NA FIN di e promé siglo, Gayo i otro kristian a haña nan ku vários difikultat. Algun miembro di e kongregashon tabata plama siñansa falsu pa purba di debilitá i dividí e kongregashon. (1 Huan 2:18, 19; 2 Huan 7) Un hòmber ku tabata yama Diótrefes tabata kana “papia malu” di apòstel Huan i otro rumannan. El a nenga di mustra hospitalidat na kristiannan ku tabata bishitá e kongregashonnan i tabata purba di konvensé otro kristiannan pa sigui su ehèmpel. (3 Huan 9, 10) Esei tabata e situashon ora Huan a skirbi Gayo. E karta ku Huan a skirbi mas o ménos na aña 98 ta den e Skritura Griego Kristian komo e “Di Tres Karta di Huan.”

Apesar di e pruebanan ku Gayo a enfrentá, el a sigui sirbi Yehova fielmente. Kon el a demostrá su fieldat? Dikon nos ke imitá Gayo su ehèmpel awe? Kon e karta di Huan por yuda nos hasi esei?

E eskritor di Tres Huan ta yama su mes “e ansiano.” Esei tabata sufisiente pa su yu spiritual stimá, Gayo, rekonos’é komo apòstel Huan. Ku kariño Huan a referí na dje komo “nos kerido ruman Gayo, ku di bèrdat mi ta stima.” Despues Huan a bisa ku el a spera ku Gayo su salú físiko tabata mes bon ku su salú spiritual. Ki un bunita elogio!—3 Huan 1, 2, 4.

Kisas Gayo tabata un superintendente di kongregashon, aunke e karta no ta bisa esei spesífikamente. Huan a elogiá Gayo pasobra el a mustra hospitalidat na e rumannan aunke e no tabata konosé nan. Huan a mira esaki komo prueba di Gayo su fieldat ya ku un di e karakterístikanan di sirbidónan di Dios ta ku semper nan ta mustra hospitalidat.—Gén. 18:1-8; 1 Tim. 3:2; 3 Huan 5.

E palabranan di apresio ku Huan a skirbi pa Gayo pa e hospitalidat ku el a mustra na e rumannan ta indiká ku e kristiannan tabata biaha regularmente entre e lugá kaminda apòstel Huan tabata keda i e kongregashonnan. I siguramente e rumannan akí tabata informá apòstel Huan di e kosnan ku nan tabata topa. Kisas ta di e manera akí Huan a bin haña sa kiko tabata pasando ku e kongregashonnan akí.

Sin duda, superintendentenan biahero lo a preferá di keda serka nan rumannan. E kasnan di hospedahe tabatin mal reputashon, e servisio tabata malu i e ambiente tabata hopi inmoral. P’esei, ora tabata posibel, biaheronan sabí tabata keda ku nan  amigunan, i un kristian lo a keda serka otro kristian.

Un bes mas apòstel Huan a animá Gayo pa mustra hospitalidat i a pidié pa manda e rumannan bai “na un manera ku ta digno pa sirbidó di Dios.” Den e kaso akí, esaki a nifiká kubri nan nesesidatnan i duna nan loke nan tabatin mester pa nan biahe te ora nan a yega nan destinashon. Tabata bisto ku Gayo a yega di hasi esaki kaba pa e rumannan ku a yega di bishitá nan promé, komo ku ta nan a bisa Huan tokante Gayo su amor i fe.—3 Huan 3, 6.

E bishitantenan por tabata misionero, superintendente biahero òf kristiannan ku Huan a manda. Sea kual sea e kaso, e rumannan tabata biaha pa motibu di e bon notisia. Huan a bisa: “Ta pa motibu di e nòmber di Dios nan a sali bai prediká.” (3 Huan 7) Pues, e rumannan a forma parti di e kongregashon kristian i tabata meresé un kaluroso bon biní. Ta manera Huan a skirbi: “Nos tin e obligashon di mustra hospitalidat na personanan asina, pa nos por bira kompañero di trabou den e bèrdat.”—3 Huan 8.

Huan a skirbi Gayo un karta no solamente pa yam’é danki, sino tambe pa yud’é atendé ku un problema serio. Pa un motibu òf otro, un miembro di e kongregashon kristian ku tabata yama Diótrefes no tabata dispuesto pa mustra hospitalidat na e rumannan ku tabata biaha. El a asta purba di stroba otro rumannan pa hasi esaki.—3 Huan 9, 10.

