IKEMEMKE inọ Gaius ye nditọete eken oro ẹkedude ke utịt utịt eyo mme apostle, sia ndusụk nditọete emi ẹkekpepde nsunsu ukpepn̄kpọ ẹma ẹdomo ndinam idem emem nditọete, nnyụn̄ ntọ ubahade ke esop. (1 John 2:18, 19; 2 John 7) Eyenete emi ekekerede Diotrephes ama esitịn̄ “ndiọi ikọ” adian apostle John ye nditọete eken, imaha ndidara nditọete oro ẹkesisan̄ade-san̄a ẹnam utom Abasi, onyụn̄ odomo ndikpan mbon oro ẹkeyomde ndidara mmọ. (3 John 9, 10) Nte n̄kpọ eketiede edi emi ke ini John ekewetde Gaius leta. Enye ekewet leta emi ke n̄kpọ nte isua 98 eyo mme apostle. Ẹkot leta oro “Ọyọhọ John Ita.”

Kpa ye oro mîkememke inọ Gaius, enye ama aka iso ọsọn̄ọ ada anam n̄kpọ Jehovah. Didie ke enye akanam emi? Ntak emi ikpekpebede enye mfịn? Didie ke leta John ekeme ndin̄wam nnyịn ikpebe Gaius?

Andiwet Ọyọhọ John Ita okokot idemesie “ebiowo.” Ntak edi oro mîkọsọn̄ke Gaius, edima eyen esie ke Ọbọn̄, ndifiọk ke apostle John ekewet leta emi. John ekewet ke ntọn̄ọ leta esie ete: “Edima Gaius, emi mmade etieti.” Ekem enye ama ọdọhọ ke imọ ibọn̄ akam ite idem ọsọn̄ Gaius, enye onyụn̄ aka iso asan̄a ke akpanikọ. Emi owụt nte John akamade Gaius onyụn̄ oyomde n̄kpọ ọfọn enye!​—3 John 1, 2, 4.

Ekeme ndidi Gaius ekedi ebiowo ke esop, edi leta John itịn̄ke. John ama otoro Gaius ke ndikọnọ nditọete ufọk nnyụn̄ n̄kama mmọ esen, kpa ye oro enye mîkọdiọn̄ọke mmọ. Emi owụt ke Gaius ekedi ata owo Abasi, sia toto ke eset ikọt Abasi ẹsimama ndikama owo esen.​—Gen. 18:1-8; 1 Tim. 3:2; 3 John 5.

John ndikotoro Gaius ke ndisikama nditọete esen owụt ke nditọete ẹma ẹsiwaha edem apostle John ke ini mmọ ẹkenyọn̄de ndikese mme esop; anaedi nditọete emi ẹma ẹsitịn̄ se mmọ ẹkekụtde ẹnọ John. Etie nte mmọ ẹkesinam John ọfiọk se ikakade iso ke mme esop.

Nditọete oro ẹkesisan̄ade-san̄a ẹnam utom Abasi ẹkesima ndidụn̄ ke ufọk nditọete mmọ. Ntak-a? Mme ufọkisen ikọwọrọke eti etop, owo ikesikamake isenowo ọfọn do, ẹma ẹsinyụn̄ ẹnam oburobụt ido do. Oro akanam mme akaisan̄ emi mîyomke mfịna ẹkesima ndidụn̄ ye mme ufan mmọ edieke ufan̄ odude, nditọete oro ẹkesisan̄ade-san̄a ẹnam utom Abasi ẹnyụn̄ ẹdụn̄ ye nditọete mmọ.

John ama afiak ọdọhọ Gaius aka iso ndikama mme owo esen. John ọkọdọhọ Gaius ete: “Mbọk sio [nditọete oro ẹsan̄ade-san̄a ẹnam utom Abasi] unyọn̄ ke ido nte odotde ke iso Abasi.” Ndisio isenowo unyọn̄ ọkọwọrọ ndinọ mmọ se mmọ ẹyomde mbemiso mmọ ẹnyọn̄ọ, nnyụn̄ nnọ mmọ kpukpru se mmọ ẹdiyomde ke usụn̄ isan̄ tutu mmọ ẹsịm ebiet emi mmọ ẹkade. Gaius ama ananam ntem ye isenowo oro ẹkewahade ufọk esie, sia mmọ ẹma ẹtịn̄ ẹnọ John nte Gaius akakamade mmimọ esen onyụn̄ enyenede mbuọtidem.​—3 John 3, 6.

