1, 2. a) Jehova ye nafolofɛn saba jumanw lo di an ma? b) An bena mun lo lajɛ barokun nin na?

DUNIƝA kɔnɔ, mɔgɔ si ka nafolo ma se Jehova ta ma (1 Til. Kib. 29:11, 12). Dɔw b’a faamu ko Jehova ka nafolofɛnw nafa ka bon. I ko Faa ɲuman, Jehova b’a tɛgɛ labila k’o mɔgɔw sɔn. An be Jehova waleɲuman lɔn sabu a y’a ka nafolofɛn dɔw di an ma. O nafolofɛn dɔw ye 1) Ala ka Masaya, 2) waajuli baara ani 3) tiɲɛn kalan nafamanba minw be Ala ka Kuma kɔnɔ! Nka n’an m’an yɛrɛ kɔrɔsi, an tɛna o nafolofɛnw nafa ye tugun ani a laban, an bena u mafiɲɛya. Walisa k’u jati fɛɛn nafamanbaw ye, an ka ɲi ka baara kɛ n’u ye koɲuman. Ka fara o kan, an ka ɲi k’a to u koo ka diya an ye kosɔbɛ. Yezu ko: “Aw ka nafolo be yɔrɔ min na, aw ka miiriya be o yɔrɔ la fana.”—Luka 12:34.

² An k’a filɛ cogo min na an be se ka dɔ fara an ka kanuya kan ani ka Ala waleɲuman lɔn fɛɛn nunu koo la: Ala ka Masaya, waajuli baara ani tiɲɛn kalanw. Kalan lajɛtɔ, a filɛ i be se ka min kɛ walisa o nafolofɛnw koo ka diya i ye kosɔbɛ.

3. Yezu ye jagokɛla min kofɔ, ale sɔnna ka mun lo kɛ walisa ka kɔnɔkisɛ sɔngɔ gwɛlɛ dɔ san? (Jaa lajɛ, barokun daminɛ na.)

³ Matiyo 13:45, 46 kalan. Yezu ye ntalen dɔ la jagokɛla dɔ koo la min tun be kɔnɔkisɛw ɲini. Siga t’a la, saan caaman kɔnɔ, o cɛɛ ye kɔnɔkisɛ caaman san k’u feere. Sisan, a ye kɔnɔkisɛ dɔ ye min cɛ ka ɲi kosɔbɛ. A yeko dɔrɔn y’a dusu diya. A y’a bololafɛnw bɛɛ feere walisa ka se k’o kɔnɔkisɛ san. Miiri k’a filɛ o kɔnɔkisɛ koo tun ka gwɛlɛ a ma cogo min na!

4. Ni Ala ka Masaya koo ka di an ye, an bena mun lo kɛ?

⁴ O jagokɛla ka koo be mun lo yira an na? Tiɲɛn kalan minw ɲɛsinna Ala ka Masaya koo ma, u be i n’a fɔ kɔnɔkisɛ sɔngɔ gwɛlɛ. N’u koo ka di an ye i ko kɔnɔkisɛ koo tun ka di jagokɛla ye cogo min na, fɛɛn o fɛɛn b’an fɛ, an bena sɔn k’u to yen. Mun na do? Walisa ka kɛ Ala ka Masaya ka marakɔnɔmɔgɔ dɔ ye fɔɔ abada (Mariki 10:28-30 kalan). An ka mɔgɔ fila ka koo lajɛ minw sɔnna k’u ka fɛɛnw bɛɛ to yen Ala ka Masaya kosɔn.

5. Zase tun labɛnnin lo ka mun lo kɛ Ala ka Masaya kosɔn?

⁵ Zase tun ye lanpominɛlaw kuntigi dɔ ye. A ye mɔgɔw nanbara fɔɔ ka kɛ nafolotigi ye (Luka 19:1-9). Yezu ye kibaro diiman fɔ a ye Ala ka Masaya koo la. A y’a faamu ko a tun be min lamɛnna, o nafa ka bon kosɔbɛ. O kama, a sinna ka dɔ kɛ dɔ ye. A ko: “Matigi, sisan ne bena n ka nafolo tilancɛ di fantanw ma, ni ne ye mɔgɔ min namara, ne bena o ɲɔgɔn naani segi a tigi ma.” A ye mɔgɔw nanbara ka nafolo min sɔrɔ, a ninsɔndiyara k’o segi o tigiw ma ani k’a ka wasabaliya dabila.

