1, 2. (a) Fyuma nshi fitatu ifya ku mupashi ifyo Yehova atupeela? (b) Finshi twalasambilila muli cino cipande?

YEHOVA e wakwatisha icuma mwi sonde lyonse na ku muulu. (1 Imila. 29:11, 12) Apo Shifwe ni kapekape, alapeela ifyuma fya ku mupashi kuli bonse abeluka ukuti fyalicindama. Tulatasha sana Yehova pa kutupeela ifyuma fya ku mupashi, apaba (1) Ubufumu bwa kwa Lesa, (2) imbila nsuma iikalenga abantu bakapusuke, na (3) icine icacindama icaba mu Cebo cakwe! Nomba nga tatucenjele, kuti twaleka ukumona ifi fyuma ukuti fyalicindama kabili kuti twafisuula. Pa kuti tutwalilile ukuficindamika, tulingile ukulafibomfya bwino kabili lyonse tulingile ukutwalilila ukufitemwa. Yesu atile: “Ukuli icuma cenu, e kuba ne mitima yenu.”—Luka 12:34.

² Natulande pa fyo twingacita ne fyo twingatwalilila ukutemwa no kutasha pa Bufumu, pa mulimo wa kubila imbila nsuma na pa cine. Ilyo tulelanda pali ifi, muletontonkanya pa fyo mwingacita pa kuti mutemwe sana ifi ifyuma fya ku mupashi.

3. Finshi uwa makwebo mu cilangililo ico Yesu alandile aitemenwe ukucita pa kuti akwate margariti uwauma umutengo? (Moneni icikope pa ntendekelo ya cino cipande.)

³ Belengeni Mateo 13:45, 46. Yesu alandile icilangililo ca wa makwebo uwalefwaya bamargariti. Pa myaka iingi, uyu uwa makwebo aleshita no kushitisha bamargariti abengi. Lelo alisangile margariti umo uwaweme sana ica kuti ilyo aumwene fye alisekelele nga nshi. Nomba pa kuti ashite uyu margariti alingile ukushitisha fyonse ifyo akwete. Ukwabula no kutwishika uyu margariti ali uwacindama sana ku wa makwebo!

4. Finshi tukacita nga twatemwa Ubufumu bwa kwa Lesa nga filya uwa makwebo atemenwe margariti?

⁴ Finshi tulesambililako ku wa makwebo? Ubufumu bwaba kwati ni margariti uwauma umutengo. Nga twatemwa sana Ubufumu nga filya uwa makwebo atemenwe ulya margariti, tukaitemenwa ukusha fyonse pa kuti tukabe abatekwa ba Bufumu. (Belengeni Marko 10:28-30.) Natulande pa bantu babili abacitile ifi twalandapo.

5. Bushe Sakeo alangile shani ukuti alefwaisha ukunonka Ubufumu bwa kwa Lesa?

⁵ Sakeo ali ni kasonkesha umukalamba uwa misonko, kabili ali umukankaala pa mulandu wa kuti alepoka abantu indalama mu bucenjeshi. (Luka 19:1-9) Ilyo Sakeo aumfwile Yesu alesambilisha abantu pa Bufumu, alilwike ukuti ifyo aleumfwa fyali nge cuma icapulamo, kabili ilyo line fye alicitilepo fimo. Atile: “Moneni! Mwe Shikulu, hafu wa fyo nakwata, ndepeela abapiina, na conse ico napokele mu bucenjeshi ku muntu onse ndebweseshapo imiku ine.” Aliitemenwe ukusha icuma conse ico apokele mu bucenjeshi kabili alilekele ukuba no bufunushi.

