NE FE‵PAKI a Kaio mo nisi Kelisiano i te fakaotiotiga o te senitenali muamua mo tulaga faiga‵ta. Ne fakasalalau atu ne tino a akoakoga ‵se kae taumafai o fakavāivāi kae fakamavae‵vae a fakapotopotoga. (1 Ioa. 2:18, 19; 2 Ioa. 7) E isi se tagata e igoa ki a Siofilisi ne fakasalalau ne ia a “pati ma‵sei” e uiga ki te apositolo ko Ioane mo nisi tino, ne ita fitifiti ma talimalo ne ia a Kelisiano faima‵laga, kae taumafai o fakamalosi atu ki nisi tino ke fakaakoako atu ki a ia. (3 Ioa. 9, 10) Tenā eiloa te tulaga i te taimi ne tusi atu ei a Ioane ki a Kaio. Ne aofia a te tusi a te apositolo, telā kāti ne tusi i te 98 T.A., i Tusitusiga Eleni Kelisiano e pelā me ko “Te Tolu o Ioane.”

Faitalia a tulaga faiga‵ta ne fepaki mo ia, ne tumau eiloa a Kaio i te tavini atu ki a Ieova mo te fakamaoni. Ne fakaasi atu pefea ne ia tena fakamaoni? Kaia e fia fakaakoako atu ei tatou ki a Kaio i aso nei? E fesoasoani mai pefea te tusi a Ioane ki a tatou ke fai penā?

A te tino ne tusi ne ia a te Tolu Ioane ne taku ne ia a ia eiloa ki “te toeaina matua.” Ko lava loa i ei ke iloa ‵lei ne tena tama faka-te-agaga pele ko Kaio me ko te apositolo ko Ioane tenā. Ne fakasino atu eiloa a Ioane mo te alofa ki a Kaio e pelā me ko “toku taina pele, telā e alofa tonu au ki ei.” Ne fakaasi atu ei ne Ioane tena fakamoemoega me e ‵pau eiloa te malosi faka-te-foitino o Kaio mo tena malosi i te feitu faka-te-agaga. Ko se faka‵tau eiloa i te ‵gali o pati tavae konā!—3 Ioa. 1, 2, 4.

Kāti ne fai a Kaio mo fai se ovasia i te fakapotopotoga, kae e se taku ‵tonu mai eiloa penā i te tusi. Ne tavae ne Ioane a Kaio mō te fakaafega ne ia o taina faitalia me e se iloa ne ia latou. Ne mafaufau a Ioane ki te mea tenei e pelā me se fakatalitonuga o te fakamaoni o Kaio, ona ko te fakaasiatuga o te uiga talimalo se mea telā ne fai faeloa i ei ke tu ‵kese a tavini a te Atua.—Kene. 18:1-8; 1 Timo. 3:2; 3 Ioa. 5.

Ne fakaasi mai i pati tavae a Ioane ki te uiga talimalo ne fakaasi atu ne Kaio me ne faima‵laga atu faeloa a Kelisiano mai te koga ne nofo ei a te apositolo ko Ioane ki fakapotopotoga, kae ne fai atu eiloa ne tino faima‵laga konei ki a Ioane a mea katoa. Kāti tenei eiloa te auala ne iloa ei ne Ioane a tala e uiga ki fakapotopotoga konei.

E mautinoa eiloa me e ma‵nako a Kelisiano faima‵laga ke ‵nofo mo taina tali‵tonu. E matagā eiloa a fakanofonofoga i fale talimalo, e se fai faka‵lei ki olotou malo, kae ne koga fai amioga ma‵sei foki. Tela la, kafai e mafai, e ‵nofo a tino faima‵laga ‵poto mo taugasoa; ko Kelisiano faima‵laga mo taina Kelisiano.

Ne fakamalosi atu a Ioane ki a Kaio ke toe fakaasi atu ne ia a te uiga talimalo, me ne fakamolemole atu a te apositolo ki a ia ke “uga atu a tino konā [tino faima‵laga] ke olo i se auala telā e fiafia ki ei te Atua.” I te feitu tenei, a te uga atu o malo ke olo atu i te lotou auala e fakauiga i ei ki te tausiga o latou i mea e manakogina ne latou mō te suā malaga kae tuku atu a mea katoa e manakogina ne latou ke oko ki te taimi e taunu atu ei ki te koga e olo latou ki ei. E fakamaoni mai me ko oti eiloa ne fai ne Kaio a mea konei mō ana malo mai mua atu, ona ko te mea ne fakaasi ne latou ki a Ioane a te alofa mo te fakatuanaki o te tino ne ‵nofo latou i ei.—3 Ioa. 3, 6.

