GAYUSI akanye nalamanye emaKhristu ngasekupheleni kwelikhulu lekucala babhekana netinkinga. Bantfu lebebakadze basakata timfundziso temanga betama kwenta emabandla kutsi ehlukane ekhatsi. (1 Joh. 2:18, 19; 2 Joh 7) Lenye indvodza lenguDiyotrefesi, beyikhuluma “tintfo letimbi” ngemphostoli Johane kanye nalabanye, iphindze ingafuni kwemukela emaKhristu lebekavakashela emabandla, futsi beyiphocelela nalabanye kutsi balandzele lomkhuba lomubi. (3 Joh. 9, 10) Nguleso simo lesenta Johane wabhalela Gayusi. Lencwadzi lomphostoli layibhala nga-98 C.E., iyincwadzi “Yesitsatfu yaJohane,” emiBhalweni yemaKhristu yesiGriki.

Nanobe abhekana netinkinga, Gayusi wachubeka akhonta Jehova ngekwetsembeka. Wakukhombisa njani kwetsembeka kwakhe? Kungani kufanele silingise sibonelo saGayusi lamuhla? Incwadzi yaJohane ingasisita njani kutsi silandzele lesibonelo?

Umbhali waJohane wesitsatfu utibita ngekutsi ‘uyindvodza leseyikhulile.’ Nguleso sizatfu lesenta umntfwana wakhe enkhosini, longuGayusi, wambita ngekutsi ngumphostoli Johane. Johane yena nakakhuluma ngaGayusi watsi: “lotsandzekako, lengimtsandza kakhulu.” Kamuva Johane wafisela Gayusi imphilo lenhle kanye nebuhlobo lobuhle naNkulunkulu. Lena yindlela Johane labetiva ngayo ngaGayusi kanye nendlela yekumdvumisa.—3 Joh. 1, 2, 4.

Kungenteka kutsi Gayusi bekangumchumanisi welibandla, kodvwa lencwadzi ayisitjeli kanjalo. Johane wadvumisa Gayusi ngekwemukela bazalwane emtini wakhe nanobe bekangabati. Johane watsi loku bekubufakazi bekutsi Gayusi beketsembekile kuJehova, njengoba tinceku taNkulunkulu betatiwa ngekwemukela tivakashi.—Gen. 18:1-8; 1 Thim. 3:2; 3 Joh 5.

Emavi ekubonga lashiwo nguJohane kuGayusi ngekumukela bazalwane akhombisa kutsi emaKhristu bekavamise kuhambela tindzawo letifaka ekhatsi indzawo umphostoli Johane lebekahlala kuyo kanye nemabandla. Akungabateki kutsi letivakashi betivamise kucocela Johane indlela lebetiphatseke ngayo. Kungenteka Johane bekatitfola ngalendlela tindzaba talamabandla.

EmaKhristu lebekavakasha bekajabulela kuhlala emakhaya alabanye bazalwane. Emahhotela bekanelidvumela lelibi, angatiphatsi kahle tivakashi futsi bekagcwele bantfu lebebatiphatsa kabi. Ngako nangabe timo tivuma, tivakashi letihlakaniphile betihlala emakhaya ebangani bato, nemaKhristu lavakashile bekahlala emakhaya alamanye emaKhristu.

Johane wakhutsata Gayusi kutsi aphindze emukele tivakashi, futsi lomphostoli wamcela kutsi ‘asite [letivakashi] ngendlela leyemukelekako.’ Kusita tivakashi ngalendlela, bekusho kunakekela tidzingo tato teluhambo lolulandzelako futsi uphindze utinike tonkhe tintfo letitidzingako tize tiyofika lapho tiya khona. Lamavi aJohane akhombisa kutsi Gayusi bekake wakwenta loku etivakashini tangaphambili, futsi taletsela Johane umbiko mayelana nelutsandvo nekukholwa letakutfola ngesikhatsi tivakashile.—3 Joh 3, 6.

