GAIUS ọrhẹ Ilele Kristi erọrọ ọke inyikọ na, i dẹrughwaroghwu ebẹnbẹn sansan. Ihworho re yono iyono efian, i damoma rẹ aye ine fi oghalẹ rhẹ ikoko na. (1 John 2:18, 19; 2 John 7) Ọhworhare owu re se Diotrephes ọ ta erharhere ẹmro kpahen ọnyikọ John ọrhẹ awọrọ, o vwo ji rhiabọ dede Ilele Kristi ri rhiẹ ọpha ruiẹ-ẹ, nọ jeghwai riẹriẹ awọrọ nẹ aye i hẹrokelie. (3 John 9, 10) Uvwre ọke ọnana yẹ ọnyikọ John ọ ya ileta vwe Gaius. Ileta ọnyikọ John rọ yare uvwre ẹgbukpe 98 C.E., yẹ ọbe i Baibol na re se 3 John.

Udabọ ebẹnbẹn ri Gaius ọ dẹrughwaroghwu, ọ fuevwan ga i Jehova. Marhẹ yo ru djephia taghene ọ fuevwan ga i Jehova? Mesoriẹ o fo na hẹrokele udje i Gaius inyenana? Marhẹ yẹ ileta ọnyikọ John ono ru ha userhumu rẹn ọwan ru omaran?

Ohworho rọ ya John ọresa o se omayen ohworho rọ kpako ne. Ọnana nọ ha userhumu rẹn Gaius rhe taghene ọnyikọ John yọ ya ileta na. John o se i Gaius taghene ọye ohworho ro vwo ẹguọlọ kpahen omamọ. Ọnyikọ John ọ jeghwai nọ kpahen oborẹ oma i Gaius ọ havwọ, sẹ omayen ọ sasare jerẹ oborẹ ọsasare uvuẹn ukoko na. Ọnana o djephia taghene ọnyikọ John o vwo ọdamẹ kpahiẹn!—3 John 1, 2, 4.

Ọkezẹko, Gaius ọkpako ukoko ọke ọrana, ọrẹn ileta na ọ ghwai hunute yi-i. John no jiri Gaius nime, o rhiabọ dede imizu re bruie sa, dedevwo aye epha. John ọ hariẹ taghene ọnana o djephia taghene Gaius ọ fuevwan ga i Jehova, nime uruemru re rhiabọ dede epha o dje ohworho rhiẹ obọdẹn Olele Kristi.—Gen. 18:1-8; 1 Tim. 3:2; 3 John 5.

John ọ kpẹmẹ Gaius fọkiẹ uruemru ro rhiabọ dede epha. Ọnana no djephia taghene Ilele Kristi a nya uvwre ekete ọnyikọ John ọ havwọ riẹ ikoko sansan, aye na jeghwai ta rẹn ọnyikọ John kpahen oborẹ aye i rhiẹromẹrẹn. Ọkezẹko, nyoma izede ọnana yẹ ọnyikọ John o rhon iyẹnren kpahen ikoko na.

Ilele Kristi re riẹ ekete sansan, e lele Ilele Kristi erọrọ rhirhiẹ. Nime a nẹ iyẹnrẹn ibiobiomu kpahen oghwa rẹ ihworho e je edọn rhọ, aye a ha ekwakwa ibiobiomu dede epha, aye i jeghwai vwo iruemru ọfanrhiẹn. Fọkiẹ ọrana, ihworho ri vwo ẹghwanren erhe riẹ ekete erọrọ, aye ne lele igbehian aye  rhirhiẹ; Ilele Kristi ne lele Ilele Kristi erọrọ rhirhiẹ.

John o jiririe rẹn Gaius nọ rharhumu dje uruemru re dede epha phia. Ọnyikọ John ọ tare taghene ọ “ha userhumu rẹn [epha na] nẹ aye i sabu nya onya aye riaro lele oborẹ ọnọ merhen Osolobrugwẹ oma.” Ọnana o mevirhọ taghene ọnọ yẹ epha na oborẹ aye i guọlọre neneyo aye i sabu te ekete rẹ aye a nya. O mwẹro taghene Gaius o ru ọnana rẹn Ilele Kristi erọrọ ne, nime aye i nẹ iyẹnrẹn rẹn i John kpahen oborẹ Gaius ọ hẹrote aye lele kugbe esegburhomẹmro ro vwori.—3 John 3, 6. 

