GAYIYOOSIRANNA umi xibbi diro heeˈrinohu wolu Kiristaanira, qarra ikkanno coyi iillinonsa. Hatte yannara kaphu roso rosiissanno mannooti songuwa jawaattannokkinna babbadantanno gede assate woˈnaaltanno. (1 Yoh. 2:18, 19; 2 Yoh. 7) Diyoxiraafiisi yinanni manchi soqqamaasincho Yohaannisinna wole Kiristaana “xonanninna shollishanni” coyiˈranno; qoleno isi wosina diadhanno; wolootu Kiristaanino isi faale haˈrara xixxiiwanno. (3 Yoh. 9, 10) Yohaannisi tenne sokka Gayiyoosira borreessi yannara songote giddo togoo coyi no. Soqqamaasinchu tenne sokka borreessinohu 98 M.D. ballaati; tenne sokka Giriikete Afiite Qullaawa Borro giddo “Sayikki Yohaannisi” yinanni.

Gayiyoosi addi addi fonqoli iillisirono, Yihowara ammaname soqqama diagurino. Ikkina, isi ammanaminota leellishinohu hiittoonniiti? Xaa yannara Gayiyoosi faale haˈra hasiˈneemmohu mayiraati? Yohaannisi borreessino sokka tennera kaaˈlitannonkehu hiittoonniiti?

Sayikki Yohaannisi borreessinohu isonooto “ani geerchu” yiino. Yohaannisira ayyaanaamittete beetto ikkinohu Gayiyoosi, sokka soyinosihu Yohaannisi ikkinota tennenni calla afa dandaanno. Yohaannisi Gayiyoosira “halaalunni baxeemmohura” yee borreessino. Yohaannisi, Gayiyoosi ayyaanaamittetenni keeraancho ikkinte gede ordu keeraanchimmano afiˈrara halchino. Tini, Yohaannisi Gayiyoosi naadannotanna isi daafira hedannota leellishshannote.—3 Yoh. 1, 2, 4.

Tenne sokka giddo xawinse kulloonnikkiha ikkirono Gayiyoosi songote aliidi laˈˈaancho ikkikki digatino. Gayiyoosi wosina adhannotera wole agurina afinokki manna nafa wosinsirannotera Yohaannisi galatinosi. Gayiyoosi togo assasi ammanaminoha ikkasi leellishshannota Yohaannisi wodanchino; korkaatuno hundi yannanni kayisi Maganu manni wosina adhatenni egennaminoho.—3 Yoh. 5; Kal. 18:1-8; 1 Xim. 3:2.

Yohaannisi Gayiyoosi wosina adhannotera galatasi, Kiristaanu Yohaannisi heeˈranno qooxeessinni songuwa noowa haˈrannotanna insa tuncu yiinonsare daye Yohaannisire kulannota leellishshanno. Yohaannisi songuwa noo gara afannohu konni garinni ikkikki digatino.

Towaatate haˈranno Kiristaani fooliishshiˈra hasiˈrannohu roduuwinsa mineeti. Korakaatuno hakkawaro noo hotella bushate, wosinaho hasiisannore shiqishshannokkitenna amanyootu maaeelle woˈmitinote. Konnira doogo haˈrannohu hayyichu manni dandaaminsaha ikkiro jaallansawa umo woranno; songuwa towaatara haˈranno Kiristaanino ammanate roduuwinsawa galanno.

Yohaannisi Gayiyoosi wosina adhanno gede lede jawaachishanni togo yiino: “Maganu hagiidhanno gede xaano [towaatate dagginore] doogonsara kaaˈlittonsaro danchaho.” Yohaannisi towaatate martinore kaaˈlinsa yiinohu, insa hadhannowa iillita geeshsha doogote hasiisannonsare uyinsa yaateeti. Gayiyoosi alba isiwa dayino wosinira togo assinoti dihuluullissannote; korkaatuno hakku wosinimma mari manni wosinsinsa manchi baxannohanna ammana noosiha ikkinota Yohaannisira kulino.—3 Yoh. 3, 6.

Kuni wosini misiyoone, Yohaannisi soyino manna woy songuwa towaatannoha ikkikki digatino. Noonsa qoosso baxxuta ikkiturono, insa hadhinohu dancha duduwo duduwate yiteeti. Yohaannisi, insa “Suˈmisira yite fultino” yiino. (3 Yoh. 7) Yohaannisi konni qummeeshshira aleenni (kiiro 6 lai) Maganu daafira coyiˈrinohura, “suˈmisira yite” yaanno handaara horoonsiˈrinohu Yihowa suˈmira yite fultino yaateeti. Kuri roduuwi Kiristaanu songo miilla ikkitino daafira hagiirrunni wosinsa hasiissannoreeti. Yohaannisi yiinonte gede, “halaalu loosira gutammeemmo gede hattoo manna kaaˈla” yaano wosinimma adha hasiissannonke.—3 Yoh. 8.

Yohaannisi Gayiyoosira sokka borreessinohu iso galatate yee calla diˈˈikkino. Yohaannisi borreessinohu Gayiyoosi iillinosi qarra dandaanno gede kaaˈlasira yeeti. Kiristaanu songo miila ikkinohu Diyoxiraafiisi yinanni manchi towaatara daanno Kiristaana diwosinsanno. Wolootuno wosina adhitannokki gede hoolate woˈnaalanno.—3 Yoh. 9, 10.

