ГАЙОС у Мәсиһийед дьн йед ԛьрʹна йәке рʹасти чәтьнайа һатьн. Щьватеда һьнәка һинкьрьнед ԛәлп бәла дькьрьн, сәва кӧ щьват сьст бә у пʹарәвәбә (1 Йуһʹн. 2:18, 19; 2 Йуһʹн. 7). Дийотрәфис нава щьватеда «хәйба» Йуһʹәннайе шанди у йед дьн дькьр. Әԝи Мәсиһийед рʹеԝирʹа йед кӧ мьзгини бәла дькьрьн, меванһʹьзи нәдьда кʹьфше у һьн жи рʹийа йед дьн дьгьрт ԝәки әԝана жи хушк-бьра ԛәбул нәкьн (3 Йуһʹн. 9, 10). Ԝи һʹалида Йуһʹәнна нәʹмә ньвиси Гайосрʹа. Йуһʹәнна әԝ нәʹмә ԝәкә сала 98 Д.М. ньвиси, у Ньвисаред Йунанида әв те навкьрьне «Нәʹма Йуһʹәннайә Сьсийа».

Нава ԝан чәтьнайада, Гайос бь амьни Хԝәдерʹа хьзмәт дькьр. Ле гәло әԝи амьнийа хԝә ча да кʹьфше? Чьда әм дькарьн чʹәʹв бьдьнә Гайос? У ве йәкеда нәʹма Йуһʹәнна ча али мә дькә?

Йуһʹәнна нәʹма хԝәйә сьсийада хԝә нав кьрьбу ча «бәрпьрсийар». Гайос дәрберʹа фәʹм кьр ԝәки әԝ Йуһʹәнна йә кӧ жерʹа ньвисийә, чьмки Йуһʹәнна али Гайос кьр кӧ рʹастийе нас кә. Йуһʹәнна бь дьл у әшԛ нәʹмеда дьньвисә Гайосе дәлал, «кʹижани кӧ әз бь рʹастийе һʹьз дькьм». Паше Йуһʹәнна гот, кӧ баԝәр ә ԝәки сьһʹәт-ԛәԝата ԝийә физики жи баш ә, чаԝа сьһʹәт-ԛәԝата ԝийә рʹӧһʹани. Рʹасти жи гьлийед чьԛас хԝәш у ширьн ьн! (3 Йуһʹн. 1, 2, 4)

Дьԛәԝьмә Гайос бәрпьрсийаре щьвате бу, ле нәʹмәкеда әԝ йәк найе готьне. Йуһʹәнна пʹайе Гайос да бона меванһʹьзийа ԝи һьндава хушк-бьра, һәла һе һьндава йед нәнас жи. У әԝи гот кӧ бь ве йәке амьнийа Гайос те кʹьфше, чьмки меванһʹьзи әԝ һʹӧнӧр ә, бь кʹижани тʹьме хьзмәткʹаред Хԝәде әʹйан дьбьн (Дәстп. 18:1-8; 1 Тимтʹ. 3:2; 3 Йуһʹн. 5).

Жь гьлийед Йуһʹәнна те кʹьфше, ԝәки Мәсиһийа тʹьме рʹеԝити дькьрьн щийе Йуһʹәнна дьма у незики щьвата. Әԝ хушк-бьра һьлбәт ԝе Йуһʹәннарʹа гьли кьрана кӧ рʹасти чь чәтьнайа һатьнә. Дьԛәԝьмә кӧ бь сайа ве йәке Йуһʹәнна дәнг у бәса педьһʹәсийа дәрһәԛа ԝан щьвата.

Һьлбәт Мәсиһийед рʹеԝи ԝе бьхԝәстана щәм хушк-бьра бьмана, чьмки отелада хьраби дьһатә кьрьне у бенамуси бәлабуйи бу. Фәʹмдари йә йед кӧ рʹеԝити дькьрьн, һәрге һәвалед ԝан һәбуна, ԝе  щәм һәвалед хԝә бьмана, ле Мәсиһи щәм Мәсиһийа дьман.

Йуһʹәнна Гайос һелан кьр, ԝәки диса меванһʹьзийе бьдә кʹьфше, чьмки әԝи жь ԝи һиви кьр кӧ ԝан рʹеԝийа ӧса вәрʹекә «чаԝа кӧ ль Хԝәде хԝәш те». Вәрʹекьрьна мевана дьһатә һʹәсабе кӧ һазьр кьн чь кӧ бона рʹекʹәтьна ԝан у рʹева ԝанрʹа лазьм ә, сәва бьгьһижьнә щийед хԝә. Те кʹьфше кӧ Гайос ида ӧса кьрьбу бона меванед пешийа ԝан, чьмки әԝ йәк гьһиштә гӧһе Йуһʹәнна кӧ Гайос ча бь һʹьзкьрьн әԝана ԛәбул кьрьбун у баԝәрийа ԝи чьԛас ԛайим ә (3 Йуһʹн. 3, 6).

