GAIASE le Bakreste ’moho le eena ba phetseng nakoana ka mor’a hore Jesu a tlohe lefatšeng ba ile ba e-ba le mathata. Ho ne ho e-na le Bakreste ba neng ba ruta lithuto tse fosahetseng ba bile ba leka ho arola le ho nyahamisa ba bang. (1 Jo 2:18, 19; 2 Jo 7) Mokreste ea bitsoang Diotrefe o ne “a bebera” ka moapostola Johanne le Bakreste ba bang, o ne a sa rate ho amohela Bakreste ba tsamaeang a bile a khothalletsa ba bang hore ba mo etsise. (3 Jo 9, 10) Lintho tsena li ne li etsahala nakong eo Johanne a neng a ngolla Gaiase. Lengolo lena le ngotsoe ka selemo sa 98, le hlaha Mangolong a Segerike a Bakreste e le “La Boraro la Johanne.”

Le har’a mathata ana Gaiase o ile a tsoela pele a sebeletsa Jehova. O ile a bontša joang hore oa tšepahala? Na re ka latela mohlala oa hae? Lengolo la Johanne le ka re thusa joang tabeng ee?

Mongoli oa lengolo la Boraro la Johanne o ipitsa “monna e moholo.” Gaiase o ile a nka hore mantsoe ana ke a motho ea ileng a mo thusa ho ba le kamano le Molimo e leng Johanne. Ha Johanne a lumelisa Gaiase o ile a re: “Moratuoa, eo ke mo ratang kannete.” O ile a re o tšepa hore Gaiase o phela hantle feela joalokaha a e-na le kamano e ntle le Molimo. E tlameha ebe Gaiase o ile a khothala haholo ka lebaka la mantsoe ana a monate.—3Jo 1, 2, 4.

Ho ka etsahala hore ebe Gaiase e ne e le mohokahanyi oa sehlopha sa baholo. Johanne o ne a nka ho amohela baeti e le bopaki ba hore motho ke mohlanka oa Molimo ea tšepahalang kaha bahlanka ba Molimo ba ne ba tsejoa ka ho amohela baeti, kahoo o ile a babatsa Gaiase hobane o ne a amohela bara le barali babo le hoja a ne a sa ba tsebe.—Gen 18:1-8; 1Ti 3:2; 3Jo 5.

Mantsoe ao Johanne a ileng a a bua ha a khothatsa Gaiase a paka hore Bakreste ba ne ba tloaetse ho etela liphutheho ba tloha moo Johanne a neng a le hona teng. Ho ka etsahala hore ebe Johanne o tsebile litaba tse etsahalang liphuthehong ka Bakreste bana.

E tlameha ebe Bakreste ba ne ba sa thabele ho fihlela libakeng tseo ho amohelloang baeti ho tsona kaha li ne li e-na le botumo bo bobe hape batho ba ne ba tšoaroa hampe ha ba fihletse ho tsona. Ka lona lebaka lena, Bakreste ba ne ba fihlela ha bara le barali babo bona, ha batho ba bang bona ba ne ba fihlela ha metsoalle ea bona.

Johanne o ile a khothalletsa Gaiase ho tsoela pele a amohela baeti kaha o ile a re: “U ba tsamaise ka mokhoa o tšoanelang Molimo.” Ka ho cho joalo o ne a bolela hore Gaiase o lokela ho thuse baeti bao ka sohle seo ba neng ba tla se hloka ho fihlela ba fihla moo ba eang. O ne a tseba hore Gaiase o ne a se a ntse a phetha boikarabello bona, hobane barab’abo rona ba ile ba mo phetela hore o ba amohetse hantle le hore o na le tumelo e matla.—3 Jo 3, 6.

Baeti bana ba ne ba bolela litaba tse molemo, mohlomong ba bang ba ne ba fetisa melaetsa ea Johanne, e le baromuoa kapa e le balebeli ba tsamaeang. Johanne o ile a re: “Etsoe ba ile ba tsoa ka lebaka la lebitso la hae.” (3 Jo 7) O ne a sa tsoa bua ka Molimo (bona temana ea 6), kahoo ha a ne a re “ka lebaka la lebitso la hae” o ne a bua ka Jehova. Baeti bana ba ne ba lokela ho amoheloa hantle hobane e ne e le Bakreste, joalokaha Johanne a itse: “Re tlamehile ho bontša batho ba joalo kamohelo ea baeti, e le hore re ka ba basebetsi-’moho ’neteng.”—3 Jo 8.

Johanne o ne a sa ngolle Gaiase feela hore a mo lebohe empa o ne a boetse a batla ho mo thusa ka bothata boo a neng a tobane le bona. Diotrefe eo ho builoeng ka eena pejana o ne a sa rate ho amohela Bakreste ba neng ba etela moo a phelang teng. O ne a sa felle moo empa o ne a boela a leka ho thibela ba bang ho ba amohela.—3 Jo 9, 10.