Diyoxiraafiisi wosina adha hasiˈriro nafa ammanamino Kiristaani isi minira hagiidhe haˈrannokkiti egennantinote. Korkaatuno isi songote giddo albisa ikkate gaˈnannoho; qoleno isi Yohaannisi yaannore diayirrisanno; hakkiino sae isi konni soqqamaasinchinna wolootu daafira bushare coyiˈranno. Yohaannisi Diyoxiraafiisi kaphu rosiisaanchooti yiinokkiha ikkirono, isi kayinni soqqamaasinchu Yohaannisira noosi qoosso diayirrisino. Diyoxiraafiisi maccaha ikka hasiˈrasinna Kiristaanunnita ikkitinokki lao noosiha ikkasi ammanamasi huluullammanni gede assitino. Diyoxiraafiisi assinori silxaane hasidhannorinna naaxxitannori songo bebbeehantanno gede assitannota leellishanno. Konnira Yohaannisi Gayiyoosi “busha labbooti” yee amaalino; tini amaale ninkerano kaaˈlitannote.—3 Yoh. 11.

Dimexiroosi yinanni Kiristaanchi Diyoxiraafiisi gedeeha diˈˈikkino; Yohaannisi Dimexiroosi suˈma danchatenni kayisino. Togo yee borreessino: “Dimexiroosire mannu baalu farciˈranno; . . . Isire ninkeno farciˈneemmo; farciˈneemmo coyino halaale ikkinota afatto.” (3 Yoh. 12) Dimexiroosira Gayiyoosi kaaˈlo hasiissinosiha ikkara dandaanno; konnira Yohaannisi sayikki sokkasi giddo keerenna galata borreessino. Tenne sokka Gayiyoosira massinohu Dimexiroosi umosi ikkara dandaanno. Dimexiroosi Yohaannisi riqibbe hadhannori giddo mitto ikkinoro woy songo towaatannoha ikkinoro, Yohaannisi borreessinori wolqa afiˈranno gede assannore coyiˈrikki digatino.

Gayiyoosi wosina adhannoha ikke heeˈreenna Yohaannisi iso wosina adha agurtooti yee jawaachishinosihu mayiraati? Gayiyoosi roore jawaata ikkara hasiˈrinohuraati ikka? Diyoxiraafiisi wosina adhanno Kiristaana songote giddonni fushshe haˈrisate woˈnaalannohura, Gayiyoosi tennera waajje wosina adha aguranno yee yaadinohuraati ikka? Korkaatu ikkihano ikkiro, Yohaannisi, Gayiyoosi “danchare assannohu Maganunniho” yee jawaachishinosi. (3 Yoh. 11) Danchare assinanninna hatto assa agurrannikki gede assannohu kaajju korkaati giddo mittu konneeti.

Yohaannisi borreessino sokka Gayiyoosi wosina adha agurannokki gede assitinosi? Sayikki Yohaannisi sokka, wolootu ‘dancha ikkinore’ assitanno gede jawaachishate Qullaawu Maxaafi  giddo borreessante heeˈrase, tini sokka Gayiyoosi kaaˈlitinosita leellishshannote.

Muxxe rodiinke Gayiyoosi daafira kawiinni saˈne kulloonniri dino. Ikkirono, isi heeshshore haransine kulloonnirinni lowore ronseemmo.

Umihunni, ninke giddo rooru halaale anfoommohu, konne halaale rosiisate yee basetenni base haˈrannohu ammanamino Kiristaani widoonniiti. Hige Kiristaanu songo giddonni dancha duduwo duduwate wole gobba haˈrannohu baalanka diˈˈikkino. Ikkirono, Gayiyoosi assinte gede, woluwiinni soqqamate dagginore lawishshaho woradu aliidi laˈˈaanchonna minaamasi mite doogonni kaaˈlanna jawaachisha dandiineemmo. Hattono, gobbansara woy wole gobba hadhe sabbakkannori roore hasiisannowa soqqantannorira mitore assine kaaˈla dandiineemmo. Konnira “wosinchimma daggannore haadhensa” yitanno amaale harunsino.—Rom. 12:13; 1 Xim. 5:9, 10.

Layinkihunni, yannankera songote giddo albisa ikkitinorira hajajantannokkiri saˈe saˈe heedhuro maalaˈla dihasiissannonke. Soqqamaasinchu Yohaannisi yannara silxaane ayirrissannokkiri no; soqqamaasinchu Phaawuloosirano hattoo coyi tuncu yiinosi. (2 Qor. 10:7-12; 12:11-13) Ikkina, ninke songote giddo togoori tuncu yiinonkero maa assa hasiissannonke? Phaawuloosi Ximootewoosi togo yee amaalino: “Mootichu Yesuusi soqqamaancho ikkinohu baalanka mararannoha, rosiisa dandaannohanna cincannoha ikka hasiissannosi ikkinnina giwama dihasiissannosi. Gibbannosire shaqqillunni amaala hasiissannosi.” Ninke mitu manni hanqisannore assanno wote cincineemmoha ikkiro, insa gale hosanni hedonsa woyyeessiˈra dandaanno. Yihowa insa “aagintaabbe higge halaale affanno gede yanna aansara dandaanno.”—2 Xim. 2:24, 25.

Sayikkihunni, gimbanninsata dandiite Yihowara ammanante soqqantannore naandanninsata kulanna galata hasiissanno. Soqqamaasinchu Yohaannisi Gayiyoosi jawaachishino; hattono assannori dancha ikkinota huwatanno gede assino. Hatteente gede, yannankera songote cimeeyye Yohaannisi lawishsha harunsite, ammanate roduuwinsa ‘daafurtannokki’ gede jawaachisha hasiissannonsa.—Isa. 40:31; 1 Tes. 5:11.

Soqqamaasinchu Yohaannisi Gayiyoosira borreessino sokka 219 Giriikete Afii qaalla calla noota ikkitino daafira, kuni maxaafi Qullaawa Borro giddo shiimiidiho. Ikkirono, giddosi noo sokka yannankera noo Kiristaanira lowo geeshsha kaaˈlitannote.