Меван дьбәкә мисйонер бун, йан аликʹарчийед Йуһʹәнна, йан жи бәрпьрсийаред рʹеԝи бун. Фьрԛи тʹӧнә әԝана кʹе бун, ԝана рʹеԝити дькьр сәва мьзгинийе бәла кьн. Йуһʹәнна гот: «Әԝана бона наве Мәсиһ кʹәтьнә рʹе» (3 Йуһʹн. 7). Әв гьлийед Йуһʹәнна «әԝана бона наве Мәсиһ кʹәтьнә рʹе», дьдә кʹьфше кӧ әԝ хушк-бьра жь щьвата Мәсиһи бун, у әԝана һежа бун кӧ ԝана бь дьл у әшԛ ԛәбул кьн. Ләма Йуһʹәнна гьлийед ӧса ньвиси: «Аԝа әм гәрәке йед ӧса ԛәбул кьн, кӧ әм тʹәви шьхӧле рʹастийе бьн» (3 Йуһʹн. 8).

Йуһʹәнна нә тʹәне бона пʹайидайине Гайосрʹа ньвиси, әԝи ӧса жи дьхԝәст чәтьнайа мәзьнда али ԝи бькә. Бьраки бь наве Дийотрәфис нәдьхԝәст Мәсиһийед рʹеԝирʹа меванһʹьзийе бьдә кʹьфше. Әԝи һәла һе рʹе хушк-бьред дьн жи дьгьрт, сәва ԝан мевана ԛәбул нәкьн (3 Йуһʹн. 9, 10).

Бешьк, тʹӧ Мәсиһи ԝе нәхԝәста щәм Дийотрәфис меван бьминә. Щьватеда әԝи хԝә сәр йед дьнрʹа дьгьрт, у Йуһʹәнна жи дәрһәԛа ԝи тьштед ԛәнщ нә гот. Һьн жи Дийотрәфис бь һʹәмде хԝә тьштед хьраб дьгот сәр Йуһʹәнна у йед дьн. Йуһʹәнна сәр Дийотрәфис нә гот кӧ әԝ дәрсдаре ԛәлп ә, ле әԝи наве Йуһʹәнна шанди дехьст. Дийотрәфис пәй наве хԝә дькʹәт у ньһерʹандьна ԝийә нәрʹаст, амьнийа ԝи дькьрә бьн шьке. Сәрһатийа Дийотрәфис нишан дькә, ԝәки щьватеда дькарә тьштәки ӧса бьԛәԝьмә, кӧ мәрьвед хԝәһʹьз у бабах шәрʹ-дәʹԝа бькьнә нава щьватеда. Ләма жи Йуһʹәнна готә Гайос: «Чʹәʹв нәдә хьрабийе». Әԝ ширәт ӧса жи бона мә йә (3 Йуһʹн. 11).

Йуһʹәнна нәʹма хԝәда ӧса жи дәрһәԛа бьраки ԛәнщ ньвиси, кӧ наве ԝи Димитрийо бу. Әԝ бьра мина Дийотрәфис нибу. Йуһʹәнна дәрһәԛа ԝи ньвиси: «Бона Димитрийо һʹәму жи шәʹдәтийа ԛәнщ дьдьн . . . Әм жи шәʹдәтийе дьдьн у тӧ зани кӧ шәʹдәтийа мә рʹаст ә» (3 Йуһʹн. 12). Дьбәкә Димитрийорʹа аликʹарийа Гайос лазьм бу, у Йуһʹәнна ве нәʹма хԝәйә сьсийада, Гайосрʹа дәрһәԛа Димитрийо гьли кьр у пʹайе ԝи да. Дьбәк Димитрийо хԝәха әԝ нәʹмә да Гайос. Йан дьбәк Йуһʹәнна ԝи шанд, йан жи дьбәкә әԝ бәрпьрсийаре рʹеԝи бу, у дьбәкә чь кӧ Йуһʹәнна ньвисибу, Димитрийо һе зәлал Гайосрʹа шьровәкьр.