6. Bushe ba Rose bayalwike shani pa kuti babe abatekwa ba Bufumu bwa kwa Lesa, kabili cinshi calengele baluke?

⁶ Tapalapita imyaka iingi ukutula apo umwanakashi uo twalaita ukuti Rose aumfwilile imbila ya Bufumu, pali ilya nshita aleishishanya no mwanakashi munankwe. Ali mukalamba wa kabungwe akalelwisha ukuti basuminishe abaume ukulalaala na baume banabo na banakashi ukulalaala na banakashi banabo. Ilyo ba Rose batendeke ukusambilila Baibolo, balimwene ukuti icine pa Bufumu bwa kwa Lesa cuma icapulamo. Lelo balilwike ukuti balingile ukuleka ifyabipa ifyo balecita. (1 Kor. 6:9, 10) Ba Rose balifumine mu kabungwe balimo kabili balilekele no kwishishanya no mwanakashi munabo. Ba Rose balibatishiwe mu 2009, kabili umwaka wakonkelepo balitendeke bupainiya bwa nshita yonse. Ukutemwa batemenwe Yehova no Bufumu bwakwe kwali ukwakosa ukucila ulunkumbwa lwa mubili.—Marko 12:29, 30.

7. Kuti twacita shani pa kuti tutwalilile ukutemwa Ubufumu bwa kwa Lesa no mutima onse?

⁷ Kwena fwe bengi twalyalula ubumi bwesu pa kuti tube abatekwa ba Bufumu bwa kwa Lesa. (Rom. 12:2) Na lyo line tulingile ukutwalilila ukuba abacenjela ku fintu ifingalenga twaleka ukutemwa Ubufumu, apaba no kutemwisha ifyuma e lyo no lunkumbwa lwa kufwaya ukucita ubulalelale. (Amapi. 4:23; Mat. 5:27-29) Yehova alitupeela icuma na cimbi icingatwafwa ukutwalilila ukutemwa Ubufumu bwakwe no mutima wesu onse.

8. (a) Mulandu nshi umutumwa Paulo alandile ukuti umulimo wa kubila imbila nsuma ‘cuma mu fipe fye bumba’? (b) Finshi Paulo alecita ifilanga ukuti alemona umulimo wa kubila ukuti cuma?

⁸ Yesu alitupeela umulimo wa kubila no kusambilisha abantu imbila nsuma ya Bufumu bwa  kwa Lesa. (Mat. 28:19, 20) Umutumwa Paulo alishibe ifyo umulimo wa kubila imbila nsuma wacindama. Alemona umulimo wa cipangano cipya ukuti “cuma . . . mu fipe fye bumba.” (2 Kor. 4:7; 1 Tim. 1:12) Nangu ca kuti tuli fipe fye bumba ifishapwililika, imbila tubila kuti yalenga twaisapusuka, twapususha na baletumfwa. Paulo alishibe ifi, e ico atile: “Awe ifintu fyonse ncitila imbila nsuma, pa kuti nshimikileko bambi.” (1 Kor. 9:23) Ukwabula no kutwishika ifyo Paulo atemenwe ukubila imbila nsuma fyalengele alebombesha ukupanga abasambi. (Belengeni Abena Roma 1:14, 15; 2 Timote 4:2.) Ici calengele aleshipikisha ilyo balemucusha. (1 Tes. 2:2) Kuti twalanga shani ukuti twalitemwa umulimo wa kubila imbila nsuma?

9. Finshi fimo ifyo twingacita pa kuti tulelanga ukuti tulatasha pa umulimo wa kubila imbila nsuma?

⁹ Inshila imo iyo Paulo alangiilemo ukuti aletasha sana pa mulimo wa kubila imbila nsuma ya kuti alebomfya bwino inshita yonse iyo aleshukila ku kulanda na bantu pa cine. Filya fine abatumwa na Bena Kristu abaliko pali ilya nshita balecita, na ifwe tulabila imbila nsuma ku cintubwingi, ku ng’anda ne ng’anda e lyo na mu lyashi fye. (Imil. 5:42; 20:20) Kuti twalabombesha mu mulimo wa kubila imbila nsuma, kabili nga tuli na maka nalimo kuti twabombako bupainiya bwa kwafwilisha nelyo ubwa nshita yonse. Na kabili kuti twasambililako ululimi na lumbi, kabili kuti twakukiila ku ncende imbi mu calo cesu nelyo ku calo cimbi.—Imil. 16:9, 10.

