NEPARUBANG ta kapurueba ira da Gayo anna i tanakuan nga Cristiano turi pangurianan na ollu-siglo. Pinurueban danuri mangiwara tu falso ira nga tuttuddu nga pakkafian anna passirinnan i kongregasion. (1 Juan 2:18, 19; 2 Juan 7) Mangikagi i lalaki nga mangngagan tu Diotrefes tu “pamara-parake” meyannung kada apostol Juan anna ta tanakuan, manakina nga mamadulo ta Cristiano ira nga bisita, anna kumbinsianna i tanakuan nga tuttulan i ehemplona. (3 Juan 9, 10) Yatun i situasion turi ta nattura si Juan kani Gayo. Nitura yatun na apostol ma-98 C.E., nga mabibbig ta Griego nga Katurakan bilang “I Mekatallu nga Tura ni Juan.”

Maski anni nga problema i neparubang kani Gayo, nibala-balayunna lagapa i matalo nga passerbi kani Jehova. Kunnasina nepasingan i kinamatalona? Ngatta kayà tam nga parigan i ehemplo ni Gayo? Kunnasi makoffun nittam i tura ni Juan nga kuan yatun?

Tinukoy na nattura ta Mekatallu Juan i baggina nga “manakam.” Yatutta nammuan na meddu nga espiritual nga anana nga si Gayo nga si apostol Juan yatun. Tinukoy ni Juan si Gayo nga “kuruga iddeddukak-ku.” Tapus nitura gapa ni Juan nga magiddanama yaya nga mapia gapa nakuan i pisikal nga gawa-gawayyanna kunne na gapa ta espiritual. Anni ngana mabba kastana ta panageno anna napafutuan nga komendasion!​—3 Juan 1, 2, 4.

Awayyana nga manangngal ta kongregasion si Gayo, ngem ari nga espesipiko nga nekagi ta tura. Zinayaw ni Juan si Gayo ta pamadulona ta wawwaragi maski arianna paga ira ammammu. Nikonsidera yaw ni Juan nga pamakurug ta kinamatalo ni Gayo, megafu ta panakkilalan na aripan na Dios i pamadulo.​—Gen. 18:1-8; 1 Tim. 3:2; 3 Juan 5.

Ipasingan na pangappresia ni Juan ta pamadulo ni Gayo ta wawwaragi nga regular nga mabbisita i Cristiano ira ta lugar ni Juan anna ta kongregasion ira, anna manawag nga inistoriada kani Juan nu anni i nasingadda. Awayya nga gukabanna yaw nga makalawa si Juan tu dumug ira meyannung ta kongregasion.

Siguradu nga kayà na mabbisi-bisita ira nga Cristiano nga maddian ta kapangngurugda. Marake i reputasion anna serbisio na motel ira anna lugar yatun na imoralidad. Nu posible gafu, maddian i masirib ira nga mabbisita ta kokkofudda; i Cristiano gapa ira nga mabbisita ta balay na Cristiano ira.

Pinagaram mangana ni Juan si Gayo nga mamadulo, megafu ta kinagi na apostol sa nga ‘uffunanna ira nga mangidulo ta pabbiaheda.’ Taw nga situasion, kebalinan na pamadulo ta bisita ira nga uffunan ira para ta pakawagadda para ta tumunug nga pabbiaheda anna iyawa nira i ngamin nga kawagan adde ta makadde ira ta destinasiodda. Manawag nga kunnaw i kingngua ni Gayo ta nappasa ira nga bisitana, megafu ta nireportda kani Juan i aya anna pangurugna.​—3 Juan 3, 6.

Awayyana tu i bisita ira ay misionero, representante ni Juan, onu manangngal ira ta sirkito onu ta distrito. Maski anni paga tatun, mabbisita ira para ta mapia nga dumug. Kinagi ni Juan: “Naggannua ira nga umay masserbi kani Cristo.” (3 Juan 7) Inusa ni Juan taw i termino nga umay masserbi kani Cristo tapenu ipasingan nga yaw nga brother ira ay parte na Cristiano nga kongregasion, yatutta mepangngo ira ta mapatu nga pangalawa. Kagitta na nitura ni Juan: “Mawag gafu tu sittam nga mangurug i manguffun nira tapenu makoffun ittam gapa ta kelammuyag na kurug.”​—3 Juan 8.

Nattura si Juan kani Gayo ari laman tapenu mappabalo sa. Kayàna gapa nga moffunan yaya nga arubangan i serioso nga problema. Megafu ta egga i tadday nga miembro na Cristiano nga kongregasion nga mangngagan tu Diotrefes nga manaki mamadulo ta mabbisita ira nga Cristiano. Pinuruebanna paga nga fugaddan i tanakuan nga mamadulo.​—3 Juan 9, 10.