Epha na ina sabu rhiẹ imishọnari, ihworho ri John o dje urhomu, yanghene iniruo okinhariẹ. Kerhirhiẹ kerhirhiẹ, aye a nya onya na fọkiẹ iyẹnrẹn esiri na. Ọnyikọ John nọ tare: “Fọkiẹ odẹ ye yẹ aye a nya onya na.” (3 John 7) John ọ hunute Osolobrugwẹ uvuẹn oghwẹmro 6, omarana, odẹ ri John ọ ta kpahan na yẹ odẹ Osolobrugwẹ ro rhiẹ i Jehova. No fori ne rhiabọ dede epha enana nime aye Ilele Kristi. Ọnyikọ John nọ yare: “O fori taghene ọwan i dede epha erana, neneyo ọwan ephian i sabu rha wian kugbe uvuẹn urhomẹmro na.”—3 John 8.

Orhiẹ fọkiẹ ẹkpẹmẹ ọvo yi John ọ ya ileta vwe i Gaiusi-i. John ọ ji guọlọ ha userhumu riẹn fi ebẹnbẹn rọ dẹrughwaroghwẹ kparobọ. Fọkiẹ iroro ezẹko, Diotrephes rọ ha uvuẹn ukoko na, o vwo uruemru re dede epha-a. Nọ tobọ damoma rọ nọ dobọ awọrọ ji, nẹ aye i je rhiabọ dede epha.—3 John 9, 10.

O vwo ẹfro-o, Ilele Kristi ri fuevwan a tobọ vwo omwemẹ rẹ aye ine rhirhiẹ oghwa i Diotrephesi-i. Diotrephes ọ guọlọ ha ẹrhẹ ukaro uvuẹn ukoko na, o vwo rhiabọ dede ẹmro i John ọ ta-a, habaye, ọ ta erharhere ẹmro kpahen inyikọ na ọrhẹ awọrọ. Dedevwo ọnyikọ John o se Diotrephes oyono ofia-an, ọrẹn Diotrephes ọ vwọ nyalele oborẹ inyikọ na i tare-e. Nime Diotrephes o vwo omwemẹ rọ nọ ha ẹrhẹ rọ mai rierun uvuẹn ukoko na ọrhẹ orharhere uruemru ro vwori, ọrhọ lẹrhiẹ vwo atamwu-u. Uruemru i Diotrephes o djephia taghene uruemru omẹkpare ọrhẹ uruemru ra guọlọ ẹrhẹ rọ mai rierun, o fi oghalẹ rhẹ ukoko na. John nọ tẹmro enana rẹn i Gaius: “Wu vwa hẹrokele oborẹ obiomuru-un,” ẹmro enana i ji sekpahen ọwan inyenana.—3 John 11.

Demetrius ọ họhọ Diotrephesi-i, nime ọnyikọ John ọ tare taghene Demetrius omamọ udje. Ọnyikọ John ọ tare taghene ihworho buebun i “nẹ omamọ iyẹnrẹn kpahen i Demetrius . . . Itiọrurhomẹmro, ame e ji se oseri kpahiẹn, wu rheri taghene oborẹ ame a ta urhomẹmro.” (3 John 12) Ọnọ sabu rhirhiẹ taghene Demetrius ọ guọlọ userhumu i Gaius, John nọ nyoma ileta ya vwe i Gaius kpahen aruo ohworho i Demetrius ọ havwọ. Ọkezẹko, Demetrius ọvo yọ ha ileta na vwe i Gaius. Demetrius ọnọ sabu rhiẹ ohworho ọnyikọ John o dje urhomu yanghene oniruo okinhariẹ, Demetrius nọ jeghwai lẹrhẹ ẹmro ri John ọ yare na mwidjẹn.

