1, 2. 1) ¿Kunsa Jehová Diosat katoqtanjja? 2) ¿Kunsa aka yatichäwin yatjjataskañäni?

 TAQE kunatï alajjpachansa aka Oraqensa utjki ukanakajj Jehová Diosankiwa (1 Cró. 29:11, 12). Ukhamäkchi ukasa, kunatï Jupatak wali valoranïki ukanakwa munasir Awkisjamajj churanistu. ¿Ukanakat mä qhawqhajj kawkïrinakasa? 1) Diosan Reinopa, 2) Diosan arunakap yatiyaña, 3) Biblian utjki uka cheqa yatichäwinaka. Ukanakajj wali wakiskirïtap armsna ukhajj janipuniw walïkaspati. Ukatwa qhawqha valoranisa uk amtañasapuni, ukhamarak wali wakiskirit uñjañasa. Jesusajj akham sänwa: “Kawkintï jumanakan suma imatanakamajj utjki ukankarakiniw chuymanakamajja” sasa (Luc. 12:34).

² Diosan Reinoparu, Diosan arunakap yatiyañaru, cheqa yatichäwinakaru wali wakiskirit uñjañatakisa, ukanakat yuspärañatakis kunsa lursna uk jichhajj uñjañäni. Yatjjatkasajja, ukanakarojj kunjamsa wali wakiskirit uñjsna ukwa amuytʼañasa.

3. Jesusajj mä uñachtʼäwin parlkäna uka chachajja, ¿kunsa suma perla alañatakejj luräna? (Página 9 ukankir dibujo uñjjattʼäta).

³ (Mateo 13:45, 46 liytʼañataki). Suma perlanak thaqeri mä comerciante chachatwa Jesusajj parläna. Mä urojja, yaqha perlanakat sipansa wali valorani perla jikjjatäna jan ukajj jakïna. Uka perla alañatakejj kunatï jupan utjkäna ukanakwa aljäna. ¿Jupatakejj uka perlajj qhawqha wakiskirïnsa uk amuyasmati?

4. ¿Diosan Reinop laykojj kun lurañatakis chʼamachasiñäni?

⁴ Jesusajj parlkäna uka uñachtʼäwitjja, ¿kunsa yateqsna? Diosan Reinopat cheqa yatichäwejja, wali valorani perlar uñtasitawa. Suma perla uñjkäna uka chachjamaraki Diosan Reinop wali valoranit uñjañäni ukhajja, uka Reinompi apnaqatäñatakejj munañasarjam jan sarnaqañatakiw chʼamachasiñäni (Marcos 10:28-30 liytʼañataki). Ukarjam lurañatakejj kunjamsa mä chachasa, mä warmisa chʼamachasipjjäna uk uñjañäni.

5. ¿Kunsa Zaqueo chachajj Diosan Reinop laykojj luräna?

⁵ Zaqueo chachajj impuesto cobrerïnwa. Jaqenakat kʼarimp kʼarimpi qollqe lunthatasaw qamiriptäna (Luc. 19:1-9). Mä urojja, Zaqueojj Jesusaruw Diosan Reinopat parliri istʼäna. Ukasti chuymaparuw purtʼarakïna, ukatwa jupajj akham säna: “Tata, nayajj chikatpachwa utjirinakajat pobrenakar churaskta. Khitirutejj nayajj kʼarimp kʼarimpi lunthatkta ukarojja, pusi ukhampwa kuttʼayaskta” sasa. Kunanaktï jaqenakat lunthatkäna ukwa Zaqueojj kuttʼayjjäna, janirakiw jupatakik taqe kuns thaqjjänti.

6. ¿Kuna lurañanaksa mä warmejj apanuküna, ukat kunatsa?

