GAIO no ema kristaun seluk hasoru susar barak iha apóstolu sira-nia tempu. Ema sira neʼebé habelar hanorin falsu koko atu halo fraku no sobu kongregasaun nia unidade. (1 João 2:18, 19; 2 João 7) Mane ida naran Diótrefes “koʼalia liafuan aat oioin” kona-ba apóstolu João no ema seluk, nia lakohi hatudu laran-diʼak hodi simu ema kristaun neʼebé laʼo rai, no nia mós koko atu dada ema seluk hodi halo tuir nia. (3 João 9, 10) Neʼe mak situasaun iha tempu neʼebá, bainhira João hakerek karta ba Gaio. Apóstolu João hakerek karta neʼe iha tinan 98, no karta neʼe iha Eskritura Lia-Gregu bolu nuʼudar “Terseiru João.”

Maski Gaio hasoru susar oioin, nia kontinua serbí Jeová ho laran-metin. Oinsá mak nia hatudu ninia laran-metin neʼe? Tanbasá mak ita hakarak banati-tuir Gaio nia ezemplu ohin loron? Oinsá mak João nia karta bele ajuda ita atu halo nuneʼe?

Iha apóstolu João nia karta, nia refere ninia an nuʼudar “katuas ida”. Liafuan neʼe ajuda Gaio atu rekoñese katak ema neʼe mak apóstolu João. Apóstolu João bolu Gaio nuʼudar “haʼu-nia maluk doben, ida neʼebé haʼu hadomi tebes”. Tuirmai João dehan nia hein katak Gaio iha saúde neʼebé diʼak ba ninia isin no mós ba ninia relasaun ho Jeová. Liafuan sira-neʼe mak liafuan neʼebé furak no fó laran-manas duni!—3 João 1, 2, 4.

Maski João nia karta la temi, maibé karik Gaio mós katuas kongregasaun ida. João koʼalia hodi gaba Gaio tanba nia simu irmaun sira maski nia la koñese irmaun sira-neʼe. João hatete katak neʼe prova ida neʼebé hatudu katak Gaio mak ema neʼebé laran-metin, tanba hatudu laran-diʼak hodi simu ema seluk mak hahalok husi Maromak nia atan sira.—Gênesis (Kejadian) 18:1-8; 1 Timóteo 3:2; 3 João 5.

João nia liafuan kona-ba gaba Gaio nia laran-diʼak neʼebé nia hatudu ba irmaun sira hatudu katak, iha tempu neʼebá, ema kristaun barak mak halo viajen bá-mai husi kongregasaun sira bá apóstolu João nia fatin. No ita bele fiar katak ema sira-neʼe mak konta ba apóstolu João kona-ba situasaun iha kongregasaun sira.

Ema kristaun sira neʼebé halo viajen hakarak hela deʼit ho maluk fiar-naʼin sira, tanba fatin aluga nian iha naran neʼebé foʼer. Sira simu ema iha dalan neʼebé ladiʼak, no nakonu ho hahalok la morál. Tan neʼe mak ema neʼebé laʼo rai hakaʼas an hodi hela ho sira-nia belun, no ema kristaun sira mós hakarak hela deʼit ho maluk kristaun.

Dala ida tan João fó laran-manas ba Gaio atu simu maluk kristaun sira, tanba nia husu ba Gaio “favór ida ajuda [sira neʼebé halo viajen] iha dalan neʼebé diʼak tuir Maromak nia haree”. Liafuan “ajuda sira iha dalan” iha signifika katak tau matan ba sira-nia presiza no fó buat hotu neʼebé sira presiza toʼo sira-nia viajen ramata. Ita bele fiar katak Gaio sempre hatudu laran-diʼak ba ninia bainaka sira, tanba bainhira sira lori fali liafuan ba João, sira mós temi kona-ba Gaio nia domin no fiar.—3 João 3, 6.

Karik bainaka sira-neʼe mak misionáriu, ema neʼebé João haruka, ka irmaun sira neʼebé iha knaar atu vizita kongregasaun. Maski ita la hatene ho loloos sira mak sé, maibé ita hatene katak sira-nia objetivu mak atu habelar liafuan diʼak, tanba João hatete: “Tanba Maromak nia naran mak sira bá atu haklaken.” (3 João 7) Irmaun sira-neʼe mai husi kongregasaun, tan neʼe presiza simu ho diʼak. João hatete: “Ita iha knaar atu hatudu laran-diʼak ba ema sira hanesan neʼe, atu nuneʼe ita bele sai nuʼudar maluk serbisu-naʼin iha lia-loos.”—3 João 8.

João hakerek karta ba Gaio laʼós atu hatoʼo agradese deʼit, maibé nia mós hakarak ajuda Gaio atu hasoru problema neʼebé boot. Tanba razaun ruma, ema ida iha kongregasaun naran Diótrefes lakohi simu ema kristaun sira neʼebé halo viajen. Nia mós hanetik ema seluk hodi la bele hatudu laran-diʼak ba sira.—3 João 9, 10.