10. Bushe ba Irene bapaalwa shani pa fyo baba abacincila mu mulimo wa kubila imbila nsuma?

¹⁰ Natulande pali ba Irene, bankashi abashimbe abekala ku United States. Balefwaisha ukubila imbila nsuma ku bena Russia abakukiile ku United States. Mu 1993 ilyo batendeke ukubila, mu musumba wa New York City mwali fye ibumba ilinono ilya bakasabankanya 20 abalelanda iciRussian. Ba Irene balibila imbila nsuma muli ulu ululimi pa myaka nalimo 20, batile: “Na nomba line nshaishibisha ukulanda iciRussian.” Lelo Yehova alipaala ba Irene na bakasabankanya bambi pa fyo babombesha. Pali ino nshita, mu musumba wa New York City mwaba ifilonganino 6 ifibomfya ululimi lwa ciRussian. Pa bantu abo ba Irene basambilishe icine, 15 balibatishiwe. Bamo babombela pa maofeshi ya musambo, bambi ni bapainiya, e lyo bambi ni baeluda. Ba Irene batile, “Nga natontonkanya pa milimo imbi iyo napangile ukubomba, tapaba umulimo umbi uwali no kulenga naba ne nsansa ukucila pali uyu mulimo momba.” Ukwabula no kutwishika, ba Irene bamona uyu mulimo ukuti cuma!

11. Fisuma nshi fyacitike pa mulandu wa kuti aba bwananyina balitwalilile ukubila imbila nsuma nangu ca kuti balebacusha?

¹¹ Nga tumona umulimo wa kubila ukuti cuma, tukatwalilila ukubila imbila nsuma nangu batucushe, nga filya umutumwa Paulo  acitile. (Imil. 14:19-22) Mu myaka ya ba 1930 na mu kutampa kwa ba 1940, bamunyinefwe mu calo ca United States balebacusha icine cine. Lelo bali abashipa kabili balitwalilile ukubila imbila nsuma nga filya Paulo acitile. Pa kuti bacingilile insambu shabo isha kubila imbila nsuma, bamunyinefwe balitwele imilandu iingi ku filye. Mu 1943, ilyo munyinefwe Nathan H. Knorr alelanda pa mulandu bacimfishe mu cilye cikalamba ica United States Supreme Court, atile: “Icalenga ukuti tucimfye, mulandu wa kubombesha kwenu. Nga ca kuti bakasabankanya balilekele ukubila imbila nsuma, nga takwali umulandu nangu umo uo twatwele ku cilye icikalamba ica Supreme Court; lelo pa mulandu wa kuti imwe bakasabankanya, na ba bwananyina mwi sonde lyonse mwalitwalilila kabili tamwakaleke ukubila imbila nsuma e calenga tucimfye abatucusha. Ico twacimfisha ni co abantu ba kwa Shikulu balitwalilila ukuba abashipa.” Aba bwananyina mu fyalo fimbi nabo balishipa kabili balicimfya imilandu iingi mu filye. Ukulanda fye icishinka, nga twatemwa umulimo wa kubila kuti twacimfya abatucusha.

12. Finshi mufwaisha ukucita mu mulimo wa kubila imbila nsuma?

¹² Nga tulemona umulimo wa kubila ukuti cuma ico Yehova atupeela, tatwakulabombela fye ico cine pa kuti tukwate amaawala ya kutuma pa mweshi. Lelo tukalabomba na maka yonse “ukubila sana imbila nsuma.” (Imil. 20:24; 2 Tim. 4:5) Nomba finshi tusambilisha abantu bambi? Natulande pa cuma na cimbi ico Lesa atupeela.