⁶ Mä warmejj Diosan Reinopat parliri istʼkäna uka tiemponjja, warmi masipamp ikintasirïnwa. Maysa toqetjja, chacha pura, warmi pura sarnaqerinakan derechonakap arjjatiri mä organizacionan presidentapänwa. Bibliat yateqkasajj Diosan Reinopajj kunja valoranisa uk amuyasajja, jan wali lurañanaksa apanukünwa (1 Cor. 6:9, 10). Jehová Diosar wal munasitapatwa uka organizacionsa, warmi pura sarnaqañsa jaytjjäna. 2009 maranwa bautisasïna, 2010 marasti precursor regularat serviñ qalltäna. Munañanakaparjam sarnaqañ munañat sipansa, Jehová Diosaruw jukʼamp munasïna, ukatwa jan wali lurañanak apanuküna (Mar. 12:29, 30).

7. ¿Diosan Reinopar wali wakiskirit uñjañatakejj kunanakatsa amuyasiñasa?

⁷ Diosan Reinopampi apnaqatäñ munasajja, waljaniw jan wali lurañanak apanukupjje (Rom. 12:2). Ukanak apanukjjasasa taqeniw chʼamachasiskakiñasa. Diosan Reinop wali wakiskirit uñjaskakiñatakejja, akapachan utjirinïñ munañatsa, jañchin qʼañu lurañanak munañatsa amuyasiñasawa (Pro. 4:23; Mat. 5:27-29). Diosan Reinopar wali valoranit uñjaskakiñatakejja, Jehová Diosajj yaqha yanaptʼwa churistu.

8. 1) Diosan Reinopat yatiyañajj ñeqʼet lurat vasonkir wali valorani imatampi sasiwa sasajja, ¿kunatsa Pablojj säna? 2) ¿Kunjamsa Pablojj Diosan arunakap yatiyañ wali wakiskirit uñjäna?

⁸ Jaqenakar Diosan Reinopat yatiyapjjam, yatichapjjarakim sasaw Jesusajj sawayistu (Mat. 28:19, 20). Diosan Reinopat yatiyañajja, ñeqʼet lurat vasonkir wali valorani imatampi sasiwa sasaw Pablojj säna (2 Cor. 4:7; 1 Tim. 1:12). Jiwasajj pantjasir jaqëtanwa, ukatwa ñeqʼet lurat vasöksnas ukhamätanjja. Yatiyktan ukajj jila valoraniwa, istʼapkistu  uka jaqenakasa, jiwasas wiñay jakañ katoqsna. Pablojj akham sänwa: “Suma yatiyäwinak laykuw nayajj taqe kun lurta, ukhamat yaqha jaqenakar suma yatiyäwinak yatiyañataki” sasa (1 Cor. 9:23). Diosan Reinopat yaqha jaqenakar yatiyañatakiw Pablojj chʼamachasïna (Romanos 1:14, 15; 2 Timoteo 4:2 liytʼañataki). Pablojj Diosan arunakap yatiyañ wali wakiskirit uñjäna, ukatwa jan walinakan uñjaskasas yatiyaskakïna (1 Tes. 2:2). ¿Kunjamsa Pablot yateqasisajj Diosan arunakap yatiyañ wali wakiskirit uñjsna?

9. ¿Kunanak lurasas Diosan arunakap yatiyañ wali wakiskirit uñjatas uñachtʼaysna?

⁹ Pablojj kawkjankkasas Diosan arunakap yatiyapunirïnwa, ukhamatwa Diosan arunakap yatiyañ wali wakiskirit uñjäna. Pablompita nayrïr cristianonakampit yateqasisajja, utat uta, walja jaqenak sarnaqki uka cheqanakana, jan ukajj yaqha cheqanakanwa yatiysna (Hech. 5:42; 20:20). Walja jaqenakar yatiyañatakejja, taqe cheqan yatiyañatakiw chʼamachasiñasa. Ukatakejj inas precursor auxiliarata, precursor regularat serviñ qalltsna. Jan ukajj yaqha aru yateqsna, markas pachpan yaqha cheqaru, jan ukajj anqäjj markaruw sarsna (Hech. 16:9, 10).

