GAYO ni Aklistu ŵane ŵa m’yaka 100 yandanda ŵasimene ni yindu yakusawusya. Ŵandu ŵaŵawandisyaga yijiganyo yaunami ŵasakaga kusokonasya mkamulano m’mipingo jaciklistu. (1 Yoh. 2:18, 19; 2 Yoh. 7) Mundu jwine jwakolanjikwa Deotelefe, jwawandisyaga “ngani syaunami” pakwamba ya ndumetume Yohane soni Aklistu ŵane. Jwalakwe ŵakanaga kwapocela cenene Aklistu ŵakwendela nambosoni ŵalimbikasyaga Aklistu ŵane kujigalila ndamo jwakwe. (3 Yoh. 9, 10) Yeleyi ni yayamtendekasisye Yohane kumlembela cikalata Gayo. Cikalataci, cacalembedwe mu 98 C.E., cikusasimanikwa m’Malemba Gacigiliki Gaciklistu soni cikusakolanjikwa kuti “Cikalata Catatu ca Yohane.”

Atamose kuti Gayo ŵasimanaga ni yakusawusya, nambo ŵajendelecelepe kumtumicila Yehofa mwakulupicika. Ana jwalosisye camtuli kukulupicika kwakwe? Ana ligongo cici masiku agano tukusosekwa kujigalila cisyasyo ca Gayo? Ana cikalata ca Yohane mpaka citukamucisye camtuli kutenda yeleyi?

Jwakulemba cikalata catatu ca Yohane ŵalikolasile jika kuti “mundu jwamkulungwa.” Yeleyi yamkamucisye Gayo juŵaliji mwanace jwakwe jwausimu juŵamnonyelaga mnope kumanyilila kuti juŵalembilejo ali ndumetume Yohane. Mwacinonyelo, Yohane ŵamkolasile Gayo kuti “jwakunonyelwa jwangu.” Ŵaŵecetesoni kuti usimu wa Gayo waliji wambone mpela mucaŵelele cilu cakwe. Gelega galiji maloŵe gakusangalasya soni gakulimbikasya!—3 Yoh. 1, 2, 4.

Komboleka kuti Gayo ŵaliji jwakulolela jwa mumpingo, nambo cikalataci cangasala cilicose pa ngani jeleji. Yohane ŵam’yamicile Gayo ligongo lyakwapocela cenene abale atamose kuti ŵaliji ŵacilendo kwa jwalakwe. Yohane ŵayiweni yeleyi kuŵa umboni wakuti Gayo jwaliji jwakulupicika, ligongo kwapocela ŵane ndaŵi syosope ni kwakukusamanyikasya ŵakutumicila ŵa Mlungu.—Gen. 18:1-8; 1 Tim. 3:2; 3 Yoh. 5.

Maloŵe ga Yohane gakum’yamicila Gayo ligongo lyakwapocela cenene abale gakulosya kuti ndaŵi syosope Aklistu ŵakwendela pajendele mipingo ŵajawulaga kwa ndumetume Yohane. Komboleka kuti ŵakwendelaŵa ŵamsalilaga Yohane yindu yaŵasimanaga nayo. Sonitu komboleka kuti mwelemu ni muŵapikanilaga Yohane yindu yayatendekwaga m’mipingo.

Aklistu ŵakwendelaŵa ŵasacililaga kuyicila m’nyumba sya ŵakulupilila acimjawo. Malo gejinji gakuyicila acalendo nganigaŵa gambone, soni ŵandu ŵajinji ŵatendelagako yindu yakusakala. M’yoyo, ndaŵi syejinji ŵakwendela  ŵalunda ŵayicilaga kunyumba kwa Aklistu acimjawo.

Yohane ŵamsalilesoni Gayo kuti “alangane nawo ŵanduwo [ŵakwendela] mlitala lyakumnonyelesya Mlungu.” Pelepa, ŵagopolelaga kuti ŵape ŵanduwo yindu yosope yakwakamucisya pa ulendo wawo. Papali umboni wakuti Gayo ŵatesilepo yeleyi kwa acalendo ŵane, ligongo acalendowo ŵaliji ali amsalile kala Yohane ya cinonyelo soni cikulupi ca Gayojo.—3 Yoh. 3, 6.

