GAYO o hamwe na Akristiano arĩa angĩ maatũũraga mũthia-inĩ wa karine ya mbere nĩ maacemanagia na moritũ. Nĩ kwarĩ andũ maatheremagia morutani ma maheeni na makageria kũgayũkania ciũngano. (1 Joh. 2:18, 19; 2 Joh. 7) Mũndũ ũmwe wetagwo Diotrefe nĩ aatheremagia “ndeto njũru” ciĩgiĩ mũtũmwo Johana na andũ angĩ, akarega kũnyita ũgeni Akristiano arĩa maakoragwo thabarĩ-inĩ, na aageragia kũheenereria arĩa angĩ marũmĩrĩre kĩonereria gĩake. (3 Joh. 9, 10) Ũguo nĩguo maũndũ mahaanaga rĩrĩa Johana aandĩkĩire Gayo marũa. Marũa macio maandĩkirũo kĩndũ mwaka-inĩ wa 98 monekaga thĩinĩ wa Maandĩko ma Gĩkristiano ma Kĩngiriki, na moĩkaine ta “Marũa ma Gatatũ ma Johana.”

O na kũrĩ na moritũ macio, Gayo aathire na mbere gũtungatĩra Jehova arĩ mwĩhokeku. Onanirie atĩa atĩ aarĩ mwĩhokeku? Tũngĩenda kwĩgerekania na kĩonereria kĩa Gayo nĩkĩ ũmũthĩ? Marũa macio ma Johana mangĩtũteithia atĩa gwĩka ũguo?

Mwandĩki wa Johana wa Gatatũ eĩtaga “mũthuri mũkũrũ.” Ciugo icio ciarĩ njiganu harĩ mwana wake wa kĩĩroho, Gayo, kũmenya atĩ ũcio aarĩ mũtũmwo Johana. Johana eetire Gayo “mũrata wakwa, wee nyendete mũno.” Agĩcoka akiuga atĩ eehokaga Gayo arĩ na ũgima mwega wa mwĩrĩ o ta ũrĩa aarĩ na ũgima mwega wa kĩĩroho. Githĩ icio itiarĩ ciugo njega cia kũgaathĩrĩria?—3 Joh. 1, 2, 4.

O na gũtuĩka marũa macio matigwetete, kwahoteka Gayo aarĩ mũrori wa kĩũngano. Johana nĩ aagaathĩrĩirie Gayo nĩ ũndũ wa kũnyita ũgeni ariũ a Ithe witũ o na gũtuĩka ndaamoĩ. Johana onaga ũndũ ũcio ũkĩonania wĩhokeku wa Gayo, tondũ kũnyitana ũgeni nĩ ngumo ĩmwe ĩmenyithanagia ndungata cia Ngai.—Kĩam. 18:1-8; 1 Tim. 3:2; 3 Joh. 5.

Ciugo icio cia Johana cia gũcokia ngatho harĩ Gayo nĩ ũndũ wake gũtuga ariũ a Ithe witũ, cionanagia atĩ Akristiano nĩ maathiaga ng’endo nyingĩ gatagatĩ ga kũrĩa mũtũmwo Johana aaikaraga na ciũngano iria maathiaga, na kuonekaga atĩ arĩa maathiaga ng’endo ta icio nĩ meeraga Johana maũndũ marĩa macemania namo. Kwahoteka Akristiano acio nĩo maakinyagĩria Johana ũhoro wĩgiĩ ciũngano icio.

Hatarĩ nganja Akristiano arĩa maarĩ thabarĩ-inĩ mangĩendire gũikara kwa Akristiano arĩa angĩ. Mĩkawa yarĩ na ngumo njũru, ĩkaheana ũtungata mũũru, na nĩkuo gwekagĩrũo mĩtugo ya waganu. Kwoguo, kũngĩahotekire agendi ogĩ maaikaraga kwa arata ao, nao arĩa Akristiano magaikara kwa Akristiano arĩa angĩ.

Mũtũmwo Johana eekĩrire Gayo ngoro onanie ũtugi rĩngĩ tondũ aamũthaithire akĩmwĩra agendi ‘magĩthiĩ amarũmbũyagie na njĩra ĩngĩtĩkĩrĩka nĩ Ngai.’ Ciugo icio ‘ũmarũmbũyagie na njĩra’ cionanagia atĩ nĩ angĩamaheire kĩrĩa maabataraga makiuma kũu nĩguo mathiĩ na mbere na thabarĩ yao nginya makinye kũrĩa maathiaga. Kuonekaga atĩ Gayo nĩ aatugĩte ageni angĩ na njĩra ĩyo tondũ nĩ maatwarĩire Johana ũhoro wa wendo na wĩtĩkio wa Gayo.—3 Joh. 3, 6.

