GAYO na gu kura aKristano naadu ti digido bambata sa kama agarã aima gbia tiyo na akpakarapai. Kura aboro nga aguyo na gbandaka zire yugopai aasada ka rungburasi adungurati, na ka kparakaha. (1 Yo. 2:18, 19; 2 Yo. 7) Kumba rimoko angia Dioturepe aagbandaka ‘menemene ni gbegberẽ apai’ ti rimo gu mokedi nangia Yoane na kura aboro, ko aká ka dia agu aKristano naana ta kugume, na ko aasada ka zomia kura aboro i pekefuo gako kpiapai. (3 Yo. 9, 10) Si nga gupai naamanga ti gu regbo Yoane ake waraga fu Gayo. Gu waraga nga ga gu mokedi nangia Yoane ko akehe bara ti gu garã nangia 98 Fuo Batikayo Kristo, si du rogo Vovo Ndika nga “Gu Biata Pai Yoane Ake.”

Wa Gayo avura ka gbiatiko na akpakarapai vurũ, ko andu kindi kumbatayo kaa mangasunge fu Yekova ni ruruko. Wai du ko ayugu gako du ni ruruse? Tipagine si aida ani wiriki ga Gayo kpiapai ti ni areme? Wai rengbe ga Yoane waraga ka undo rani ani mangihe wo?

Bake Biata Yoane ayambu tiko nga “gu bakumba.” Gure aima rengba kuho fu gu wiriko naadu rogo toro yo nga Gayo ko ini gupai nga gu mokedi nangia Yoane du. Yoane ayambu Gayo esuesu nga “badiangba, nga gu ko du nyemuko ti re ni rengo.” Fuani, Yoane ayugu gako kido nga Gayo adu wenengai ti kpotoko kina wai ko adu rogo toro yo. Nairiwo gu wene fugo i agumbaha bara ko wa gure!—3 Yo. 1, 2, 4.

Si nawira wa Gayo angia babiapai rogo dungurati, ono gu waraga re ayugongo ho wo zukazuka te. Yoane atambua Gayo tipa dia awirina kugume wa si avura du nga ko ainongo yo te vurũ. Yoane abi gipai re ni gu gopai naayugo ga Gayo du ni ruruse, wa duhe nga gu sino nga ga dia boro kugume aima digo ni kpara ga Mbori amoyambu kia ti kura aboro.—Bam. P. 18:1-8; 1 Tim. 3:2; 3 Yo. 5.

Ga Yoane afugo tambuahe tipa gu sino nga ga dia aboro kugume Gayo ayuguhe fu awirina nayugo gupai nga aKristano anaata ata dedede bangbanda gu rago Gu mokedi nangia Yoane adu rogoho gbiati adungurati, na nirengo, agu aboro nunguro re aima pekapa agu apai fu Yoane i agbiatiyo na ni. Isoke vuru beyo du Yoane aru ka gia gu pangbanga naadu tipa agi adungurati re.

Agu aKristano nanaata ata re anaaida kaa sungo fuo kina akurayo aidipase. Agu aba i anaafu marã kaa ra rogoho, rimoho aima gberã ni kerehe, na si anaamanganga pai fu aboro wenengai te, na si angia ba wasiwasi mangaapai. Sidu tie, ho si ani rengbe arengba ni, agu aboro nunguro nangia airatatamana anaasungo na abakureayo; aguyo nangia aKristano kini sungu fuo akurayo aKristano.

Yoane angarasi Gayo ko yugu gu sino nga ga dia aboro kugume berewe, gu mokedi nangia Yoane re aya fuko ko ‘mangi wenengaĩ niunda [agu aboro nandu] na gayo nduge ku mbata yo ku sangba sino Mbori yo.’ Rogo gi gene re, undo agino ngba gayo gene nunguro kumbatayo, angia ka ngerafuo agu azingo i adu na ni tipa gayo nunguro kumbatayo na ka fu agu ahe fuyo dunduko i aaidaha da kuho i nika da ni rogo gu ba i aandu ku rogoho. Gopai nayugo ho nga Gayo aima mangaha wo fu gu gako agino naadu mbata, wa duhe nga i aima ye na pangbanga fu Yoane tipa gu nyemuse na idapase nga ga gu boro nadiyo kugume.—3 Yo. 3, 6.