Komboleka kuti acalendoŵa ŵaliji Amishonale, ŵaŵamjimilaga Yohane, kapena ŵakulolela ŵakwendajenda. Jemanjaji ŵajendagajendaga ni cakulinga cakuwandisya ngani syambone. Pakusala ya ŵanduŵa, Yohane ŵatite, ‘jemanjaji ŵapite kukulalicila ya lina lya Mlungu.’ (3 Yoh. 7) Abaleŵa ŵaliji mbali ja mpingo wa Ciklistu soni ŵasosekwaga kwapocela cenene. Mpela muŵalembele Yohane, “M’weji tukwete ukumu wakwapocela cenene acalendo mpela ŵeleŵa, kuti tuŵe ŵamasengo acimjawo mu usyesyene.”—3 Yoh. 8.

Ngaŵa kuti Yohane ŵamlembele cikalata Gayo pakwamba kusaka kum’yamicila. Nambo ŵasakagasoni kumkamucisya kumalana ni cakusawusya cekulungwa. Pamagongo gane, mundu jwine jwa mumpingo waciklistu lina lyakwe Deotelefe nganasakaga kwapocela Aklistu ŵakwendajenda. Jwalakwe ŵatendekasyagasoni ŵane kuti akapocelaga Aklistu ŵakwendajendaŵa.—3 Yoh. 9, 10.

Atamose kuti yaliji yakomboleka kutama ni Deotelefe, nambo Aklistu ŵakulupicika ngamkanasaka kutama najo. Deotelefe ŵasakaga malo gapenani mumpingo, nganapocelaga cilicose kutyocela kwa Yohane mwaucimbicimbi, soni ŵaŵecetaga yacipongwe yakwamba Yohane soni ŵandu ŵane. Atamose kuti Yohane nganamkolanga Deotelefe kuti jwakwiganya jwaunami, nambo Deotelefejo ŵakanaga kutenda yaŵasalaga jwandumetumejo. Kusacilila kwakwe malo gapenani mumpingo soni ndamo syakwe syangakamulana ni Ciklistu yatendekasisye ŵandu kutanda kayicila ya kulupicika kwakwe. Cakutendekwa ca Deotelefe cikutukamucisya kumanyilila yampaka yitendekwe naga mundu jwine mumpingo akusacilila yine yakwe kapena naga ali jwakupoka. Ni ligongo lyakwe Yohane ŵamsalile Gayo soni wosopewe kuti, “Mkasimjigalilaga yindu yayili yakusakala.”—3 Yoh. 11.

Mwakulekangana ni Deotelefe, Yohane ŵamkolasile Mklistu jwine lina lyakwe Demetiliyo kuti ali cisyasyo cambone. Yohane ŵalembile kuti, “Ŵandu wosope aŵecete yambone ya Demetiliyo . . . M’wejisoni tukumtendela umboni, soni m’mwejo mkumanyilila kuti umboni watukusapeleka uli usyesyene.” (3 Yoh. 12) Komboleka kuti pandaŵiji Demetiliyo ŵasakaga cikamucisyo kutyocela kwa Gayo, soni cikalata catatu ca Yohane caliji cakummanyikasya jwalakwejo. Demetiliyo msyene ni juŵajigele cikalataco kuja kupeleka kwa Gayo. Mpela jumo mwa ŵandu ŵaŵamjimilaga Yohane kapena jwakulolela jwakwendajenda, Demetiliyo ŵagombelecesyaga mnope yaŵalembile Yohane.