No gũkorũo agendi acio maarĩ amishonarĩ, arori arĩa magendaga, kana hihi andũ maatũmĩtwo nĩ Johana. O ũrĩa kũngĩkorũo kwarĩ, maagendaga nĩ ũndũ wa ũhoro mwega. Johana oigire ũũ: “Maathiire kũhunjia nĩ ũndũ wa rĩĩtwa rĩake.” (3 Joh. 7) Ciugo “nĩ ũndũ wa rĩĩtwa rĩake” ciaragia ũhoro wa rĩĩtwa rĩa Jehova tondũ mũhari-inĩ wa 6 Johana aakoretwo agweta Ngai. Kwoguo ariũ a Ithe witũ acio maarĩ a kĩũngano gĩa Gĩkristiano, na nĩ ũndũ ũcio nĩ maabataraga gũtugwo wega. Nĩ ta ũrĩa Johana aandĩkire: “Nĩ twagĩrĩirũo gũtugaga andũ ta acio, nĩguo tũnyitanagĩre nao wĩra-inĩ wa ũhoro ũrĩa wa ma.”—3 Joh. 8.

Johana ndaandĩkagĩra Gayo no getha tu amũcokerie ngatho. Nĩ eendaga kũmũteithia kũhiũrania na ũndũ mũritũ. Nĩ ũndũ wa gĩtũmi kĩna, mũndũ ũmwe warĩ kĩũngano-inĩ gĩa Gĩkristiano wetagwo Diotrefe ndeendaga gũtuga Akristiano arĩa maagendaga. O na nĩ aageragia gũkaania arĩa angĩ gũtugana.—3 Joh. 9, 10.

Hatirĩ nganja atĩ Akristiano ehokeku matingĩendire gũikara kwa Diotrefe o na kũngĩahotekire. Nĩ eendete gũkoragwo arĩ wa mbere gatagatĩ-inĩ ka andũ arĩa angĩ thĩinĩ wa kĩũngano, gũtirĩ ũndũ aamũkagĩra na gĩtĩo kuuma kũrĩ mũtũmwo Johana, na aatheremagia ndeto njũru ciĩgiĩ mũtũmwo Johana na andũ angĩ. O na gũtuĩka Johana ndaamwĩtire mũrutani wa maheeni, Diotrefe nĩ aareganaga na ũnene wa mũtũmwo Johana. Mwerekera ũcio wa Diotrefe ũtaarĩ wa Gĩkristiano, na wa kwĩrirĩria ũnene na igweta nĩ watũmaga wĩhokeku wake wĩkĩrĩrũo nganja. Ũhoro ũcio wa Diotrefe wonanagia ũrĩa andũ arĩa meyendagĩra maũndũ manene na makoragwo na mwĩtĩo mangĩgayũkania kĩũngano. Nĩkĩo Johana eerire Gayo o hamwe na o ũmwe witũ ũũ: “Ndũkegerekanie na andũ arĩa mekaga maũndũ moru.”—3 Joh. 11.

Ngũrani na Diotrefe, Mũkristiano ũngĩ wĩtagwo Demetrio nĩ agwetetwo nĩ Johana arĩ kĩonereria kĩega. Johana aandĩkire ũũ: “Demetrio nĩ agaathĩrĩirio . . . O na ithuĩ nĩ tũrutaga ũira igũrũ rĩake, na nĩ mũĩ atĩ ũira ũrĩa tũrutaga nĩ wa ma.” (3 Joh. 12) No gũkorũo Demetrio nĩ aabataraga ũteithio wa Gayo na marũa macio ma Johana wa Gatatũ maarĩ ma kũmũmenyithania na ma kũmũgaathĩrĩria. Kwahoteka Demetrio o na nĩwe watwarĩire Gayo marũa macio. Arĩ ta ũmwe wa arĩa maatũmagwo nĩ Johana, kana hihi mũrori ũrĩa ũgendaga, kwahoteka nĩ eekĩraga hinya ciugo iria Johana aandĩkĩte.

Nĩ kĩĩ gĩatũmire Johana ekĩre Gayo ngoro athiĩ na mbere kuonania ũtugi o na gũtuĩka nĩ eekaga ũguo? Hihi Johana nĩ kuona onete harĩ na bata gũteithia Gayo agĩe na ũmĩrĩru makĩria? Hihi Johana eetigĩraga atĩ Gayo no age gũtugana tondũ Diotrefe nĩ aageragia kũingata Akristiano arĩa monanagia ũtugi kĩũngano-inĩ? O ũrĩa kũngĩkorũo kwarĩ, Johana omĩrĩirie Gayo na ciugo ici: “Mũndũ ũrĩa wĩkaga maũndũ mega oimanĩte na Ngai.” (3 Joh. 11) Kĩu nĩ gĩtũmi kĩega mũno gĩa gũthiĩ na mbere gwĩkaga wega tũtegũtigithĩria.

