HA IKATARAPOS han siyahan nga siglo, hi Gayo ngan an iba pa nga Kristiano inatubang hin mga pagsari. May mga indibiduwal nga nagpapasarang hin buwa nga mga katutdoan ngan nangangalimbasog nga paluyahon an kongregasyon ngan magkaada pagkabahin-bahin. (1 Juan 2:18, 19; 2 Juan 7) Hi Diotrepes ‘nagyiyinakan hin maraot ngan waray pulos’ mahitungod kan apostol Juan ngan ha iba pa, nadiri liwat hiya nga abiabihon an nagbibiyahe nga kabugtoan, ngan ginkukombinse niya an iba nga subaron hiya. (3 Juan 9, 10) Ito an kahimtang han nagsurat hi Juan kan Gayo. Ini nga surat han apostol, nga ginhimo han mga 98 C.E., makikita ha Kristiano Griego nga Kasuratan sugad nga “An Ikatulo nga Surat ni Juan.”

Bisan pa han mga pagsari nga gin-atubang ni Gayo, padayon hiya nga nagin matinumanon kan Jehova. Paonan-o niya ito iginpakita? Kay ano nga maopay nga subaron naton hi Gayo? Paonan-o an surat ni Juan makakabulig ha aton ha pagbuhat hito?

Gintawag han parasurat han Ikatulo nga Juan an iya kalugaringon nga “tigurang nga tawo.” Pinaagi hito, makikilala dayon hi apostol Juan han iya hinigugma nga anak ha espirituwal nga hi Gayo. Gintawag ni Juan hi Gayo nga “akon gud hinigugma.” Katapos, iginpahayag ni Juan ha iya surat nga hinaot maopay an pisikal nga kahimsog ni Gayo pariho han iya espirituwal nga kahimsog. Makaparig-on gud ito nga kumendasyon ngan pagpakita hin personal nga interes ha iba!—3 Juan 1, 2, 4.

Posible nga hi Gayo usa nga paramangno ha kongregasyon, pero waray ito espisipiko nga unabiha ha surat. Gindayaw hiya ni Juan tungod han iya pagin maabiabihon ha kabugtoan bisan kon diri niya hira kilala. Para kan Juan, pamatuod ito nga matinumanon hi Gayo kay an mga surugoon han Dios kilala ha pagin maabiabihon.—Gen. 18:1-8; 1 Tim. 3:2; 3 Juan 5.

An pagpahayag ni Juan hin apresasyon ha pagin maabiabihon ni Gayo ha kabugtoan nagpapakita nga pirme nagbibiyahe an mga Kristiano tikang ha lugar nga gin-uukyan han apostol pakadto ha mga kongregasyon, ngan sigurado nga ini nga kabugtoan nagsumat kan Juan han ira naeksperyensyahan. Bangin pinaagi hini hinbaroan ni Juan an mga nahitatabo ha mga kongregasyon.

Sigurado nga karuyag han nagbibiyahe nga mga Kristiano nga umukoy ha ira mga igkasi-tumuroo. An mga balay nga pahuwayan diri maopay an bantog, nagtatanyag hin maraot nga serbisyo, ngan puno hin imoral nga buhat. Salit kon posible, an maaramon nga mga nagbibiyahe naukoy ha ira kasangkayan; an nagbibiyahe nga kabugtoan naukoy ha ira mga igkasi-Kristiano.

Gin-aghat ni Juan hi Gayo nga padayon nga magin maabiabihon, kay ginhangyo hiya han apostol nga ‘updan niya [an mga nagbibiyahe] hin pipira ka distansya ha paagi nga makakalipay ha Dios.’ Hini nga kahimtang, an ‘pag-upod hin pipira ka distansya’ nagpapasabot hin pagsiguro nga an mga bisita may-ada han ngatanan nira nga ginkikinahanglan para ha ira sunod nga pagbiyahe tubtob nga makaabot ha ira destinasyon. Sigurado nga ito an ginbuhat ni Gayo ha iya mga bisita tungod kay hinbaroan ni Juan tikang ha ira an mahitungod han gugma ngan pagtoo han tagbalay nga nag-abiabi ha ira.—3 Juan 3, 6.

