JEI vivọnu owhe kanweko tintan tọn, Gaiu po Klistiani devo lẹ po pehẹ avùnnukundiọsọmẹnu lẹ. Mẹhe to nuplọnmẹ lalo hẹn gbayipe lẹ tẹnpọn nado hẹn agun lẹ gbọjọ podọ nado hẹn kinklan wá ṣẹnṣẹn yetọn. (1 Joh. 2:18, 19; 2 Joh. 7) Dawe de he nọ yin Diotlefe to “ohó mẹhẹngble tọn” lẹ hẹn gbayipe gando apọsteli Johanu po mẹdevo lẹ po go, e nọ gbẹ́ nado do gbigbọ johẹmẹ tọn hia Klistiani he to gbejizọnlin ji lẹ, podọ e nọ tẹnpọn nado klọ apọ̀nmẹ na mẹdevo lẹ nado hodo apajlẹ etọn. (3 Joh. 9, 10) Ninọmẹ he to aimẹ to whenue Johanu kanwehlan Gaiu niyẹn. Wekanhlanmẹ he apọsteli lọ kàn to nudi owhe 98 W.M, sọawuhia to Owe-wiwe Glẹki tọn lẹ mẹ taidi “Wekanhlanmẹ Atọ̀ntọ Johanu Tọn.”

Mahopọnna avùnnukundiọsọmẹnu he Gaiu pehẹ lẹ, e sẹ̀n Jehovah po nugbonọ-yinyin po. Nawẹ e do nugbonọ-yinyin etọn hia gbọn? Naegbọn mí dona hodo apajlẹ Gaiu tọn to egbehe? Nawẹ wekanhlanmẹ Johanu tọn sọgan gọalọna mí nado wàmọ gbọn?

Mẹhe kàn Johanu Atọ̀ntọ ylọ ede dọ “sunnu mẹhomẹ lọ.” Enẹ ko pé na ovi gbigbọmẹ tọn yiwanna etọn Gaiu nido yọnẹn dọ apọsteli Johanu wẹ. Johanu yí ahundopo do dlẹnalọdo Gaiu taidi “mẹyiwanna lọ, he [ewọ] yiwanna nugbonugbo.” Enẹgodo, Johanu dọna Gaiu dọ nukundido emitọn wẹ yindọ ni to ganji to agbasa-liho podọ to gbigbọ-liho. Numọtolanmẹ po hogbe mẹpipa tọn dagbe nankọ lẹ po die!—3 Joh. 1, 2, 4.

E yọnbasi dọ mẹho agun tọn de wẹ Gaiu yin, ṣigba wekanhlanmẹ lọ ma dọ taun. Johanu pà Gaiu na e yí mẹmẹsunnu lẹ ganji mahopọnna dọ jonọ wẹ yé yin na ẹn. Johanu yí ehe do mọ kunnudenu nugbonọ-yinyin Gaiu tọn, na johẹmẹ nọ saba dohiagona sinsẹ̀n-basitọ Jiwheyẹwhe tọn lẹ.—Jen. 18:1-8; 1 Tim. 3:2; 3 Joh. 5.

Lehe Johanu pà Gaiu do na gbigbọ johẹmẹ tọn etọn hlan mẹmẹsunnu lẹ, dohia dọ Klistiani lẹ nọ zingbejizọnlin whẹwhẹ sọn fie apọsteli Johanu te yì lẹdo he mẹ agun lẹ tin te, podọ e họnwun dọ gbejizọnlin-basitọ ehelẹ nọ dọ lehe nulẹ to yìyì do na Johanu. Vlavo aliho ehe mẹ wẹ Johanu na ko sè linlin lẹ gando agun enẹlẹ go te.

Ayihaawe ma tin dọ Klistiani he nọ zingbejizọnlin lọ lẹ na ko nọ jlo nado nọ yisenọ hatọ lẹ dè. Hotẹli lẹ ma do yinkọ dagbe de to finẹ, yé ma nọ wazọ́n yetọn ganji, podọ fihe walọyizan mawé lẹ nọ peve te wẹ. Enẹwutu, to fie e yọnbasi te lẹ, mẹhe to gbejizọnlin ji lẹ nọ nọ̀  họntọn lẹ dè; podọ Klistiani gbejizọnlin-basitọ lẹ nọ nọ̀ Klistiani hatọ lẹ dè.

Johanu dotuhomẹna Gaiu nado do johẹmẹ hia whladopo dogọ, na apọsteli lọ biọ to e si nado “do [gbejizọnlin-basitọ lọ lẹ] hlan fie yé jei to aliho he jẹ to Jiwheyẹwhe nukunmẹ de mẹ.” Tofi, nado do jonọ lẹ hlan fie yé jei zẹẹmẹdo nado penukundo nuhudo yetọn lẹ go na adà gbejizọnlin lọ tọn he bọdego, podọ nado na yé nulẹpo he sin hudo yé na tindo kaka yé nado jẹ fie yé jei. E họnwun dọ Gaiu ko wàmọ na jonọ he wá e dè wayi lẹ, na yé ko hẹn linlin owanyi po yise jonọyitọ yetọn tọn po yì na Johanu.—3 Joh. 3, 6.