6. Rose ye yɛlɛmani jumanw lo kɛ ani mun na do?

⁶ A saan damanin ye nin ye, muso dɔ ye Masaya kibaro diiman mɛn. O muso tɔgɔ ko Rose. A tun ye musoɲɔgɔnɲinila ye. Jɛnkulu min be cɛɲɔgɔnɲinilaw ani musoɲɔgɔnɲinilaw lafasa, a tun y’o ɲɛmɔgɔ ye. Rose tora ka bibulukalan kɛ minkɛ, a y’a faamu ko tiɲɛn kalan minw ɲɛsinna Ala ka Masaya ma, o nafa ka bon kosɔbɛ. A y’a faamu fana ko a ka ɲi ka yɛlɛmanibaw kɛ (1 Kor. 6:9, 10). A dusukun y’a lasun ka bɔ a ka jɛnkulu kɔnɔ ani a ye musoɲɔgɔnɲini dabila. Saan 2009, Rose ye batɛmu ta ani saan kelen o kɔ, a kɛra kudayi piyɔniye ye. Jehova n’a ka Masaya koo tun ka di a ye ka tɛmɛ farisogo negew kan.—Mariki 12:29, 30.

7. An ka ɲi ka jijali wɛrɛ jumanw lo kɛ walisa Ala ka Masaya koo ka diya an ye kosɔbɛ?

⁷ An caaman ye yɛlɛmanibaw kɛ walisa ka kɛ Ala ka Masaya marakɔnɔmɔgɔ dɔw ye (Ɔrɔm. 12:2). O n’a ta bɛɛ, an bele ka ɲi ka jijali wɛrɛw kɛ. An man ɲi k’a to nafolo kanuya, kakalayakow wala fɛɛn si k’an ka kanuya nagasi Ala ka Masaya koo la (Talenw 4:23; Mat. 5:27-29). Walisa a ka Masaya koo ka diya an ye kosɔbɛ, Jehova ye nafolofɛn wɛrɛ di an ma min nafa ka bon.

8. a) Mun na ciden Pol y’a fɔ ko waajuli ye “baara nafaman” ye ‘bɔgɔdagaw’ kɔnɔ? b) Pol y’a yira cogo di ko a be waajuli baara jati baara nafamanba ye?

⁸ Kana ɲinɛ ko Yezu ko an ka kibaro diiman fɔ ani ka mɔgɔw kalan (Mat. 28:19, 20). Ciden Pol tun b’a lɔn ko waajuli baara nafa ka bon kosɔbɛ. A tun b’a jati k’o ye layidu kura ka cidenya baara ye ani ko “baara nafaman” lo. O baara dira an ma, “an minw fanga ka dɔgɔ i n’a fɔ bɔgɔdaga.” (2 Kor. 4:7;  1 Tim. 1:12). Komi an ye mɔgɔ dafabaliw ye, an be i n’a fɔ bɔgɔdagaw. Nka, an be kibaro diiman min fɔ, o be se k’a to an yɛrɛ ani an lamɛnbagaw be ɲɛnamaya banbali sɔrɔ. Pol tun b’o kala ma. O kama, a ko: “Ne bɛ fɛn bɛɛ kɛ Kibaru Duman kosɔn walisa ne ka niyɔrɔ sɔrɔ a nafa la tɔw fɛ.” (1 Kor. 9:23, ABM). Tiɲɛn na, waajuli baara tun ka di Pol ye. O lo y’a lasun a ye jijaliba kɛ walisa ka mɔgɔw kalan Ala ka Masaya koo la (Ɔrɔmukaw 1:14, 15; 2 Timote 4:2 kalan). O lo y’a dɛmɛ fana ka kɔrɔbɔli caaman muɲu (1 Tes. 2:2). An be se k’a ladegi cogo di ani k’a yira ko waajuli baara ka di an ye?