10. Suma yatiyäwinak yatiyañataki chʼamachasitapatjja, ¿kuna bendicionanaksa Irene kullakajj katoqäna?

¹⁰ Estados Unidos markankir Irene sat mä soltera kullakajja, ruso aru parlir jaqenakaruw suma yatiyäwinak yatiyañ munäna. Ukatwa 1993 maranjja, Nueva York markan ruso aru parlir mä grupor yanaptʼir saräna. Uka grupon 20 jilat kullakanakakiw utjäna. Pä tunka maranak qhepatjja, kullakajj akham siwa: “Janïraw ruso aru sum parlkti” sasa. Ukampis Jehová Diosaw uka kullakarusa, mayni jilat kullakanakarusa uka arun yatiyapjjañapatak yanaptʼawayi. Nueva York markanjja, ruso aru parlir sojjta congregacionanakaw utj-jje. Irene kullakajj waljaniruw Bibliat yatichawayi, jupanakat 15 bautisasipjje. Yaqhepajj Betelana, precursorata, jilïr irpiritwa servisipki. Irene kullakajj akham siwa: “Diosan markapan yaqhanak lurañ amtiriskayäta ukhajja, janiw jichjam wali kusisitäkiriskayätti” sasa. ¡Irene kullakatakejja, yatiyañajj wali wakiskiriwa!

11. Tʼaqesiyatpach yatiyaskakiñajja, ¿kunjamsa yanaptʼistu?

¹¹ Diosan arunakap munastan ukhajja, tʼaqesiyat uñjaskasas apóstol Pabljamaw yatiyaskakiñäni (Hech. 14:19-22). Amuytʼañataki, 1930 marat 1944 marakamajja, Estados Unidos markankir jilatanakajj tʼaqesiyata uñjaskasas yatiyasipkakïnwa. Marka apnaqerinakajj jan yatiyapjjañapatak jarktʼañ munapjjäna ukhajja, jilatanakajj tribunalan walja juicionakwa atipapjjäna. 1943 maranjja,  Estados Unidos markankir Jachʼa Tribunalanwa mä juicion atipawaytanjja sasaw Nathan Knorr jilatajj yatiyäna. Jilat kullakanakatï jan yatiyapkaspänjja, janiw mä juicios uka Tribunalar apaskaspänti. Jupanakajj yatiyasipkakïnwa, ukaw jan wal lurañatak arknaqapkäna ukajj inamayätap uñachtʼayi sasaw sarakïna. Yaqha markankir jilat kullakanakas ukar uñtasit juicionakanwa atipapjjaraki. Cheqasa, Diosan arunakap yatiyañajj jiwasatak wali wakiskiriwa, ukatwa jarkʼatpachas yatiyaskaktanjja.

12. ¿Kun lurañatakis chʼamachasïta?

¹² Diosan arunakap yatiyañatï jiwasatak wali wakiskirïchi ukhajja, janiw sapa phajjsejj qhawqha horanaksa yatiyasktan ukatak llakiskañäniti. Jan ukasti, “suma yatiyäwinak phoqatpach” yatiyañatakiw chʼamachasiñäni (Hech. 20:24; 2 Tim. 4:5). ¿Kuna toqetsa jaqenakar yatiysna? Diosajj kunsa churarakistu uk jichhajj yatjjatañäni.

13, 14. 1) ¿Mateo 13:52 qellqatan kuna toqetsa Jesusajj parlaskäna? 2) ¿Kunas “machaq” yatichäwinak jukʼamp yatjjatañatak yanaptʼistaspa?

