YANGE Gayu man Mbakristu mbagenev tagher a mbamtaver kpishi shighe u mbaapostoli kpe zurum u been la. Ior mba ve lu samber a atesen a aiegh la, lu van a iyolkpen man mpav ken atôônanongo. (1 Yoh. 2:18, 19; 2 Yoh. 7) Orgen u i yilan un ér Diotrefe yô, lam sha apostoli Yohane man mbagenev “vihi kpishi,” shi lu vendan u tesen Mbakristu mba ningir sha erdoo shi lu nyohon mbagenev zwa ér ve dondo ieren na la. (3 Yoh. 9, 10) Lu kwagh u za hemen ve Yohane nger Gayu washika je la. Washika u apostoli ne nger er ken inyom i 98 la, ngu ken Ruamabera u Mbakristu u ken Zwa Grika la. Mba yer washika la ér “Washika u sha Utar u Yohane.”

Er Gayu tagher a mbamtaver nahan kpa, za hemen u civir Yehova sha mimi. Yange tese ér un ngu a jighjigh u nan nena? Er nan ve se soo u dondon ikyav i Gayu la nyiana? Washika u Yohane la una wase se u eren kwagh ne nena?

Orngeren Washika u sha Utar u Yohane la yila iyolna ér “ortamen.” Kwagh u ôr ne kuma u wan na u ken jijingi Gayu u doo un ishima tsung la, una fa er lu apostoli Yohane yô. Yohane yila Gayu kundu kundu ér: “Or u doon ishima u a doom ishima sha mimi yô.” Maa Yohane pase ishimaverenkeghen na ér, er Gayu a lu gbong gbong sha iyol nahan, kape mlu na u ken jijingi kpa a lu je la. Nenge imba er yange ôr kwagh u doon tsung sha iyol i Gayu sha wono!—3 Yoh. 1, 2, 4.

Alaghga tsô Gayu lu ortamen ken tiônnongo, kpa washika la pase jighilii ga. Yohane wuese Gayu er yange ngohol anmgbianev shin er vande fan ve ga nahan kpaa. Yohane nenge kwagh ne ér ka ikyav i tesen ér Gayu ngu a jighjigh u nan, sha ci u u nengen sha ior kundu kundu la, ka gbenda u mbacivir Aôndo ve tesen er ve dugh kposo yô.—Gen. 18:1-8; 1 Tim. 3:2; 3 Yoh. 5.

Mkaanem ma Yohane ôr sha u wuese erdoo u Gayu a anmgbianev la tese ér, Mbakristu mbara yange vea zaan zende yô, ve kar hen ijiir i apostoli Yohane man atôônanongo lu la, nahan a shi nan kpa, mbazendev mban ôr Yohane akaa a ve lu tagher a mi la. Alaghga tsô lu sha imba gbenda ne Yohane zua a abaver sha kwagh u atôônanongo ne ye.

Yange i doo Mbakristu mba ningir sha mban u lun imôngo vea mba nan jighjigh a ve imôngo la je ka u henen a hen ga. Ayou a mbavannya yange a vihi ishima kpishi shi i eren a ior her sha inja ga shi lu ajiir a i eren idya her kpoghuloo yô. Nahan kpa, yange a gba sha mi yô, mbazendev ve tsa vea azende a ve; Mbakristu mba  ningir sha di ve tsa vea Mbakristu mbagenev mba ve ze ve inya la.

Yohane shi taver Gayu ishima ér a tesen mbavannya erdoo, sha ci u apostoli la kaa a na ér, aluer a ‘wase mbazendev mbara er i doo hen Aôndo la yô, a er doo.’ Sha gbaa ne yô, u wasen mbavannya la wa u nan ve akaa a kwagh a gbe ve a mi la, sha er vea za hemen a zende yô, shi nan ve hanma kwagh u kwagh a gba ve a mi la zan zan vea kar nyôron ape ve lu zan la. Ikyav tese wang ér, Gayu vanden eren a mbavannya nav nahan, sha ci u ve za ôron Yohane kwagh u dooshima man jighjigh u nan u Gayu la.—3 Yoh. 3, 6.