Bakreste ba ne ba ke ke ba rata ho lula le Diotrefe le ha ba ne ba ka fumana monyetla. O ne a rata ho hlahella ka phuthehong, a sa ananele litaba tse tsoang ho Johanne a bile a bua hampe ka eena le Bakreste ba bang, hape o ne a sa ikokobeletse Johanne empa ha ho moo Johanne a mo hlalosang e le motho ea rutang mashano. Diotrefe o ne a sa tšepahale hobane o ne a rata ho hlahella a bile a etsa lintho tseo Bakreste ba sa lokelang ho li etsang. Mohlala oa hae o bontša seo batho ba ikhohomosang ba ka se etsang ka phuthehong. Johanne o ile a re ho Gaiase: “E-ba moetsisi oa se molemo, eseng oa se sebe,” mantsoe ana aa sebetsa le ho rona kajeno.—3 Jo 11.

Johanne o boetse o bua ka Demetriase e le mohlala o motle. O ile a re: “Demetriase o pakiloe ke bona kaofela . . . Ha e le hantle, le rōna, rea paka, ’me ua tseba hore bopaki boo re fanang ka bona ke ’nete.” (3 Jo 12) Ho ka etsahala hore ebe ha Demetriase a ne a hloka motho ea ka mo thusang, lengolo la Johanne le ile la fihla ka nako e nepahetse le buella Gaiase. E ka ’na eaba Demetriase o ne a tsamaisa mangolo a Johanne kapa e le molebeli ea tsamaeang, kahoo, e tlameha ebe ke eena ea fileng Gaiase lengolo le tsoang ho Johanne a ba a le hlakisa haholoanyane.

Gaiase o ne a se a ntse a tloaetse ho amohela baeti, empa na ho ne ho hlokahala hore Johanne a boele a mo hopotse hore a ’ne a tsoele pele ho ba amohela? Na ebe ke hobane Johanne a ne a bona Gaiase a hloka sebete se eketsehileng? Kapa ebe ke hobane a ne a nahana hore Gaiase o tla ikhula ka lebaka la Diotrefe ea neng a leka ho khelosa Bakreste ba ratang ho amohela baeti? Ho sa tsotellehe hore na Johanne o ne a nahanne ka eng o ile a re: “Ea etsang se molemo o simoloha ho Molimo.” (3 Jo 11) Lena ke lebaka le utloahalang la hore re tsoele pele ho etsa se nepahetseng.

E tlameha ebe lengolo la Johanne le ile la khothalletsa Gaiase hore a tsoele pele ho amohela baeti kaha le rona kajeno le ntse le re khothalletsa ho etsa joalo.

Re ka ithuta ho hongata mohlaleng oa Gaiase le hoja Bibele e sa bue ho hokaalo ka eena.

Thuto ea pele, Bakreste ba ileng ba ithaopela mosebetsi oa ho etela liphutheho le oa ho isa mangolo liphuthehong ba re thusitse haholo kaha kajeno re tseba Lentsoe la Molimo. Ke ’nete hore mehleng ena Bakreste ha ba sa tsamaea maeto a matelele hore ba bolele litaba tse molemo. Leha ho le joalo re ka etsisa Gaiase ka hore re thuse barab’abo rona ba lulang ba tsamaea joaloka molebeli oa potoloho le mohats’a hae. Re ka boela ra thusa bara le barali babo rona ba fallelang libakeng tseo ho nang le tlhokahalo, ka hore re ‘latele mokhoa oa ho amohela baeti.’—Bar 12:13; 1Ti 5:9, 10.

Ea bobeli, ho ka etsahala hore ka phuthehong ho be le Bakreste ba sa hlompheng batho ba etellang pele. Ho ne ho e-na le Bakreste ba sa hlompheng moapostola Johanne le moapostola Pauluse mehleng ea baapostola. (2Ko 10:7-12; 12:11-13) Ha ho e-ba le boemo bo joalo ka phuthehong re lokela ho etsa joang? Pauluse o ile a eletsa Timothea a re: “Lekhoba la Morena ha ho hlokahale hore le loane, empa ho hlokahala hore le be bonolo ho bohle, le tšoanelehele ho ruta, le lule le ithibile bobeng, le rupele ka bonolo ba ratang ho hanyetsa.” Haeba re lula re khobile matšoafo le ha re hanyetsoa, batho ba bang ba ka ’na ba qetella ba batla ho ithuta ka Jehova ’me “a ka ba fa pako e isang tsebong e nepahetseng ea ’nete.”—2Ti 2:24, 25.

Ea boraro ke hore re lokela ho khothatsa le ho babatsa Bakreste ’moho le rona ba tsoelang pele ho sebeletsa Jehova le hoja ba e-na le mathata. Moapostola Johanne o ile a khothatsa Gaiase a ba a mo kholisa hore o tšoere tsela e nepahetseng. Baholo le bona ba lokela ho etsisa mohlala oa Johanne ka hore ba khothatse bara le barali babo rona e le hore ba se “ke ba tepella.”—Esa 40:31; 1Th 5:11.

Lengolo lena leo Johanne a neng a le ngoletse Gaiase ke lengolo le le khutšoanyane ka ho fetisisa ka Bibeleng kaha le ne le e-na le mantsoe a 219 feela ka Segerike, leha ho le joalo ke la bohlokoa haholo ho Bakreste kajeno.