Hihi marũa macio ma Johana nĩ meekĩrire Gayo ngoro athiĩ na mbere kuonania ũtugi? Gũkorũo atĩ marũa macio ma Johana wa Gatatũ marĩ Bibilia-inĩ na nĩ maathire na mbere kũhũthĩrũo gwĩkĩra andũ angĩ ngoro ‘megerekanagie na arĩa mekaga maũndũ mega,’ kuonanagia atĩ marũa macio nĩ meekire ũguo.

Gũtirĩ ũhoro ũngĩ ũĩkaine wĩgiĩ mũrũ wa Ithe witũ Gayo. O na kũrĩ ũguo, ũhoro ũcio mũnini twamenya ũmwĩgiĩ no ũtũrute maũndũ maigana ũna.

Ũndũ wa mbere, na njĩra ĩmwe kana ĩngĩ, ũmenyo ũrĩa tũrĩ naguo wa ũhoro wa ma watũkinyĩire nĩ ũndũ wa andũ ehokeku arĩa meerutĩire gũthiĩ thabarĩ nĩguo matũmenyithie ũhoro ũcio. Nĩ ma, ũmũthĩ ti andũ othe thĩinĩ wa kĩũngano gĩa Gĩkristiano mathiaga kũndũ kũraya nĩ ũndũ wa gũtwara ũhoro ũrĩa mwega. O na kũrĩ ũguo, o ta Gayo, na njĩra ĩmwe kana ĩngĩ, no tũnyite mbaru na twĩkĩre ngoro arĩa magendaga, hihi ta mũrori wa mũthiũrũrũko na mũtumia wake. Kana hihi no tũhote gũteithĩrĩria aarĩ na ariũ a Ithe witũ arĩa mathamagĩra gĩcigo-inĩ kĩngĩ bũrũri-inĩ wao, kana nja wa bũrũri wao, nĩguo matungate kũrĩa kũrĩ na bata mũnene wa ahunjia. Kwoguo rekei tũnyitage “andũ ũgeni hingo ciothe.”—Rom. 12:13; 1 Tim. 5:9, 10.

Ũndũ wa kerĩ, tũtibatiĩ kũmaka tũngĩona rĩmwe na rĩmwe andũ marokĩrĩra ũtongoria ũrĩa ũrĩ ho ciũngano-inĩ ũmũthĩ. Ũnene wa Johana na wa mũtũmwo Paulo nĩ wokĩrĩirũo. (2 Kor. 10:7-12; 12:11-13) Twagĩrĩirũo gwĩka atĩa tũngĩcemania na andũ ta acio marokĩrĩra ũnene ũrĩa ũrĩ ho kĩũngano-inĩ? Paulo aaheire Timotheo ũtaaro ũyũ: “Ngombo ya Mwathani ndĩagĩrĩirũo kũrũa, no yagĩrĩirũo gũkorũo ĩrĩ hooreri kwerekera andũ othe, ĩrĩ na ũhoti wa kũrutana, ĩkegirĩrĩria rĩrĩa yahĩtĩrio, ĩgĩtaaraga arĩa matarĩ na mwerekera mwega ĩrĩ na ũhooreri.” Rĩrĩa tuonania ũhooreri o na rĩrĩa tũhĩtĩirio, no tũtũme andũ amwe marĩ na mwerekera wa kũmenereria macenjie muonere wao o kahora. Na njĩra ĩyo, Jehova no “atũme merire nĩguo magĩe na ũmenyo ũrĩa wa ma.” —2 Tim. 2:24, 25.

Ũndũ wa gatatũ, Akristiano arĩa maratungatĩra Jehova marĩ ehokeku o na magĩcemanagia na ũkararia nĩ magĩrĩirũo gũtĩo na kũgathĩrĩrio nĩ ũndũ wa wĩhokeku wao. Mũtũmwo Johana nĩ eekĩrire Gayo ngoro na akĩmũmĩrĩria akĩmwĩra atĩ eekaga ũrĩa kwagĩrĩire. O ũndũ ũmwe na ũcio, athuri a ciũngano magĩrĩirũo kũrũmĩrĩra kĩonereria kĩa Johana na mekĩrage ngoro aarĩ na ariũ a Ithe witũ ‘matikanoge.’—Isa. 40:31; 1 Thes. 5:11.

Kũringana na rũthiomi rwa Kĩngiriki, marũa macio ma Johana kũrĩ Gayo makoragwo na ciugo 219, kwoguo magathondeka ibuku rĩrĩa inini mũno thĩinĩ wa Bibilia. O na kũrĩ ũguo, nĩ ibuku rĩa bata mũno harĩ Akristiano ũmũthĩ.