi long tingim ol samting bilong lotu. Wanpela taim Jisas i go long haus bilong Maria na susa bilong em Marta. Marta i hariap long redim kaikai, tasol Maria i sindaun klostu long Jisas na putim yau long ol tok bilong em. Taim Marta i komplein long Maria i no helpim em, Jisas i tokim Marta: “Maria i bin makim gutpela samting long mekim, na dispela samting i no inap tekewe long em.” (Luk 10:38-42) Jisas i givim gutpela skultok long Marta. Sapos yumi laik soim klia olsem yumi laikim tru Krais na yumi no laik bai ol narapela samting i pulim tingting bilong yumi, orait yumi mas wok yet long makim “gutpela samting,” olsem yumi mas putim wok lotu i stap namba 1 samting.

11. Baibel i tok wanem long pasin bilong malolo na kisim amamas?

¹¹ Yumi save bisi long mekim ol wok, olsem na yumi mas lusim sampela haptaim long malolo na kisim amamas. Baibel i tok: “Yumi save kaikai na dring, na amamas long wok bilong yumi.” (Sav. 2:24) Jisas i luksave olsem sampela taim yumi mas malolo. Wanpela taim ol disaipel i mekim bikpela wok tru long autim tok, olsem na Jisas i tokim ol: “Yupela tasol kam wantaim mi long wanpela hap i no gat man na malolo liklik.”—Mak 6:31, 32.

12. Taim yumi mekim ol samting bilong kisim amamas, wanem samting inap kamap sapos yumi no was gut? Stori long wanpela ekspiriens.

¹² Em tru olsem i no gat rong long yumi mekim ol samting bilong kisim amamas. Tasol sapos yumi no was gut, pasin bilong kisim amamas inap i stap namba 1 samting long laip bilong yumi. Long taim bilong ol aposel, planti i gat dispela tingting olsem, “Yumi kaikai na dring, long wanem, tumora bai yumi dai.” (1 Kor. 15:32) Planti manmeri long olgeta hap bilong graun i gat wankain  tingting. Inap planti yia i go pinis, wanpela yangpela man long hap wes bilong Yurop i kirap long i go long ol miting. Tasol em i gat strongpela laik long mekim ol samting bilong kisim amamas, olsem na em i stop long bung wantaim lain bilong Jehova. Bihain, em i luksave olsem ol samting em i mekim bilong kisim amamas i kamapim planti hevi, na em i no amamas long laip bilong em. Olsem na em i kirap gen long stadi long Baibel na em i winim mak long kamap pablisa. Bihain long em i kisim baptais, em i tok: “Mi rigret olsem mi lusim bikpela haptaim long painim amamas bilong dispela graun, na mi no bin luksave olsem man i save kisim bikpela amamas moa taim em i mekim wok bilong Jehova.”

13. (a) Wanem tok piksa i stret long ol hevi inap kamap long pasin bilong kisim amamas? (b) Wanem samting inap helpim yumi long holim stretpela tingting long pasin bilong kisim amamas?

¹³ Taim yumi mekim ol samting bilong kisim amamas, dispela i givim nupela strong long yumi. Yumi mas lusim hamas taim long kisim amamas? Tingim dispela tok piksa: Planti bilong yumi i save amamas long kaikai ol kain samting olsem keik na aiskrim long wan wan taim, na yumi luksave olsem sapos yumi kaikai ol dispela samting long olgeta taim, dispela bai bagarapim helt bilong yumi. Olsem na yumi save kisim ol kaikai we inap strongim bodi bilong yumi. Olsem tasol, sapos oltaim yumi mekim ol samting bilong kisim amamas, dispela bai nogutim yumi long sait bilong bilip. Sapos yumi laik i stap strong yet long sait bilong bilip, orait oltaim yumi mas mekim ol wok bilong Kingdom. Olsem wanem yumi inap luksave sapos yumi holim stretpela tingting long pasin bilong kisim amamas? Insait long wanpela wik, yumi ken raitim namba bilong hamas aua yumi lusim long mekim wok lotu, olsem go long ol miting, autim tok, na mekim pesenel stadi na famili stadi. Yumi ken skelim ol dispela aua wantaim aua yumi lusim long wankain wik bilong kisim amamas, olsem insait long ol spot, mekim ol samting yumi yet i laikim, lukim televisen, na pilaim ol vidio gem. Ating yumi bai luksave olsem yumi mas lusim sampela samting yumi save mekim bilong kisim amamas.—Ritim Efesus 5:15, 16.

