I MAMÉLÉL ma hiai hi bisu, Gayô ni bikristen bipe bi bi boma manoodana. Ngim bôt i i bé tjam biniigana bi bitembee i bi noode tômbôs lôk kéé ni lona mbagla ikété makoda. (1 Yôhanes 2:18, 19; 2 Yôhanes 7) Mut wada le Diôtréfé a bé “a mpôe hop i sok” ñôma Yôhanes ni bôt bape, a tjélék leege bikristen bi bi bé bakén, a noodege ki tinde bôt bape i boñ kiki nye. (3 Yôhanes 9, 10) Hala nyen mam ma bé ngéda Yôhanes a tilna Gayô kaat. A bi tila kaat yé bebee ni nwii 98 N.Y., ba nsébél kaat i ikété Bitilna ni hop Grikia le “Yôhanes i nyônôs aa.”

To hala kii a bi boma manoodana, Gayô a bi téñbe i gwélél Yéhôva. Lelaa a bi unda ndéñbe yé? Inyuki di nlama bana ngôñ i kôna ndémbél i Gayô i len ini? Lelaa kaat i Yôhanes i nla hôla bés i boñ hala?

Ntila kaat Yôhanes 3 a nsébél nyemede le “mañ ntôñ.” Ndi buk Grikia i ngwéélana hana i nla ki kobla le “mañ mut.” Ñôma Yôhanes a bi gwélél bibañga bi inyu yis man wé i pes mbuu Gayô le nyen a tilna nye kaat. Yôhanes a nsébél Gayô ni loñgeñem le “nugwéha, nu me ngwés ikété maliga.” I mbus, Yôhanes a nkal le a gwé botñem le Gayô a yé mbôô i pes minsôn kiki a yé mbôô i pes mbuu. Kinje bibuk bilam inyu bégés Gayô!​—3 Yôhanes 1, 2, 4.

Gayô a bé lama ba mañ u likoda, to hala kiki kaat i nkal bé hala. Yôhanes a mbégés nye le a bi leege bilôk bikéé to hala kii a bé yi bé bo. Yôhanes a bi tehe hala kiki yimbne le Gayô a tiñi ni Djob inyule i leege bakén i yé lem ba nyil bikristen ibôdôl behee.​—Bibôdle 18:1-8; 1 Timôtéô 3:2; 3 Yôhanes 5.

Bibuk Yôhanes a ngwélél inyu bégés lem i leege bakén Gayô a bééna, bi ñunda le bikristen bi bééna lem i hiôm ipôla mbai Yôhanes ni het makoda ma bééne. I nene ki le i mahuu ma liké jap, bilôk bikéé bi, bi bé bi añle Yôhanes mam ba ntehe. Bebeg le inyu hala nyen Yôhanes a bé yi mam ma ntagbe ikété makoda.

Ibabé pééna, bilôk bikéé bi bé ke liké, bi bééna lem i yééne mandap ma bikristen bipe. Mam mabe ma bé pôda ngandak inyu mandap ma bakén, inyule ma bé leege bé bôt loñge, ma bak ki bahoma bakeñi  ba ndéñg. Inyu hala nyen ibale njel i bé, bikristen bi bi bééna pék, bi bé yén mandap ma bikristen bipe.

Yôhanes a bi ti Gayô makénd le a ke ni bisu i leege bakén. A bi kal nye le a ‘tibil tjôla bakén inyu liké jap i nya y’a lémél Nyambe.’ Ha ngéda i, i tjôla mut i bé kobla le u ti nye mam momasôna a bééna ngôñ inyu liké jé. Gayô a bi lama boñ hala inyu bakén a bi bôk a leege i mbai yé, inyule ba bi bok mbôgi yak Yôhanes inyu gwéha ni hémle i Gayô.​—3 Yôhanes 3, 6.

Bebeg le bakén ba, ba bé basañal i biloñ bipe, bakenwin ba Yôhanes, tole bagwélél ba makiiña. To i ba yaga lelaa, ba bé ke liké inyu miñañ minlam. Yôhanes a nkal le: “Inyule ba bi kil i jôl jé.” (3 Yôhanes 7, MN) Yôhanes a mbôk a pôdôl inyu “Nyambe.” (nlôñ 6) I nene le bini bibuk le “ba bi kil i jôl jé” bi mpôdôl inyu Yéhôva. Jon, ba bé ba kôli i kôhna maleege malam. Inyu hala nyen Yôhanes a bi tila le: “Jon bés bon di nlama yis ndôñ bôt ini, le ndi di yila baso bap ba bagwelnson inyu maliga.”​—3 Yôhanes 8.

Jam li bi tinde Yôhanes i tilna Gayô li bé ndik bé inyu ti nye mayéga. Yôhanes a bé sômbôl hôla nye i sañgal ngim ndañ. Di nyi bé inyuki, ndi mankéé wada ikété likoda le Diôtréfé a bé tjél leege bikristen bi bé bakén. A bé sôñga yak bini bilôk bikéé bipe i leege bakén.​—3 Yôhanes 9, 10.