Si ima rengba kadu nga agu agino re angia amokedi, ga Yoane amoundo, watadu agu ababiapai ninaata ata. Ka si vura du nga kina ginipai naadu, i andu gu nunguro re tipa kina agu apai naadu tipa wene pangbanga. Yoane aya: “I andu mbiko gu Rimo re.” (3 Yo. 7) Yoane aafura ane tipa Mbori (mo bi veresi 6), sidu, gu fugo nga “mbiko gu Rimo re” si nangera wa si tipa rimo Yekova. Sidu, agu awirina re angia papara gu dungurati nga ga aKristano na si aaida aida i di yo kugume esuesu. Si wakina gupai Yoane akehe nga: “Ani di ngbatunga agu yo ti ni ku gume re ani mongo du ti sunge na yo sa rengo.”—3 Yo. 8.

Anga Yoane ake waraga gbua fu Gayo tipa ka tambuako te. Yoane aaida ka undo ko a tipa ko sovura kuti gu kpakarapai naadu. Tipa kura ndupai, kumba sa rogo gu dungurati nga ga aKristano rimoko angia Dioturepe aadunga na nyemu ka yugo gu sino nga ga dia boro kugume fu agu aKristano nanaata ata te. Na zavura ko aasadi ka ká na kura aboro ka i yugungo gu sino nga ga dia aboro kugume ya.—3 Yo. 9, 10.

Zanga kapa, ka rengba avura duadu vurũ, ruru aKristano ho narengbe ka ida ka sungo kua Dioturepe yo te. Ko akpinyemu kadu ni barumbatayo rogo dungurati, ko aadianga apai be Yoane na irisa te, na ko aagbandaka gbegberẽ menemene ti rimo amokedi na kura aboro. Wa vura duhe nga, Yoane aayambanga Dioturepe nga zire bayugupai te, Dioturepe asovura aso kuti gu pagbia nangia ga amokedi. Ga Dioturepe nyemu kadu na worimo gbiati gu gako sino naangianga ga aKristano re ya aima maa gako padu ni ruruse rogo kapa. Gupai naadu tipa Dioturepe nayugo gu maapai kurii na kparakaro gu boro nakpinyemu worimo watadu du na rukö narengbe ka ye na ni ku rogo dungurati. Sidu, Yoane ape gupai fu Gayo nga gu du furani wadu ani ni basasa dunduko nga: “Ka oni wíriki nga gu pai gberẽ agberã ya.”—3 Yo. 11.

Gu Kristano tigako nangia Demeturio Yoane agumbapa ko nga ko angia wene kpiapai, ko aadunga wa Dioturepe te. Yoane akepai ki ya: “Demeturio du aboro ni adezireko . . . ii, ani nga adezire a; mo ini aina ya gaani dezire nga rengo.” (3 Yo. 12) Si ima rengba kadu nga Demeturio aaida na ga Gayo undo na Biata Yoane nangera wa si angia gu waraga gu mokedi re akehe tipa ka fura tipa Demeturio na ka tambua rimoko. Si nangera wa Demeturio nitiko naandu na gu waraga re fu Gayo. Wa Demeturio angia boro sa dagba ga Yoane amokedi watadu isoke gu babiapai ninaata ata, si nawira wa ko aima nyakasa gupai Yoane akehe.