E yọnbasi dọ jonọ lọ lẹ ni yin mẹdehlan lẹ, mẹhe Johanu dohlan lẹ, kavi nugopọntọ tomẹyitọ lẹ. Depope he whẹho lọ yin, wẹndagbe lọ tamẹ wẹ yé basi gbejizọnlin do. Johanu dọmọ: “Oyín etọn wutu wẹ yé do tọ́nyi.” (3 Joh. 7) Johanu ṣẹṣẹ dọho gando Jiwheyẹwhe go wẹ (pọ́n wefọ 6tọ), enẹwutu, hodidọ lọ “oyín etọn wutu” na ko to alọdlẹndo oyín Jehovah tọn. Humọ, mẹmẹsunnu lọ lẹ yin hagbẹ agun Klistiani tọn bo jẹ nado yin yíyí po zohunhun po. E taidi nuhe Johanu wlan dọmọ: “Míwlẹ tin to dandannu glọ nado do gbigbọ johẹmẹ tọn hia omẹ mọnkọtọn lẹ, na mí nido lẹzun azọ́nwatọ hatọ lẹ to nugbo mẹ.”—3 Joh. 8.

Johanu ma to wekanhlan Gaiu nado pà ẹ poun gba. E sọ jlo na gọalọna ẹn nado pehẹ nuhahun sinsinyẹn de. Hagbẹ agun Klistiani tọn de he nọ yin Diotlefe ma nọ jlo na do johẹmẹ hia Klistiani he nọ basi gbejizọnlin lẹ. E tlẹ sọ nọ tẹnpọn nado glọnalina mẹdevo lẹ nado do gbigbọ johẹmẹ tọn hia.—3 Joh. 9, 10.

Matin ayihaawe, Klistiani nugbonọ lẹ ma na ko jlo nado nọ Diotlefe dè eyin enẹ tlẹ yọnbasi. Ewọ nọ jlo na tin to otẹn tintan mẹ to agun mẹ, bo ma nọ kẹalọyi nudepope sọn Johanu dè po sisi po, podọ e nọ to ohó mẹhẹngble tọn lẹ dọ pé gando Johanu po mẹdevo lẹ po go. Dile etlẹ yindọ Johanu ma ylọ Diotlefe dọ mẹplọntọ lalo gbede, e nọ to nukundiọsọ aṣẹpipa apọsteli lọ tọn. Ojlo Diotlefe tọn nado diyin gọna walọ jijọ-madi-Klistiani tọn etọn fọ́n ayihaawe dote gando nugbonọ-yinyin etọn go. Apajlẹ Diotlefe tọn do lehe nukunkẹnnọ po goyitọ lẹ po sọgan tẹnpọn nado hẹn kinklan wá agun de mẹ do hia. Enẹwutu, Johanu dọna Gaiu podọ to aliho he gbloada mẹ na dopodopo mítọn dọmọ: “Ma hodo apajlẹ nuhe yin oylan tọn blo.”—3 Joh. 11.

To vogbingbọn mẹ na Diotlefe, Johanu donù Demetliu go taidi Klistiani apajlẹ dagbenọ de. Johanu wlan dọmọ: “[Yè] ko dekunnu dagbe gando Demetliu go. Na nugbo tọn, mílọsu ga to kunnude gando ewọ go, podọ hiẹ yọnẹn dọ nugbo wẹ kunnudide mítọn.” (3 Joh. 12) E sọgan ko yindọ Demetliu do hudo alọgọ Gaiu tọn, podọ apọsteli lọ sọgan ko kàn wekanhlanmẹ Atọ̀ntọ etọn nado do mẹhe Demetliu yin hia bo na kunnudide gandego. Demetliu lọsu wẹ na ko hẹn wekanhlanmẹ lọ yì na Gaiu. Taidi mẹhe Johanu dohlan de, kavi vlavo nugopọntọ tomẹyitọ de, Demetliu lọsu na ko hẹn nuhe Johanu kàn họnwun.