¹³ Kunanaktï Jehová Diosajj yatichawaykistu ukanakajj wali valoranirakiwa. Jupatwa ukanakajj juti (2 Sam. 7:28; Sal. 31:5). Diosajj khuyaptʼayasir mä awkjamaw, cheqa yatichäwinak yatichañ munistu. Biblia liytʼasa, Bibliat apstʼat qellqatanak liytʼasa, jachʼa tantachäwinakar sarasa, sapa semana tantachäwinakar sarasaw cheqa yatichäwinak yateqtanjja. Jukʼampi yateqasajja, Jesusajj parlkäna uka ‘suma imatanakat machaqanaka merqʼenakaw’ utjistu (Mateo 13:52 liytʼañataki). Jiwasatï cheqa yatichäwinak qorirjam thaqañänejja, “machaq” cheqa yatichäwinak sum amuytʼañatakiw Jehová Diosajj yanaptʼistani (Proverbios 2:4-7 liytʼañataki). ¿Kunjamsa cheqa yatichäwinak sum yatjjatsna?

¹⁴ Sapüruw Biblia liyiñasa, Bibliat apstʼat qellqatanaksa liytʼañasa, ukatsti jukʼamp yatjjatañatak chʼamachasiñasawa. Ukaw jan yatkayätan uka “machaq” yatichäwinak sum amuytʼañatak yanaptʼistani (Jos. 1:8, 9; Sal. 1:2, 3). Yatiyañataki revistajj 1879 marana, julio phajjsin nayrïr kuti mistkäna ukan akham sänwa: ‘Cheqa yatichäwinakajj jan wali qoranakamp chhaqtayat mä panqarampi sasiwa. Uka panqara katuñatakejj wali amuyumpi thaqtañaw wakisi. Janiw mä panqara katusakejj kusisiñasäkiti. Walja panqaranak katuñatakiw chʼamachasiñasa. Cheqa yatichäwinakampejj ukhamarakiwa, janiw mä cheqa yatichäwimpik kusisiñasäkiti, jan ukasti jukʼamp cheqa yatichäwinak yateqañatakiw chʼamachasiñasa’ sasa.

15. 1) ¿Kunatsa yaqhep yatichäwinakarojj “merqʼe” yatichäwi sasejja? 2) ¿Kawkïr yatichäwis jumatak wali valoranejja?

¹⁵ Bibliat yateqañ qalltkayätan ukhajj cheqa yatichäwinakat mä qhawqha yatjjatayätanjja. Ukanakaruw merqʼe yatichäwinaka sissna. ¿Kawkïrinakas uka yatichäwinakajja? Jehová Diosajj taqe kun luratapa, jaqenakatakis mä suma amtanïtapa, jaqenakar juchampita jiwañampita salvañatak Wawapar aka Oraqer khitanitapwa qalltan yateqayätanjja. Ukatsti, Diosan Reinopaw taqe tʼaqesiñanak chhaqtayani, jan kunar ajjsarasaw aka Oraqen kusisit jakasiñäni sasaw yateqarakiyätanjja (Juan 3:16; Apo. 4:11; 21:3, 4).

16. Biblian yaqhep yatichäwinakapajj machaqat qhanañchasjje ukhajja, ¿kunsa sum amuytʼañatak lurañasa?

¹⁶ Awisajja, Bibliankir yaqhep textonakatsa, yaqhep profecianakatsa janiw nayrjam amuyasjjeti. Ukatwa kamsañsa muni uk machaqat qhanañchaski ukhajj sum yatjjatañatakisa,  lupʼiñatakis tiempo apstʼasiñasa (Hech. 17:11; 1 Tim. 4:15). Janiw nayra yatichäwimpi machaq yatichäwimpejj kunansa jan pachpäjje ukak yatjjatañasäkiti, jan ukasti kunanakas jukʼamp sum qhansti ukanakamppacha amuytʼañatakiw chʼamachasiñasa. Ukhamatwa machaq yatichäwinak jukʼamp sum yatjjatañäni. ¿Kunatsa sum yatjjatañatak chʼamachasiñasa?

17, 18. ¿Kunjamsa espíritu santojj yanaptʼistaspa?

