GAYO kɛ e nyɛmimɛ Kristofohi nɛ a hi si ngɛ kaseli ɔmɛ a be ɔ mi ɔ kɛ nyagbahi kpe. Ni kakaaka komɛ nɛ a ngɛ lakpa tsɔɔmi tsɔɔe ɔ bɔ mɔde kaa a ma ha nɛ asafo ɔmɛ nɛ gbɔjɔ, konɛ mi gbami nɛ ba a kpɛti. (1 Yoh. 2:18, 19; 2 Yoh. 7) Nyumu ko nɛ a tsɛɛ lɛ ke Diotrefe ɔ ngɛ bɔfo Yohane kɛ nyɛmimɛ kpahi a he guɛ gbee, nɛ e sume nɛ ‘e he Kristofohi nɛ a ji nibwɔhi ɔ atuu,’ nɛ e ngɛ mɔde bɔe kaa e maa gbe nyɛmimɛ kpahi a yi mi konɛ a kase lɛ. (3 Yoh. 9, 10) Benɛ Yohane ngɛ womi nɛ ɔ ngmae kɛ ya ha Gayo ɔ, jã ji bɔ nɛ si fɔfɔɛ ɔ ngɛ. Sɛ womi nɛ ɔ nɛ bɔfo ɔ ngma maa pee jeha 98 ɔ mi ɔ piɛɛ Kristofohi A Hela Ngmami ɔ he, nɛ lɔ ɔ ji “Yohane Womi Etɛne” ɔ nɛ.

Ngɛ haomihi nɛ Gayo kɛ kpe ɔ tsuo se ɔ, e ya nɔ nɛ e ye Yehowa anɔkuale. Mɛni tsɔɔ kaa e ye anɔkuale? Mɛni he je nɛ e sa kaa wa kase Gayo nɔ hyɛmi nɔ́ ɔ mwɔnɛ ɔ? Mɛni blɔ nɔ nɛ Yohane sɛ womi ɔ ma nyɛ maa ye bua wɔ konɛ waa pee jã ngɛ?

Nɔ nɛ ngma Yohane womi etɛne ɔ tsɛ e he ke “nɔkɔtɔma.” Lɔ ɔ kɛkɛ po ha nɛ Gayo nɛ ji e bi ngɛ Mawu jami mi nɛ e suɔ lɛ saminya a na kaa bɔfo Yohane lɛ ngma sɛ womi ɔ nɛ. Yohane je suɔmi mi nɛ e de Gayo ke, “i suɔ mo saminya kɛ ye tsui tsuo.” Lɔ ɔ se ɔ, Yohane tsɔɔ kaa e sɔlemi ji kaa Gayo nɛ ná nɔmlɔ tso mi he wami kaa bɔ nɛ e he wa ngɛ Mawu jami mi ɔ. Hyɛ bɔ nɛ Yohane je suɔmi mi kɛ je Gayo yi ha!—3 Yoh. 1, 2, 4.

Eko ɔ, jamɛ a be ɔ, Gayo ngɛ sɔmɔe kaa asafo mi nɔkɔtɔma, se sɛ womi ɔ tsɔɔ we. Yohane je Gayo yi kaa e he nyɛmimɛ ɔmɛ atuu, e ngɛ mi kaa a ji nibwɔhi mohu lɛɛ. Yohane na enɛ ɔ kaa e ji odase nɛ tsɔɔ kaa Gayo yeɔ anɔkuale, ejakaa nibwɔ peemi ji su ko nɛ a kɛ leɔ Mawu sɔmɔli anɔkualetsɛmɛ.— 1 Mose 18:1-8; 1 Tim. 3:2; 3 Yoh. 5.

Yohane munyu nɛ e tu kɛ tsɔɔ kaa e bua jɔ Gayo nibwɔ peemi he ɔ tsɔɔ kaa Kristofohi nɛ a ngɛ he nɛ bɔfo Yohane ngɛ ɔ kɛ nihi nɛ a ngɛ asafo ɔmɛ a mi ɔ pɔɔ a sibi slaami, nɛ blɔ hiali nɛ ɔmɛ deɔ Yohane níhi nɛ a yɔse ɔ. Eko ɔ, kɛ gu blɔ nɛ ɔ nɔ nɛ Yohane nine suɔ amaniɛ bɔmihi nɛ kɔɔ asafo ɔmɛ a he ɔ nɔ.