Kāti a malo ne misionale, ko sui o Ioane io me ko ovasia faima‵laga. Faitalia me ko oi latou, ne faima‵laga atu latou mō te tala ‵lei. Ne fai mai a Ioane: “Ne olo atu eiloa latou ona ko te igoa o te Atua.” (3 Ioa. 7) Ne fai a taina mo vaega o te fakapotopotoga Kelisiano kae ne ‵tau o talimalo faka‵lei latou. E pelā eiloa mo te mea ne tusi mai ne Ioane: “Ko ‵tau ei o fakaasi atu ne tatou te uiga talimalo ki tino penā, ko te mea ke fai tatou mo fai ne taina e ga‵lue fakatasi i te munatonu.”—3 Ioa. 8.

Ne seki tusi atu fua a Ioane o fakafetai ki a Kaio. Ne manako foki a ia o fesoasoani atu ke fakafesagai atu ki se fakalavelave tāua. Ona ko nisi pogai, ne seki loto fiafia se tino i te fakapotopotoga Kelisiano e igoa ki a Siofilisi, ke fakaasi atu a te uiga talimalo ki Kelisiano faima‵laga. Ne taumafai foki a ia o taofi a nisi tino mai te fakaasi atu o te uiga talimalo.—3 Ioa. 9, 10.

E seai se fakalotolotolua me ne seki fia ‵nofo foki a Kelisiano fakamaoni mo Siofilisi faitalia foki loa māfai ne mafai o fai penā. Ne fia tulaga muamua a ia i te fakapotopotoga, e seai eiloa se mea ne maua ne ia mai i a Ioane mo te āva, kae ne fakasalalau atu ne ia a pati ma‵sei e uiga ki te apositolo mo nisi tino. E tiga eiloa ne seki taku ne Ioane a ia ki se faiakoga loi, ne ‵teke atu a Siofilisi ki te pulega a te apositolo. A te manakoga o Siofilisi mō se tulaga maluga mo tena uiga sē Kelisiano ne fakafesili aka ei tena alofa tumau. E fakaasi mai i te mea ne tupu ki a Siofilisi a te lasi o te fakamalosiga e mafai o fai ne se tino fia fai tofi kae fakamaualuga ke fakamavaevae ei te fakapotopotoga. Tela la, ne fai atu a Ioane ki a Kaio, kae e mafai foki o fai mai ki a tatou taki tokotasi: “Sa fakaakoako ki mea ma‵sei.”—3 Ioa. 11.

E se pelā mo Siofilisi, ne taku mai ne Ioane se Kelisiano e igoa ki a Temetiu me se fakaakoakoga ‵lei. “E molimau mai a tino katoa e uiga ki a Temetiu . . . E tonu, e molimau atu foki matou e uiga ki a ia,” ne tusi mai a Ioane, “kae e iloa ne koe me e tonu eiloa te molimau telā e avatu ne matou.” (3 Ioa. 12) Kāti ne manakogina ne Temetiu a te fesoasoani o Kaio, kae ne fai eiloa a te Tolu Ioane e pelā me se tusi o pati fakamalo mo manatu fesoasoani. Kāti ne avatu eiloa ne Temetiu a te tusi ki a Kaio. E pelā me se sui o Ioane, io me kāti se ovasia faimalaga, kāti ne toe faka‵mafa atu ne Temetiu a mea kolā ne tusi atu ne Ioane.

Kaia ne fakamalosi atu ei a Ioane ki a Kaio ke tumau i te fakaasi atu o te uiga talimalo ona ko te mea ko oti eiloa ne fai penā tou tagata? E mata, ne lavea ne Ioane a te manakoga ke toe ati aka te loto malosi o Kaio? E mata, ne manavase a te apositolo i a Kaio ma fakatalave ona ko te mea e taumafai a Siofilisi ke ‵tuli keatea a Kelisiano uiga talimalo mai te fakapotopotoga? Faitalia me se a te pogai, ne fakatalitonu atu ne Ioane ki a Kaio, i ana muna: “A te tino telā e fai ne ia te mea ‵lei e māfua mai i te Atua.” (3 Ioa. 11) E fai eiloa te mea tenā mo pogai tāua ‵ki ke fai te mea ‵lei kae tumau eiloa i ei.