Ibabé pééna minhôôlak mi bikristen mi bé bé le, mi neebe i yééne yak Diôtréfé to ibale a bana ngôñ i leege bo. A bé sômbôl bana tel i bisu ikété likoda, a bé diihe bé ki to yom yo ki yo i nlôl yak ñôma Yôhanes, a yônôs ki mbok yosôna ni hilégé ikolba ñôma ni bôt bape. I yé mbale le Yôhanes a sébél bé nye le malét nu bitembee, ndi Diôtréfé a bé yan libak jé li ñôma. Ngôñ i ba mut bisu i Diôtréfé ni bilem gwé bibe bi bé unda le a tiñi bé ni Djob. Ñañ u Diôtréfé u ñunda le bôt ba ngôk ni ba lipamal ba nla ôbôs adna i likoda. Inyu hala nyen Yôhanes a nkal Gayô jam li mbéñge yak bés i len ini le: “U kôna bañ mam ma yé béba.”​—3 Yôhanes 11.

Maselna ni Diôtréfé, Yôhanes a mpôdôl kristen ipe i gwé jôl le Démétriô inyu ndémbél yé lam. Yôhanes a kal le: “Yak bés ki di mbok mbôgi [inyu yé], ndi u nyi le mbôgi yés i yé hodo.” (3 Yôhanes 12) I mpôôna le Démétriô a bééna ngôñ ni mahôla ma Gayô, ni le Yôhanes a bi tilna Gayô kaat yé i nyônôs 3 inyu bat nye le a tibil leege Démétriô. I nene le Démétriô nyemede nyen a bi ti Gayô kaat i. Kiki a bé nkenwin nu Yôhanes tole ngwélél makiiña, Démétriô a bi lama tibil toñle nye mam Yôhanes a bi tila.

Inyuki Yôhanes a bi ti Gayô makénd i ke ni bisu i leege bakén ki le a bééna lem i? Baa Yôhanes a bééna ngôñ i kônde lédés Gayô mu lem lam i? Baa Yôhanes a bé kon woñi le Gayô a nimis lem yé lam mu kii Diôtréfé a bé tééñga bikristen bi bi bé leege bakén? To i ba yaga lelaa, Yôhanes a bi tibil lédés Gayô ngéda a kal le: “Mut a mboñ loñge nyen a yé nu Nyambe.” (3 Yôhanes 11) Hala a nti bés loñge njom i ke ni bisu i boñ loñge ibabé waa.

Baa kaat i Yôhanes i bi ti Gayô makénd i ke ni bisu i leege bakén? Di nla kal le ñ, inyule ini kaat i yé ikété Bibel inyu ti bôt bape makénd i ‘kôna mam ma yé loñge.’

Mam momasôna di nyi inyu mankéé wés nu kwañ le Gayô, mo ma hala. Ndi i ndék mam di nyi i niñ yé, i nla niiga bés ngandak mam.

Pog, bés bobasôna di gwé pil inyule di nyi maliga i len ini mu kii bikristen bipe bi bi neebe i ke ntandaa liké inyu lo niiga bés maliga. I yé maliga le bikristen gwobisôna i len ini bi nke bé ntandaa liké inyu miñañ minlam. Ndi kiki Gayô, yak bés di nla nit bôt ba nke liké, kiki bo ngwélél makiiña ni nwaa, di tinak bo makénd. Bebeg ki le di nla hôla bilôk bikéé bi bôlôm ni bi bôda bi bi nke nit likalô i homa batéé likalô ba ta bé ngandak, ikété loñ tole i biloñ bipe. Jon di ‘ligip i leege bakén.’​—Rôma 12:13; 1 Timôtéô 5:9, 10.

Iba, hala a nlama bé hélés bés ibale ngim mangéda, sôñna bitel i ngwéé ikété likoda i len ini. Bôt ba bi pééna libak li ñôma li Yôhanes, yak ni li Paul. (2 Korintô 10:7-12; 12:11-13) Kii di nlama ni boñ ibale di mboma nya ndutu i ikété likoda? Paul a bi ti Timôtéô mana maéba le: “Nkol Nwet u nlama oo jo bisañ, ndi u bôihege ndigi bôt bobasôna, u ban-ga pék i niiga, u hônbaga ki, u yik niiga bakolba ni ñemlima.” Ibale di nyi gwel bésbomede ngéda mut a nyumbla bés, ngim bakolba i nla bôdôl héñha mahoñol ndék ni ndék kayéle yak Yéhôva “a néhne bo njel i hiel miñem, le ba yi maliga.”​—2 Timôtéô 2:24, 25.

Aa, bikristen bi bi tiñi i gwélél Yéhôva ikété ngolba, bi kôli le di diihe bo, di ti ki bo bibégés inyu loñge yap ndémbél. Ibabé pééna, ñôma Yôhanes a bi ti Gayô makénd, a kal ki nye le mam a yé boñ ma yé loñge. Nlélém jam i len ini, mimañ mi nlama noñ ndémbél i Yôhanes i ti bilôk bikéé bi bôlôm ni bi bôda makénd le ba kônde gwel minson “ibabé waa.”​—Yésaya 40:31; 1 Tésalônika 5:11.

Kaat ñôma Yôhanes a tilna Gayô ni hop Grikia i bééna ndik 219 bibuk. Yon i yé kaat i nlôôha titigi ikété Bibel yosôna. Ndi to hala, i yé nseñ ngandak inyu bikristen i len ini.