NGAYO ndo Akristo wa l’ekomelo ka ntambe ka ntondo wakahomanaka l’ehemba. Anto wakadianganyaka wetshelo wa kashi wakasalaka la wolo dia mbɔdia ndo mbidja diatɔnelo lo tshumanelo. (1 Jni. 2:18, 19; 2 Jni. 7) Pami kakawelɛka Diyɔtɛrɛfɛ akahandjola “akambo wa kɔlɔ ndo w’anyanya” lo dikambo di’ɔpɔstɔlɔ Joani ndo di’anto akina, nde akatonaka nongola Akristo waketetaka ndo nde akatshutshuyaka anto akina dia ndjela ɛnyɛlɔ kande. (3 Jni. 9, 10) Dikambo sɔ diakasalema etena kakafundɛka Joani Ngayo mukanda. Mukanda ɔsɔ w’ɔpɔstɔlɔ wakafundama oya lo 98 T.D., mbelamɛka lo Afundelo w’Akristo wa lo Grɛkɛ ɔnɛ “Mukanda wa sato wa Joani.”

Kaanga mbakandahomana l’ehemba, Ngayo akatetemala kambɛ Jehowa la kɔlamelo. Ngande wakandɛnya kɔlamelo yande? Lande na kahombaso mbokoya ɛnyɛlɔ ka Ngayo ɛlɔ kɛnɛ? Ngande wakoka mukanda wa Joani tokimanyiya dia nsala dui sɔ?

Ofundji wa 3 Joani ndjaelɛka “ekumanyi.” Dui sɔ nto diakakoke dia Ngayo ɔnande la ngandji la lo nyuma mbeeya ɔnɛ ɔsɔ ɔpɔstɔlɔ Joani. La wangasanu tshɛ, Joani akelɛ Ngayo ɔnɛ “ɔnalengo la ngandji lokami mɛtɛ ngandji.” Oma laasɔ, Joani aki l’elongamelo dia Ngayo aki la yoonge ya dimɛna lo demba ndo lo nyuma. Ande kanyi ya dimɛna yaki la nde ndo woho wakandawandola dimɛna lee!—3 Jni. 1, 2, 4.

Mbeyaka monga ko Ngayo aki omendji l’etshumanelo, koko mukanda akɔ hawoshikikɛ dikambo sɔ. Joani akandola Ngayo lo woho wakandalongolaka anango kaanga mbakinde kombaeyaka. Joani akɔsaka dia ɔsɔ ekɔ djembetelo yɛnya dia Ngayo aki la kɔlamelo, nɛ dia nongola angɛndangɛnda aki dui dimɔtshi diakatshikitanyaka ekambi waki Nzambi la anto akina.​—Eta. 18:1-8; 1 Tim. 3:2; 3 Jni. 5.

Ɛtɛkɛta wa Joani wa lowando lo woho wakalongolaka Ngayo anangɛso mɛnyaka dia Akristo waketetaka mbala la mbala oma lɛnɛ akadjasɛ ɔpɔstɔlɔ Joani otsha lɛnɛ aki tshumanelo ndo mɛnamaka dia ambetshetshi asɔ wakatɛka Joani akambo wakawɛnaka. Ondo lo tshimbo y’anto asɔ mbakalongola Joani nsango yendana la tshumanelo sɔ.

Aha la taamu, Akristo waketetaka wakalangaka mpanga laka asekawɔ ambetawudi. Ɛtɛlɛ waki la lokumu la kɔlɔ efula, wakasalaka akambo wa kɔlɔ, ndo vɔ waki oko weoko wa lɔkɛwɔ la mindo. Diakɔ diele, lɛnɛ akakokaka dui sɔ salema, ambetshetshi waki la lomba wakahangaka laka angɛnyi awɔ; Akristo wakahangaka laka Akristo.

Joani akakeketsha Ngayo dia nongola angɛndangɛnda nto, nɛ dia ɔpɔstɔlɔ ɔsɔ akɔɔlɔmbɛ dia nde “nkɛndja [angɛndangɛnda] lo yoho yangɛnyangɛnya Nzambi.” Lanɛ, nkɛndja angɛndangɛnda nembetshiyaka mbakotshɛ ehomba awɔ wendana la etenyi ka lɔkɛndɔ kambotshikala ndo mbasha ɛngɔ tshɛ kayonga la wɔ ohomba polo lam’ayowokoma lɛnɛ atawatshu. Mɛnamaka dia Ngayo akasalɛ angɛndangɛnda ande wa ntondo dui sɔ, nɛ dia vɔ wakatotɛ Joani woho wakandawaɛnya ngandji ndo mbetawɔ.​—3 Jni. 3, 6.