Mesoriẹ i John ọ ta rẹn Gaius no rho rhiabọ dede epha, ra mẹriẹn taghene o ruie vẹrhẹ? Ọnọ sabu rhirhiẹ taghene ọ guọlọ lẹrhẹ Gaius vwo uduefigbere. Ọkezẹko, ọnyikọ John o brudu sẹ Gaius ono ti rierhumu nime Diotrephes ọ damoma ro no le ihworho ri vwo uruemru ghwologhwolo nẹ ukoko na. Kerhirhiẹ kerhirhiẹ, John ọ yẹ Gaius imwẹro nyoma ọ ta: “Ohworho ro ru oborẹ orhomurun o nẹ obẹ Osolobrugwẹ rhe.” (3 John 11) Ọnana yẹ oborẹ ọsoriẹ o fo nẹ ọwan i rhe ru oborẹ orhomurun.

Ileta i John na ọ lẹrhẹ Gaius rhe vwo uruemru re dede epha? Ee, nime John ọresa  ọ ha uvuẹn i Baibol na, inyenana, awọrọ e ji yono oborẹ aye ine ru “hẹrokele oborẹ orhomurun.”

Erhe rhon iyẹnrẹn ọrọrọ kpahen i Gaius ra ta kpahen na-a. Ọrẹn, ibiẹ ekwakwa re rhon kpahiẹn ọnọ sabu yono ọwan iyono buebun.

Ọrukaro, buebun ọwan i mẹrẹn urhomẹmro na vwrurhe nyoma ihworho ri fuevwan ga i Jehova, ri vwo omwemẹ rẹ aye ina nya ugbo oseseri nẹ aye i sabu yono ọwan. Itiọrurhomẹmro, orhiẹ Ilele Kristi ephian inyenana yi na sabu nya ugbo oseseri fọkiẹ iyẹnrẹn esiri na-a. Ọrẹn, jerẹ Gaius ọwan ina sabu hobọtua yanghene ha userhumu rẹn era nya ugbo oseseri, jerẹ iniruo okinhariẹ ọrhẹ ane aye. Yanghene ọwan ina sabu hobọtua imizu ri kwa riẹ ekete erọrọ uvuẹn ẹkwotọre aye yanghene ẹkwotọre ọrọrọ ra mai guọlọ ighwoghwẹmro Uvie na. Omarana, no fori ne vwo uruemru re dede epha.—Rom. 12:13; 1 Tim. 5:9, 10.

Ọreva, o fo no gbe ọwan unu orhianẹ imizu ezẹko a kparahaso orhienbro ekpako uvuẹn ukoko na inyenana-a. Nime a ji kparehaso orhienbro Ọnyikọ John ọrhẹ Ọnyikọ Paul uvuẹn ukoko na. (2 Cor. 10:7-12;12: 11-13) Me yo fori nẹ ọwan i ru, orhianẹ ọwan i rhiẹromẹrẹn aruo erhirhiẹ erana uvuẹn ukoko na inyenana? Paul ọ ha urhebro rẹn i Timothy: “O fo nẹ ọvrẹn Ọrovwori na ọ wọnrọ-ọn, ọrẹn o fori no ru dẹndẹn lele ihworho ephian, mwuovwan ono yono, sun omayen erhe ruie sọ, o yono eri vwe rhe te rhẹ ẹhẹn ọfọfọ.” Erhe sun oma ọwan orhianẹ e ruru ọwan sọ, ihworho ezẹko ri rhiẹ ọludu ina sabu wene bibiesuọn. Ọke ọrana, Jehova “ọnọ sabu harhomu aye nẹ aye i vwo irherhe ọgbagba ọrẹ urhomẹmro na.”—2 Tim. 2:24, 25.

Ọresa, o fori na kpẹmẹ Ilele Kristi ra fuevwan ga i Jehova udabọ ẹkparehaso. Ọnyikọ John ọ ghini ha urhebro rẹn Gaius jeghwai yẹ ye imwẹro taghene o ru oborẹ ọgbare. Omarana, o fori nẹ ekpako ukoko i ji hẹrokele udje ọnyikọ John, nyoma aye ina ha urhebro rẹn imizu ri ha uvuẹn ukoko na neneyo aye i je rhe fiobọrhotọre.—Isa. 40:31; 1 Thess. 5:11.

Uvuẹn edjadjẹ i Greek rẹ ọnyikọ John ọ ha ya ileta na vwe i Gaius, ẹmro 219 ọvo yi havwiẹ, ọye yi jeghwai ọbe rọ mai kamo uvuẹn i Baibol na. Ọrẹn, Ilele Kristi ephian a mẹrẹn erere nẹ 3 John inyenana.