1, 2. მუ დიგურუ პეტრექ, მთელ სერ ჩხომიშ ჭოფუას ქიმკათანუნ თიშ უკულ?

იესოშ მოწაფეეფშე შკვითიქ მთელ სერ ქიმკათანუ ჩხომიშ ჭოფუას გალილეაშ ზღვას, მარა მუთუნქ ვაჭოფეს. იესო ზღვაპიჯშე ოკვირუდ თინეფს დო უწუ: „ქენაჸათით ბადე ნავიშ მარძგვან მხარეს დო ქოძირუნთ. თინეფქ ქენაჸათეს, მარა ვექშაღინეს, მუშენდა ბადექ ჩხომით გეიფშუ“ (იოან. 21:1—6).

² ოჭმარეს იესოქ მოწაფეეფს ოჭკომალ გემკუღ, უკულ სიმონ პეტრეს გემკართ დო უწუ: „სიმონ იოანეშ სქუა, თენეფშე უმოსის გიჸორქო?“. მუშენ კითხ იესოქ თენა? იესოს უჩქუდ, ნამდა პეტრეს უჸორდ ჩხომიშ ჭოფუა. ათეშგურშენ თის ოინტერესუდ, მუ რდუ პეტრეშო უმოს მნიშვნელოვან — ჩხომიშ ჭოფუა დო ვარ, იესო დო თიშ გურაფეფი. პეტრექ უპასუხ: „ქო, უფალი, სი გიჩქუ, ნამდა მიჸორქინ“ (იოან. 21:15). პეტრექ მუშ ცხოვრებათ დამტკიც, ნამდა თენა თაშ რდუნ. თიმ დღარშე მოჸუნაფილ თინა იესოშ ჸოროფას ოძირანდ თით, ნამდა მთელ მუშ დროს მოწაფეეფიშ მომზადებაშ საქმეშო ახარჯენდ დო პირველ საუკუნეშ კრებაშ აქტიურ წევრი რდუ.

3. მუშენ ოკო რდან ქრისტიანეფ ფრთხილას?

 ³ მუს ბგურაფლენთ იესოშ სიტყვეფშე, ნამუთ პეტრეს უწუ? ფრთხილას ოკო ვორდათ, ნამდა ვედმესუსტან იესოშ ჸოროფაქ დო სამეფოშ საქმეეფშე ყურადღება შხვა მუთუნშა ვეგნიბღათ. იესოს ჯგირო უჩქუდ, ნამდა თე ქიანას ბრელ ოწუხებელ დო პრობლემა მაღვენუდეს, ნამუთ ადვილ გინაღალარ ვამაიდეს. მათასალიშ გურშენ მუშ იგავს იესოქ თქუ, ნამდა ნამთინე მიღენდ „სიტყვას სამეფოშ გურშენ“ დო წიმი მიდეშ, მარა „თე ქიანას ოზრუნებელ დო ქონებაშ მიმაჩილითაფარ ძალა . . . მოსპუნდ სიტყვას“ (მათ. 13:19—22; მარ. 4:19). ფრთხილას ვეპჸით-და, ირდღაშიან ოწუხებელ სულიერო დუმასუსტენა დო მეცილებნა მსახურებას. ათეშგურშენ იესოქ მუშ მოწაფეეფ გაფრთხილ: „ქიდეკვირით თქვან დუც, ნამდა გურქ ვედგემონკან ნაბეტან ჭკომუა-შუმათ დო ცხოვრებაშ ოზრუნებელით“ (ლუკ. 21:34).

