SI Gayo tan saray arum ya Kristiano nen bandad sampot na inmunan siglo et dinmalan ed saray subok. Wala ray mangikakayat na palson bangat pian pakapuyen iray kongregasyon tan niwalay inkaapag-apag. (1 Juan 2:18, 19; 2 Juan 7) Sakey a lakin manngaran na Diotrefes so mangikakayat na “makaderal iran labir” nipaakar ed si apostol Juan tan ed arum ya agagi, agto labay ya parawesen iray ombiabiahen Kristiano, tan sasalien ton impluensyaan so arum ya ontan met so gawaen da. (3 Juan 9, 10) Ontan so situasyon nen sinulatan nen Juan si Gayo. Sayan sulat na apostol ya asumpal nen manga 98 C.E. et kabiangan na Kristianon Griegon Kasulatan tan tinawag ya “Komatlon Sulat nen Juan.”

Anggano dakel ya subok so dinalan nen Gayo, sikatoy nansiansian matoor ya nanlingkor ed si Jehova. Panon ton impanengneng so katooran to? Akin ya labay tayon aligen so alimbawa nen Gayo? Panon itayon natulongan na sulat nen Juan pian nagawaan itan?

Say nansulat ed Komatlon Juan et tinawag toy sarili to ya “masiken.” Lapud satan, amta lan tampol na inad-aro ton espiritual ya anak a si Gayo ya si apostol Juan so nansulat. Maar-aron tinawag nen Juan si Gayo bilang “pinablin Gayo, a peteg ya inad-arok.” Insan imbaga nen Juan ya komon ta maksil ed pisikal si Gayo a singa say espiritualidad to. Talagan maabig itan ya liknaan tan balibalin komendasyon!—3 Juan 1, 2, 4.

Nayarin sakey lan manangasikaso ed kongregasyon si Gayo, balet ag-itan abitla ed sulat. Kinomendaan nen Juan si Gayo lapud aasikasoen to ray agagi anggano agto ra kabat. Parad si Juan et prueba iya na katooran nen Gayo, lapud nabidbir iray lingkor na Dios ed inkamaparawes da.—Gen. 18:1-8; 1 Tim. 3:2; 3 Juan 5.

Saray imbaga nen Juan bilang apresasyon ed inkamaparawes nen Gayo ed saray agagi et pakapatnagan ya saray Kristiano et regular ya ombiabiahe manlapud kawalaan nen apostol Juan paonlad arum ya kongregasyon, tan mapatnag ya iistoryaen dad si Juan iray naeeksperiensya da. Nayarin diad onian paraan nababalitaan nen Juan iray nagagawa ed sarayan kongregasyon.

Seguradon mas labay na saray ombiabiahen Kristiano so ontuloy ed abung na kapanisiaan da. Saray abung ya panagpundoan et aliwliway reputasyon da, aliwan marakep so serbisyo ra, tan wadtan iray manggagawa na imoral. Kanian no posible, saray ombiabiahe et ontutuloy ed abung na kakaaro da tan saray ombiabiahen Kristiano et diad kapara dan Kristiano.

Pinaseseg nen Juan si Gayo ya ipanengneng to lamet so inkamaparawes, ta kinerew ed sikato na apostol ya saray agagin ombiabiahe et ‘pasipoten to ra diad paraan a manepeg ed Dios.’ Kaiba ed sayan pamasipot so pangiparaan na saray nakaukolan na saray bisita parad onsublay ya laen da tan pangitarya ed amin ya nakaukolan da anggad makasabi rad laen da. Mapatnag ya onia lay ginawa nen Gayo ed saray akaunan bisita to, ta imbalita da lad si Juan so panangaro tan pananisia nen Gayo.—3 Juan 3, 6.

Sarayan bisita et nayarin misionero, ibabaki nen Juan, odino ombiabiahen manangasikaso. Siopaman iraya, ombiabiahe ira nisengeg ed maong a balita. Imbaga nen Juan: “Linma ran nampulong nisengeg ed ngaran to.” (3 Juan 7) Diad akaunan bersikulo (bersikulo 6) et binitla nen Juan so Dios, kanian mapatnag ya saray balikas ya “nisengeg ed ngaran to” et ontutukoy ed ngaran nen Jehova. Saray agagi et kabiangan na Kristianon kongregasyon, kanian manepeg labat ya asikasoen iran maong. Ontan so insulat nen Juan: “Nepeg tayon ipatnag so inkamaparawes ed sarayan totoo, pian magmaliw itayon kakimeyan diad katuaan.”—3 Juan 8.

Sinulatan nen Juan si Gayo aliwa labat ya pian pisalamatan to. Labay met nen Juan ya tulongan si Gayo ed sakey ya seryoson problema. Walay membro na kongregasyon a manngaran na Diotrefes ya agto labay ya parawesen iray ombiabiahen Kristiano. Sinali to ni ingen ya pigilan so arum ya labay day mamarawes.—3 Juan 9, 10.