Kungenteka letivakashi bekutitfunywa telivangeli, emancusa aJohane noma babonisi labavakashela emabandla. Kungakhatsaliseki kutsi letivakashi betibobani, lesikwatiko kutsi betihamba ngenca yetindzaba letimnandzi. Johane watsi: “Baphume ngesizatfu seligama lakhe.” (3 Joh 7) Johane bekabhekisela kuNkulunkulu (buka livesi 6). Ngako, lamavi latsi “ngesizatfu seligama lakhe” kungenteka abhekiselwe ebitweni laJehova. Labazalwane bebayincenye yelibandla lebuKhristu futsi bekufanele bemukelwe ngendlela lenelutsandvo. Kungako Johane wabhala watsi: “Sibophekile kutsi sibemukele kahle bantfu labanjalo, kuze sibe tisebenti letikanye nabo ecinisweni.”—3 Joh 8.

Sizatfu lesenta Johane wabhalela Gayusi bekungasiko nje kumbonga kuphela. Bekafuna nekumsita kutsi angayicatulula njani lenkinga lenkhulu lebekabhekane nayo. Sizatfu besikutsi lelinye lilunga lelibandla lebuKhristu lelinguDiyotrefesi belingafuni kwemukela emaKhristu lavakashile. Waphindze wetama kucindzetela nalamanye emaKhristu kutsi angawemukeli.—3 Joh. 9, 10.

Liciniso, emaKhristu letsembekile bekangeke afune kuhlala naDiyotrefesi ngisho noma ngabe timo betivuma kutsi ente kanjalo. Diyotrefesi bekatsandza tindzawo letiphambili ebandleni, angafuni lutfo lolushiwo nguJohane futsi bekasakata inkhulumo lengemanga ngalomphostoli nangalabanye bazalwane. Nanobe Johane angazange ambite ngekutsi ngumfundzisi wemanga, kodvwa Diyotrefesi abengalemukeli ligunya lalomphostoli. Sifiso saDiyotrefesi sekuvelela kanye nesimo sakhe lesingesiso sebuKhristu senta kwekutsi kwetsembeka kwakhe kuNkulunkulu kusolise. Lendzaba yaDiyotrefesi ibonisa kutsi bantfu labafuna ludvumo kanye nalabatigcabhako bangabangela umoya wekwehlukana ebandleni. Ngako lamavi aJohane lawasho kuGayusi latsi: “Ungakulingisi lokubi,” ayasebenta nakitsi lamuhla.—3 Joh 11.

Ngekungafani naDiyotrefesi, lomunye umKhristu longuDemetriyusi, Johane wambita ngekutsi usibonelo lesihle. Johane wabhala ngaye watsi: “Demetriyusi ufakazelwa kahle . . . Ecinisweni natsi sifakaza ngaye, futsi nawe uyati kutsi bufakazi betfu buliciniso.” (3 Joh 12) Kungenteka kutsi Demetriyusi wake wadzinga lusito lwaGayusi futsi kungenteka incwadzi yaJohane wesitsatfu yaba setfulo kanye nekutusa kwalomphostoli. Kungenteka futsi Demetriyusi nguye lowamikisa lencwadzi kuGayusi. Njengoba kungenteka abengulomunye wemancusa aJohane noma kungenteka abengumbonisi lohambela emabandla, Demetriyusi wagcizelela loko Johane abekubhalile.

Yini leyenta Johane wakhutsata Gayusi kutsi achubeke nekwemukela tivakashi nangabe bekuyintfo lebekavele ayenta? Johane wasibona yini sidzingo sekusita Gayusi kutsi achubeke nekuba nesibindzi? Lomphostoli bekakhatsateke ngekutsi Gayusi bekangahle ayekele yini kwemukela tihambi ngenca yekutsi Diyotrefesi bekafuna kucosha emaKhristu lanemoya wekwemukela tivakashi ebandleni? Kunoma ngukuphi, Johane wacinisa Gayusi ngemavi latsi: “Umuntfu lowenta lokuhle uvela kuNkulunkulu.” (3 Joh 11) Lesi sizatfu lesikhulu sekwenta lokulungile nesekuchubeka senta kanjalo.