13, 14. Bushe “icipao” ico Yesu alandilepo pali Mateo 13:52 ni cinshi, kabili tucisusha shani?

¹³ Icuma ca ku mupashi icalenga butatu, cine ico Yehova atusokolwela. Yehova ni Lesa wa cine. (2 Sam. 7:28; Amalu. 31:5) Apo Yehova Shifwe ni kapekape, alasambilisha abamutiina icine. Ukutula ilyo twaumfwile icine pa muku wa kubalilapo, twalitwalilila ukusambilila ifintu ifingi mu Baibolo, mu mpapulo, na pa kulongana kukalamba no kunono. Mu kupita kwa nshita, twatendeke ukukwata ico Yesu aitile ukuti “icipao” umwaba icine ica kale ne cipya. (Belengeni Mateo 13:52.) Yehova akatwafwa ukusunga icine icacindama mu “cipao nga tulecifwayafwaya kwati tulefwaya ifyuma ifyashikama.” (Belengeni Amapinda 2:4-7.) Kuti twacita shani ifyo?

¹⁴ Tulingile ukutemwa ukuisambilisha Baibolo no kulafwailapo ifyebo mu Cebo ca kwa Lesa na mu mpapulo shesu. Nga tulecita ifi, tukeshiba icine ‘icipya’ ico tushaishibe kale. (Yosh. 1:8, 9; Amalu. 1:2, 3) Magazini ya kubalilapo iyafumine mu July 1879, yatile: “Icine, caba kwati liluba ilinono ilyaba mu matololo, mu mbali ye luba mwaba fikalolo e kutila ubufi kabili fikalolo fingi ica kutila kuti fyatabilila iluba. Pa kuti musange iluba e kuti icine mulingile ukulifwaya. . . . Nga mwalisanga mulingile ukukontama pa kuti mulibuule. Tamulingile ukupelela fye pa kukwata iluba limo ilya cine. . . . Lelo mulingile ukufwailapo na yambi.” Kanshi tulingile ukulafwaisha ukwisusha icine mu cipao cesu.

15. Mulandu nshi twingalandila ukuti icine cimo ca ‘kale,’ kabili cine nshi ica kale ico mwacindamika sana?

¹⁵ Na kabili twalisangile icuma icauma umutengo ilyo twatendeke ukusambilila Baibolo na bantu ba kwa Lesa. Ici cine kuti twaciita ukuti cine ca ‘kale,’ pantu e co twabalilepo ukwishiba kabili twalicitemwa ukutula na pa kutendeka. Cine nshi icacindama ico twasambilile? Twasambilile ukuti Yehova e Kabumba wesu kabili e watupeela ubumi no kuti kwaliba ico abumbiile abantunse. Na kabili twalisambilile ukuti pa mulandu wa kuti Lesa alitutemwa, alitupeele Umwana wakwe uwatufwilile pa kuti tulubuke  ku lubembu ne mfwa. Twalisambilile no kuti Ubufumu bukafumyapo ukucula konse kabili tukekala umuyayaya, mu mutende e lyo tukaba ne nsansa ilyo Ubufumu bukalateka isonde.—Yoh. 3:16; Ukus. 4:11; 21:3, 4.

16. Finshi tulingile ukucita nga kwaba ukwaluka mu fyo twaishibe icine?

¹⁶ Limo limo ifyo twaishiba pa masesemo ya mu Baibolo nelyo pe Lembo kuti fyayaluka. Nga kwaba ukwaluka, tulingile ukubikako amano ilyo tuleisambilisha ifyo fyebo ifipya no kutontonkanyapo sana. (Imil. 17:11; 1 Tim. 4:15) Tatulingile ukulafwaisha fye ukwishiba bwino ukwaluka ukukalamba ukwa malembo, lelo tulingile no kulafwaisha ukwishiba ubupusano ubunono ubuli pa fyo twaishibe kale ne fipya ifyalwilwe. Nga tulecita ifi, tukasungilila icine icipya mu cipao cesu. Busuma nshi bwaba mu kucita ifi?