Alaghga mbavannya mban lu mbamishen shin mbatyomov mba Yohane gayô, mbakuran mba ningir sha. A lu nyi je kpa, ve zenden sha ci u loho u dedoo la. Yohane kaa ér: “Ka sha ci u Iti la ve dugh ye.” (3 Yoh. 7) Yohane sember ôron kwagh u Aôndo (nenge ivur i sha 6 la), nahan mkaanem ma “sha ci u Iti la” la, ma ôron kwagh u iti i Yehova la. Anmgbianev mbara kpa ve lu ken nongo u Kristu, nahan gba u a ngohol ve gbar gbar. Lu er Yohane nger nahan vough, ér: “Ka u sé nyôr a ambaaior la ken ya kpee, sha u se kpaa sé nyôr nongo sha tom u sha mimi la.”—3 Yoh. 8.

Yohane yange nger Gayu washika sha ci u sughun un tseegh tsô ga. Yohane soo u wasen un u nengen sha zayol u vesen ugen kpaa. Orgen ken nongo u Kristu u i yilan un ér Diotrefe la, lu vendan u tesen Mbakristu mba ningir sha erdoo, sha ci u ityôkyaa i lu a mi ken ishima la. Shi lu nôngon u yangen mbagenev u tesen ve erdoo je kpaa.—3 Yoh. 9, 10.

Luun er gba u Mbakristu mba mimi vea tsa hen ya u Diotrefe je kpa, ma ve soo ga je ka u henen a hen ga. Yange tamen doo un tsung ken tiônnongo, kpa Yohane na un kwaghmôm u tesen un icivir ga. Sha nahan yô, a lam sha apostoli la man mbagenev vihi kpishi. Er Yohane yila Diotrefe ér ngu ortesen u aiegh ga nahan kpa, Diotrefe lu vendan u dondon hemen u apostoli la. Er sar Diotrefe u duen iti shi lu a ieren i Orkristu ga yô, i nengen un ér ngu civir Aôndo sha mimi ga. Er kwagh u Diotrefe la a tese nahan, mba kwagh u hemen u doo ve kpishi shi ve we igbongor la, ka ve nôngo ér vea va a mpav ken tiônnongo. Sha nahan yô, Yohane kaa a Gayu, man hanma wase cii ér: “De ze a kwaghbo ityô ga.”—3 Yoh. 11.

Er Diotrefe lu a ieren i dedoo ga nahan kpa, Yohane ter kwagh u Orkristu ugen u i yilan un ér Demetriu la kaa ér, yange ver ikyav i dedoo. Yohane nger ér: “Ior cii mba eren shiada u dedoo sha Demetriu . . . Se kpa se mba eren shiada, man u fa, shiada wase ka u mimi je.” (3 Yoh. 12) Adooga Demetriu yange soo ér Gayu a na un iwasen, nahan alaghga apostoli la nger Washika u sha Utar u Yohane la, sha u pasen Gayu kwagh u Demetriu shi kaan ér a kuma iwasen i a lu keren la. Alaghga je yô, lu Demetriu iyolna za na Gayu washika la ye. Er Demetriu lu ortyom u Yohane shin alaghga lu orkuran u ningir sha yô, a shi nan kpa, yange seer tan iwanger sha kwagh u Yohane nger la.

Er Gayu lu vanden tesen mbagenev erdoo nahan kpa, Yohane yange taver un ishima ér a za hemen u eren nahan sha ci u nyi? Yange gba u Yohane una seer taver Gayu ishimaa? Ishima yange i za apostoli la iyol sha ci u alaghga Gayu una er zôzô sha kwagh u tesen mbagenev erdoo, ér Diotrefe ngu nôngon u dughun Mbakristu mba ve eren a mbagenev doo doo la, ken tiônnongo kera shinii? A lu nyi je kpa, Yohane seer taver Gayu ishima ér: “Or u nan eren kwagh u dedoo yô, ka ken Aôndo nan dugh ye.” (3 Yoh. 11) Ka ityôkyaa i doon tsung, i i ne ve se tesen erdoo shi se ze hemen u eren nahan je la.