Ita bele fiar katak ema kristaun neʼebé laran-metin lakohi atu hela ho Diótrefes maski nia fó fatin ba sira. Nia gosta sai ema neʼebé uluk iha kongregasaun, nia lakohi simu buat ida husi João ho respeitu, no nia mós koʼalia liafuan aat oioin kona-ba apóstolu João no ema seluk. Maski João la bolu nia nuʼudar mestre falsu, maibé Diótrefes lakohi rekoñese apóstolu João nia autoridade. Tanba Diótrefes hakarak buka deʼit pozisaun no la hatudu hahalok ema kristaun nian, neʼe katak nia la hatudu laran-metin ba Maromak. Diótrefes nia hahalok hatudu oinsá ema balu neʼebé buka oin no foti-an bele estraga dame iha kongregasaun. Tan neʼe João hatete ba Gaio, no mós ba ita hotu: “Keta banati-tuir buat neʼebé aat.”—3 João 11.

João mós temi kona-ba ema kristaun ida naran Demétrius, nia la hanesan ho Diótrefes. Demétrius hatudu ezemplu diʼak. João dehan: “Iha ona sasin barak kona-ba Demétrius . . . Tuir loloos, ami mós fó sasin kona-ba nia, no ó hatene katak sasin neʼebé ami fó mak loos.” (3 João 12) Karik Demétrius presiza Gaio nia ajuda, tan neʼe Terseiru João sai hanesan karta rekomendasaun husi apóstolu João atu fó koñese nia ba Gaio. Karik Demétrius mak ema neʼebé fó ajuda ba João, ka karik nia mak katuas neʼebé vizita kongregasaun sira no nia rasik mak lori karta neʼe ba Gaio. Ita bele fiar katak nia esplika liután buat neʼebé João hakerek.

Tanbasá mak João husu Gaio atu kontinua hatudu laran-diʼak hodi simu ema maski nia halo daudauk ona? Neʼe tanba João hakarak fó aten-brani ba nia ka lae? Karik apóstolu João hanoin katak Gaio sente taʼuk tanba ema neʼebé hatudu laran-diʼak, Diótrefes koko ona atu duni ema neʼe sai husi kongregasaun. Maski ita la hatene razaun loloos mak saida, maibé João fó fiar ba Gaio hodi hatete: “Ema neʼebé halo diʼak mai husi Maromak.” (3 João 11) Neʼe mak razaun importante duni atu halo buat neʼebé diʼak no atu kontinua halo nuneʼe.

João nia karta book duni Gaio atu kontinua hatudu laran-diʼak ka lae? Sin, tanba Terseiru João mós bele hetan iha Bíblia no rai toʼo ohin loron atu fó laran-manas ba ema seluk atu “banati-tuir buat neʼebé diʼak”, neʼe hatudu katak João nia karta book duni Gaio.

Neʼe deʼit mak informasaun neʼebé ita hatene kona-ba ita-nia irmaun doben Gaio. Maibé informasaun sira-neʼe ajuda ita aprende kona-ba lisaun barak.

Primeiru, ita agradese tebes ba ema kristaun laran-metin sira neʼebé halo viajen bá-mai atu haklaken lia-loos ba ita. Maski laʼós ema hotu husi kongregasaun ohin loron halo viajen ba fatin dook atu haklaken, maibé ita bele koko halo tuir Gaio nia ezemplu atu fó apoiu no fó laran-manas ba sira neʼebé halo daudauk viajen neʼe, hanesan katuas área ho sira-nia feen. Ka karik ita bele fó ajuda ba irmaun-irmán sira neʼebé muda ba fatin seluk ka rai seluk atu serbí iha fatin neʼebé presiza liután haklaken-naʼin. Tan neʼe mai ita “haburas toman atu hatudu laran-diʼak”.—Roma 12:13; 1 Timóteo 5:9, 10.

Segundu, ita sei la hakfodak kuandu ita haree ema ruma kontra irmaun sira neʼebé dirije kongregasaun ohin loron. Ema balu kontra João nia podér; neʼe mós akontese ona ba apóstolu Paulo. (2 Korinto 10:7-12; 12:11-13) Entaun, se ita mak hasoru situasaun susar hanesan neʼe iha kongregasaun, ita presiza halo saida? Paulo fó sujestaun ba Timóteo: “Naʼi nia atan la presiza haksesuk malu, maibé tenke hatudu laran-diʼak ba ema hotu, iha matenek atu hanorin, no kontrola an kuandu ema halo sala hasoru nia. Nia tenke hanorin ho laran-maus ba sira neʼebé kontra nia.” Se ita mak hatudu laran-maus nafatin iha situasaun susar, karik neʼe bele book ema neʼebé gosta kritika ema seluk atu troka sira-nia hahalok. No karik neʼe mós bele fó oportunidade ba Jeová atu “halo sira troka sira-nia laran, atu nuneʼe sira bele hatene didiʼak kona-ba lia-loos”.—2 Timóteo 2:24, 25.

Terseiru, ita presiza gaba no fó laran-manas ba ita-nia maluk kristaun sira neʼebé laran-metin nafatin ba Jeová maski ema seluk kontra sira. Ita bele fiar katak liafuan sira husi apóstolu João fó duni laran-manas ba Gaio no fó fiar ba nia katak nia halo daudauk buat neʼebé loos. Hanesan neʼe mós ohin loron, katuas kongregasaun sira presiza halo tuir João nia ezemplu hodi fó laran-manas ba irmaun-irmán atu sira “la sai fraku”.—Isaías (Yesaya) 40:31; 1 Tesalónika 5:11.

Apóstolu João hakerek deʼit liafuan hamutuk 219 iha lia-gregu ba Gaio iha ninia karta. Maski neʼe mak livru neʼebé badak liu hotu iha Bíblia laran, maibé iha folin-boot tebes ba ema kristaun ohin loron.