Ngɛ anɔkuale mi ɔ, ke Kristofo no ko hia blɔ ɔ, e maa suɔ nɛ e ya to e nyɛmi Kristofo no ngɔ. Nibwɔhi a to hehi nɛ ngɛ jamɛ a be ɔ mi ɔ be biɛ kpakpa, a hyɛ we nihi a nɔ saminya, nɛ a woɔ je mi bami yaya mi he wami. Enɛ ɔ he ɔ, ke e maa hi ɔ, blɔ hiali nɛ a hɛ ka si ɔ ya toɔ a huɛmɛ a ngɔ, nɛ Kristofohi hu ya toɔ a nyɛmimɛ Kristofohi a ngɔ.

Bɔfo Yohane wo Gayo he wami ekohu kaa e je nibwɔ peemi su kpo, ejakaa e de Gayo ke e “wo [blɔ hiali ɔmɛ] blɔ saminya, bɔ nɛ maa sa Mawu hɛ mi nɛ a kɛ tsa a blɔ hiami ɔ nɔ.” Enɛ ɔ tsɔɔ kaa e sa nɛ e ngɔ níhi nɛ maa su mɛ kɛ ha a blɔ hiami ɔ nɔ tsami ɔ kɛ wo mɛ blɔ, nɛ e ha mɛ nɔ́ tsuaa nɔ́ nɛ a maa hia kɛ ya si be nɛ a maa su he nɛ a yaa a. E ngɛ heii kaa Gayo pee enɛ ɔ ha nibwɔ komɛ nɛ a ba to e ngɔ ɔ hyɛ, ejakaa a ya bɔ Yohane níhi nɛ Gayo pee kɛ tsɔɔ kaa e ngɛ suɔmi kɛ hemi kɛ yemi ɔ.—3 Yoh. 3, 6.

Eko ɔ, nibwɔ nɛ ɔmɛ ji ma se sane kpakpa fiɛɛli, aloo Yohane nane mi dali, aloo kpɔ mi nɔ hyɛli. A ji ma se kpakpa fiɛɛli jio, Yohane nane mi dali jio, kpɔ mi nɔ hyɛli jio, a hia blɔ ɔ ngɛ sane kpakpa a he je. Yohane de ke: “Blɔ nɛ a hia nɛ ɔ, Kristo ní tsumi a ngɛ tsue.” (3 Yoh. 7) Munyu nɛ ji “Kristo ní tsumi a ngɛ tsue” nɛ Yohane kɛ tsu ní ɔ tsɔɔ kaa nyɛmimɛ nɛ ɔmɛ piɛɛ Kristofohi asafo ɔ he, nɛ e sa nɛ a he mɛ atuu. Enɛ ɔ he ɔ Yohane ngma ke: “Wɔ nɛ wa le Kristo ɔ, e hia kaa waa ye kɛ bua nimli nɛ ɔmɛ, nɛ waa piɛ a he kɛ tsu anɔkuale ɔ he ní tsumi ɔ.”—3 Yoh. 8.

Tsa pi sina he je kɛkɛ nɛ Yohane ngma womi nɛ ɔ kɛ ya ha Gayo. Yohane ngɛ hlae nɛ e ye bua lɛ kɛ tsu si fɔfɔɛ ko nɛ hɛdɔ ngɛ he ɔ he ní hulɔ. Yi mi tomi ko he je ɔ, nyumu ko nɛ a tsɛɛ lɛ ke Diotrefe nɛ e piɛɛ Kristofohi asafo ɔ he ɔ sume kaa e maa pee Kristofohi nɛ a ba slaa mɛ ɔ nibwɔ. E bɔ mɔde po kaa e maa tsi nyɛmimɛ kpa amɛ a nya konɛ a ko pee nihi nibwɔ.—3 Yoh. 9, 10.