4. მუ მიმეხვარებნა, ქიგებგათ ქომიჸორა დო ვარ იესო? (ქოძირით სურათ 22-ა გვერდის)

⁴ პეტრეცალო ჩქი ხოლო შემლებნა დუვამტკიცათ იესოშ ჸოროფა თით, ნამდა პირველ ადგილს გივორინუათ თი საქმე, ნამუთ იესოქ დუმავალეს. მუჭო დებრწმუნათ, თაშ იფქციებუთინ? მინშა ჩქინ დუც ოკო ქოპკითხათ: მუ რე არძაშ უმოს მნიშვნელოვან ჩქიმ ცხოვრებას? მუს მოუღ ჩქიმო ხიოლ, სულიერ საქმეეფს დო ვარ შხვა მუთუნს? მორთ, გუვარჩუათ სუმ მხარე, ნამუსით მუშ ადგილ ვემურჩქინით-და, შილებე შეასუსტას ჩქინ ჸოროფა იესო ქრისტეშა დო სულიერ საქმეეფშა. თე მხარეეფ რე — სამუშა, გართობა-მოსვანჯა დო მატერიალურ ნივთეფი.

5. მუს ითხინს ბიბლია ოჯახიშ დუდეფშე?

⁵ პეტრეშო ჩხომიშ ჭოფუა სასიამოვნო საქმეშე მეტ რდუ. თინა თე საქმეთ დუც ეიჯუმუანდ. ოჯახიშ დუდეფს არჩქილენა, ნამდა ბიბლია ითხინს თინეფშე, იზრუნან ოჯახიშ მატერიალურ საჭიროებეფშენ (1 ტიმ. 5:8). თინეფქ დუდ ოკო ვაზოგან, ნამდა შეასრულან თე მოვალეობა. მარა, თე ბოლო დღალეფს, ქვეყნიურ სამუშა ოწუხებელს მირჩქინანა.

6. მუნერ პრობლემეფი არსებენს ამდღა ქვეყნიურ სამუშას?

⁶ ამდღა სამუშა ადგილეფიშ ნარკულობაშ გურშენ დიდ კონკურენცია რე. ათეშგურშენ ბრელ თანამშრომელს უმოს მეტ აფუ ომუშებელ დო მინშა ნაკლებ ხელფასშა ხოლო. დამსაქმებელეფი ნაკლებ ხალხიშ ხარჯშა ბრელ სამუშას ორთუნა, ათეშგურშენ ხალხი ფიზიკურო, გონებრივო დო ემოციურო გინოშურდუ. თინეფქ, მიდგას ვეშიალებე თეცალ პირობეფს მუშობან, შილებე მიოდინუან სამუშა.

7, 8. ა) მიშ ართგურეფ ოკო ვორდათ? ბ) მუ დიგურუ ტაილანდელ ჯიმაქ მუშ სამუშაშე?

⁷ ჩქი ქრისტიანეფ ვალდებულ ვორეთ იეჰოვა ღორონთიშ ართგურეფ ვორდათ დო ვართ ხოლო ჩქინ დამსაქმებელიშ (ლუკ. 10:27). სამუშა ჩქინო უბრალოთ თიშ საშვალება რე, ქიბზრუნათ აუცილებელშენ დო ხექ ქეშმენწყუან მსახურებას. ფრთხილას ვეპჸით-და, ქვეყნიურ სამუშაქ შილებე ქიმეცილან მსახურებას. მაგალთო, ართ ტაილანდელ ჯიმა იჩიებ: „მა კომპიუტერეფიშ ემანწყუალო მუფშენდ. ჩქიმ საქმე მანგარო მობწონდ, მარა თინა ბრელ დროს ითხინდ დო სულიერ საქმეეფშო დრო საერთოთ ვამოსკიდუდ. ბოლოს ქიმეფხვად, ნამდა სამეფოშ საქმე პირველ ადგილშა ქიგემრინუაფუდკონ თიშენ, მუდგაინ ოკო დოფთირეკო“. მუ აკეთ თე ჯიმაქ?