Nnyịn idiọn̄ọke m̀mê isenowo emi ẹkedi mme isụn̄utom, nditọete oro John ekesidọn̄de utom ọnọ mme esọp, m̀mê mme esenyịn oro ẹsan̄ade-san̄a. Edi se idiọn̄ọde edi ke mmọ ẹkesika isan̄ ke ntak eti mbụk. John ọkọdọhọ ete: “Mmọ ẹkewọn̄ọ ke ntak enyịn̄ Abasi.” (3 John 7) Sia nditọete oro ẹkesisan̄ade-san̄a ẹnam n̄kpọ Abasi, ama odot ẹnen̄ede ẹdara mmọ. Ntak edi oro John ọkọdọhọde ete: “Nnyịn inyene ndidara utọ mbon emi esen, man nnyịn ikpakabade idi nsan̄autom ke akpanikọ.”​—3 John 8.

John ikewetke Gaius leta oro man otoro enye kpọt, edi ekewet n̄ko man an̄wam enye ọfiọk se akpanamde ke ini mfịna okodude ke esop. Nte ima iketetịn̄, Diotrephes ikamaha ndidara nditọete oro ẹkesisan̄ade-san̄a ẹnam n̄kpọ Abasi. Enye ama onyụn̄ odomo ndikpan nditọete oro ẹkeyomde ndidara mmọ​—3 John 9, 10.

Idụhe eyenete emi akpakamade ndidụn̄ ke ufọk Diotrephes, idem ọkpọkọm enye ọkpọkọdọdọhọ ẹdidụn̄ ye imọ. Enye ama esima ndidi ebeiso ke otu nditọete, ibọhọ n̄kpọ ekededi eke otode John ye ukpono, onyụn̄ esima nditịn̄ ndiọi ikọ ndian apostle John ye nditọete eken. Edi akpanikọ ke John ikọdọhọke ke Diotrephes esikpep nsunsu ukpepn̄kpọ, edi Diotrephes ikadaha John ke n̄kpọ ndomokiet. Diotrephes ndikoyom ndidi ebeiso nnyụn̄ nsịn ndidara nditọete ama owụt ke enye ikọsọn̄ọke ida ye Jehovah. Emi owụt ke owo ekededi oro oyomde ndidi ebeiso ke esop mînyụn̄ idaha owo ndomokiet ke n̄kpọ ekeme nditọ ubahade ke esop. Item oro John ọkọnọde Gaius ebehe nnyịn mfịn n̄ko. John ọkọdọhọ enye ete: “Kûkpebe se idiọkde.”​—3 John 11.

Demetrius iketiehe nte Diotrephes; John ọkọdọhọ ke enye ama enịm eti uwụtn̄kpọ. John ọkọdọhọ ntem aban̄a Demetrius: “Mmọ ẹma ẹtie ntiense ẹban̄a Demetrius, . . . Nnyịn n̄ko ke itie ntiense, ndien afo ọmọfiọk ete ikọ ntiense oro inọde edi akpanikọ.” (3 John 12) Ekeme ndidi Demetrius ama oyom Gaius an̄wam imọ anam n̄kpọ, ndien ekeme ndidi apostle John akada Ọyọhọ John Ita otoro Gaius ọnọ Demetrius. Etie nte Demetrius ekemen leta emi ke ubọk esie ọsọk Gaius. Demetrius ekedi kiet ke otu nditọete oro John ekesidọn̄de utom ọnọ mme esop, onyụn̄ ekeme ndidi enye ekedi esenyịn oro asan̄ade-san̄a. Demetrius ama esikụt ete ke ẹnam se John ekewetde.