¹⁷ Kunanaktï Bibliat yateqktan ukanak amtañatakejj espíritu santow yanaptʼapjjätam sasaw Jesusajj säna (Juan 14:25, 26). Diosan arunakap yatiyktan ukhajja, ¿kunjamsa yanaptʼistaspa? Peter jilatat amuytʼañäni. 1970 maran 19 maranïnwa, ukhakiw Gran Bretaña markankir Betelar mantäna. Mä urojja, utat uta yatiykasaw niya 50 marani sunkharar chachar yatiyäna. ‘¿Bibliat sum amuytʼañ munasmati?’ sasaw jilatajj jisktʼäna. Uka chachajj judío religionankir wali yatjjattʼat chachänwa, mä waynak Bibliat yatichañ munatap uñjasajj wal muspharäna. Bibliat yatiti janicha uk yantʼañatakikiw jilatar akham jisktʼäna: “Walikiw wawa, ¿Daniel librojj kuna arunsa qellqasïna?” sasa. Peter jilatajj sänwa: “Mä qhawqha cheqanakajj arameo arut qellqasïna” sasa. Peter jilatajj akham amti: “Yatjjattʼat chachajj ukham qhanañchatajat wal muspharäna. Ukampis nayaw kunjamatsa uka jisktʼar qhanañchpachäta sasin jukʼamp muspharayäta. Utar kuttʼasajja, Yatiyañataki ukhamarak ¡Despertad! revistanakajj mä qhawqha phajjsinak nayra mistkäna ukanakwa wasitat uñakipta. Ukanakat mä qellqatanjja, Daniel librojj arameo arutwa qellqasïna sasaw qhanañchäna” (Dan. 2:4). * Kunjamtï uñjktanjja, Biblian cheqa yatichäwinakap nayra liytʼkayätan ukanak amtañatakiw espíritu santojj yanaptʼistaspa (Luc. 12:11, 12; 21:13-15).

¹⁸ Jehová Diosajj yatichkistu uka cheqa yatichäwinak wali valoranit uñjañäni, yuspärañäni ukhajja, uka cheqa yatichäwinak taqe chuymaw yatjjataskakiñäni. Yaqhanakar yatiyañatakis jukʼamp wakichtʼatäñäniwa.

19. ¿Kunatsa Diosat katoqktan ukanak sum uñjañasa?

¹⁹ Diosat katoqktan ukanakajj wali valoranïtapwa aka yatichäwin yateqawaytanjja. Supayasa, jupan apnaqat akapachasa, ukanak aptʼasiñaswa munapjje, ukatwa wali amuyumpi sarnaqañasa. Jan amuyasksna ukhajja, mä suma trabajon walja qollqe ganañ munañampiw apayassna, jan ukajj wali utjirinïñ munsna, walja cosasanakanïsin jachʼa jachʼa tukuñwa munsna. Apóstol Juanajj “akapachasa munañanakapasa tukusiskiwa” sasaw säna (1 Juan 2:15-17). Ukatwa Diosajj churkistu ukanak wali wakiskirit uñjaskakiñatak chʼamachasiñasa.

20. ¿Diosat katoqkta ukanak sum imasiñatakejj kunsa luräta?

²⁰ Diosan Reinop wali wakiskirit uñjañat kunanakatï jarkʼkistaspa ukanak jankʼakiw apanukuñasa. Diosan arunakap yatiyañ wali wakiskirit uñjaskakiñatakiw chʼamachasiñasa, ukatsti taqe chuymaw yatiyaskakiñasa. Bibliankir cheqa yatichäwinak thaqaskakiñasawa. Ukhamatwa ‘wali valoranïki ukanakjja alajjpachar imasiñäni’ ukanjja janiw “lunthatas jakʼachaskaniti, ni thuthas thuthantkaniti”. Jesusan aka arunakap amtapuniñäni, jupajj akham sänwa: “Kawkintï jumanakan suma imatanakamajj utjki ukankarakiniw chuymanakamajja” sasa (Luc. 12:33, 34).