Incwadzi yaJohane yamkhutsata yini Gayusi kutsi achubeke nekwemukela tivakashi? Lokutsi incwadzi yaJohane yesitsatfu yagcinwa  eluhlwini lwetincwadzi teliBhayibheli futsi iye yakhutsata nalabanye kutsi ‘balingise lokuhle’ kukhombisa kutsi yamkhutsata.

Kute lokunyenti lesikwatiko ngemzalwane wetfu lesimtsandzako wakadzeni, longuGayusi. Noma kunjalo, loku lokuncane lokusitjela ngemphilo yakhe kungasifundzisa tifundvo letinyenti.

Kwekucala, ngelizinga lelitsite, linyenti letfu likweleta kwemukela labo labetsembekile labeta nelwati lweliciniso futsi labanesifiso sekusifundzisa lona. Liciniso, akusiwo onkhe emalunga elibandla lebuKhristu lakhona lamuhla lahamba libanga lelidze ngenca yetindzaba letimnandzi. Noma kunjalo, singamlingisa Gayusi ngekutsi sisekele siphindze sikhutsate labo labasivakashelako njengembonisi wesigodzi kanye nemkakhe. Singaphindze sisekele ngetintfo letidzingwa bazalwane nabodzadze labasuka emakhaya abo baye kuletinye tindzawo letiseveni labo noma kulamanye emave kute bayokhonta lapho kunesidzingo lesikhulu khona sebamemeteli beMbuso. Ngako asikwente “umkhuba kwemukela tivakashi.”—Rom. 12:13; 1 Thim. 5:9, 10.

Kwesibili, akukafanele simangale nangabe ngaletinye tikhatsi kuhle kuba khona labavukela ligunya emabandleni esikhatsini setfu. Ligunya laJohane kanye nelemphostoli Pawula labekelwa inselele. (2 Khor. 10:7-12; 12:11-13) Nobe kunjalo, yini lokufanele siyente nangabe kuvela simo lesinjalo ebandleni? Pawula weluleka Thimothi watsi: “Sisebenti seNkhosi akukafaneli silwe, kodvwa kufanele sibe nemusa kubo bonkhe, sikufanele kufundzisa, futsi sitibambe nasoniwa, sibayale ngemoya lomuhle labo labamelene naso.” Nangabe sihlala sitibambile futsi singatfukutseli kakhulu ngisho noma sichukulutwa, labo labanesimo lesibi bangagcine sebayishintjile indlela labenta ngayo. Ngekuvumelana naloko, Jehova “angahle ente inhlitiyo yabo ishintje, batfole lwati lolungulonalona lweliciniso.”—2 Thim. 2:24, 25.

Kwesitsatfu, emaKhritsu lakhonta Jehova ngekwetsembeka ngisho nobe aphikiswa, adzinga kunconywa kanye nekudvunyiswa ngenca yenkonzo yawo yekwetsembeka. Umphostoli Johane wakhutsata Gayusi futsi wamcinisekisa kutsi loko lebekakwenta bekulungile. Ngendlela lefanako, emadvodza lamadzala ebandleni lamuhla kufanele alandzele sibonelo saJohane ngekukhutsata bazalwane nabodzadze kute “bangadzinwa.”—Isa. 40:31; 1 Thes. 5:11.

Ngenca yekutsi lencwadzi yemphostoli Johane layibhalela Gayusi inemagama esiGriki langu-219, loko kuyenta ibe yincwadzi lemfisha kunato tonkhe eBhayibhelini. Noma kunjalo, ibaluleke kakhulu kumaKhristu lamuhla.