Naegbọn Johanu do na tuli Gaiu nado to johẹmẹ dohia to whenuena e yindọ e ko nọ wàmọ? Be Johanu mọdọ emi dona gọalọna Gaiu nado wleawuna adọgbigbo dogọ wẹ ya? Be apọsteli lọ to nuhà dọ Gaiu sọgan wá whleawu, na Diotlefe to tintẹnpọn nado yàn Klistiani johẹmẹtọ lẹ sọn agun lọ mẹ wutu wẹ ya? Depope he whẹho lọ yin, Johanu vọ́ jide na Gaiu dọmọ: “Mẹhe nọ wà dagbe wá sọn Jiwheyẹwhe dè.” (3 Joh. 11) Whẹwhinwhẹ́n titengbe de wẹ ehe yin nado nọ wà dagbe bosọ to mọwà zọnmii.

Be wekanhlanmẹ Johanu tọn whàn Gaiu nado to johẹmẹ dohia zọnmii ya? Nugbo lọ dọ wekanhlanmẹ Atọ̀ntọ Johanu tọn yin hihla dai do kandai Biblu tọn mẹ nado sọgan  na tuli mẹdevo lẹ nado “nọ hodo apajlẹ nuhe yin dagbe tọn,” dohia dọ e wàmọ nugbo.

Mí ma yọ́n nususu gando mẹmẹsunnu vivẹ́ mítọn Gaiu go. Etomọṣo, onú kleun he mí yọnẹn gando gbẹzan etọn go sọgan plọn mí nususu.

Tintan, susu mítọn wẹ wá yọ́n nugbo lọ, na omẹ nugbonọ delẹ ze yede jo nado basi gbejizọnlin bo hẹn nugbo lọ zun yinyọnẹn na mí wutu. Nugbo wẹ dọ to egbehe, e ma yin Klistiani lẹpo wẹ nọ zingbejizọnlin gaa lẹ na wẹndagbe lọ tọn wutu. Etomọṣo, taidi Gaiu, mí sọgan wà nue go mí pé nado nọgodona mẹhe nọ basi gbejizọnlin lẹ, vlavo nugopọntọ lẹdo tọn lẹ po asi yetọn lẹ po, bo nọ na yé tuli. Kavi mí sọgan nọ do godonọnamẹ nujọnu tọn hia Klistiani hatọ he sẹtẹn nado sẹ̀n to fie nuhudo wẹnlatọ Ahọluduta lọ tọn sù taun te lẹ, vlavo yì awà devo ji to otò yetọn mẹ kavi yì otò devo mẹ. Enẹwutu, mì gbọ mí ni nọ “hodo aliho johẹmẹ tọn.”—Lom. 12:13; 1 Tim. 5:9, 10.

Awetọ, e ma dona paṣa mí, eyin nukundidiọsọ aṣẹpipa wá fọ́n to agun mẹ to egbehe. Aṣẹpipa Johanu tọn yin nukundiọsọ; podọ apọsteli Paulu tọn ga. (2 Kọl. 10:7-12; 12:11-13) Ṣigba, nawẹ mí dona yinuwa gbọn eyin mí pehẹ nuhahun dopolọ to agun mẹ? Paulu na ayinamẹ Timoti dọmọ: “Afanumẹ Oklunọ tọn ma dona nọ hoavùn, ṣigba ewọ dona nọ wà dẹẹdẹ hlan mẹlẹpo bo pegan nado plọnmẹ bosọ nọ duto ede ji to whenue yè ṣinuwa do e bo nọ yí walọmimiọn do plọn mẹhe ma tindo ayilinlẹn dagbe lẹ.” Eyin mí hẹn walọmimiọn go to whenue yè hẹn homẹgble mí, delẹ to nukundiọsọmẹtọ mítọn lẹ mẹ sọgan yin whinwhàn vudevude nado diọ. To godo mẹ, Jehovah “sọgan na yé lẹnvọjọ he nọ planmẹ jẹ oyọnẹn he pegan nugbo tọn kọ̀n.”—2 Tim. 2:24, 25.

Atọ̀ntọ, mí dona nọ yọ́n pinpẹn Klistiani hatọ he nọ sẹ̀n Jehovah po nugbonọ-yinyin po mahopọnna nukundiọsọmẹ lẹ tọn, bo nọ pà yé po zohunhun po na nugbonọ-yinyin yetọn. E họnwun dọ Johanu na tuli Gaiu bo vọ́ jide na ẹn dọ nuhe sọgbe wà wẹ e te. Mọdopolọ to egbehe, mẹho lẹ dona nọ hodo apajlẹ Johanu tọn bo nọ na tuli mẹmẹsunnu po mẹmẹyọnnu yetọn lẹ po, ehe na zọ́n bọ “onú ma na ṣikọna yé.”—Isa. 40:31; 1 Tẹs. 5:11.

Hogbe Glẹkigbe tọn 219 poun wẹ wekanhlanmẹ Johanu tọn hlan Gaiu bẹhẹn, podọ owe ehe wẹ owe Biblu tọn he whè hugan. Etomọṣo, nuhọakuẹ wẹ owe ehe yin na Klistiani lẹ to egbehe.