⁸ „ართ წანაშ დინახალე გეგმას ვონწყუნდ დო უკულ გეგნოპჭყვიდ, ნაყინიშ გუმოჩამა ქიდომჭყაფუდკო. დუდშე ქენვანთხი  დო გურ მაფუდ გოტახილ. თეს გეძინელ, მუჟამსით ჩქიმ ჯვეშ თანამშრომელეფს შეფხვადუდინ, გუმაძიცანდეს დო მოკითხუდეს, მუშენ მივოტე კონდინციონერამ ოთახის კომპიუტერწკუმა მუშობა დო მუშენ გინობჭყვიდ ქუჩას ნაყინიშ გიმოჩამა. ბლოცულენდ დო იეჰოვას ფთხინდ, ქიმმეხვარკო, ქიმვოჭირნეკო ჩქიმ მიზანს, ნამდა უმოს დრო მიღუდკო სულიერ საქმეეფშო. დრო ხანიშ უკულ ჩქიმ საქმექ უჯგუშო მიდართ. ჩქიმ კლიენტეფიშ გემოვნება უჯგუშო ქიდიბგურე დო თინეფს მოწონდესინ ფერ ნაყინიშ კეთება ქიდიბჭყი. ჭიჭე ხანშა, ირ დღას არძა ნაყინს გიმოფჩანდ. ასე მეტ ფარა მიშმალე, ვინემ კომპიუტერეფწკუმა მუფშენდინ თი დროს. ამდღა ბედნერ ვორექ, მუშენდა ნაკლებ ონერვიანებელ მიღუ, ვინემ ჯვეშ სამუშას მიღუდ. მუთ არძაშე მნიშვნელოვან რე, უმოს ხოლოს ვორექ იეჰოვაწკუმა“, — იჩიებ თინა (წეკითხით მათე 5:3, 6).

9. მუჭო შემლებნა მიღუდან გაწონასწორებულ თოლწონუა სამუშაშენ?

⁹ ღორონთი აფასენს მოხანდე კოჩის. შრომას ბრელ ჯგირობუა მოუღ (იგავ. 12:14). მარა, მუჭოთ ჟიშე მოშინაფილ ჯიმაშ მაგალითშე ბძირითინ, სამუშას მუშ ადგილ ოკო მეურჩქინათ. იესოქ თქუ: „ათეშგურშენ პირველ რიგის გორით სამეფო დო მუმაშ სიმართლე დო შხვა ირფელს [აუცილებერ საჭიროებეფს] მიღენთ“ (მათ. 6:33). თიშ გაგებელო, ქომღუნან დო ვარ გაწონასწორებულ თოლწონუა სუმუშაშე დო სულიერ საქმეეფშე, ჩქინ დუც ოკო ქოპკითხათ: სამუშა ჩქიმო უმოს საინტერესო ხომ ვარე დო სულიერ საქმეეფი ჩვეულებრივ დო მოსაწყენ? თე კითხვაშე დაფიქრება მიმეხვარებნა, ქიგებგათ სინამდვილეს, მუ რე ჩქინო მნიშვნელოვან.

10. მუ გაკვეთილ დომტუეს იესოქ გაწონასწორებულ თოლწონუაშ გურშენ?

¹⁰ იესოქ დომტუეს პრინციპი, ნამუთ მიმეხვარებნა სწორ თოლწონუა მიღდან სამუშა დო სულიერ საქმეეფწკუმა. არჩა იესოქ სტუმარო მერთუ მარიამ დო თიშ დაშ მართაშ ჸუდეშა. მუჟამსით მართა ოჭკომალს ორთუდუნ, მარიამ იესოშ ხოლოს ხედ დო ურჩქილედ. მართაქ იესოწკუმა ქიჩიულ, ნამდა მარიამ ვახვარუდ, მარა იესოქ თის უწუ: „მარიამქ უჯგუშ გიშეგორ დო ვემდაღალუ თის“ (ლუკ. 10:38—42). მართაქ თავრეშე ჯგირ გაკვეთილ დიგურუ. ქვეყნიურ საქმეეფქ ბრელ დრო ვამდომღან დო იესოშ ჸოროფა დუვამტკიცათ თიშენ, ოკო გავაგრძელათ „უჯგუშიშ გიშაგორუა“ დო სულიერ საქმეეფი პირველ ადგილს ქიგვორინუათ.

