SI Gayo kag ang iban pa nga Cristiano sang unang siglo nakaatubang sing mga kabudlayan. Ang mga nagapalapta sing butig nga mga panudlo nagtinguha nga paluyahon kag bahinbahinon ang mga kongregasyon. (1 Juan 2:18, 19; 2 Juan 7) Ang isa ka lalaki nga si Diotrefes nagpalapta sing “malain nga sugilanon” parte kay apostol Juan kag sa iban pa. Nagpangindi man sia nga abiabihon ang nagalakbay nga mga Cristiano kag nagtinguha nga hayluhon ang iban nga sundon ang iya ginahimo. (3 Juan 9, 10) Amo sini ang sitwasyon sang magsulat si Juan kay Gayo. Ang sulat sang apostol, nga ginsulat sang mga 98 C.E., makita sa Cristianong Griegong Kasulatan bilang “Ang Ikatlo nga Sulat ni Juan.”

Wala sapayan sang mga kabudlayan nga naatubang ni Gayo, padayon sia nga nag-alagad sing matutom kay Jehova. Paano niya ginpakita ang iya katutom? Ngaa gusto naton ilugon ang maayo nga halimbawa ni Gayo subong? Paano kita mabuligan sang sulat ni Juan nga mahimo ini?

Ang manunulat sang Ikatlong Juan nagtawag sang iya kaugalingon nga “tigulang nga lalaki.” Para sa gintudluan ni apostol Juan kag pinalangga nga si Gayo, bastante na ini nga paglaragway para mahibaluan niya nga si Juan ang nagsulat sini. Gintawag sia ni Juan nga “hinigugma nga si Gayo, nga ginahigugma ko gid.” Dayon ginpabutyag ni Juan nga kuntani maayo man ang panglawas ni Gayo pareho sang iya espirituwal nga kahimtangan. Dalayawon gid nga pagpalangga kag komendasyon!—3 Juan 1, 2, 4.

Mahimo nga isa ka manugtatap sa kongregasyon si Gayo, pero wala ini ginasiling sang sulat. Gindayaw ni Juan si Gayo bangod ginpadayon niya ang mga kauturan sa iya balay bisan pa indi niya sila kilala. Para kay Juan, pamatuod ini sang katutom ni Gayo, kay ang mga alagad sang Dios kilala sa ila pagkamaabiabihon.—Gen. 18:1-8; 1 Tim. 3:2; 3 Juan 5.

Ang pagdayaw ni Juan sa pagkamaabiabihon ni Gayo sa mga kauturan nagapakita nga ang mga Cristiano regular nga nagalakbay pakadto sa iban nga kongregasyon. Ang iban nga nagalabay sa ginateneran ni apostol Juan nagasugid sa iya sang ila mga eksperiensia. Mahimo nga paagi sa sini nakabaton si Juan sing balita parte sa sini nga mga kongregasyon.

Mas gusto sang nagalakbay nga mga Cristiano nga magdayon sa ila masigkatumuluo. Malain ang reputasyon sang mga dalayunan, indi maayo ang serbisyo, kag lapnag ang imoral nga mga buhat. Gani, kon posible, ang  nagahalong nga mga manuglakbay nagadayon sa ila mga abyan; kag ang nagalakbay nga mga Cristiano nagadayon sa ila mga kauturan.

Ginpalig-on ni Juan si Gayo nga magpakita liwat sang pagkamaabiabihon, kay ginpangabay sia sang apostol nga ‘buligan ang mga nagalakbay sa paagi nga makapahalipay sa Dios.’ Buot silingon, buligan niya ang mga bisita para makapadayon sa ila paglakbay kag amanan sila sang tanan nila nga kinahanglanon para makalab-ot sila sa ila masunod nga kaladtuan. Ginhimo na ini ni Gayo sa mga bisita niya sang una, kay ginsugid nila kay Juan ang parte sa gugma kag pagtuo ni Gayo.—3 Juan 3, 6.

Ang mga bisita mahimo mga misyonero, mga tiglawas ni Juan, ukon nagalakbay nga mga manugtatap. Nagalakbay sila tungod sa maayong balita. Si Juan nagsiling: “Nagalakat sila tungod sa iya ngalan.” (3 Juan 7) Bag-o lang ginsambit ni Juan ang parte sa Dios, (tan-awa ang bersikulo 6), gani ang dinalan nga “tungod sa iya ngalan” mahimo gid nga nagapatuhoy sa ngalan ni Jehova. Gani, ini nga mga kauturan mga miembro sang Cristianong kongregasyon kag dapat sila abiabihon. Subong sang ginsulat ni Juan: “Obligado kita nga abiabihon ang amo sina nga mga tawo, agod mangin mga masigkamanugpangabudlay kita sa kamatuoran.”—3 Juan 8.

Nagsulat si Juan kay Gayo indi lang agod pasalamatan sia. Gusto man ni Juan nga buligan sia sa isa ka serioso nga problema. Isa ka miembro sang Cristianong kongregasyon nga si Diotrefes ang indi luyag nga abiabihon ang nagalakbay nga mga Cristiano. Gintinguhaan pa gani niya nga punggan ang iban nga mangin maabiabihon.—3 Juan 9, 10.

