GAÏUS a Bekristen ya ntete mimbu ôsu be nga tebe meve’ele été. Bôte be mbe be ye’ele minsos be nga kômbô te’e mekônda, a kandé me mengam. (1 Jn. 2:18, 19; 2 Jn. 7) Môt éziñ, a too jôé na Diotrèphe, a mbe a ye’ele “mbia mejô” a lat a nlômane Jean, a minlômane mivok. A mbe a kama’ane Bekristen na, be bo mvam a Bekristen be mbe be jome mekônda, a mbe fe a kômbô’ô tindi bôte na, be tôñe mboone wé. (3 Jn. 9, 10) Jôm éte nje Jean a nga tili Gaïus kalate. Kalate ate, a ne “Kalate Lale Jean a nga tili.” A nga tili nye bebé mbu 98 ya É.J., a ne wua ya bekalate ya Kalate Zambe be ne nkobô Grèk.

Gaïus a nga ke ôsu a kabetane Yéhôva, akusa bo minjuk a nga tôbane mie. Aval avé a nga liti na a kabetane Yéhôva? Amu jé bia yiane tôñ éve’ela Gaïus den? Aval avé kalate Jean a nga tili nye, a ne volô bia na bi bo de?

Môt a nga tili kalate Lale Jean a loon émiene na, “mvendé.” Éfia éte é mbe é yiane Gaïus na, a yeme na, nlômane Jean nnye a tili nye. Jean a loone Gaïus na, “môt me anye’e.” A tili fe Gaïus na a too ndi na, a ne mvo’é minsôn a nsisim. Ke mbamba jam môt a ne jeñ asu mvôé jé le nga?—3 Jn. 1, 2, 4.

Éko éziñe na Gaïus a mbe mvendé ya akônda, ve kalate Jean a nga tili nye a nji kate bia de. Jean a nga se’e Gaïus amu a mbe a yeme nyoñe bobenyañe bé ya mbunan, ja’a beyeñ. E mise me Jean, nalé a mbe a liti’i na, Gaïus a ne mbamba mbo ésaé Yéhôva, amu na, aso melu mvus, e yeme nyoñe bôt, a ne fulu benya bebo bisaé be Yéhôva.—Met. 18:1-8; 1 Tim. 3:2; 3 Jn. 5.

Jean a se’e Gaïus amu a yeme nyoñe bobejañ, nalé a liti na, Bekristen be mbe be kôlô’ô vôme Jean a mbe a nyiñe, be kele jome mekônda; Bekristene bete be mbe be kañete’e Jean avale mekônda me mbe me nyoñe be. Éko éziñ, a zen éte nje Jean a mbe a bi mefoé ma so mekônda mete.

Teke vaa nge beté, bobejañ be mbe be so’o bitisone bife, be mbe be zômbô’ô ke tabe menda me bobenyañe bap ya mbunan. B’auberge be nji be mbamba bevôme ya ke tabe, be nji be be yeme nyoñe bôte wôé, be mbe fe bevôme mvite mame ya  bisôk é mbe é boba’an. E vôme nalé a mbe ngule ya boban, bôte ba so dulu, be mbe be kele tabe be bemvôé bap; Bekristen ki, be mbe be kele be bobenyañ bap ya nsisim.

Jean a nga jô Gaïus na, a ke ôsu a bo ésôs, éyoñ a nga jô nye na, a ‘li’itane [bôte ba ke dulu] dulu dap ane de ayiane be Zambe.’ Nalé a mbe a tina’ane na, a yiane ke litane be akekui vôm éziñ, a na, a yiane ve be biôm bia ye volô be na, be ke kui vôme ba ke. Da yené fo’o na, Gaïus a nga belane beyeñ bé nalé, amu be nga ke kañete de Jean.—3 Jn. 3, 6.

Beyeñ Gaïus a nga ba’ale, be nga yiane be bemissionaire, bobejañe Jean a nga lôm, nge ke bejome mekônda. Be nga ke mulu mete amu mbamba foé. Jean a nga jô na: “Amu ajô ya Jôé te nde ete be nga ke de.” (3 Jn. 7) Jean a mbe a kobô’ô ajô Zambe (fombô’ô éfus 6), nde ñhe, éyoñ a jô na, “amu ajô ya Jôé te” Jean a kobô ajô jôé Yéhôva. Bobejañ be ne bibu’a ya akônda, ajô te, bia yiane nyoñe be a ôsesa. Jôm éte nje Jean a nga tili na: “Bi ayiane tu’a nyoñ avale bôt ete, nde bi aye bo beébe bebo bisaé mfa’a ya benya mejôô.”—3 Jn. 8.

Jean a nji tili Gaïus fo’o ve asu ya na, a ve nye akéva. A mbe fe a kômbô’ô volô nye na, a jibi beta njuk a mbe a tôbane wô. Diotrèphe, ébu’a jia ya akônda, a nji be a kômbô’ô nyoñe Bekristene ba so bitisone bife a ôsesa. A nga jeñe fe na, a kamane Bekristene bevok na be ke ôsu a bo de.—3 Jn. 9, 10.