11. მუს მოგურუანა ბიბლია მოსვანჯაშენ?

¹¹ არძას მოსაჭირნა მოსვანჯა, ნამდა ბრელ მუშობაშ დო გადატვირთულ გრაფიკიშ უკულ ძალეფ დიფრთინუათ. ღორონთიშ სიტყვას ჭარ: „მუთუნ ვა რე კოჩშო თიშე უჯგუშ, ნამდა ჭკომას, შვას დო ისიამოვნას მუშ ხანდათ“ (ეკლ. 2:24). იესოს არჩქილედ, ნამდა მოსვანჯა აუცილებერ რდუ. არჩა დიდ ხანიშ ქადაქებაშ უკულ, იესოქ მუშ მოწაფეეფს უწუ: „მორთ, სოდგაინ მიდაფრთათ, მითინ ვარენ ფერ ადგილშა დო ჭიჭე მიფსვანჯათ“ (მარ. 6:31, 32).

12. მუ საშიშროება არსებენს გართობა დო მოსვანჯაშ დროს? ქიმიჸონით მაგალით.

¹² გართობა დო მოსვანჯა აუცილებერ რე, ნამდა დიფრთინუათ ძალეფი. მარა თე დროს ოშკურანჯ რე, ნამდა თექ ჩქინ ცხოვრებას მთავარ ადგილ ვედეკინას. პირველ საუკუნეს ბრელ თაშ ფიქრენდ: „პჭკომათ დო ფშვათ, მუშენდა ჭუმან იშენ გობჭყორდუთ“ (1 კორ. 15:32). ამდღა  ხოლო ბრელ ფიქრენს თაშ. მაგალთო, ართ ახალგაზრდა კოჩიქ დასავლეთ ევროპას კრებაშ შეხვალამეფშა ქიდიჭყ გილულა. მარა თის გართობა თიშმანწარათ უჸორდ, მიოტუ იეჰოვაშ ხალხწკუმა ურთიერთობა. დრო ხანიშ უკულ თიქ ქიმეხვად, ნამდა გინოჸუნელ გართობას პრობლემეფი დო გურიშგოტახუა მოუღუდ. თეშ უკულ თიქ კინ ქიდიჭყ ბიბლიაშ გურაფა დო მაუწყებელო გინირთ. ნათუაშ უკულ თქუ: „ხვალე ართის ბნარღენქ, მუშენ ვოდინე თესხი დრო, ქიმეფხვალამედკო თის, ნამდა იეჰოვაშ მსახურებას მოუღ უმოს ბედნერობა ვინემ გართობას, ნამუთ თე ქვეყნიერებას რე“.

13. ა) მუ საფრთხეეფი მოჸუნს გართობა დო მოსვანჯას? ბ) მუ მიმეხვარებნა სწორ თოლწონუა მიღუდან გართობა და მოსვანჯაშენ?

¹³ მუჭოთ უკვე მიფშინეთინ, გართობაშ მიზანი თინა ოკო რდას, ნამდა მიფსვანჯათ დო დიფრთინუათ ძალეფ. მუსხი დრო ოკო დუთმათ თის? მაგალთო, დეფიფქრათ: ბრელს მიჸორა ნამცხვარიშ ჭკომუა, მარა ხვალე ნამცხვარ დო გემუანეფ ოპჭკომით-და, თენა ჩქინ ჯამრთელობას ქეცილებ. ათეშგურშენ ძირითადო ნოყიერ ოჭკომალ ოკო მიბღათ, ნამუთ ორგუ ჩქინ ორგანიზმის. თეგვარო ირიათო გართობა დო მოსვანჯა შეასუსტენს ჩქინ სულიერ ჯამრთელობას. ათეშგურშენ ძირითადო სულიერ საქმეეფს ოკო ვორთუდათ. მუჭო გებგათ, ქომღუნა დო ვარ სწორ თოლწონუა გართობაშენ? ქიდვეკვირათ მარაშ დინახალე მუსხი საათის გიმურთუნთ სულიერ საქმეეფს, მაგალთო, კრებაშა გილულას, ქადაქებას, ბიბლიაშ პირად გურაფას დო ოჯახურ თაყვანიშცემას. თეშ უკულ შევადარათ თენა თი დროს, ნამუსით გიმურთუნთ გართობას, მაგალთო, სპორტის, მობწონანფერ საქმეშ კეთებას, ტელევიზორიშ ჯინას ვარდა ვიდეოლაჸაფეფს. მუს მოძირანა თე შედარება? ხომ ვამაფნა ოთირალ მუთუნ? (წეკითხით ეფესოელები 5:15, 16).