Siguradu nga manaki gapa na matalo ira nga Cristiano nga maddian kani Diotrefes maski posible yatun. Kayàna nga yaya laman i madumu-rumug ta kongregasion, arianna vuluvuga nga nirespeto si Juan, anna mangiwara yaya tu pamara-parake meyannung ta apostol anna ta tanakuan. Maski ari vuluvuga nga tinukoy ni Juan nga falso nga mestru si Diotrefes, ngem kontranna i autoridad na apostol ira. Makuestion i kinamatalo ni Diotrefes megafu ta pakkaragana nga mabbalin tu prominente anna ta ari maka-Cristiano nga ugalina. Masingan ta kaso ni Diotrefes i mamassirinna nga influwensia ta kongregasion na ambisioso anna arogante ira nga indibidual. Yatutta kinagi ni Juan kani Gayo anna ta kada tadday nittam gapa: “Ariam-mu nga parigan i marakay.”​—3 Juan 11.

Ari tu kagitta ni Diotrefes, tinukoy ni Juan i Cristiano nga mangngagan nga Demetrio nga mapia nga ehemplo. “Mapia i kaga-kagian na totolay meyannung kani Demetrio, . . . Pakurugak-ku gapa yaw,” nitura ni Juan, “ay ammu nu tu kurug i kagiak-ku.” (3 Juan 12) Awayyana nga mawag ni Demetrio i uffun ni Gayo, anna i Mekatallu Juan i nasserbi nga tura nga pangigafu nga palappa anna rekomendasion. Awayyana nga si Demetrio mismu i nangitulug tu tura kani Gayo. Bilang tadday nga representante ni Juan, onu mabbisita tu kongregasion, sinuportan ni Demetrio i nitura ni Juan.

Ngatta pinagaram ni Juan nga itulu-tuloy ni Gayo i mamadulo maski nu kanayunna ngana nga kuan yatun? Nasingan kari ni Juan i pakawagan nga mas pasikannan i nono ni Gayo? Mavurung kari i apostol nga mafugaddan si Gayo megafu ta purueban ni Diotrefes nga papanawan ta kongregasion i minammadulo ira nga Cristiano? Maski anni paga tatun, nipasiguradu ni Juan kani Gayo: “I sinni laman nga mangngua ta mapia ay tolay na Dios.” (3 Juan 11) Yatun i mapia nga rason ta pangngua tu mapia anna tulu-tuloy nga kuan yatun.

Napagaram kari si Gayo ta tura ni Juan nga itulu-tuloy i mamadulo? Wan, megafu ta nesali ta kanon na Biblia i Mekatallu Juan tapenu mapagaram i tanakuan nga ‘parigan i mapia.’

Baddi laman i ammu tam nga informasion meyannung ta meddu nga wagi tam gari nga si Gayo. Ngem, aru i itudduna yatun nittam tu leksion.

Ollu, aru ta nittam i nakannammu ta kinakurug megafu ta matalo ira nga sigga-paran nga mabbisita nittam tapenu mepakannammu nittam yatun. Siempre, ari tu ngamin nga miembro na moderno-aggaw nga Cristiano nga kongregasion i umay ta arayyu ira nga lugar para ta mapia nga dumug. Ngem kagitta ni Gayo, awayya tam gapa suportan anna pagaramman danuri mabbisi-bisita, nga gittana manangngal ta sirkito anna atawana. Onu mangiyawa ittam tu praktikal nga suporta ta brother anna sister ira nga nagali tu lugar ta nasiodda, onu maski ta abroad, tapenu masserbi nu sitaw dakal i pakawagan para ta mangilayyagayya ta Pappatulan. Yatutta, “padulattan nu i dayu ira.”​—Roma 12:13; 1 Tim. 5:9, 10.

Mekadua, ariattam ngana makaddag nu egga i saggi-mittan nga situasion nga egga makkuestion ta autoridad ta kongregasion. Nakuestion i autoridad ni Juan; kunnatun gapa kani apostol Pablo. (2 Cor. 10:7-12; 12:11-13) Anni gafu i reaksiottam nu meparubang ittam ta kunnatun nga mariga nga situasion ta kongregasion? Sinabarangngan ni Pablo si Timoteo: “I masserbi ta Yafu ay mawag tu ari nga makiddama. Mawag tu masippo anna mapia i akkivvulu-vulu na ta ngamin nga totolay. Mawag tu mapia anna mapasensia nga mattuddu, masippo nga mangivuya ta totolay ira nga manuria sa.” Nu mattalupaddiattam nga malumamo maski matutturia, mapaguyu i karuan nga minakkritika nga ulian i disposisiodda. Megafu tatun, “aber laman nu ipamavulun na Dios tu mabbabawi ira anna kannammuad-da i kurug.”​—2 Tim. 2:24, 25.

Mekatallu, kawagan nga ammuan anna napafutuan nga komendan danuri kapangngurug nga matalo nga nasserbi kani Jehova maski mapeppersigi. Siguradu nga pinagaram ni apostol Juan si Gayo anna nipasiguraduna nga mapia i kukukuanna. Tuttulan gapa nakuan na elder ira i ehemplo ni Juan gukaban na pamagaram ta wawwaragi tapenu ariadda “mabannag.”​—Isa. 40:31; 1 Tes. 5:11.

Egga laman i 219 nga uvovug ta Griego nga teksto na tura nga naggafu kani apostol Juan kani Gayo, yatutta yatun i pinaka-ababba nga libru ta Biblia. Ngem, talaga mabalor yatun para ta Cristiano ira ta maddaggun.