Indi gid gusto sang matutom nga mga Cristiano nga magdayon sa balay ni Diotrefes bisan pa posible ini. Kay man, luyag niya nga magpulupangulo sa kongregasyon, wala niya ginabaton nga may pagtahod ang tanan nga halin kay Juan, kag nagapalapta sia sang malain nga sugilanon parte sa apostol kag sa iban. Bisan pa wala gintawag ni Juan si Diotrefes nga butig nga manunudlo, ginapamatukan niya ang awtoridad sang apostol. Maduhaduhaan ang pagkamainunungon ni Diotrefes bangod luyag niya mangin bantog kag indi maayo ang iya mga kinaiya. Ang ginhimo ni Diotrefes nagapakita nga mahimo mabahinbahin ang kongregasyon bangod sang ambisyuso kag arogante nga mga tawo. Gani ginpalig-on ni Juan si Gayo, kag lakip man kita: “Indi pag-iluga ang malain.”—3 Juan 11.

Indi pareho ni Diotrefes, ginsambit ni Juan ang isa ka Cristiano nga si Demetrio nga maayo nga halimbawa. “Maayo ang ginasugid nila tanan tuhoy kay Demetrio . . . Sa katunayan, nagapamatuod man kami tuhoy sa iya,” sulat ni Juan, “kag nakahibalo ka nga matuod ini.” (3 Juan 12) Mahimo nga kinahanglan ni Demetrio ang bulig ni Gayo, kag ang Ikatlong Juan mahimo amo ang sulat sang apostol para ipakilala kag irekomendar si Demetrio. Mahimo nga si Demetrio mismo ang nagdala sang sulat kay Gayo. Subong tiglawas ni Juan, ukon ayhan nagalakbay nga manugtatap, mahimo nga ginpamatud-an pa gid ni Demetrio ang ginsulat ni Juan.

Ngaa ginpalig-on pa ni Juan si Gayo nga padayon nga mangin maabiabihon kay ginahimo naman niya ini? Nakita bala ni Juan nga kinahanglan pabakuron ang kaisog ni Gayo? Nabalaka bala ang apostol nga basi indi na mangin maabiabihon si Gayo kay ginatinguhaan ni Diotrefes nga pahalinon sa kongregasyon ang maabiabihon nga mga Cristiano? Ano man ang rason, ginpasalig ni Juan si Gayo: “Ang isa nga nagahimo sang maayo naghalin sa Dios.” (3 Juan 11) Isa ini ka maayo gid nga rason sa paghimo sang maayo kag sa pagpadayon nga himuon ini.

Napalig-on bala si Gayo sang sulat ni Juan nga padayon nga mangin maabiabihon? Ang  katunayan nga ang Ikatlong Juan nalakip sa mga tulun-an sa Biblia kag nakalab-ot sa aton agod palig-unon ang ‘pag-ilog sa maayo’ nagapakita nga amo gid sini ang natabo.

Wala na sing dugang nga impormasyon parte sa aton pinalangga nga utod sang una nga si Gayo. Pero, madamo kita sing matun-an sa sining malip-ot nga kasaysayan sang iya kabuhi.

Una, ang kalabanan sa aton nakatuon sang kamatuoran paagi sa mga matutom nga handa sa paglakbay para ipaambit ini sa aton. Siempre, indi tanan nga miembro sang Cristianong kongregasyon subong ang nagalakbay sing malayo tungod sa maayong balita. Pero, pareho ni Gayo, mahimo naton masuportahan kag mapalig-on ang mga nagalakbay, pareho sang manugtatap sang sirkito kag iya asawa. Ukon mahimo naton masuportahan ang mga kauturan nga nagsaylo sa iban nga kongregasyon, ukon sa iban nga pungsod, para mag-alagad sa mga lugar nga nagakinahanglan sing dugang nga manugbantala sang Ginharian. Gani dapat kita “mangin maabiabihon.”—Roma 12:13; 1 Tim. 5:9, 10.

Ikaduha, indi kita dapat matingala kon may magkuestyon sa awtoridad sang mga nagapanguna sa kongregasyon, nga talagsa man lang nagakatabo. Ginkuestyon sadto ang awtoridad ni Juan kag ni apostol Pablo. (2 Cor. 10:7-12; 12:11-13) Ano dapat ang aton himuon kon may amo sini sa aton kongregasyon? Ginlaygayan ni Pablo si Timoteo: “Ang ulipon sang Ginuo indi kinahanglan makig-away, kundi kinahanglan mangin malulo sa tanan, kalipikado sa pagpanudlo, nagapugong sang kaugalingon kon nahimuan sing sala, kag nagatudlo nga may kalulo sa mga masinupakon.” Kon magpabilin kita nga kalmado bisan pa ginapakalain kita, ang pila nga nagapakalain mahimo nga amat-amat nga magbag-o. Kag “basi tugutan [ni Jehova] nga maghinulsol sila nga magadul-ong sa sibu nga ihibalo tuhoy sa kamatuoran.”—2 Tim. 2:24, 25.

Ikatlo, ang mga Cristiano nga matutom nga nagaalagad kay Jehova bisan pa sang mga pagpamatok dapat tahuron kag komendahan. Pat-od gid nga ginpalig-on ni apostol Juan si Gayo kag ginpasalig sia nga husto ang iya nga ginahimo. Gani, dapat ilugon sang mga gulang subong ang halimbawa ni Juan paagi sa pagpalig-on sa mga kauturan agod “indi [sila] paglapyuon.”—Isa. 40:31; 1 Tes. 5:11.

Sa Griego, 219 lang ka tinaga ang sulat ni apostol Juan kay Gayo kag amo ini ang pinakamalip-ot nga libro sa Biblia. Pero, mapuslanon gid ini sa mga Cristiano subong.