17, 18. Bushe umupashi wa mushilo kuti watwafwa shani?

¹⁷ Yesu asambilishe ukuti umupashi wa kwa Lesa kuti watwibukishako ifyo twasambilile kale. (Yoh. 14:25, 26) Bushe umupashi kuti watwafwa shani fwe babila imbila nsuma ku cintubwingi? Natulande pali munyinefwe Peter. Mu 1970 ali ne myaka 19 kabili e lyo atendeke fye ukubombela pa musambo wa ku Britain. Ilyo aleshimikila ku ng’anda ne ng’anda, akumenye umwaume uwali ne myaka nalimo 50, kabili ali no mwefu uutali. Ba Peter baipwishe umwaume nga kuti atemwa ukumfwikisha ifya mu Baibolo. Umwaume alipapile sana, e ico aebele ba Peter ukuti pano pekala abaYuda. Uyu mwaume ali ni kasambilisha wa baYuda, apo alefwaya ukwesha ba Peter, abepwishe ati, “Mulumendo, lulimi nshi balembeelemo ibuuku lya kwa Daniele?” Ba Peter bayaswike abati, “Ifipandwa fimo bafilembele mu ciAramaic. Uyu mwaume alipapile ukuti nalishibe icasuko, nomba ne wapapile sana nine! Naishibe shani icasuko? Ilyo naile ku ng’anda natendeke ukufwaya ifyebo mu Ulupungu lwa kwa Kalinda na Loleni! iyafumine ku numa, nasangile icipande icalondolwele ukuti ibuuku lya kwa Daniele balilembele mu ciAramaic.” (Dan. 2:4) Kanshi te kuti tutwishike ukuti umupashi wa mushilo ulatwibukishako ifyo twabelengele kale, ifyo twasungila mu cipao cesu.—Luka 12:11, 12; 21:13-15.

¹⁸ Nga tumona amano ayo Yehova atusambilisha ukuti cuma, tukesusha icine icipya ne ca kale mu cipao cesu. Nga twaya tuletemenwako amano ya kwa Yehova, tukaipekanya ukulasambilisha bwino abantu.

19. Mulandu nshi uo tulingile ukucingilila ifyuma fyesu ifya ku mupashi?

¹⁹ Satana ne calo cakwe balafwaya inshila shalekanalekana ishingalenga twaleka ukutemwa ifyuma ifyo twalandapo muli cino cipande. Nga tatucenjele kuti twabelelekwa ku micenjelo ya kwa Satana. Kuti twatendeka ukukumbwa incito sha pa muulu, imikalile ya bwanalaale, e lyo kuti twalaitakishisha na pa fyo twakwata. Umutumwa Yohane atweba ukuti cino calo cileya no kunkumbwa lwa ciko. (1 Yoh. 2:15-17) Kanshi tulingile ukubombesha pa kuti tulecingilila ifyuma fyesu ifya ku mupashi no kutwalilila ukufitemwa.

20. Finshi mulefwaisha ukucita pa kuti mulecingilila ifyuma fyenu ifya ku mupashi?

²⁰ Muleitemenwa ukusha fyonse ifingalenga mwaleka ukutemwa Ubufumu bwa kwa Lesa. Twalilileni ukuba abacincila pa kubila imbila nsuma, kabili mwikaleka ukutemwa umulimo wa kupususha abantu. Twalilileni ukufwayafwaya icine. Nga mulecita ifi, ninshi muleilonganikila “icuma icishingapwa [ku] muulu, uko umupuupu tapalama nelyo icipelebesha ca bushiku taconaula. Pantu ukuli icuma cenu, e kuba ne mitima yenu.”—Luka 12:33, 34.