An mga nagin bisita ni Gayo posible nga mga misyonero, mga representante ni Juan, o nagbibiyahe nga mga paramangno. Anoman an kahimtang, nagbiyahe hira para ha maopay nga sumat. Hi Juan nagsiring: “Tungod han iya ngaran linakat hira.” (3 Juan 7) Ha bersikulo 6, gin-unabi ni Juan an Dios, salit an mga pulong nga “tungod han iya ngaran” posible nga nagtutudlok ha ngaran ni Jehova. Matin-aw, ini nga kabugtoan bahin han Kristiano nga kongregasyon ngan takos han mahigugmaon nga pag-abiabi. Ito an ginpabug-atan ni Juan han hiya nagsurat: “Kinahanglan magpakita kita hin pagkamaabiabihon ha sugad nga mga tawo, basi kita magin igkasi-magburuhat ha pagsuporta han kamatuoran.”—3 Juan 8.

Nagsurat hi Juan kan Gayo diri la basi pasalamatan hiya kondi basi buligan liwat hiya nga malamposan an usa nga seryoso nga problema. Ha pipira nga hinungdan, an membro han kongregasyon nga hi Diotrepes nadiri pag-abiabi ha nagbibiyahe nga mga Kristiano ngan nangangalimbasog pa ngani nga pugngan an iba nga magin maabiabihon.—3 Juan 9, 10.

Sigurado nga an magtinumanon nga Kristiano diri maruruyag pag-ukoy ha balay ni Diotrepes bisan kon posible ito. Kay ano? Kay karuyag niya magmayor-mayor ha kongregasyon, waray liwat positibo nga ginyakan hi apostol Juan mahitungod ha iya, ngan nagyiyinakan hiya hin maraot ngan waray pulos mahitungod kan Juan ngan ha iba pa. Bisan kon waray hiya tawaga ni Juan nga buwaon nga magturutdo, nakontra hiya ha awtoridad han apostol. An hingyap ni Diotrepes nga magin prominente ngan an iya diri kanan Kristiano nga panggawi nagpapakita nga baga hin diri hiya maunungon kan Jehova. An ehemplo ni Diotrepes nagpapakita nga mahimo magkaada pagkabahin-bahin ha kongregasyon tungod han mga mapahitas-on. Salit ginsidngan ni Juan hi Gayo: “Ayaw pagsubad han maraot.” (3 Juan 11) Aplikado liwat ini ha aton yana.

Diri pariho kan Diotrepes, an Kristiano nga hi Demetrio gin-unabi ni Juan sugad nga maopay nga ehemplo. “Maopay gud an ginsisiring nira ngatanan mahitungod kan Demetrio . . . Ha pagkamatuod, kami liwat nagtitestigo mahitungod ha iya,” siring ni apostol Juan, “ngan maaram kamo nga totoo gud an amon pamatuod.” (3 Juan 12) Posible nga kinahanglan ni Demetrio an bulig ni Gayo, ngan an Ikatulo nga Juan posible nga surat han apostol basi ipakilala ngan irekomendar hi Demetrio. Bangin hi Demetrio mismo an nagdara han surat kan Gayo. Sugad nga representante ni Juan, o bangin sugad nga nagbibiyahe nga paramangno, posible nga iginpatin-aw ni Demetrio an mga sulod han surat ni Juan.