14. მუთ იფხემძღვანელათ გართობა დო მოსვანჯაშ გიშაგორუაშ დროს?

¹⁴ არძაშ პირად გინაჭყვიდირალ რე, მუნერ გართობას გიშეგორუნს; ოჯახიშ დუდეფს ხოლო შეულებნა გინოჭყვიდან, მუნერ გართობა დო მოსვანჯა გიშაგორან მუნეფიშ ოჯახიშ წევრეფშო. მარა თენა ოკო ოთანხმუდას იეჰოვაშ ხემძვანელობას, ნამუთ ბიბლიურ პრინციპეფშე იძირე. * ჯგირ დასვენება „ღორონთიშ ძღვინ რე“ (ეკლ. 3:12, 13). მუშო ოკო, რაგად ჩქი მესმებნა, ნამდა ართნერ გემოვნება ვამღუნა, ათეშგურშენ არძა შხვადოშხვანერ გართობას გიშებგორუნთ (გალ. 6:4, 5). მუდგანერ გართობა ვეგშიბგორათინ, თის მუშ ადგილ ოკო მეურჩქინათ. იესოქ თქუ: „სოდეთ სქან განძი რენ, თექ იჸი სქან გურ ხოლო“ (მათ. 6:21). თაშ ნამდა, ჩქინ მეფეშ, იესოშ მთელ გურით ჸოროფა, მიმეხვარებნა ჩქინ ფიქრეფით, რაგადით დო მოქმედებეფით სამეფოშ საქმე გემირდან პირველ ადგილს დო ვართ ხოლო ირდღაშიან საქმეეფი (ფილ. 1:9, 10).

15, 16. ა) მუჭო შილებე მატერიალზმიქ ქრისტიანშო მახექ იჸუას? ბ) მუ გონივრულ რჩევა მუჩეს იესოქ, ნამუთ მატერიალიზმის ოხუ?

¹⁵ ამდღა ბრელ ხვალე თიშე ფიქრენს, ნამდა ახალ მუკაქუნალ, ელექტრონულ მოწყობილობეფი დო შხვა მუთუნ ქიჸიდას. ათეშგურშენ, თითოულ ქრისტიანქ ხშირაშო ოკო დეფიქრას მუშ კორნებეფშენ დო ქოკითხას მუშ დუც: თიცალ მნიშვნელოვან ხომ ვა რე ჩქიმო მატერიალურ ნივთეფი, ნამდა კრებაშო მომზადებაშ უმოს დროს ვუთმენქ ახალ მანქანეფიშ დო მუკაქუნალიშ გოჯინას დო თინეფშე ფიქრის? თეშ ხომ ვეგნვაჸუნ ირდღაშიან  საქმეეფს, ნამდა ჭიჭე დრო მოსკიდუ ლოცვაშო დო ბიბლიაშ კითხირშენ? მატერიალურ ნივთეფიშ ჸოროფაქ დოთირუ ქრისტეშა ჩქინ ჸოროფა-და, დეფიფქრათ ოკო თიშ სიტყვეფშე: „დუდ დეცვით ირნერ ჰარამობაშე“ (ლუკ. 12:15). მუშენ მუჩეს იესოქ თეცალ გაფრთხილება?