9. An be se k’a yira cogo di ko waajuli baara ka di an ye?

⁹ Pol tun be tɛmɛ fɛɛrɛw bɛɛ fɛ ka kibaro diiman fɔ mɔgɔw ye. A y’a yira o cogo la fana ko waajuli baara ka di a ye. An fana be waajuli kɛ sababu dɔw sen fɛ, jamayɔrɔw la ani soo ni soo i ko cidenw ni kerecɛn fɔlɔw tun b’a kɛ cogo min na (Kɛw. 5:42; 20:20). N’an be se, an k’a ɲini ka dɔ fara an ka waajuli baara kan. Ɲɛyirali fɛ, an be se ka kɛ piyɔniye kɔrɔsigi wala kudayi piyɔniye ye. An be se fana ka kaan wɛrɛ degi, ka taga dugu dɔ la wala jamana wɛrɛ la walisa ka waajuli kɛ.—Kɛw. 16:9, 10.

10. Irene ye duga jumanw lo sɔrɔ sabu a tun jijanin lo ka kibaro diiman fɔ?

¹⁰ An ka balimamuso Irene ka koo lajɛ. A be Etazini jamana na ani a furunin tɛ. Irisikan minw siginin be Etazini, a tun b’a fɛ sɔbɛ la ka kibaro diiman fɔ olu ye. A y’a daminɛ k’o kɛ saan 1993 la. O tuma na, jɛnkulu dennin dɔ lo tun be yen min b’o kaan fɔ Niyɔriki dugu la. Weleweledala 20 dɔrɔn lo tun b’o jɛnkulu kɔnɔ. Irene ye waajuli kɛ o kaan na saan 20 kɔnɔ. A ko: “N’ bele tɛ Irisikan mɛn bɛrɛbɛrɛ.” Nka, Jehova y’ale ni mɔgɔ wɛrɛw duga sabu u tun kisɛyanin lo waajuli baara la. Bi, kafo wɔɔrɔ lo be yen Irisikan na Niyɔriki. A ka Bibulu kalanden mɔgɔ 15 lo batizera. U dɔw kɛra Betɛlidenw, piyɔniyew ani diinan mɔgɔkɔrɔw ye. Irene ko: “N’ tun be se ka laɲinita wɛrɛw latigɛ n’ yɛrɛ ye. Ni n’ miirila o laɲinitaw la, n’ ma la a la ko u dɔ tun be se ka n’ ninsɔndiya ten.” Tiɲɛn na, Irene tun be waajuli baara jati baara nafamanba ye!

11. N’an be to ka waajuli kɛ kɔrɔbɔli bɛɛ n’a ta, nafa juman lo be sɔrɔ o la?

¹¹ Ni waajuli baara ka di an ye, an bena kɛ i n’a fɔ ciden Pol ani an bena to ka waajuli kɛ kɔrɔbɔli bɛɛ n’a ta (Kɛw. 14:19-22). Saan 1930-1944 wagati la, kɔrɔbɔliba tun b’an balimaw kan Etazini. Nka, u lɔra kelen kan i n’a fɔ ciden Pol ani u tora ka waajuli kɛ. Walisa k’a yira ko a daganin lo an ka waajuli  kɛ, balimaw y’u yɛrɛ lafasa kititigɛso la siɲɛ caaman. Ɲɛyirali fɛ, an ye joo sɔrɔ kitiko dɔ la Etazini ka kititigɛsoba la. Ka ɲɛsin o koo ma, balimacɛ Nathan H. Knorr y’a fɔ saan 1943 la ko: “An ye joo sɔrɔ kititigɛsoba la aw ka jijalibaw lo kosɔn. Ni aw weleweledalaw tun ye waajuli dabila, kitiko si tun tɛna kɛ. Nka, duniɲa kuru bɛɛ kɔnɔ, aw tora ka waajuli kɛ. O lo kama kɔrɔbɔli ma see sɔrɔ an kan. Matigi sagokɛlaw lɔra kelen kan minkɛ, o lo y’a to an ye joo sɔrɔ kititigɛso la.” Jamana wɛrɛw la fana, balimaw lɔra kelen kan ani o kɛra sababu ye u ye joo sɔrɔ kititigɛsow la. Komi waajuli baara ka di an ye, an tɛna a to kɔrɔbɔli k’an bali k’o baara kɛ.

12. I cɛsirinin lo ka mun lo kɛ waajuli baara koo la?

¹² N’an be waajuli jati baara nafamanba ye, an tɛna a ɲini ka waajuli kɛ walisa ka lɛri hakɛ dɔ sɔrɔ dɔrɔn. Nka, an bena an seko bɛɛ kɛ walisa ka “Ala ka nɛɛma kibaru diman nin fɔ mɔgɔw ye.” (Kɛw. 20:24; 2 Tim. 4:5). An bena mɔgɔw kalan mun lo la do? An ka nafolofɛn wɛrɛ lajɛ, Ala ye min di an ma.