Kay ano nga gin-aghat ni Juan hi Gayo nga padayon nga magin maabiabihon nga ginbubuhat naman ito ni Gayo? Nahunahuna ba ni Juan nga kinahanglan dasigon hi Gayo nga magpadayon ha pagbuhat han maopay? Nabaraka ba an apostol nga bangin mag-alang na pag-abiabi hi Gayo tungod kay nangangalimbasog hi Diotrepes nga paiwason ha kongregasyon an mga Kristiano nga maabiabihon? Anoman an hinungdan, ginparig-on ni Juan hi Gayo pinaagi ha pagsiring: “An nagbubuhat hin maopay tikang ha Dios.” (3 Juan 11) Ito an usa han pinakamaopay nga rason ha padayon nga pagbuhat han maopay.

An surat ba ni Juan nagpagios kan Gayo nga padayon nga magin maabiabihon? Oo, tungod kay an Ikatulo nga Juan nagin bahin han giniyahan nga Kasuratan ngan natipigan ito basi aghaton kita nga “magsubad han maopay.”

Ito la an aton mahibabaroan mahitungod ha aton hinigugma nga bugto han siyahan nga siglo nga hi Gayo. Pero inin halipot nga impormasyon mahitungod ha iya nagtututdo ha aton hin mga leksyon.

Siyahan, ha pipira nga paagi, kadam-an ha aton an nabuligan nga mahibaro han kamatuoran pinaagi han magtinumanon nga kabugtoan nga andam magbiyahe basi itutdo ito ha aton. Syempre, diri ngatanan nga Kristiano yana kinahanglan magbiyahe hin hirayo para ha maopay nga sumat. Pero pariho kan Gayo, mahimo naton mabuligan ngan maparig-on an mga nagbibiyahe nga kabugtoan, sugad han paramangno han sirkito ngan an iya asawa. O mahimo kita maghatag hin praktikal nga bulig ha kabugtoan nga nabalhin ha iba nga lugar o nasud basi mag-alagad kon diin may daku nga panginahanglan hin mga magwarali han Ginhadian. Salit hinaot “magin maabiabihon [kita] pirme.”—Roma 12:13; 1 Tim. 5:9, 10.

Ikaduha, diri kita sadang mahipausa kon usahay ginkukwestyon an awtoridad hadton pinili nga kalalakin-an ha kongregasyon yana. Ginkwestyon an awtoridad ni Juan; ginbuhat liwat ito kan apostol Pablo. (2 Cor. 10:7-12; 12:11-13) Kon sugad, ano an sadang naton magin reaksyon kon naatubang kita hin sugad nga mga problema ha kongregasyon? Ginsagdonan ni Pablo hi Timoteo: “An uripon han Ginoo diri kinahanglan makig-away, lugod kinahanglan magin buotan ha ngatanan, kwalipikado ha pagtutdo, nagpupugong ha kalugaringon kon ginbubuhatan hin maraot, ngan may pagkamalumo nga nagtututdo ha mga rebelyoso.” Kon padayon kita nga magigin malumo bisan kon may nakakapasina ha aton, an pipira nga kritiko bangin hinay-hinay nga mapagios nga bag-uhon an ira disposisyon. Sugad nga resulta, “bangin itugot han Dios nga magbag-o an ira kasingkasing, basi magkaada hira husto nga kahibaro ha kamatuoran.”—2 Tim. 2:24, 25.

Ikatulo, an aton mga igkasi-Kristiano nga maunungon nga nag-aalagad kan Jehova bisan pa han pagkontra kinahanglan mahigugmaon nga kumendasyonan tungod han ira pagin matinumanon. Sigurado nga ginparig-on ngan ginpasarig ni apostol Juan hi Gayo nga husto an iya ginbubuhat. Ha pariho nga paagi, sadang subaron han mga tigurang yana an ehemplo ni Juan pinaagi ha pagdasig ha kabugtoan basi ‘diri hira manluya.’—Isa. 40:31; 1 Tes. 5:11.

An surat ni apostol Juan kan Gayo amo an pinakahalipot nga libro han Biblia; may-ada la ito 219 nga pulong ha Griego nga manuskrito. Pero mapulsanon gud ito ha mga Kristiano yana.