Sin duda, asta si tabata posibel mes, rumannan fiel lo no tabata ke keda serka Diótrefes. E tabata gusta tin e promé lugá den kongregashon, e no tabatin rèspèt pa Huan, e no tabata aseptá nada ku Huan a bisa i tabata papia malu di e apòstelnan i otro rumannan. Aunke Diótrefes tabata resistí e outoridat di Huan, nunka e apòstel no a yam’é un maestro falsu. Diótrefes su deseo pa prominensia i su aktitut ku no tabata pas pa un kristian a lanta duda den su lealtat. E kaso di Diótrefes ta mustra kon un hende ku ambishon i arogansia por trata di dividí e kongregashon. P’esei Huan a bisa Gayo i kada un di nos tambe: “No imitá loke ta malu.”—3 Huan 11.

Na kontraste ku Diótrefes, Huan a referí na un kristian ku tabata yama Demetrio, kende sí tabata un bon ehèmpel. Huan a skirbi: “Tur e rumannan ta papia bon di Demetrio . . . De echo, nos tambe ta duna testimonio di dje, i bo sa ku e testimonio ku nos ta duna ta bèrdat.” (3 Huan 12) Kisas Demetrio tabatin mester di Gayo su yudansa, i e karta di Tres Huan por a sirbi komo e karta di introdukshon i rekomendashon p’e. Kisas ta Demetrio mes mester a duna Gayo e karta. Si ta Huan a manda Demetrio òf si ta komo un superintendente biahero Demetrio a bishitá e kongregashon, muy probablemente lo el a konfirmá loke Huan a skirbi.

Dikon Huan a urgi Gayo pa sigui mustra hospitalidat aunke e tabata hasi esaki kaba? Akaso Huan a mira ku tabata nesesario pa yuda Gayo haña mas kurashi? Òf kisas e apòstel tabata preokupá ku Gayo lo a vasilá pa mustra hospitalidat ya ku Diótrefes tabata purba di saka e kristiannan ku tabata hasi esei for di e kongregashon? Sea kual sea e kaso, Huan a sigurá Gayo ora el a bisa: “Esun ku ta hasi bon ta bini di Dios.” (3 Huan 11) Esei ta un ekselente motibu pa sigui hasi loke ta bon.

E karta di Huan a motivá Gayo pa e sigui mustra hospitalidat? E echo ku e karta di  Tres Huan a bira parti di Beibel i ku e ta sigui sirbi komo un animashon pa otro kristian imitá “loke ta bon,” ta mustra nos ku esei sigur ta e kaso.

Nos no sa nada mas di nos ruman stimá Gayo. Sinembargo, e tiki ku nos a haña sa di su bida por siña nos algun kos.

Na promé lugá, te na un sierto grado, ta danki na e rumannan fiel ku tabata dispuesto pa biaha pa bin siña nos ku nos a haña e konosementu ku hopi di nos tin awe. Klaru, no ta tur miembro di e kongregashon kristian awe ta biaha distansianan leu pa motibu di e bon notisia. Pero, meskos ku Gayo, nos por apoyá e rumannan ku ta biaha i den algun manera animá nan, manera por ehèmpel e superintendente di sirkuito i su esposa. Òf kisas nos por duna yudansa práktiko na rumannan ku a muda bai sierto áreanan den nan mes pais òf a bai afó pa sirbi kaminda tin nesesidat pa mas publikadó di Reino. Pues, laga nos “sigui e kaminda di hospitalidat.”—Rom. 12:13; 1 Tim. 5:9, 10.

Na di dos lugá, nos no mester keda sorprendí si awe na algun okashon rumannan ta kuestioná outoridat den kongregashon. Tantu apòstel Huan komo apòstel Pablo su outoridat a ser kuestioná. (2 Kor. 10:7-12; 12:11-13) Pues, kon nos mester reakshoná ora nos haña nos ku difikultatnan similar den nos kongregashon? Pablo a konsehá Timoteo: “Un esklabo di Señor no tin nodi di pleita, pero e mester ta amabel ku tur hende, kapasitá pa siña otro. E mester ta un persona ku ta dominá su mes ora nan hasi malu kuné.” Si nos mantené nos mes kalmu asta ora hende provoká nos, ku tempu algun di esnan ku ta kritiká nos por kambia nan aktitut. Yehova, na su turno, “ta laga nan arepentí pa nan por yega na un konosementu eksakto di e bèrdat.”—2 Tim. 2:24, 25.

Na di tres lugá, nos mester elogiá rumannan ku ta sirbi Yehova lealmente apesar di oposishon i atmirá nan pa nan esfuerso. Apòstel Huan siguramente a animá i sigurá Gayo ku loke e tabata hasi tabata bon. Awe, di mes manera, ansianonan mester sigui Huan su ehèmpel i animá nan rumannan pa asina nan no “bira fatigá.”—Isa. 40:31; 1 Tes. 5:11.

Na griego original, e karta di Huan pa Gayo ta kontené solamente 219 palabra i ta e buki di mas kòrtiku den Beibel. Pero e ta di gran balor pa kristiannan awe.