Гәло чьрʹа Йуһʹәнна Гайос ширәт кьр ԝәки бәрдәԝам кә меванһʹьз бә, нә ахьр әԝ ида йәки ӧса бу? Дьбәкә Йуһʹәнна дьхԝәст кӧ Гайос ԛәԝи кә. Йан жи дьбәкә шанди бәрхԝә дькʹәт ԝәки Гайос хԝә паш хә у меванһʹьзийе нәдә кʹьфше, чьмки ве йәкеда щьватеда Дийотрәфис рʹе хушк-бьра дьгьрт. Чь жи һәбә, Йуһʹәнна дьл да Гайос кӧ жерʹа гот: «Әԝе кӧ ԛәнщийе дькә, жь Хԝәде йә» (3 Йуһʹн. 11). Бәле, әԝ мәʹникә гәләк мәзьн ә ԝәки тʹьме ԛәнщийе бькьн.

Гәло нәʹма Йуһʹәнна Гайос һелан кьр ԝәки бәрдәԝам кә меванһʹьз бә? Бь рʹастийе әԝ нәʹма Йуһʹәннайә Сьсийа Кʹьтеба Пирозда һатә хԝәйкьрьне у бона мәрьвед  майин жи ширәт ә сәва чʹәʹв бьдьнә «ԛәнщийе».

Әм зедә тьштәки ньзаньн дәрһәԛа бьрайе дәлал Гайос, ле чь кӧ әм заньн дькарә гәләк тьшт мә һин кә.

Йа пешьн, гәләк жь мә һатьнә сәр рʹийа рʹастийе бь аликʹарийа ԝан хушк-бьред амьн, йед кӧ бь дьл у щан рʹеԝити дькьрьн сәва рʹастийе бьгьһиньнә мә. Иро нә һʹәму Мәсиһи рʹийа гәләк дур дьчьн, сәва мьзгинийе бәла кьн. Ле әм мина Гайос дькарьн аликʹарийе у дьл бьдьнә ԝан хушк-бьра йед кӧ рʹеԝитийе дькьн, мәсәлә бәрпьрсийаред мьһале у жьнед ԝан. Йан жи әм дькарьн кʹомәке бьдьнә ԝан хушк-бьра, йед кӧ дәрбази шәһәрәки дьн йан һәла һе ԝәлате хәриб бунә, кʹидәре кӧ һʹәԝщәтийа мьзгинвана һәйә. Ԝәрә әм тʹьме «пәй меванһʹьзийе бьн» (Рʹом. 12:13; 1 Тимтʹ. 5:9, 10).

Йа дӧда, әм гәрәке әʹщебмайи нәминьн һәрге щьватеда щара ԛәдьре кәсәки дехьн. Бьраки ԛәдьре Йуһʹәнна дехьст у Паԝлос жи рʹасти ве чәтьнайе һат (2 Корн. 10:7-12; 12:11-13). Гәло әм ча гәрәке хԝә бьдьнә кʹьфше, һәрге щьватеда әм рʹасти ве чәтьнайе бен? Паԝлос Тимотʹейорʹа ширәтәкә ӧса да: «Ль хӧламе Хӧдан накʹәвә, кӧ шәрʹ бькә, ле һьндава һʹәмуйада бәрбьһер бә, бькарьбә һин кә у бинфьрә бә, бь ширьнайи йед мьԛабьл ширәт кә». Бәле, һәрге кәсәк мьԛабьли мә йә, ле әм хԝәгьрти нә у һерса хԝә дьгьрьн, дьле ԝан дькарә нәрм бә у һеди-һеди әԝана баш бьфькьрьн сәр мә. Ле Йаһоԝа «бәлки . . . мәщале бьдә ԝан, кӧ жь гӧнәкьрьне вәгәрʹьн у рʹастийе нас кьн» (2 Тимтʹ. 2:24, 25).

Йа сьсийа, әм гәрәке бь дьл у щан пʹайе ԝан хушк-бьра бьдьн, йед кӧ нава тәнгасийада бь амьни Йаһоԝарʹа хьзмәт дькьн. Һьлбәт Йуһʹәннайе шанди һелан да Гайос у ԝи да баԝәркьрьне, ԝәки әԝ тьштед рʹаст дькә. Иро рʹуспи гәрәке чʹәʹв бьдьнә Йуһʹәнна, кӧ хушк-бьра ԛәԝи кьн, сәва әԝана нәԝәстьн (Иша. 40:31; 1 Тʹеслн. 5:11).

Текста Йунанида, нәʹма Йуһʹәнна Гайосрʹа жь 219 хәбәра нә, у Кʹьтеба Пирозда әԝ кʹьтеб йа лапә кьн ә. Ле бона Мәсиһийа әԝ гәләк ԛимәт ә у кʹаре жи тинә.