Washika u Yohane la yange mgbegha Gayu za hemen u tesen mbagenev erdoo kpa? Er Washika u sha Utar u Yohane la a lu môm ken ityakerada i Bibilo shi i ver mkaanem ma takerada shon her, sha u ma taver mbagenev ishima u  eren “kwagh u doon” yô, tese je ér washika la yange mgbegha Gayu u eren kwagh u dedoo.

Ka cii kwagh u se fe sha kwagh u Gayu, anmgbian wase u doon se ishima u sha ayange a tsuaa la je ne. Nahan cii kpa, kwagh u se fe sha kwagh u uma na cuku tseegh la, una fatyô u tesen se akaa kpishi.

Kwagh u hiihii yô, mfe u se kpishi se lu a mi sha kwagh u mimi nyian ne, ka mbananjighjigh mbagenev, yange ve zende sha ve, ve wase se se fa un ye. Sha mimi yô, ka mba ve lu ken nongo u Kristu cii ve zenden ve ze sha ajiir a icaa nyian sha ci u loho u dedoo ga. Nahan cii kpa, se fatyô u suen shi taver mba ve zenden sha la ishima, er ortamen u sôron atôônanongo vea kwase na nahan, vough er Gayu yange er nahan. Shin alaghga se fatyô u nan anmgbianev mba nomso man mba kasev, mba ka ve mough ve yem sha ajiir agen ken tar ve shin ve yem ken tar ugen je kpaa, sha u za eren tom ape kwagh a hembe gban sha mbapasenkwagh u Tartor la iwasen sha mimi. Sha nahan yô, de se “eren nen a mbavannya dedoo.”—Rom. 12:13; 1 Tim. 5:9, 10.

Kwagh u sha uhar yô, gba u a kpiligh se iyol er ashighe agen kpuaa, mbagenev ken tiônnongo nyian ka ve venda u dondon hemen ga. Yange mbagenev venda hemen u Yohane kua u apostoli Paulu la kpaa. (2 Kor. 10:7-12; 12:11-13) Nahan aluer se tagher a imba mtaver la ken tiônnongo sha ikyev i mbagenev yô, gba u se er nena? Paulu yange wa Timoteu kwagh ér: “Kpan u Ter yô, ka u nana̱ lu or u ayongo ga keng, kpa nana̱ lu sar sar a ior cii, nana̱ lu or u fan ityesen man or u wan ishima kpaa, nana̱ kôôm mbahendan kwagh a nan sha ishima i legh legh.” Aluer mbagban ahon sha hanma kwagh vihi se ishima ker, kpa se za hemen u tesen ishima i legh legh her yô, alaghga kwagh ne una mgbegha mbagenev ken ve tegh tegh u sôron inja ve. Shi Yehova kpa ‘alaghga Una na ve mgemshima vea kav mimi.’—2 Tim. 2:24, 25.

Kwagh u sha utar yô, gba u se fa Mbakristu mbagenev, mba ve lu civir Yehova sha mimi, mba i lu hendan a ve la, shi se wuese ve sha jighjigh ve u nan la sha mimi. Apostoli Yohane yange taver Gayu ishima shi wase un fa wang ér ngu eren kwagh u vough. Gba u mbatamen nyian vea dondo ikyav i Yohane la sha u taver anmgbianev mba nomso man mba kasev ishima sha er “vea vôr ga” yô.—Yes. 40:31; 1 Tes. 5:11.

Washika u apostoli Yohane nger hen Gayu la, ngu a asember 219 tseegh ken ruamabera u ken zwa Grika la, nahan ka takerada u Bibilo u u hembe lihen ga yô. Nahan cii kpa, takerada u Bibilo ne ngu Mbakristu nyian a iwasen kpishi je.