Tipagine Yoane azungodi Gayo ko niyugu gu sino nga ga dia aboro kugume ayugo ti ni kindi baraho ko amangaha amanga ni? Ya mo Yoane abi gupai nga si naida ko nyakasi ga Gayo wingbaduse? Ya mo gu mokedi nangia Yoane aabaka bangiriko abaka nga Gayo rengbe kadu na ndundu ka dia aboro kugume mbiko Dioturepe aasada ka do agu aKristano kusayo rogo dungurati naadia aboro kugume? Ka si vura du nga kina ginipai naadu, Yoane akido Gayo niya ko: “Gu ni namanga wenepai ni nga ga Mbori ni.” (3 Yo. 11) Gure nga wene ndupai ka manga wenepai na kaa mangaha amanga kindi.

Ya mo ga Yoane waraga afõngbadu Gayo yo ko naandu andu kindi kumbatayo kaa dia aboro kugume? Gu rengo nga, i aima banda  Biata Yoane rogo Ziazia Kekeapai yo tipa si nangarasa kura aboro i “wíriki . . . gu pai . . . ngba angba,” nayugo gupai nga si aima undoko.

Dungu apai ho aboro nainihe tipa gi wirinarani naadu bakuru kusayo nga Gayo re te. Ono wa vura duhe wo, gi wiri guru wisigopai tipa gako raka re rengbe ka yugo badungu apai furani.

Bambatapai nga, badungu rani aini rengo mbiko gu ruru aboro naadu na nyemu ka ta ku rogo kura rago tipa ka yugoho furani. Rengo ngaha nga, anga agu aKristano dunduko du ti gi gaani regbo re nandu tuturũ tipa ka tungusa wene pangbanga te. Ono tie, wakina Gayo, ani rengbe ka undo rogo kura agene yo, na ka ngarasa agu aboro nata ata wa babi adungurati na diako. Watadu ani rengbe ka undo agu awirina rogo mangimangipai yo nga aguyo naga ku rogo kura aba kina rogo gayo ringara watadu aguyo naga ku gi ngbiiyo tipa ka mangasunge rogo gu ba du na zingo abatungusipa Kindo rogoho. Sidu, si naida ‘ani dí agu yo ku gume naye koyo du ani ni.’—Rom. 12:13; 1 Tim. 5:9, 10.

Uepai nga, si aidanga ngbarani zere te ka si dunga kura aboro aidanga ka ra kutii pagbia rogo dungurati areme te. Kura aboro aaidanga kadu kutii ga Yoane pagbia te; na kina wo si adu tipa Pauro a. (2 Kor. 10:7-12; 12:11-13) Wai du tie si aida ani mangipai ka si du nga ani gbiatirani na ngbatunga akpakarapai wa gure be kura aboro rogo dungurati? Pauro arugu Timoteo nga: “Ka ga Gbia moyambu tá nga kpata ya, ono ni du ni bayee ni fu aboro dũ, rengbe na yugo pai, ni hipai, ni rugu agu yo nati kangu ni zera.” Ho ani azeresa ngbadurani ni zavura ho aboro agbata rani ni, si ima rengba ka sa agu aboro re i tona ka aria gayo bipai yeeye. Yekova tigako ima rengba ka fu “saberã fu yo sa ina rengo.”—2 Tim. 2:24, 25.

Biatapai nga, si naida ani inipa agu akuarani aKristano namangasunge fu Yekova niruru yo i ki zavura kaa gbiatiyo na sogote vurũ, na kini tambua yo tipa pa nye yo ni ruruyo. Nirengo, gu mokedi nangia Yoane aima ngarasa Gayo na ki kido ko nga ko aamanga gupai naadu ni wenehe. Wakina gure a, si naida abaakumba areme pekefuo gu kpiapai nangia ga Yoane ni ngarasa yo awirina tipa gupai nga ‘ka i mbú nga ya.’—Yes. 40:31; 1 Tesa. 5:11.

Gu waraga nga ga Yoane fu Gayo nga wiri guru kitabu rogo Ziazia Kekeapai yo, rogo pa-Giriki, si na keke afugo rogoho gbua nga 219. Ono wa vura duhe wo, si nirengo na nyanyakipa ha fu aKristano areme.