Ntak emi John ọkọdọhọde Gaius aka iso ndikama isenowo ke ini edide ekesesịne ete mbon ke iyịp ndinam ntre? Ndi John eketịn̄ emi man ọsọn̄ọ enye idem? Mîdịghe, ndi John ekekere ke Gaius ekeme nditre ndikama nditọete esen ke ntak emi Diotrephes okoyomde ndibịn eyenete ekededi oro anamde ntre nsio ke esop? Se ededi oro ekedide ntak, John ama ọsọn̄ọ Gaius idem ke ndidọhọ enye ete: “Owo eke anamde se ifọnde oto Abasi.” (3 John 11) Emi edi ata akpan ntak oro nnyịn mîkpetreke ndinam se ifọnde.

 Ndi Ọyọhọ John Ita emi John ekewetde ọnọ ẹsọk Gaius ama an̄wam enye aka iso akama nditọete esen? Sia ẹsịnde leta emi ke Bible man an̄wam nnyịn “[ikpebe] se ifọnde,” emi owụt ke ama an̄wam enye.

Ekpri se ifiọkde iban̄a edima eyenete nnyịn Gaius ke ineme emi. Kpa ye oro, emi ekeme ndikpep nnyịn ediwak n̄kpọ.

Akpa, etie nte nditọete emi ẹkenyịmede ndika nsio nsio itie n̄kọkwọrọ ikọ ẹkenam ediwak nnyịn idifiọk akpanikọ. Imọdiọn̄ọ ke idịghe kpukpru nnyịn mfịn isika nsio nsio itie ikọkwọrọ eti mbụk. Edi imekeme ndikpebe Gaius ke ndin̄wam nnyụn̄ nsọn̄ọ nditọete oro ẹsinamde emi idem, utọ nte esenyịn circuit ye n̄wan esie. Imonyụn̄ ikeme ndin̄wam nditọete nnyịn emi ẹwọrọde ẹka ebiet emi ẹnen̄erede ẹyom mme ọkwọrọikọ ke idụt nnyịn m̀mê ke idụt en̄wen. Mmọdo, ẹyak nnyịn “[ima] ndikama isenowo.”​—Rome 12:13; 1 Tim. 5:9, 10.

Ọyọhọ iba, nnyịn ikpayakke idem akpa nnyịn edieke ndusụk nditọete ẹnamde n̄kpọ oro owụtde ke mmọ idaha mbiowo ke n̄kpọ. Diotrephes ikadaha apostle John ke n̄kpọ, ndusụk nditọete ikonyụn̄ idaha apostle Paul ke n̄kpọ. (2 Cor. 10:7-12; 12:11-13) Nso ke ikpanam edieke utọ n̄kpọ emi ọwọrọde nnyịn? Paul ọkọdọhọ Timothy ete: “Ofụn Ọbọn̄ inyeneke ndin̄wana en̄wan, edi enyene nditie sụn̄sụn̄ ye kpukpru owo, odot ndikpep owo n̄kpọ, omụm idem akama ke ini ẹnamde enye idiọk, ada ifụre ifụre ido eteme mbon oro ẹbiọn̄ọde-biọn̄ọ.” Edieke inamde n̄kpọ ifụre ifụre ke ini ẹyatde nnyịn esịt, emi ekeme ndinam ndusụk mbon oro ẹnamde se iyatde nnyịn ẹkpụhọde edu mmọ. Jehovah akam ekeme ndinam “mmọ ẹkabade esịt ẹdinyene nnennen ifiọk akpanikọ.”​—2 Tim. 2:24, 25.

Ọyọhọ ita, ọfọn isinen̄ede itoro nditọete oro ẹsọn̄ọde ẹda ẹnam n̄kpọ Jehovah kpa ye oro ẹkọbọde mmọ, inyụn̄ isọn̄ọ mmọ idem. Apostle John ama ọsọn̄ọ Gaius idem onyụn̄ ọdọhọ enye aka iso anam se ifọnde. Ọfọn mbiowo n̄ko ẹkpebe John ke ndisọn̄ọ nditọete mmọ idem mbak mmọ ‘ẹdikpa mba.’​—Isa. 40:31; 1 Thess. 5:11.

Apostle John akada ikọ Greek 219 kpọt ewet leta emi ọnọ ẹsọk Gaius, ntre ọyọhọ John Ita omụhọ akan ke Bible. Kpa ye oro, leta esie emi enen̄ede enyene ufọn ọnọ nnyịn mfịn.