KAIUS oh Kristian teikan ni kaimwiseklahn mwehin wahnpoaron ko lelohng kahpwal kan. Irail kan me kin koasoiaseli padahk likamw kan kin song en kaluwetehla oh katohrepeseng mwomwohdiso kan. (1 Sohn 2:18, 19; 2 Sohn 7) Ohl emen me adaneki Diohtrepihs kin nda “soahng suwed kan” duwen wahnpoaron Sohn oh meteikan, e sohte kin men sewese rie Kristian kan me seiloakla rehrail, oh kin song en kamwakid meteikan en idawehn eh mehn kahlemeng. (3 Sohn 9, 10) Ih met me wiewiawi ni Sohn eh ntinglahng Kaius. Kisinlikouo me wahnpoarono ntingihada ni mpen pahr 98, mi nan Palien Paipel ni Lokaiahn Krihk nin duwen “Kisinlikou Kesiluh Sang Sohn.”

Mendahki kahpwal kan me Kaius lelohng, e kin pousehlahte papah Siohwa ni lelepek. Ia duwen eh kasalehda eh lelepek? Dahme kahrehda kitail men alasang mehn kahlemeng en Kaius rahnwet? Ia duwen kisinlikou en Sohn eh kak sewese kitail en wia met?

Sounnting en Kesiluh en Sohn kahdaneki pein ih “me Maho.” Met itarohng rie Kristiano Kaius en pohnese me ih me wahnpoaron Sohn. Ni kadek, Sohn kahdaneki Kaius “kompoakepahi” me e kin “poakepoake mehlel.” Sohn eri kasalehda eh koapworopworki me ahn Kaius roson en kehlail duwehte eh pwoson eh kin kehlail. Ia uwen kaselel en eh koasoi ko!​—3 Sohn 1, 2, 4.

Kaius ele wia sounapwalih en mwomwohdiso, ahpw kisinlikouo sohte kasalehda ni oaritik duwen met. Sohn kapingahki Kaius eh sewese rie Kristian ko mendahki e sehse irail. Sohn kilangwohng met nin duwen mehn kadehdepen ahn Kaius eh lelepek, pwehki en kasamwo ni kadek meteikan kin ahnsou koaros wia kasalepen sapwellimen Koht ladu kan.​—Sen. 18:1-8; 1 Tim. 3:2; 3 Sohn 5.

Sohn eh kalahnganki ahn Kaius kin kasamwo ni kadek rie kan kasalehda me Kristian kan kin kalapw seiloakseli nanpwungen wasa me Sohn mie oh mwomwohdiso teikan, oh irail pwukat ele ndaiong Sohn duwen dahme kin wiawihong irail. Mwein ni ahl wet me Sohn alehdi rohng kan sang mwomwohdiso pwukat.

Kristian ko me kin seiloak uhdahn kin men mi rehn riarail ko. Ihmw kan me re anahne pwain pwehn pweidi ie kin uhdahn adsuwedkihla arail sahpis suwed oh aramas kin wiahkihla wasahn wia tiahk samin ie. Ihme kahrehda ma kak, sounseiloak kan me loalokong kin mi rehn kompoakparail kan, oh Kristian  kan me kin seiloak kin mi rehn riarail Kristian kan.

Sohn kangoange Kaius en pwurehng kasamwo rie kan ni kadek, pwehki e peki Kaius en “sewese irail pwe re en kak woneweite nan arail seiloak, ni soahng kan me Koht pahn kupwurperenki.” En sewese sounseiloak pwukat en woneweite kin wehwehki en sewesehki arail anahn kan ong arail seiloak oh kihong irail soahng koaros me re anahne lao re lel wasa me re pahn lel ie. E sansal me Kaius wiahier met mwoweo ong irail ko me e kasamwo, pwehki re padahkihong Sohn duwen eh limpoak oh pwoson.​—3 Sohn 3, 6.

Sounseiloak pwukat ele misineri kei, meninkeder kei ong Sohn, de sounapwalih kan me kin seiloak. Sohte lipilipil dah, re kin seiloakseli pwehn lohki rongamwahwo. Sohn nda: “Pwehki mwareo me re kin seiloangki.” (3 Sohn 7, NW) Eri, brother ko me kin seiloak wia kisehn mwomwohdisohn Kristian oh riarail ko anahne kasamwo irail ni kadek. Duwehte me Sohn ntingihedi: “Kitail . . . en sewese aramas pwukat, pwe kitail en wiahki ehu ni arail doadoahk en me mehlelo.”​—3 Sohn 8.

Sohn sohte ntinglahng Kaius pwehn ihte kalahngan ong ih. Sohn pil men sewese ih en dadaur pahn kahpwal laud ehu. Ahpw pwehki kahrepe kei, emen tohn mwomwohdiso me adaneki Diohtrepihs sohte men kasamwo ni kadek Kristian kan me kin seiloak. E pil song en kauhdi meteikan en kasamwo irail pwukat.​—3 Sohn 9, 10.