¹⁶ იესოქ თქუ, ნამდა „მითინს ვეშიალებე რდას ჟირ ბატონიშ მონა“. უკულ გეუძინ: „ვეშქალებენა ღორონთიშ მონათ რდათ დო ქონებაშ ხოლო“, მუშენდა ჟირხოლო „ბატონ“ ითხინს განსაკუთრებულ ართგურობას. იესოქ თქუ, ნამდა კოჩი „ვარდა ართის გიჯოგუანს დო მაჟიას ქიჸოროფუანს, ვარდა ართის გეგნაჸუნუ დო მაჟიას მუთუნო ვემირჩქინანს“ (მათ. 6:24). ჩქი არასრულყოფილეფ ვორეთ, ათეშგურშენ ირიათო ოკო ვებრძოლათ „ხორციშ კორნებეფს“, ნამდგაშა მატერიალიზმი ხოლო მიშურს (ეფეს. 2:3).

17. ა) მუშენ უჭირს ხორციელ აზროვნება უღუნ ფერ კათას, სწორ თოლწონუა უღდას მატერიალურ ნივთეფშენ? ბ) მუ მიმეხვარებნა, ვებრძოლათ მატერიალურ კორნებეფს?

¹⁷ ხორციელ აზროვნება უღუნ ფერ კათას, უჭირს სწორ თოლწონუა უღუდას მატერიალურ ნივთეფშენ, მუშენდა სულიერო ვა ფიქრენა (წეკითხით 1 კორინთელები 2:14). თინეფს ვა უღუნა საღ აზროვნება დო უჭირა, გარჩუან ჯგირ დო ფურ ართმაჟიაშე (ებრ. 5:11—14). ათეშგურშენ, ნამთინეს ვაკონტროლებე მატერიალურ ნივთეფიშ შეძენაშ კორნება, ნამუთ ბოლოშა დღას ვედიკმაყოფილებე (ეკლ. 5:10). მარა საბედნეროთ ჩქი შემლებნა ვებრძოლათ ხორციელ აზროვნებას ღორონთიშ სიტყვაშ ბიბლიაშ რეგულარულ კითხირით (1 პეტ. 2:2). იესოს ბიბლიურ ჭეშმარიტებაშენ ფიქრიქ მეხვარ ვაჩირთუკო; ჩქი ხოლო ბიბლიურ პრინციპეფიშ გიმორნაფა მიმეხვარებნა ვებრძოლათ მატერიალურ კორნებეფს (მათ. 4:8—10). თეცალ მოქცევათ, ვოძირანთ, ნამდა იესო უმოსო მიჸორა, ვინემ მატერიალურ ნივთეფი.

18. მუ გაფნა გინოჭყიდილ?

¹⁸ მუჟამსით იესოქ პეტრეს კითხ: „თენეფშე უმოსის გიჸორქო?“, თეთ ქიგაშინ, ნამდა აუცილებერ რდუ სულიერ საქმეეფი პირველ ადგილშა ქიგურინუაფუდკო. პეტრე, ნამუშ სახელ ნიშნენს „კირდეშ მიკნატახას“, ცხოვრენდ მუშ სახელს ოსადაგუდუნ თეშ, მუშენდა თინა გიმირჩქინანდ კირდეცალ მტკიცე თვისებეფს (საქ. 4:5—20). ჩქი ხოლო ამდღა გინოჭყვიდილ მაფნა, ვა ვოდინუათ იესოშ ჸოროფა დო თენა ვოძირათ თით, ნამდა მუშ ადგილ ქიმურჩქინათ სამუშას, მოსვანჯას დო მიღუდან სწორ თოლწონუა მატერიალურ ნივთეფშენ. მორთ ჩქინ არჩევანით ვოძირათ, ნამდა იფთვალისწინენთ პეტრეშ სიტყვეფს, ნამუთ იესოს უწუ: „უფალი, სი გიჩქუ, ნამდა მიჸორქინ“.