Agpankelawan ya aglabay na saray matoor ya Kristiano so ontuloy ed abung nen Diotrefes anggano nayari ni. Labalabay toy magmaliw ya manunaan ed kongregasyon, agto rerespetoen so antokaman ya ibabaga nen Juan, tan dederalan to so apostol tan saray arum. Anggano agtinawag nen Juan si Diotrefes ya palson managbangat, agto bibidbiren so autoridad na apostol. Lapud pirawat nen Diotrefes so magmaliw ya prominente tan lapud makapuy ya ugali to, kuestionable so katooran to. Ipapanengneng na alimbawa nen Diotrefes ya wala ray indibidual ya ambisyoso tan mapaatagey ya sasalien dan impluensyaan so arum pian niwalay inkaapag-apag ed kongregasyon. Kanian oniay bilin nen Juan ed si Gayo, tan para met iya ed kada sakey ed sikatayo: “Agmo aaligen so mauges.”—3 Juan 11.

Aliwan singa si Diotrefes, walay sakey a Kristianon maong so alimbawa to ya binitla nen Juan. Say ngaran to et Demetrio. Insulat nen Juan: “Maabig so ibabaga ran amin nipaakar ed si Demetrio . . . Diad tua et tatasian mi met so nipaakar ed sikato, tan amtam a say iiter min pantasi et tua.” (3 Juan 12) Nayarin kaukolan nen Demetrio so tulong nen Gayo, tan nayarin say Komatlon Juan ya sulat na apostol so paraan pian sikatoy nipakabat tan nirekomenda to. Posiblin si Demetrio ya mismo so angiter na sulat ed si Gayo. Bilang sakey ya ibabaki nen Juan, odino nayarin ombiabiahen manangasikaso, mapatnag ya mas impalinew nen Demetrio so labay ya ibaga nen Juan ed sulat to.

Akin et pinaseseg nen Juan si Gayo ya itultuloy toy magmaliw ya maparawes anta dati met lan ontan? Kasin anengneng nen Juan ya kaukolan ton pabiskegen si Gayo pian mas makapanpakpel? Kasin mapaga so apostol ya ompan agla itan gawaen nen Gayo ta sasalien nen Diotrefes ya ekalen ed kongregasyon iray maparawes ya Kristiano? Antokaman so situasyon, oniay impaseguro nen Juan ed si Gayo: “Samay manggagaway maong et manlalapud Dios.” (3 Juan 11) Talagan maabig itan a rason pian manggaway maong tan itultuloy ya gawaen itan.

Kasin apakiwas si Gayo ed sulat nen Juan pian mantultuloy ya maparawes? Mapatnag ya ontan so agawa lapud nagmaliw ya kabiangan na Biblia so Komatlon Juan pian napaseseg so arum ya ‘aligen so maong.’

Anggapo lay arum ya amta tayo nipaakar ed pinabli tayon agi nensaman ya si Gayo. Balet, dakel so naaralan tayon leksion ed sayan antikey ya detalye ed bilay to.

Unona, maslak ed sikatayo et akaaral met na katuaan ed saray matoor ya agagi, ya ombiabiahe pian ipaamta so katuaan. Siempre, aliwan amin ya membro na Kristianon kongregasyon natan et ombiabiahe na arawi nisengeg ed maong a balita. Balet singa si Gayo, nayari tayon suportaan tan pasesegen iray ombiabiahen agagi tayo, singa say manangasikaso na sirkito tan say asawa to. Odino nayari met ya mangiter tayoy praktikal a tulong ed saray agagin inmalis ed sananey a lugar diad mismon bansa tayo, odino ed arum ya bansa, pian manlingkor ed pasen ya mas baleg so pankaukolan parad saray manangipalapag na Panarian. Kanian komon ta ‘iyugali tayoy mamarawes.’—Roma 12:13; 1 Tim. 5:9, 10.

Komadua, agtayo pankelawan ya no maminsan diad loob na kongregasyon natan et wala ray mankuestion ed autoridad. Kinuestion so autoridad nen Juan; ontan met so autoridad nen apostol Pablo. (2 Cor. 10:7-12; 12:11-13) Anto sirin so nepeg ya reaksion tayo no wala ray ontan ed kongregasyon? Oniay bilin nen Pablo ed si Timoteo: “Say aripen na Katawan et agnepeg a mikolkol, noagta nepeg a mauyamo ed amin, kualipikadon manbangat, ag-ombabawi sano walay nanggawa na mauges ed sikato, maulimek a mangibabangat ed saramay agmipakna ed ibabaga to.” No mansiansia itayon kalmado anggan walay mamapasanok ed sikatayo, saray arum ya makritikon indibidual et nayarin napakiwas ya umanen so ugali ra. No gawaen da itan, ompan “abuloyan ira [nen Jehova] a magbabawi pian nawalaan ira na suston kakabatan ed katuaan.”—2 Tim. 2:24, 25.

Komatlo, saray agagi tayon matoor a manlilingkor ed si Jehova anggano napapasegsegang et kaukolan tayo ran apresyaen tan maaron komendaan lapud katooran da. Seguradon pinaseseg nen apostol Juan si Gayo tan pinaseguroan ton duga so gagawaen to. Ontan met, kaukolan ya aligen na saray elder natan so alimbawa nen Juan ya pasesegen da ray agagi ra pian “ag-ira nakesawan.”—Isa. 40:31; 1 Tes. 5:11.

Diad orihinal a Griegon sulat, 219 labat ya salita so inusar nen apostol Juan ed sulat tod si Gayo, kanian saya so sankatikeyan ya libro ed Biblia. Anggaman ontan, makanakana iya ed saray Kristiano natan.