SAAN kɛmɛkulu fɔlɔ laban fan fɛ, gwɛlɛya dɔw tun be Gayusi ni kerecɛn tɔɔw kan. Mɔgɔ dɔw tun be ngalon kalanw kɛ yɔrɔ bɛɛ. U y’a ɲini ka kafodenw fari faga ani k’u faran ɲɔgɔn na (1 Zan 2:18, 19; 2 Zan 7). Cɛɛ dɔ tun be weele ko Diyotɛrɛfu. Ale tun be kuma jugu fɔ yɔrɔ bɛɛ ciden Zan ni mɔgɔ wɛrɛw koo la. Kerecɛn minw tun be taga dugu ni duguw la ka kibaro diiman fɔ, a tun be ban k’olu ladon fana. A yɛrɛ tun be kerecɛn tɔɔw lasun u kana u ladon (3 Zan 9, 10). O lo kosɔn, Zan ye lɛtɛrɛ sɛbɛ k’a ci Gayusi ma. Zan y’o lɛtɛrɛ sɛbɛ saan 98 fan fɛ Krista tile la. O bataki be sɔrɔ Gɛrɛkikan sɛbɛninw kɔnɔ. A be weele ko: “Zan ka bataki sabanan.”

O gwɛlɛyaw bɛɛ n’a ta, Gayisu tora ka Jehova bato ni kantigiya ye. A y’a yira cogo di ko a ye kantigi ye? Mun na an ka ɲi ka Gayisu ka ɲɛyirali ɲuman ladegi bi? Zan ka bataki sabanan be se k’an dɛmɛ cogo di k’o kɛ?

Zan ka bataki sabanan sɛbɛbaga ko ale ye kafo “cɛkɔrɔba” ye. O kumaw dama fɛ, Gayusi tun b’a lɔn k’o bataki sɛbɛbaga ye ciden Zan lo ye, a kalanfa kanulen. Zan y’a fɔ Gayusi ye ni kanuya ye ko: “Ne bɛ i kanu tiɲɛ la.” O kɔ, ciden Zan y’a fɔ ko a b’a fɛ Gayusi ka to kɛnɛya la i n’a fɔ a be tagara ɲɛ Alako ta fan fɛ cogo min na. O tun ye tandoli kuma ye dɛ!—3 Zan 1, 2, 4, ABM.

N’a sɔrɔ Gayusi tun ye kafo ɲɛminɛbaga dɔ ye. Nka ciden Zan ka bataki t’o fɔ an ye ka gwɛ. Hali ni Gayusi tun tɛ balimaw lɔn, a tun b’u ladon. Ciden Zan y’a tando o kosɔn. Zan fɛ, o koo tun b’a yira ko Gayusi ye mɔgɔ kantigi ye. Mun na do? Sabu sanga ni wagati bɛɛ, Ala sagokɛlaw be lonanw ladon.—Zɛnɛzi 18:1-8; 1 Tim. 3:2; 3 Zan 5.

Zan ye Gayusi tando sabu a tun be balimaw ladon. O b’a yira ko ciden Zan tun be dugu min na, kerecɛn dɔw tun ka teli ka bɔ yen ka taga bɔ kafow ye dugu wɛrɛw la. Gayusi y’o kerecɛnw minɛ cogo min na, siga t’a la, u tun b’o fɔ ciden Zan ye. N’a sɔrɔ, olu lo tun be kafodenw kibaro fɔ Zan ye.

Siga t’a la, kerecɛn minw tun be bɔ dugu wɛrɛw la Ala tɔgɔ kosɔn, a tun ka di u ye ka jigi u kerecɛnɲɔgɔnw fɛ. Mɔgɔw tun tɛ lotɛliw tɔgɔ ɲuman fɔ, u tun tɛ u ka kiliyanw minɛ ka ɲɛ ani kakalayakow tun ka teli ka kɛ yen. O kosɔn, n’a tun be se ka kɛ, lonan hakilitigiw tun be jigi u teriw lo fɛ. Kerecɛn minw bɔra Ala tɔgɔ kosɔn, olu tun be jigi u kerecɛnɲɔgɔnw lo fɛ.

Ciden Zan ye Gayusi jija a ka to ka lonanw ladon. A y’a fɔ a ye ko: “I ka u dɛmɛ u ka taama ko la ni dɛmɛni ye min bɛ bɛn Ala sago ma.” O kɔrɔ ko Gayusi k’o balimaw mako wasa u ka voyazi tɔɔ bɛɛ la. U mako be fɛɛn o fɛɛn na ka se u tagayɔrɔ la, a k’o di u ma. Siga t’a la, Gayusi tun ye lonan minw ladon ka kɔrɔ, a tun y’o kɛ u ye. O kosɔn, lonanw tun y’a ka kanuya n’a ka kantigiya kofɔ Zan ye.—3 Zan 3, 6, ABM.