Teke vaa nge beté, teke étôtôlô Kristen éziñ é mbe é kômbô’ô ke tabe be Diotrèphe, to’o nalé a mbe ve boban. Amu a mbe a nye’e a tebe ôsu akônda été, a nji be a semé’é mame mese ma so be Jean, a mbe fe a kobô’ô minkobô mi’ébiasé a lat a Jean, a minlômane mivok. Diotrèphe a mbe a biasé Jean akusa bo na, teke môs éziñ a nga loone nye na, ñye’ele medu’an. Diotrèphe a mbe a bili mbia fulu, a mbe fe a kômbô’ô tebe bôte bese ôsu. Mboon ôte ô nga bo na, be sili nge a ke fo’o ôsu a wulu ba’aba’a a Yéhôva. Éve’ela Diotrèphe ja liti na, mebun a ésas, bi ne soo mengam akônda Yéhôva été. Ajô ete nde Jean a nga ve Gaïus, a môt ase ya be bia abendé di: “Te vu mam me ne abé.”—3 Jn. 11.

Kristen éziñ, Démétrius, é mbe é sela’ane Diotrèphe. Jean a nga lañe nye ane môt a liti mbamba éve’ela. A nga jô na: “Mfa’a [Démétrius], bôte ba ve mbamba nkañete mfa’a wé . . . Ja’ane bia fe, bi ne bengaa. A wo yeme na, nkañete wongan ô ne bebela.” (3 Jn. 12, Mfefé Nkôñelan.) Démétrius a mbe a yi mvolane Gaïus; éko éziñe na, Jean a nga belane kalate Lale a nga tili, na a kobô ajô dé, a na a se’e nye. Éko éziñe na, Démétrius émien a nga tili fe Gaïus. Démétrius a nga yiane yemete mam Jean a nga tili, amu a mbe a yiane be môte wua ya ba Jean a nga lôm, nge ke na, a mbe njome mekônda.

Amu jé Jean a nga jô Gaïus na, a ke ôsu a bo mvam a bobenyañe bé éyoñ ése a mbe ngule ya bo de? Ye Jean a nga yene na, a yiane ve Gaïus ngule nyôl? Ye nlôman ô mbe ô koo woñe na, Gaïus a ye telé mbamba mboone wé amu na, Diotrèphe a mbe a jeñe na, a vaa avale bôt ete akônda été? Jam bia yem e ne ve na, Jean a nga ve Gaïus ngule nyôl éyoñ a nga jô nye na: “Nyô a bo mvaé, nnye a ne nyô ya Zambe.” (3 Jn. 11) Mbamba amu ya bo mvaé, a ke ôsu a bo de nnye le.

 Ye kalate Jean a nga ve fo’o Gaïus ngule nyôle na, a ke ôsu a nyoñe beyeñ? Bi ne yalane na, ôwé amu na, kalate Lale Jean a ne Kalate Zambe été. Nde fe, kalate ate a ve bia ngule nyôle na, bi ‘vu mam me ne mvaé.’

Teke môt éziñ ya be bia a nga nyiñ a monyañe wongan bia nye’e, Gaïus. Ve éyoñe bia fas ényiñe jé, bi ne yé’é abui mam.

Jam ôsu, bi ne jô na, abui ya be bia e nga yeme benya mejôô amu bebo bisaé be Yéhôva béziñ be nga ke mulu na, be zu ve be ñyeman ôte. E ne été na, bebo bisaé be Yéhôva bese ya melu ma, be nji wulu abui bekilimeta na be ke kañete mbamba foé. Ve aval ane Gaïus, bi ne su’u bobejañ ba ke mulu a zen éziñ. Bi ne su’u bejome mekônda a binga bap. Bi ne fe su’u bobejañ ba ke kañete bevôme bekañete mbamba foé be ne tyôtyoé, nge ba ba kôlô mesi map na ba ke kañete mesi mefe. Kalate Zambe a jô na, bia yiane ‘tôñ anyep.’—Bero. 12:13; 1 Tim. 5:9, 10.

Jame baa, bi nji yiane bo fe’e ne vema nge bôte béziñe ya akônda, ba biasé bôte ba wulu de. Be nga biasé Jean; be nga biasé fe nlômane Paul. (2 Bec. 10:7-12; 12:11-13) Nde, jé bia yiane ñhe bo nge bia tôban avale minjuk ete akônda été? Paul a nga ve Timothée abendé di: “Mbo ésaé Tate a ne fo’o te yiane wôman, ve bo évôvoé nlem mfa’a ya bôte bese, atyeñ ya ye’ele, njiban, a ye’ele ba be abo melo a nje’eban nlem.” Éyoñe bi ne évôvoé to’o éyoñe ba soñe bia, bôte ba kobô bia abé, be ne tyendé ôsimesane wop. Yéhôva “a ye ve be ngule ya kôñelane minlem a zu yeme benya mejôô.”—2 Tim. 2:24, 25.

Jame lale, bia yiane yem ésaé bobejañ ba wulu ba’aba’a a Yéhôva ba bo akusa bo minjuk, a se’e be. Nlômane Jean ô nga kôme fo’o ve Gaïus ngule nyôl, a liti nye na, mboone wé ô mbe mvo’é. Avale da fe, bemvendé ya melu ma, ba yiane vu éve’ela Jean, ba yiane ve bobejañe ngule nyôl asu ya na, be bo “te tek.”—És. 40:31; 1 Bet. 5:11.

Kalate Jean a nga tili Gaïus a ne kalate a dañ étun, e bekalate bese ya Kalate Zambe. A bili ve bifia 219 e Kalate Zambe Traduction du monde nouveau (nkobô Engilis). Bekristen ya melu ma ba yene beta mfi ya kalate ate.