Ligongo cici Yohane ŵamlimbikasisye Gayo kuti ajendelecelepe kwapocela cenene acalendo? Ana Yohane ŵakuweni kusosekwa kwakumlimbikasya Gayo? Kapena ana Yohane ŵaganisyaga kuti Gayo cawujile munyuma ligongo lyakuti Deotelefe ŵajogoyaga Aklistu ŵaŵapocelaga cenene acalendo kuti ciŵatyosye mumpingo? Ngatukumanyilila, nambo Yohane ŵamsimicisye Gayo mwakuŵeceta kuti, “Jwakutenda yambone ali jwakutyocela kwa Mlungu.” (3 Yoh. 11) Lyeleli lili ligongo lyambone lyakututendekasya kuti tutendeje yambone soni kwendelecela kutenda yeleyo.

Ana cikalata ca Yohane camlimbikasisye Gayo kwendelecela kwapocela cenene acalendo? Elo. Tukwanga m’yoyo ligongo lyakuti cikalata catatu ca Yohane, casunjidwe m’Baibulo kuti cakamucisye ŵane “kuya yayili yambone.”

Pangalisoni yine yatukumanyilila yakwamba mbale jwetu jwakunonyelwa, Gayo. Nambope, mpaka tulijiganye yejinji kutyocela pa yindu yamnono yatutagulilene yakwamba umi wakwe.

Candanda, ŵajinji mwetuwe twalijiganyisye usyesyene kutyocela kwa ŵandu ŵakulupicika ŵaŵaliji ŵakusacilila kwenda lutando lwelewu kwika kumangwetu kukutumanyisya usyesyene. Masiku agano, ngaŵa abale wosope ŵa mumpingo waciklistu ŵakusajenda lutando lwelewu ni lisosa lyakusaka kuwandisya ngani syambone. Nambope, mpela muŵatendele Gayo m’weji mpaka twakamucisye soni kwalimbikasya ŵakulolela mikuli soni aciŵamkwawo. Kapena mpaka twakamucisye abale ni alongo ŵakusamila mmikuli jine mcilambo cetu peco, kapena ku cilambo cine ni cakulinga cakuja kutumicila kwakusosecela ŵakulalicila ya Ucimwene ŵajinji. M’yoyo kwende wosope ‘twapoceleje cenene acalendo.’—Alo. 12:13; 1 Tim. 5:9, 10.

Caŵili, ngatukusosekwa kusimonga naga ŵane m’mipingo ngakusacimbicisya ŵandu ŵakwete maukumu. Yeleyi ni yayamtendecele Yohane soni ndumetume Paulo. (2 Akoli. 10:7-12; 12:11-13) Ana mpaka tutende wuli patusimene ni yakutendekwa yakulandana ni yayamtendecele jemanjaji? Paulo ŵamsalile Timoteyo kuti, “Kapolo jwa Ambuje ngakusosekwa kukangana ni ŵandu ŵane nambo akusosekwa kuŵa jwakulitimalika kwa wosope, jwakuŵajilwa kwiganya, jwakuwukamula mtima ŵane pamlemwecesye soni kwiganya mwakuwusimana mtima ŵandu ŵakusisya.” Naga tukwendelecela kuŵa ŵakuwusimana mtima atamose ŵane patutumbilikasisye, mpaka yatendekasye ŵandu ŵakusisya kuti acenje nganisyo syawo. Kaneko, Yehofa ‘mpaka ŵape upile wakuti apitikuce mtima kuti amanyilile usyesyene.’—2 Tim. 2:24, 25.

Catatu, Aklistu acimjetu ŵakutumicila Yehofa mwakulupicika atamose kuti akusimana ni yakusawusya akusosekwa kwalimbikasya soni kwayamicila ligongo lya kulupicika kwawo. Ndumetume Yohane ŵamlimbikasisye Gayo soni kumsimicisya kuti akutenda yambone. Mwakulandanamo, acakulungwa ŵa mumpingo masiku agano akusosekwa kujigalila cisyasyo ca Yohane pakwalimbikasya abale ni alongo kuti ‘akatenguka.’—Yes. 40:31; 1 Ates. 5:11.

Mu Cigiliki, cikalata ciŵalembile ndumetume Yohane kwa Gayo cakwete maloŵe 219, yayikulosya kuti jili buku jamwana mnope m’Baibulo. Nambope mwana majiganyo gakusosekwa mnope kwa Aklistu masiku agano.