Atsinyɛ jemi ko be he kaa Kristofohi anɔkualetsɛmɛ be suɔe kaa a ma ya to si ngɛ Diotrefe ngɔ, ke a ná he blɔ po. Diotrefe suɔ kaa e ma ná blɔ nya ngɛ asafo ɔ mi, e bui Yohane fɛɛ, nɛ e gbeɔ bɔfo Yohane kɛ ni kpahi a he guɛ. E ngɛ mi kaa Yohane tsɛ we Diotrefe ke lakpa tsɔɔlɔ hyɛ mohu lɛɛ, se Diotrefe te si kɛ wo Yohane ngɛ blɔ nya nɛ e hɛɛ ɔ he je. Diotrefe suɔ kaa e ná blɔ nya, nɛ e je we Kristofohi a suhi kpo, enɛ ɔ he ɔ, e nyɛ we nɛ e ye anɔkuale. Diotrefe sane ɔ tsɔɔ bɔ nɛ ni kakaaka komɛ nɛ a woɔ a he nɔ, nɛ a suɔ kaa a ná blɔ nya a ma nyɛ maa ngɔ mi gbami kɛ ba asafo ɔ mi ha. Enɛ ɔ he ɔ, Yohane de Gayo nɔ́ ko nɛ kɔɔ wɔ hu wa he mwɔnɛ ɔ. E de ke: “Ko ya wo nihi nɛ peeɔ ní yayamihi ɔ a nane.”—3 Yoh. 11.

Kristofo no ko nɛ a tsɛɛ lɛ ke Demetrio ɔ lɛɛ e be kaa Diotrefe. Yohane tsɔɔ kaa e pee nɔ hyɛmi nɔ́ kpakpa. Yohane de ke: “Demetrio lɛɛ nɔ tsuaa nɔ tuɔ e he munyu kpakpa; . . . Wɔ hu wa ngɛ odase yee jã nɔuu, nɛ nyɛ le kaa anɔkuale wa ngɛ tue.” (3 Yoh. 12) Eko ɔ, Demetrio hia Gayo yemi kɛ buami, nɛ e ma nyɛ maa pee kaa Yohane ngma e womi nɛ ji etɛ ɔ kɛ ya ha Gayo konɛ e kɛ tsɔɔ lɛ nɔ nɛ Demetrio ji. Eko ɔ, Demetrio nitsɛ lɛ ngɔ sɛ womi nɛ ɔ kɛ ya ha Gayo. Akɛnɛ Demetrio piɛɛ Yohane nane mi dali ɔmɛ a he, aloo e ji kpɔ mi nɔ hyɛlɔ he je ɔ, eko ɔ, e nyɛ nɛ e tsɔɔ nɔ́ nɛ Yohane ngma a sisi fitsofitso kɛ tsɔɔ Gayo.

Mɛni he je nɛ Yohane wo Gayo he wami kaa e ya nɔ nɛ e pee nihi nibwɔ be mi nɛ e ngɛ jã pee momo ɔ? Anɛ Yohane yɔse kaa e he hia nɛ e wo Gayo he wami lo? Anɛ eko ɔ, bɔfo Yohane susu kaa Gayo ma kpa nihi nibwɔ peemi akɛnɛ Diotrefe ngɛ mɔde bɔe kaa e maa tsi Kristofohi nɛ a peeɔ nihi nibwɔ ɔ a nya ngɛ asafo ɔ mi ɔ lo? Jã ji sane ɔ jio, pi jã ji sane ɔ jio, Yohane wo Gayo he wami ke: “Nɔ tsuaa nɔ nɛ peeɔ nɔ́ kpakpa a, Mawu nɔ́ ji lɛ.” (3 Yoh. 11) Enɛ ɔ ji yi mi tomi kpakpa he je nɛ e sa nɛ waa ya nɔ nɛ waa pee kpakpa.

Anɛ Yohane sɛ womi ɔ wo Gayo he wami konɛ e ya nɔ nɛ e pee nihi nibwɔ lo? Akɛnɛ Yohane womi etɛne ɔ piɛɛ Baiblo ɔ mi womi ɔmɛ a he, nɛ a baa yi konɛ e wo nihi he wami nɛ a  “kase nihi nɛ peeɔ nɔ́ kpakpa” a he je ɔ, wa ma nyɛ ma de ke e wo Gayo he wami niinɛ.

A ngmɛ́ Gayo he sane kpa ko hu ngɛ Baiblo ɔ mi. Se kɛ̃ ɔ, wa ma nyɛ maa kase níhi fuu kɛ je e he sane bɔɔ nɛ a ngma a mi.