Kristian lelepek kan uhdahn sohte pahn men mihmi rehn Diohtrepihs mehnda ma met kak wiawi. E kin men ih me pahn keieu nan mwomwohdiso, e kin mwamwahliki Sohn, oh e kin koasoia soahng suwed kan duwen wahnpoarono oh pil wahnpoaron meteikan. Mendahki Sohn sohte kahdaneki ih sounpadahk likamw men, Diohtrepihs sohte kin men utung manaman me wahnpoarono ahneki. Ahn Diohtrepihs ineng en lapalapala oh eh sohte kin kasalehda wiewiahn Kristian kasalehda peikasalpen eh loalopwoat. Dahme Diohtrepihs wiao wia kasalepen ia duwen aramas pohnmwahso oh aklapalap kan ar ele kin song en kahrehiong saminimin en wiawi nan mwomwohdiso. Sohn ndaiong Kaius, oh pil emenemen kitail: “Dehr alasang me suwed.”​—3 Sohn 11.

Weksang Diohtrepihs, Sohn koasoia duwen mehn kahlemeng mwahu en Kristian men me adaneki Demihtrius. Sohn ntingihedi: “Aramas akan koaros kin kahdamwahwih Demihtrius, . . . Eri, se pil kadehdehda, oh ke ese me at kadehde me mehlel.” (3 Sohn 12) Ele Demihtrius anahne sawas sang Kaius, oh Kesiluh en Sohn ele wia kisinlikou sang wahnpoarono me pahn kasalehda ihs Demihtrius oh soangen koahiek me e ahneki. Ele pein Demihtrius me wahla kisinlikowo rehn Kaius. Nin duwen emen nein Sohn meninkeder, de ele sounapwalih me kin seiloak, Demihtrius ele kadehdehda dahme Sohn ntingihedi.

Dahme kahrehda Sohn kangoange Kaius en pousehlahte kasamwo ni kadek meteikan ni Kaius eh wiewiahier met? Ia duwe, Sohn kilang me mie anahnepen en kakehlailihala ahn Kaius kin eimah? Wahnpoarono pwunodki me Kaius ele pahn pweiek en wia met pwehki Diohtrepihs kin songosong en kihsang nan mwomwohdiso Kristian kan me kin kasamwo ni kadek meteikan? Sohte lipilipil mehnia, Sohn kamehlelehiong Kaius ni eh nda: “Mehmen me kin wiewia me mwahu, iei ih sapwellimen Koht.” (3 Sohn 11) Met wia kahrepe mwahu ehu en wia dahme mwahu oh pousehlahte wiewia met.

Ia duwe, nein Sohn kisinlikowo kamwakid Kaius en pousehlahte kasamwo meteikan ni kadek? Pwehki Kesiluh en Sohn iang mi nan Paipel oh wia mehn kangoang ehu ong meteikan  en “alasang me mwahu,” met kasalehda me ei.

Sohte koasoipen riatailo Kaius likin met. Ahpw, atail wadek ekis duwen eh mour kak padahkihong kitail duwen iren mehn kasukuhl tohto.

Keieu, pali laud en kitail kalahnganki irail me lelepek kan me kin men seiloakseli pwe kitail en kak esehla padahk mehlel. Ei mehlel, kaidehn koaros tohn mwomwohdisohn Kristian rahnwet kin seiloakla wasa doh kan pwehn lohkiseli rongamwahwo. Ahpw, duwehte Kaius, kitail kak sewese oh kangoange ni ahl teikan irail kan me kin seiloak, duwehte sounapwalih me kin seiloak oh eh pwoudo. De kitail ele kak sewese riatail Kristian kan me kin keseula wasa kan nan atail sahpw, de pil sahpw teikan, pwehn papah wasa kan me anahn laud mie ong sounkalohki Wehio. Eri kitail en “kasamwo” meteikan ni kadek.​—Rom 12:13; 1 Tim. 5:9, 10.

Keriau, kitail en dehr pwuriamweiki ma ehu rahn kahpwal kan me pid ihs me ahneki manaman kin pwarada nan mwomwohdiso. Mie me uhwong manaman me Sohn ahneki, met pil wiawihong wahnpoaron Pohl. (2 Kor. 10:7-12; 12:11-13) Eri, dahme kitail pahn wia ma kitail lelohng soangen kahpwalohte sang ekei nan mwomwohdiso? Pohl ndaiong Timoty: “Ladun Kaun-o men en dehr akamai. E pahn kin kadek ong aramas koaros, sounpadahk mwahu oh kanengamah men, pahn kin kadek ni eh pahn kapwung pelie kan.” Ni atail kin kasalehda mpahi mendahki mehkot kasonge kitail, ekei me kin men kauwe meteikan ele kak ekisekis wekila sang dahme re kin wiewia. Eri, Siohwa ele “pahn ketikihong irail ahnsou mwahu en koluhla oh esehla me mehlelo.”​—2 Tim. 2:24, 25.

Kesiluh, kitail anahne pohnese oh kapinga riatail Kristian kan me kin papah Siohwa ni loalopwoat mendahki uhwong kan pwehki arail lelepek. Wahnpoaron Sohn uhdahn kangoange Kaius oh kamehlelehiong ih me e wiewia dahme pwung. Pil duwehte, elder kan rahnwet anahne idawehn mehn kahlemeng en Sohn sang ni arail kin kangoange riarail Kristian kan ren dehr “pwangada.”​—Ais. 40:31; 1 Des. 5:11.

Lepin lokaiahn Krihk 219 te me wiahda kisinlikou wet sang Sohn ong Kaius oh e wia pwuhk me keieu mwotomwot nan Paipel. Ahpw, e wia kisinlikou ehu me uhdahn kesempwal ong Kristian kan rahnwet.