14. Wanem samting i mas stiaim yumi taim yumi laik mekim ol samting bilong kisim amamas?

¹⁴ Het bilong famili na olgeta insait long famili i ken makim samting ol i laik mekim bilong kisim amamas, tasol ol dispela samting i mas stret wantaim ol stiatok bilong Jehova long Baibel. * Ol gutpela amamas “i olsem presen God i givim yumi.” (Sav. 3:12, 13) Ol samting yumi laik mekim bilong kisim amamas bai i no wankain long laik bilong ol narapela. (Gal. 6:4, 5) Tasol yumi no ken larim dispela i stap namba 1 samting long laip bilong yumi. Jisas i tok: “Long ples we ol gutpela gutpela samting bilong yu i stap long en, long dispela ples laik bilong bel bilong yu tu bai stap.” (Mat. 6:21) Olsem na sapos yumi laikim tru Jisas, dispela bai stiaim tingting, toktok, na pasin bilong yumi na yumi bai lusim bikpela haptaim long wok bilong Kingdom, na olgeta narapela samting bai stap namba 2.—Fili. 1:9, 10.

15, 16. (a) Olsem wanem pasin bilong laikim tumas mani kago inap putim hevi long ol Kristen? (b) Jisas i givim wanem tok kaunsel long sait bilong mani kago?

¹⁵ Long nau, planti manmeri i tingting tasol long kisim ol samting i gat nupela stail, olsem ol klos, fon, o kompiuta. Olsem na oltaim olgeta wan wan Kristen i mas skelim ol samting em i laikim na askim em yet: ‘Mi save tingim mani kago olsem bikpela samting na mi lusim bikpela haptaim moa long mekim wok painimaut na tingting long nupela kar na  stail bilong bilas na mi no lusim bikpela haptaim long redim ol miting? Mi save tingting tasol long ol nomol wok bilong wan wan de na mi no lusim bikpela haptaim long beten na ritim Baibel?’ Sapos yumi luksave olsem yumi laikim tumas mani kago na dispela i daunim pasin bilong yumi long laikim Krais, orait yumi mas tingim tok bilong Jisas. Em i tok: “Yupela i mas sakim olgeta kain pasin mangal.” (Luk 12:15) Bilong wanem Jisas i mekim dispela strongpela tok lukaut?

¹⁶ Jisas i tok “i no gat wanpela man inap stap wokboi bilong tupela bosman.” Em i tok moa: “Yupela i no inap stap wokboi bilong God na mani wantaim.” Long wanem, man i no inap givim hap bel tasol long wanpela bosman, nogat, em i mas givim bel olgeta. Jisas i tok, yumi “bai laikim wanpela na i no laikim narapela, o [yumi] bai pas long wanpela na les long narapela.” (Mat. 6:24) Yumi olgeta i gat sin, olsem na yumi mas wok strong long sakim “ol laik nogut bilong bodi,” dispela i makim tu pasin bilong laikim mani kago.—Efe. 2:3.

17. (a) Bilong wanem ol manmeri husat i tingting tasol long inapim laik bilong bodi i hatwok long holim stretpela tingting long mani kago? (b) Wanem samting inap helpim yumi long daunim laik bilong bungim planti mani kago?

¹⁷ Ol manmeri husat i tingting tasol long inapim laik bilong bodi, ol i hatwok long holim stretpela tingting long mani kago bikos ol i no tingting long ol samting bilong lotu. (Ritim 1 Korin 2:14.) Taim tingting bilong ol i pulap long kain kain samting, ol bai hatwok long kliagut long wanem samting i stret na wanem samting i no stret. (Hib. 5:11-14) Olsem na sampela bilong ol i kisim laik bilong bungim planti mani kago, na ol i pilim olsem ol i sot yet long mani kago. (Sav. 5:10) Tasol man inap daunim dispela hevi sapos oltaim em i kisim save long Tok Bilong God long Baibel. (1 Pita 2:2) Jisas i bin tingim tingim tok bilong God, na dispela i strongim em long sakim ol traim. Olsem tasol, sapos yumi bihainim ol stiatok bilong Baibel, dispela bai helpim yumi long daunim laik bilong mani kago. (Mat. 4:8-10) Taim yumi mekim olsem, yumi soim Jisas olsem yumi laikim em moa winim mani kago.

18. Yu tingting strong long mekim wanem?

¹⁸ Jisas i askim Pita olsem: “Yu laikim mi moa winim ol dispela samting”? Em i kirapim Pita long tingim gen olsem em i mas putim wok bilong God i stap namba 1 samting long laip bilong em. Mining bilong nem Pita em “Wanpela Hap Ston,” na Pita i truim mining i stap long nem bilong em bikos em i stap strong olsem ston na em i no surik long bihainim stretpela pasin. (Apo. 4:5-20) Long nau, yumi tu i tingting strong long putim wok mani, pasin bilong kisim amamas, na mani kago i stap namba 2 samting long laip bilong yumi, na yumi no larim ol dispela samting i daunim pasin bilong yumi long laikim Krais. Ol disisen bilong yumi i mas soim olsem yumi holim wankain tingting olsem Pita. Em i tokim Jisas: “Bikpela, yu save mi laikim yu tumas.”