13, 14. Yezu ye “Nafolo” marayɔrɔ min kofɔ Matiyo 13:52 kɔnɔ, o ye mun lo ye? An be nafolo lajɛn a kɔnɔ cogo di?

¹³ An ye tiɲɛn kalan minw bɛɛ faamu, olu lo ye nafolofɛn sabanan ye, Jehova ye min di an ma. Jehova ye Tiɲɛntigi Ala ye (2 Sam. 7:28; Zab. 31:6). I ko Faa ɲuman, Jehova b’a tɛgɛ labila k’a ɲɛsiranbagaw dɛmɛ ka tiɲɛn kalanw faamu. Kabi an ye Jehova lɔn, Bibulu, an ka gafew, lajɛnbaw ani kafo ka lajɛnw y’an dɛmɛ ka fɛɛn caaman faamu. N’an b’a ɲini ka tiɲɛn kalanw faamu, wagati dɔ bena se, an bena fɛɛn kɔrɔw ni fɛɛn kuraw don an ka “nafolo” marayɔrɔ la (Matiyo 13:52 kalan). N’an b’o tiɲɛn kalanw ɲini i n’a fɔ nafolo dogonin, Jehova bena an dɛmɛ ka kalan kura nafamanw lajɛn an ka “nafolo” marayɔrɔ la (Talenw 2:4-7 kalan). An be se k’o kɛ cogo di do?

¹⁴ An ka ɲi ka Bibulu ani an ka gafew kalan tuma o tuma ani k’u sɛgɛsɛgɛ koɲuman. O bena an dɛmɛ ka “fɛnkura” sɔrɔ, o min ye tiɲɛn kalanw ye an tun tɛ minw lɔn ka kɔrɔ (Zozuwe 1:8, 9; Zab. 1:2, 3). Kɔrɔsili Sangaso fɔlɔ sɛbɛra saan 1879 la. A tun fɔra a kɔnɔ ko tiɲɛn kalanw be i n’a fɔ filɛru minw dogonin be biin juguw cɛma. Ni mɔgɔ b’a fɛ k’o filɛru ɲɔgɔn sɔrɔ, a ka ɲi k’a ɲini koɲuman. N’a y’a ye, a man ɲi ka dan kelen dɔrɔn ma. Nka, a ka ɲi ka to ka ɲininin kɛ walisa ka filɛru caaman wɛrɛw sɔrɔ. O cogo kelen na, an man ɲi ka dan tiɲɛn kalan kelen dɔrɔn ma. Nka, an ka ɲi ka to k’a ɲini sɔbɛ la ka tiɲɛn kalan wɛrɛw faamu.

15. Mun na an be se k’a fɔ ko tiɲɛn kalan dɔw ye “fɛɛn kɔrɔman” ye? Tiɲɛn kalan jumanw lo ka di ele ye kosɔbɛ?

¹⁵ Tuma min na an y’a daminɛ ka bibulukalan kɛ ni Jehova Seerew ye, an ye tiɲɛn kalan nafaman dɔw faamu. An be se k’a fɔ k’olu ye “fɛɛn kɔrɔman” ye sabu an kɔnna k’olu lo faamu. O kalan nafamanw ye mun ni mun lo ye? Ɲɛyirali fɛ, an y’a faamu ko Jehova ye an Danbaga ani niin Dibaga ye. An y’a faamu fana ko Ala be ni sagonata ye adamadenw koo la. Ala be adamadenw kanu minkɛ, a y’a Dencɛ di k’a kɛ kunmabɔsara ye. O sababu fɛ, an be se ka kisi ka bɔ jurumu ni saya fanga kɔrɔ. An y’a faamu fana ko Ala ka Masaya bena tɔɔrɔw bɛɛ ban ani ko an bena se ka ɲɛnamaya kɛ ninsɔndiya ni hɛɛrɛ la fɔɔ abada.—Zan 3:16; Yir. 4:11; 21:3, 4.

16. N’an ye faamuyali kuraw sɔrɔ, an ka ɲi ka mun lo kɛ do?

 ¹⁶ Tuma kelen kelen, an be faamuyali kuraw sɔrɔ Bibulu ka kiraya kuma dