1, 2. (a) Anong tulong espirituwal na kayamanan an itinao sa sato ni Jehova? (b) Ano an pag-uulayan niyato sa artikulong ini?

SI Jehova an pinakamayaman na Persona sa uniberso. (1 Cron. 29:11, 12) Bilang an satong matinaong Ama, bukas-palad niyang itinatao an saiyang espirituwal na mga kayamanan sa gabos na nakakaaram kun gurano iyan kahalaga. Nagpapasalamat nanggad kita ta tinawan kita ni Jehova nin espirituwal na mga kayamanan, kaiba diyan an (1) Kahadian nin Diyos, (2) an satong nagliligtas-buhay na ministeryo, asin (3) an mahalagang marhay na mga katotoohan na yaon sa saiyang Tataramon! Pero kun dai kita mag-iingat, puwedeng mawara an satong pagpapahalaga sa mga kayamanan na ini asin maiapon an mga iyan. Tanganing dai iyan mangyari, kaipuhan na padagos tang girumdumon an halaga kaiyan asin pararumon an satong pagpapahalaga diyan. Sinabi ni Jesus: “Kun hain an saindong kayamanan, yaon man duman an saindong puso.”—Luc. 12:34.

² Pag-ulayan niyato kun paano ta mapapagdanay na makusog an satong pagpapahalaga sa Kahadian, ministeryo, asin sa katotoohan. Mantang ginigibo niyato iyan, hurop-hurupon man kun paano mo mismo  mapapararom an pagpapahalaga mo sa espirituwal na mga kayamanan na ini.

3. Ano an andam na gibuhon kan negosyante sa ilustrasyon ni Jesus tanganing mabakal an magayunon na perlas? (Hilingon an ritrato sa kapinunan kan artikulo.)

³ Basahon an Mateo 13:45, 46. May itinaong ilustrasyon si Jesus dapit sa sarong negosyante na naghahanap nin mga perlas. Sa pagnegosyo niya, siguradong nakabakal asin nakapabakal na siya nin ginatos na perlas. Pero ngunyan, may nahanap siyang sarong magayunon na perlas na dawa kan mahiling pa sana niya iyan ugmahon na siya. Pero tanganing mabakal iyan kaipuhan niyang ipabakal an gabos na pagsadiri niya. Naiimahinar mo daw kun gurano kahalaga sa saiya an perlas na iyan?

4. Kun mahalagang marhay sa sato an Kahadian nin Diyos arog kan paghiling kan negosyante sa perlas, ano an andam tang gibuhon?

⁴ Ano an manunudan niyato digdi? An katotoohan dapit sa Kahadian nin Diyos kaagid kan perlas na iyan na daing kapantay an halaga. Kun mahalagang marhay iyan sa sato arog kan paghiling kan negosyante sa perlas, magigin andam kitang bayaan an gabos tanganing magin sakop asin magdanay na sakop kan Kahadian. (Basahon an Marcos 10:28-30.) Pag-ulayan ta an duwang indibidwal na arog kaiyan mismo an ginibo.

5. Paano ipinahiling ni Zaqueo na mahalagang marhay sa saiya an Kahadian nin Diyos?

⁵ Si Zaqueo dating pamayo kan mga parasingil nin buhis na nagyaman paagi sa pangingikil nin kuwarta. (Luc. 19:1-9) Pero, kan madangog niya si Jesus na naghuhulit dapit sa Kahadian, nasabutan niya kun gurano kahalaga kan nadadangog niya kaya naghiro siya tulos. Sinabi niya: “Kagurangnan, an kabanga kan mga pagsadiri ko itatao ko sa mga pobre, asin ano man na nakikil ko sa kiisay man, ibabalik ko iyan na apat na doble.” Andam si Zaqueo na ibalik an mga nakikil niyang kayamanan asin ipinundo na niya an pagigin mahanab.

6. Anong mga pagbabago an ginibo ni Rose tanganing magin sakop siya kan Kahadian nin Diyos, asin taano ta ginibo niya iyan?

⁶ Nadangog kan sarong babayi na aapudon tang Rose an mensahe kan Kahadian pirang taon na an nakaagi. May karelasyon siya kaidtong babayi. Presidente man siya kan sarong organisasyon na ipinapakipaglaban an deretso kan mga homoseksuwal. Pero kan nag-aadal na si Rose nin Bibliya asin nahiling niya kun gurano kahalaga kan katotoohan dapit sa Kahadian nin Diyos, narealisar niyang kaipuhan niyang gumibo nin dakulang mga pagbabago. (1 Cor. 6:9, 10) Pinahiro siya kan saiyang puso na bayaan an posisyon niya asin tapuson na an pakikipagrelasyon sa kapwa niya babayi. Nabawtismuhan si Rose kan 2009, asin nagin regular payunir kan sunod na taon. An pagkamuot niya para ki Jehova asin sa saiyang Kahadian mas makusog kisa sa ano man na makalaman na mga pagmawot.—Mar. 12:29, 30.

7. Ano an kaipuhan niyatong gibuhon para mapagdanay na makusog an satong pagpapahalaga sa Kahadian nin Diyos?

⁷ Totoo, dakul sa sato an biyong binago an satong pagkatawo para magin sakop kan Kahadian nin Diyos. (Roma 12:2) Pero may kaipuhan pa kitang gibuhon. Dapat na pirmi kitang mag-ingat sa mga bagay na puwedeng makapaluya kan pagpapahalaga niyato sa Kahadian, arog kan pagmawot sa materyal na mga bagay asin sa ano man na imoral na pagmawot. (Tal. 4:23; Mat. 5:27-29) Tanganing mapagdanay niyatong makusog an satong pagpapahalaga sa Kahadian nin Diyos, tinawan kita ni Jehova nin saro pang kayamanan na daing kapantay an halaga.

8. (a) Taano ta inapod ni apostol Pablo an satong ministeryo na ‘kayamanan na yaon sa mga lalagan na dalipay’? (b) Paano ipinahiling ni Pablo an pagpapahalaga niya sa saiyang ministeryo?

⁸ Inasignaran kita ni Jesus na ihulit asin itukdo an maugmang bareta kan Kahadian nin Diyos. (Mat. 28:19, 20) Nahiling ni apostol Pablo kun gurano  kahalaga kan ministeryo. Inapod niya an ministeryo kan bagong tipan na ‘kayamanan na yaon sa mga lalagan na dalipay.’ (2 Cor. 4:7; 1 Tim. 1:12) Huling bako kitang perpekto, arog kita kan mga lalagan na dalipay na iyan. Pero an mensaheng ihinuhulit niyato puwedeng magtao nin daing sagkod na buhay para sa sato asin sa mga nagdadangog sa sato. Aram ini ni Pablo kaya sinabi niya: “Ginigibo ko an gabos na bagay para sa maugmang bareta, tanganing maipaabot ko iyan sa iba.” (1 Cor. 9:23) Iyo, an pagpapahalaga ni Pablo sa ministeryo an nagpahiro sa saiya na magmaigot sa paggibo nin mga disipulo. (Basahon an Roma 1:14, 15; 2 Timoteo 4:2.) Nakatabang iyan sa saiya na matagalan an grabeng pagkontra. (1 Tes. 2:2) Paano ta maaarog an pagpapahalaga ni Pablo sa ministeryo?

9. Ano an nagkapirang paagi na maipapahiling ta an satong pagpapahalaga sa ministeryo?

⁹ An sarong paagi na ipinahiling ni Pablo na mahalagang marhay sa saiya an ministeryo iyo an pagigin alisto niya sa mga oportunidad na makapagpatotoo sa iba. Arog kan mga apostol asin kan mga Kristiyano kan inot na siglo, naghaharong-harong kita, naghuhulit sa mga pampublikong lugar asin sain man may tawo. (Gibo 5:42; 20:20) Sagkod na nasa kamugtakan, naghahanap kita nin mga paagi para mapahiwas an satong ministeryo. Tibaad paagi sa pag-auxiliary o pagregular payunir. Tibaad puwede man kitang mag-adal nin ibang lengguwahe, magbalyo sa ibang lugar, sa laog man o sa luwas pa ngani kan nasyon.—Gibo 16:9, 10.

10. Anong mga bendisyon an nakamtan ni Irene huli sa pagmamaigot niyang ihulit an maugmang bareta?

¹⁰ Pag-isipan an halimbawa ni Irene, na sarong daing agom na sister sa Estados Unidos. Gustong-gusto niyang maghulit sa mga nag-imigrar na nagtataram nin Russian. Kan punan niyang gibuhon iyan kan 1993, igwa sana nin 20 parahayag sa Russian-language group sa siyudad nin New York. Mga 20 taon na siyang maigot na naglilingkod diyan. Sinabi ni Irene: “Bako pa man giraray akong matibay mag-Russian.” Pero binendisyunan ni Jehova an kaigutan niya asin kan iba pang arog niya. Ngunyan, igwa nang anom na kongregasyon sa lengguwaheng Russian sa siyudad nin New York. Kinse sa mga tinukduan ni Irene sa Bibliya an nabawtismuhan. An iba sa sainda naglilingkod bilang Bethelite, payunir, asin elder. Sinabi ni Irene, “Pag iniisip ko an iba pa kutanang pasuhan ko kaidto, mayo na akong maisip na mas makakapagpaugma sako.” Iyo, pinapahalagahan niyang marhay an saiyang ministeryo!

11. Ano an marahay na mga resulta kun padagos kitang maghuhulit sa ibong nin persekusyon?

¹¹ Kun pinapahalagahan tang marhay an satong ministeryo, magigin arog kita ni apostol Pablo na padagos na naghulit sa ibong nin persekusyon. (Gibo 14:19-22) Kaidtong dekada nin 1930 sagkod sa inot na mga taon kan dekada nin 1940, napaatubang sa grabeng pagkontra an satong mga tugang sa Estados Unidos. Pero arog ni Pablo, nanindugan sinda asin padagos na naghulit. Para maprotektaran an satong deretso na maghulit, dakul na kaso an ipinakipaglaban kan satong  mga tugang. Kan 1943, ini an sinabi ni Brother Nathan H. Knorr dapit sa sarong kasong ginana ta sa Korte Suprema kan U.S.: “Nanggana kita huli sa saindong kaigutan. Kun dai nagpadagos sa paghuhulit an mga parahayag, dai kuta nin mga kasong isinangat sa Korte Suprema; pero huli sa saindo, mga parahayag, gabos na tugang sa bilog na kinaban, dahil nagpadagos kamo asin dai nagpundo, nadaog ta an mga nagpersegir sa sato. Huli sa marigon na paninindugan kan mga lingkod kan Kagurangnan kaya nagin paborable an desisyon.” Nanggagana man an satong mga tugang sa ibang mga nasyon huli sa arog man kaiyan na paninindugan. Iyo, puwedeng madaog kan satong pagpapahalaga sa ministeryo an persekusyon.

12. Kun dapit sa saimong ministeryo, ano an determinado mong gibuhon?

¹² Kun ibinibilang niyato an ministeryo na sarong kayamanan na daing kapantay an halaga hali ki Jehova, dai sana kita mapokus sa kun pirang oras an irereport ta. Imbes, gigibuhon niyato an gabos tang makakaya tanganing “lubos na magpatotoo manungod sa maugmang bareta.” (Gibo 20:24; 2 Tim. 4:5) Pero ano an itutukdo ta sa iba? Pag-ulayan ta an saro pang kayamanan hali sa Diyos.

13, 14. Ano an “sarayan nin kayamanan” na sinambit ni Jesus sa Mateo 13:52, asin paano ta dadagdagan an laog kaiyan?

¹³ An satong ikatulong espirituwal na kayamanan iyo an gabos na katotoohan na nanudan niyato. Si Jehova an Diyos nin katotoohan. (2 Sam. 7:28; Sal. 31:5) Bilang an satong matinaong Ama, ihinahayag niya an mga katotoohan na ini sa mga may takot sa saiya. Puon kan inot tang madangog an katotoohan, nagkaoportunidad na kitang magkua nin mga katotoohan hali sa saiyang Tataramon, an Bibliya, hali sa satong mga publikasyon, asin sa satong mga kumbensiyon, asembleya, asin mga pagtiripon kada semana. Sa paglihis nin panahon, nagkaigwa kita kan inaapod ni Jesus na “sarayan nin kayamanan” kan mga luma asin bagong katotoohan. (Basahon an Mateo 13:52.) Tatabangan kita ni Jehova na madagdagan nin mahalagang marhay na bagong mga katotoohan an satong “sarayan nin kayamanan” kun hinahanap niyato iyan arog kan sa nakatagong mga kayamanan. (Basahon an Talinhaga 2:4-7.) Paano ta iyan gigibuhon?

¹⁴ Kaipuhan niyatong regular na pag-adalan an Bibliya asin an satong mga publikasyon saka magsiyasat na marhay. Makakatabang ini sa sato na madiskubre an mga katotoohan na masasabi tang “bago” huling dai ta pa iyan aram kaidto. (Jos. 1:8, 9; Sal. 1:2, 3) An kainot-inuting isyu kan magasin na ini, na ipinublikar kan Hulyo 1879, nagsabi: “An katotoohan, arog nin sarong sadit na burak na dai gayong risa sa kadlagan nin búhay, napapalibutan asin haros mapuot na kan marambong na mga duot nin salang mga impormasyon. Tanganing mahiling mo iyan, dapat kang padagos na maghanap. . . . Para mapasaimo iyan, dapat na dumuko ka asin kuanon iyan. Dai ka makontento sa saro sanang burak nin katotoohan. . . . Padagos na kumua, maghanap nin dakul pa.” Iyo, dapat na pagmaigutan niyatong mas dagdagan an laog kan satuyang sarayan nin mga katotoohan na hali sa Diyos.

15. Taano ta masasabi niyato na “luma” an nagkapirang katotoohan, asin arin sa mga iyan an personal mong pinapahalagahan na marhay?

¹⁵ May mga nanudan kitang mahalagang marhay na mga katotoohan kan inot kitang makiasosyar sa banwaan nin Diyos. Masasabi tang “luma” iyan huling iyan an inot niyatong mga naaraman kan nagpupuon pa sana kitang magin Kristiyano. Ano an pira sa mga katotoohan na iyan? Nanudan niyato na si Jehova an satong Kaglalang saka an Paratao nin Buhay asin na may katuyuhan siya para sa katawuhan. Nanudan ta man na mamumuton na itinao nin Diyos an saiyang Aki bilang atang na pantubos tanganing mapatalingkas kita sa kasalan asin kagadanan. Asin nanudan niyato na an Kahadian Niya an matapos sa gabos na kasakitan asin  na may paglaom kitang mabuhay nin daing sagkod, na matuninong asin maugma sa pamamahala kan Kahadian.—Juan 3:16; Kap. 4:11; 21:3, 4.

16. Ano an kaipuhan niyatong gibuhon pag may itinaong pagbabago sa pakasabot niyato dapit sa sarong katotoohan?

¹⁶ Sa pana-panahon, may mga itinataong pagbabago sa pakasabot niyato sa mga hula o teksto sa Bibliya. Kaipuhan niyatong magtagama nin panahon para pag-adalan na marhay asin hurop-hurupon an bagong impormasyon na iyan. (Gibo 17:11; 1 Tim. 4:15) Hinguwahon niyatong masabutan nin malinaw bako sana an panginot na mga ginibong pagbabago, kundi pati idtong saradit na mga detalye kan bagong pakasabot. Paagi kaini, masisigurado niyatong maidadagdag ta an bagong katotoohan na iyan sa satuyang sarayan nin kayamanan. Taano ta kapaki-pakinabang an paggibo kaini?

17, 18. Paano kita matatabangan kan banal na espiritu?

¹⁷ Itinukdo ni Jesus na puwedeng ipagirumdom sa sato kan banal na espiritu nin Diyos an mga nanudan ta. (Juan 14:25, 26) Paano ini makakatabang sa sato pag naghuhulit kan maugmang bareta? Pag-isipan an eksperyensiya nin sarong brother na an pangaran Peter. Kan 1970, 19 anyos siya asin bago pa sana siyang maglingkod sa Bethel sa Britania. Mantang naghaharong-harong, nakaulay niya an sarong barabason asin medyo may edad nang lalaki. Hinapot ni Peter an lalaki kun gusto kaining masabutan an Bibliya. Medyo nabigla an lalaki asin sinabi kaini na saro siyang Judiong rabbi. Tanganing purbaran si Peter, naghapot an rabbi, “Sige daw Noy, sa anong lengguwahe isinurat an libro nin Daniel?” Nagsimbag si Peter, “An iba kaiyan isinurat sa Aramaiko.” Inistorya ni Peter, “Nabigla an rabbi ta aram ko an simbag—pero mas nabigla ako! Taano ta aram ko iyan? Pagpuli sa harong, hiniling ko an nakaagi pa sanang mga isyu kan magasin na An Torrengbantayan saka Awake! Nahiling ko an sarong artikulo na diyan ipinapaliwanag na isinurat an libro nin Daniel sa lengguwaheng Aramaiko.” (Dan. 2:4) Iyo, puwedeng ipagirumdom sa sato kan banal na espiritu an mga impormasyon na nabasa ta asin yaon na sa satuyang sarayan nin kayamanan.—Luc. 12:11, 12; 21:13-15.

¹⁸ Kun pinapahalagahan tang marhay an kadunungan hali ki Jehova, papahiruon kita kan satong puso na padagos na dagdagan nin mga katotoohan—bago asin luma—an satuyang sarayan nin kayamanan. Mantang mas nagkukusog an satong pagpapahalaga sa kadunungan ni Jehova, mas nagigin andam kitang magtukdo sa iba.

19. Taano ta dapat niyatong protektaran an satong espirituwal na mga kayamanan?

¹⁹ Si Satanas asin an saiyang kinaban padagos na naghihinguwang paluyahon o halion an satong pagpapahalaga sa espirituwal na mga kayamanan na pinag-ulayan ta sa artikulong ini. Bako kitang ligtas sa mga pakanang iyan. Kun dai kita mag-iingat, madali kitang madadara kan mga inaalok kan kinaban na trabahong halangkaw an suweldo asin maluhong pamumuhay, o kan pagmawot na ipagpasikat an mga bagay na igwa kita. Pinatanidan kita ni apostol Juan na an kinaban na ini mapapara pati na an mga kamawutan kaiyan. (1 Juan 2:15-17) Iyan an dahilan kaya dapat na padagos tang pahalagahan an satong espirituwal na mga kayamanan asin magmaigot na protektaran iyan.

20. Ano an determinado mong gibuhon tanganing maprotektaran an saimong espirituwal na mga kayamanan?

²⁰ Magin andam na bayaan an ano man na makakapaluya sa pagpapahalaga mo sa Kahadian nin Diyos. Padagos na magin maigot sa paghuhulit, asin nungka man na paluyahon an pagpapahalaga mo sa satong nagliligtas-buhay na ministeryo. Padagos asin maigot na maghanap nin mga katotoohan hali sa Bibliya. Mantang ginigibo mo ini, nakakatipon ka nin “kayamanan sa langit, kun sain daing parahabon an nakakarani asin daing mga insekto an nangraraot. Huli ta kun hain an saindong kayamanan, yaon man duman an saindong puso.”—Luc. 12:33, 34.