Angɛndangɛnda asɔ wakakokaka monga waa misiɔnɛrɛ, atomami w’oma le Joani, kana emendji weteta. Oyadi weho akɔna w’angɛndangɛnda wakiwɔ, vɔ waketetaka l’ɔtɛ wa lokumu l’ɔlɔlɔ. Joani akate ate: “L’ɔtɛ wa lokombo lande mbakawahandjɔnɛ.” (3 Jni. 7) Joani akatɛkɛtaka dikambo dia Nzambi (enda divɛsa 6), diakɔ diele etelo k’ɔnɛ “l’ɔtɛ wa lokombo lande” mendanaka la lokombo la Jehowa. Lo mɛtɛ, anangɛso asɔ waki ase etshumanelo k’Akristo ndo wakasunganaka nongɔma dimɛna. Ekɔ oko wakafunde Joani ate: “Sho la dia nongolaka anto wa ngasɔ dimɛna dia sho nkamba kaamɛ lo akambo wa mɛtɛ.”​—3 Jni. 8.

Ɔkɔkɔ wakafundɛ Joani Ngayo komonga tsho dia mbaandola. Joani akalange nto dia mbokimanyiya dia nde ndɔshana l’okakatanu ɔmɔtshi wa wolo. L’ɔtɛ w’ɛkɔkɔ ɛmɔtshi, ose etshumanelo k’Akristo ɔmɔtshi lakawelɛka Diyɔtɛrɛfɛ konangaka nongola Akristo waketetaka. Nde akakome polo lo nshimba anto akina diaha vɔ nongola angɛndangɛnda.​—3 Jni. 9, 10.

Aha la taamu, Akristo wa kɔlamelo konangaka mpanga laka Diyɔtɛrɛfɛ kaanga lo tena diakakokaka dui sɔ salema. Nde akalangaka monga lo dihole dia ntondo l’etshumanelo, nde kɔmbɔsaka awui w’oma le Joani la nɛmɔ, ndo nde akadianganyaka awui wa kɔlɔ ndo w’anyanya lo dikambo di’ɔpɔstɔlɔ ɔsɔ ndo anto akina. Kaanga mbele ndooko lushi lakawelɛ Joani ɔnɛ ombetsha wa kashi, Diyɔtɛrɛfɛ akatonaka lowandji l’apɔstɔlɔ. Nsaki kaki la Diyɔtɛrɛfɛ ka monga la lokumu ndo dionga dia kɔlɔ diaki la nde akakonya anto akina dia mvɔ kɔlamelo yande tshɔdia. Ɛnyɛlɔ ka Diyɔtɛrɛfɛ mɛnyaka dia anto wadja diatɔnelo, w’etako ndo wa lotamanya koka monga la shɛngiya lo etshumanelo. Diakɔ diele Joani akatɛ Ngayo ndo onto tshɛ la l’atei aso ate: “Tokoyake kɛnɛ kele kɔlɔ.”​—3 Jni. 11.

Otshikitanyi la Diyɔtɛrɛfɛ, Joani akatɛkɛta dikambo di’Okristo wakawelɛka Dɛmɛtɛriyo dia nde aki ɛnyɛlɔ ka dimɛna. Joani akafunde ate: “Wakatɛkɛta dimɛna lo dikambo dia Dɛmɛtɛriyo . . . Lo mɛtɛ, ndo sho lawɔ tekɔ lo ntɛkɛta dimɛna lo dikambo diande ndo wɛ mbeyaka dia kɛnɛ kataso kekɔ mɛtɛ.” (3 Jni. 12) Mbeyaka monga ko Dɛmɛtɛriyo aki l’ohomba w’ekimanyielo ka Ngayo ndo 3 Joani akakoke monga mukanda waki ɔpɔstɔlɔ ɔsɔ wa mbɔtwɛlɔ ndo wa lowando. Mbeyaka monga ko Dɛmɛtɛriyo ndamɛ mbakatɔlɛ Ngayo mukanda akɔ. Oko wakinde otomami ɔmɔtshi waki Joani kana ondo omendji weteta, ondo Dɛmɛtɛriyo akakeketsha kɛnɛ kakafunde Joani.

Lande na kakakeketsha Joani Ngayo dia ntetemala nongola angɛndangɛnda etena kele nde aki lo nsala dui sɔ? Onde Joani akɛnyi ohomba wa nkeketsha Ngayo dia monga la dihonga? Onde ɔpɔstɔlɔ ɔsɔ akayakiyanyaka dia Ngayo akakoke mengenga l’ɔtɛ wakaanɛka Diyɔtɛrɛfɛ dia mbitshanya Akristo wakalongɔnaka oma l’etshumanelo? Oyadi l’ɔtɛ w’ɔkɔkɔ akɔna tshɛ, Joani akakeketsha Ngayo lo mbotɛ ate: “Onto lasala kɛnɛ kele ɔlɔlɔ ndja oma le Nzambi.” (3 Jni. 11) Ɔsɔ ekɔ ɔkɔkɔ ɔmɔtshi wa dimɛna wa nsala ɔlɔlɔ ndo ntetemala nsala dui sɔ.