E mata, ne fakamalosi atu a te tusi a Ioane ki a Kaio ke tumau eiloa i te fakaasi atu o te uiga  talimalo? A te manatu me ne tausi a te Tolu Ioane i te Tusi Tapu kae ne tuku fakasolo mai ke fakamalosi atu ki nisi tino ke ‘fai te mea ‵lei’ e fakaasi mai i ei me ne fai eiloa penā.

E seki ai ne mea ne toe tusi mai e uiga ki te ‵tou taina pele mua, ko Kaio. E tiga eiloa te feitu tenā, a te tamā fakamatalaga toetoe tenei e uiga ki tena olaga e maua ei ne tatou a akoakoga e uke.

Muamua, e ‵nofo kaitalafu tatou ki tino fakamaoni kolā ne loto fia‵fia ke faima‵laga ko te mea ke fakaasi mai ne latou ki a tatou a te iloaga o te munatonu. E tonu, e se ko tino katoa i te fakapotopotoga Kelisiano i aso nei e mafai o faimalaga atu mō te tala ‵lei. Kae e pelā mo Kaio, e mafai ne tatou o ‵lago atu i nisi auala kae fakamalosi atu ki tino kolā e faima‵laga, e pelā mo te ovasia o te fenua mo tena avaga. Io me e mafai o fesoasoani atu ki taina mo tuagane kolā e olo atu mai te suā koga ki te suā koga i te fenua, io me e o‵mai mai nisi fenua ke tavini atu i koga e manakogina malosi ei a tino talai o te Malo. Tela la, ke na “fakatumau te uiga talimalo.”—Loma 12:13; 1 Timo. 5:9, 10.

A te lua o akoakoga, e se ‵tau o ofo tatou māfai ko ‵teke atu i nai taimi ki pulega i loto i te fakapotopotoga i aso nei. Ne ‵teke atu ki te pulega a Ioane; kae e penā foki ki te apositolo ko Paulo. (2 Koli. 10:7-12; 12:11-13) Kae e ‵tau o ‵saga atu pefea tatou māfai ko fe‵paki mo tulaga faiga‵ta mai nisi tino i te fakapotopotoga? Ne fakamalosi atu a Paulo ki a Timoteo: “Me i pologa a te Aliki e se ‵tau o kinau, kae e ‵tau o uiga filemu ki tino katoa, ke apo i te akoako atu, kae fakaasi atu te kufaki i mea ‵se e fai atu ki a latou, e akoako atu mo te atafai a tino kolā e se fia‵fia.” Kafai e tumau tatou i te uiga filemu ke oko foki loa ki taimi e fakaitaita mai ei, e mafai o fakamalosi atu ki nisi tino uiga ‵teke ke kamata o ‵fuli te lotou kilokiloga. Mai konā, e mafai “o ‵fuli olotou loto ne [Ieova] te Atua, ke iloa tonu ne latou te munatonu.”—2 Timo. 2:24, 25.

A te tolu, e ‵tau eiloa o talia a taina Kelisiano kolā e tavini atu mo te fakamaoni ki a Ieova faitalia a ‵tekemaiga kae fakamalo atu mo te alofa mō te lotou fakamaoni. Ne fakamalosi atu eiloa a te apositolo ko Ioane ki a Kaio kae fakatalitonu atu me ne fai eiloa ne ia te mea tonu. E penā foki, e ‵tau mo toeaina i aso nei o fakaakoako atu ki a Ioane mai te fakamalosi atu ki olotou taina mo tuagane ko te mea ke “se mafai o fi‵ta” latou.—Isa. 40:31; 1 Tesa. 5:11.

Mai i pati fua e 219 i te tusiga i te ‵gana Eleni, a te tusi mai te apositolo ko Ioane ki a Kaio ko te ‵toe tusi toetoe i te Tusi Tapu. Kae e tāua tonu eiloa i se auala sili ki Kelisiano i aso nei.