N’a sɔrɔ Zan lo tun y’o lonanw ci, wala u tun ye misɔndenw wala kɔrɔsibaga tagamakɛlaw ye. A mana kɛ min o min ye, o balimaw tun be taga duguw la walisa ka kibaro diiman fɔ. Zan y’a fɔ ko: “U bɛ taama la Matigi tɔgɔ kosɔn.” (3 Zan 7, ABM ). Zan tun kaan be Ala lo ma (vɛrise 6, ABM ). O la, a kaan be “tɔgɔ” min ma, o ye Jehova tɔgɔ lo ye. O kama, balimaw tun ka kan k’u ladon koɲuman. Zan y’a sɛbɛ ko: “An ka kan k’o mɔgɔ nunu ɲɔgɔn minɛ ka ɲa, waasa an niin ka don o tiɲɛ baara la.”—3 Zan 8.

Zan ma lɛtɛrɛ sɛbɛ Gayusi ma walisa k’a fo dɔrɔn dɛ! A tun b’a fɛ fana ka ladili di a ma gwɛlɛyaba dɔ koo la. Diyotɛrɛfu tun ye kafoden dɔ ye. An m’a lɔn fɛɛn min kama, nka kerecɛn minw tun bɔra Ala tɔgɔ kosɔn, Diyotɛrɛfu tun be ban k’olu ladon. A tun be tɔɔw bali fana k’o kɛ.—3 Zan 9, 10.

Siga t’a la, kerecɛn kantigiw tun t’a fɛ ka jigi Diyotɛrɛfu fɛ hali n’u tun be se k’o kɛ. Diyotɛrɛfu tun b’a fɛ ka kɛ koo bɛɛ ɲɛmɔgɔ ye kafo kɔnɔ. Fɛɛn o fɛɛn tun mana bɔ Zan yɔrɔ, a tun t’o jati ani a tun be kuma juguw fɔ yɔrɔ bɛɛ ciden Zan ani mɔgɔ wɛrɛw koo la. Ciden Zan m’a fɔ ko Diyotɛrɛfu be ngalon kalanw kɛ. Nka, Diyotɛrɛfu tun tɛ bonya la Zan kan. Diyotɛrɛfu tun b’a fɛ ka lɔyɔrɔba sɔrɔ ani a ka kɛwalew tun t’a yira ko a ye kerecɛn ye. O tun b’a to mɔgɔw tun b’u yɛrɛ ɲininga n’a ye kantigi ye tiɲɛn na. Diyotɛrɛfu ka koo b’a yira ko mɔgɔ minw ye kuncɛbaw ani hasiriw ye, u be se ka na ni farali ye kafo kɔnɔ. Ciden Zan y’a fɔ Gayusi ye ko: “I kana mɔgɔ ka kojugu ladege.” Nka o kuma ɲɛsinna an kelen kelen bɛɛ ma fana.—3 Zan 11.

Ciden Zan ye kerecɛn wɛrɛ kofɔ min tɔgɔ ko Demetiriyusi. Ale tun tɛ komi Diyotɛrɛfu. Zan ko Demetiriyusi ye ɲɛyirali ɲuman ye. A y’a sɛbɛ ko: “Demetiriyusi kɔni, mɔgɔ bɛɛ b’ale tɔgɔɲuman fɔra . . . Anw fana b’a tɔgɔɲuman fɔ. I b’a lɔn ko an be min fɔ, ko tiɲɛ lo.” (3 Zan 12). N’a sɔrɔ Demetiriyusi mako tun be Gayusi ka dɛmɛ na. A be se ka kɛ ko Zan ka bataki sabanan kuun tun ye ka Demetiriyusi kofɔ Gayusi ye ani k’a ɲini a fɛ a ka Demetiriyusi ladon. N’a sɔrɔ Demetiriyusi yɛrɛ lo tagara o bataki di Gayusi ma. A be se ka kɛ fana ko Zan lo tun y’a ci wala ko kɔrɔsibaga tagamakɛla dɔ tun lo. Zan tun b’a fɛ ka min fɔ, n’a sɔrɔ Demetiriyusi yɛrɛ y’o ɲɛfɔ koɲuman.