Onde mukanda wa Joani wakatshutshuya Ngayo dia ntetemala nongola angɛndangɛnda? Woho wele 3 Joani akalamema lo kanɔ ka lo Bible  ndo akatomama dia tokeketsha anto akina dia “[mb]okoya kɛnɛ kele ɔlɔlɔ” mɛnyaka dia ngasɔ mbakidiɔ.

Hateye akambo akina nto lo dikambo dia Ngayo, ɔnangɛso la ngandji la lo nshi y’edjedja ɔsɔ. Koko, yema y’awui wamboteya lo kɛnɛ kakandasalaka lo lɔsɛnɔ lande koka tosha wetshelo efula.

Ntondotondo, efula ka l’atei aso takeye akambo wa mɛtɛ oma le wanɛ wele la kɔlamelo waketawɔ minda lɔkɛndɔ dia ndjotewoya akambo akɔ. Koko aha anto tshɛ wele nshi nyɛ l’etshumanelo k’Akristo mbanda nkɛndɔ dia ntshɔ etale l’ɔtɛ wa lokumu l’ɔlɔlɔ. Koko l’ɛnyɛlɔ ka Ngayo, lo yoho mɔtshi, sho kokaka nsukɛ ndo nkeketsha wanɛ wanda nkɛndɔ, ɛnyɛlɔ omendji w’otshimbedi la wadɛnde. Kana sho koka mbisha anangɛso l’akadiyɛso wonɔ lo bɛtshi dia nkɛtɛ dia lo wodja aso ekimanyielo ka shikaa, kana wanɛ watshɔ dia tokamba lɛnɛ ele ohomba efula w’apandjudi wa Diolelo. Ɔnkɔnɛ, nyɛsɔ “[t]onge la mbekelo ka nongolaka angɛndangɛnda.”​—Rɔmɔ 12:13; 1 Tim. 5:9, 10.

Wetshelo wa hende, hatohombe kashimɔ naka anto amɔtshi wambotona lowandji la l’etshumanelo ɛlɔ kɛnɛ, kaanga mbele dui sɔ haleke salema. Lowandji la Joani lakatonama; ndo la ɔpɔstɔlɔ Pɔɔlɔ. (2 Kɔr. 10:7-12; 12:11-13) Ko ahombaso nsala naka tambohomana l’okakatanu akɔ waamɛ oma le anto amɔtshi wa l’etshumanelo? Pɔɔlɔ akalake Timɔte ate: “Okambi wa Nkumadiɔndjɔ hahombe ndɔ ta, koko nde pombaka monga la memakana otsha le anto tshɛ, monga la akoka wa mbetsha ndo monga la ndjakimɛ etena koosalɛwɔ kɔlɔ. Nde pombaka mbetsha la memakana tshɛ wanɛ wahetawɔ wetshelo.” Naka sho ntetemala monga la memakana kaanga etena katosolawɔ, kete anto watɔnyɔla koka tshutshuyama dia ntshikitanya dionga diawɔ. Jehowa lo wedi ande “mbeyaka mbasha ndjatshumoya kakonya lo ewo k’oshika k’akambo wa mɛtɛ.”​—2 Tim. 2:24, 25.

Wetshelo wa sato, asekaso Akristo wakambɛ Jehowa la kɔlamelo tshɛ kaanga la ntondo k’ɔlɔshamelo wekɔ l’ohomba wa sho mbaeya ndo mbawandola la wangasanu tshɛ l’ɔtɛ wa kɔlamelo yawɔ. Lo mɛtɛ, ɔpɔstɔlɔ Joani akakeketsha Ngayo ndo akawotɛ dia nde akasalaka kɛnɛ kaki mɛtɛ ɔlɔlɔ. Woho akɔ waamɛ mbele, ɛlɔ kɛnɛ dikumanyi pombaka ndjela ɛnyɛlɔ ka Joani lo keketshaka anangɛwɔ l’akadiyɛwɔ. Lo nsala ngasɔ vɔ “hawotɔlɛmba.”​—Isa. 40:31; 1 Tɛs. 5:11.

Mukanda wakafundɛ ɔpɔstɔlɔ Joani Ngayo wele la tɔtɛkɛta 219 toto lo efundelo wa lo Grɛkɛ, mbele dibuku dioleki mondo lo Bible. Koko vɔ wekɔ la nɛmɔ di’efula le Akristo ɛlɔ kɛnɛ.