Kekleekle ɔ, ngɛ blɔ ko nɔ ɔ, wa ma nyɛ ma de ke anɔkualetsɛmɛ nɛ a ngɔ a he kɛ sã afɔle nɛ a hia blɔ kɛ ba je wa ma a mi ɔ lɛ ha nɛ wa ba le anɔkuale ɔ nɛ. Ngɛ anɔkuale mi ɔ, tsa pi nihi tsuo nɛ a ngɛ Kristofohi asafo ɔ mi mwɔnɛ ɔ nɛ a hiaa blɔ gagaagahi ngɛ sane kpakpa a he je. Se kaa bɔ nɛ Gayo pee ɔ, wɔ hu wa ma nyɛ maa ye bua kpɔ mi nɔ hyɛli kɛ a yihi, kɛ ni kpahi nɛ a hia blɔ ɔ, nɛ waa wo mɛ he wami. Aloo wa ma nyɛ maa pee nɔ́ ko kɛ ye bua nyɛmimɛ nyumuhi kɛ yihi nɛ a hiaa blɔ kɛ yaa he kpahi ngɛ a ma a mi, aloo ma se po konɛ a ya ye bua ngɛ he nɛ Matsɛ Yemi fiɛɛli fuu a he hia ngɛ ɔ. Enɛ ɔ he ɔ, nyɛ ha nɛ waa “bɔ nibwɔ peemi he mɔde.”—Rom. 12:13; 1 Tim. 5:9, 10.

Nɔ́ nɛ ji enyɔ ɔ, ngɛ asafo ɔ mi po ɔ, nihi ma nyɛ maa te si kɛ wo nihi nɛ a hɛɛ blɔ nya a. E ngɛ mi kaa enɛ ɔ pɔɛ bami mohu lɛɛ, se ke e ba jã a, e sɛ nɛ e pee wɔ nyakpɛ. A te si kɛ wo Yohane ngɛ he blɔ nɛ e ngɛ ɔ he je, nɛ jã kɛ̃ nɛ a pee bɔfo Paulo hulɔ. (2 Kor. 10:7-12; 12:11-13) Ke jã a, lɛɛ ke waa kɛ si fɔfɔɛ kaa jã kpe ngɛ asafo ɔ mi ɔ, kɛ e sa kaa waa pee wa ní ha kɛɛ? Paulo wo Timoteo ga ke: “Nyɔmtsɛ ɔ sɔmɔlɔ ɔ, e sɛ́ kaa e pɛɔ; mohu ɔ, e mi nɛ jɔ ha nɔ tsuaa nɔ; e pee ní tsɔɔlɔ kpakpa nɛ toɔ e tsui si. Pi enɛ ɔ kɛkɛ, e sa kaa e pee nɔ nɛ kɛ mi mi jɔmi tuɔ munyu tsɔɔ nihi nɛ tee si kɛ siɔ lɛ ɔ.” Ke nihi wo wa mi mi la, nɛ wa ya nɔ nɛ wa to wa tsui si ɔ, bɔɔbɔɔbɔɔ ɔ, nihi nɛ a tuɔ níhi a he munyu nyanyaanya a ma nyɛ ma tsake a subai. Kɛkɛ ɔ, Yehowa “maa na jamɛatsɛmɛ ɔmɛ mɔbɔ nɛ a tsake a tsui, konɛ a ba le anɔkuale ɔ.” (2 Tim. 2:24, 25)

Nɔ́ nɛ ji etɛ ɔ, wa nyɛmimɛ Kristofohi nɛ a kɛ anɔkuale yemi sɔmɔ Yehowa ngɛ si temi kɛ womi nɛ a kɛ ngɛ kpee tsuo se ɔ sa yi jemi wawɛɛ, ejakaa a wo anɔkuale blɔ ɔ. Bɔfo Yohane wo Gayo he wami, nɛ e ha lɛ nɔ mi mami kaa e ngɛ nɔ́ nɛ da pee. Jã nɔuu kɛ̃ nɛ mwɔnɛ ɔ, e sa nɛ asafo mi nikɔtɔmahi nɛ a kase Yohane, nɛ a wo a nyɛmimɛ he wami konɛ “pɔ ko tɔ mɛ.”—Yes. 40:31; 1 Tes. 5:11.

Sɛ womi nɛ bɔfo Yohane ngma kɛ ya ha Gayo ɔ ngɛ kpiti kulaa. Lɔ ɔ ji womi nɛ ngɛ kpiti kulaa ngɛ Baiblo mluku ɔ mi, ejakaa a kɛ Hela munyunguhi 219 pɛ lɛ ngma. Se kɛ̃ ɔ, womi nɛ ɔ yeɔ bua Kristofohi wawɛɛ mwɔnɛ ɔ.