Gayusi tun be lonanw ladon ka kɔrɔ. N’o lo, mun na ciden Zan y’a fɔ a ye ko a ka to ka lonanw ladon? Yala Zan y’a ye ko Gayusi mako tun b’a la, u k’a jija a ka jagwɛlɛya kosɔn wa? Kerecɛn minw tun be lonanw ladon, Diyotɛrɛfu tun b’a fɛ k’olu gwɛn ka bɔ kafo kɔnɔ. O kosɔn, n’a sɔrɔ ciden Zan tun be siranna ko Gayusi bena sigasiga ka lonanw ladon. A ka kɛ min o min ye, Zan ye Gayusi hakili sigi ko: “Mɔgɔ min be koɲuman kɛ, o tigi ye Ala ta ye.” (3 Zan 11). O kama, an fana ka ɲi ka to ka koo ɲuman kɛ tuma bɛɛ.

Yala Zan ka bataki ye Gayusi lasun a tora ka lonanw ladon wa? An be se k’a fɔ ko ɔnhɔn sabu Ala barika la, Zan ka bataki sabanan be Bibulu kɔnɔ walisa ka mɔgɔw jija u ka “koɲuman” kɛ.

An tɛ ni kunnafoni caaman ye an balimacɛ kanulen Gayusi koo la. Nka an be fitinin min lɔn, o b’an kalan koo caaman na.

A fɔlɔ, an be se k’a fɔ ko an caaman ye tiɲɛn lɔn sabu balima kantigi dɔw sɔnna ka bɔ u ka dugu la ka na an kalan. Tiɲɛn lo ko bi, kafodenw bɛɛ tɛ se ka taga kibaro diiman fɔ jamana wɛrɛ la. Nka, an be se ka Gayusi ladegi. Balima minw be taga dugu wɛrɛw la i n’a fɔ kafokulu kɔrɔsibaga n’a muso, an be se k’olu dɛmɛ ani k’u jija cogo caaman na. Balima dɔw be bɔ dugu wɛrɛw la wala jamana wɛrɛw la ka na dɛmɛ don yɔrɔ minw na weleweledalaw man ca. An be se k’olu dɛmɛ fana. O kama, an ka to ka “mɔgɔ wɛrɛw ladon.”—Ɔrɔm. 12:13; 1 Tim. 5:9, 10.

A filanan, ni mɔgɔ dɔw be ban ka bonya la kafo ɲɛminɛbagaw kan, o man kan ka bari an na. Ciden Zan ni Pol tun ye kafo ɲɛminɛbagaw ye, nka dɔw tun tɛ bonya la u kan (2 Korɛntikaw 10:7-12; 12:11-13). N’o koo ɲɔgɔn be kɛra an na kafo kɔnɔ, an bena mun lo kɛ do? Ciden Pol ye Timote ladi ko: “Matigi ka baarakɛla man kan ka kɛlɛ kɛ, a ka kan ka mɔgɔ bɛɛ koo diya a yɛrɛ ye, ani ka kɛ mɔgɔ ye, min be se mɔgɔw kalan na ni muɲuli ye. Mɔgɔ minw te sɔn a ka kalan ma, a ka kan k’olu minɛ ni dususuma ye.” Mɔgɔ minw b’an kɔrɔfɔ, n’an b’an dusu suma u kɔrɔ, dɔɔni dɔɔni, u ka miiriya bena yɛlɛma an koo la. Jehova fana “bena u dɛmɛ u ka nimisa ka faran u ka kojuguw la waasa u ka tiɲɛn lɔn.”—2 Tim. 2:24, 25.

A sabanan, kerecɛn minw be kantigiya kɛ Jehova ye gwɛlɛyaw bɛɛ n’a ta, an ka ɲi k’u waleɲuman lɔn ani k’u tando u ka kantigiya kosɔn. Siga t’a la, ciden Zan ye Gayusi jija ani k’a hakili sigi ko a be koo ɲuman lo kɛra. O cogo kelen na bi, diinan mɔgɔkɔrɔw ka ɲi ka ciden Zan ka ɲɛyirali ɲuman ladegi. U ka ɲi k’u balimaw jija walisa u kana “sigɛn” Alako ta fan fɛ.—Ezayi 40:31; 1 Tes. 5:11.

Zan y’a ka bataki sabanan min ci Gayusi ma, kumaden 219 dɔrɔn lo be sɔrɔ a kɔnɔ Gɛrɛkikan na. O kitabu lo ka surun Bibulu ka kitabuw bɛɛ la. Nka, o kitabu nafa ka bon kosɔbɛ kerecɛnw fɛ bi.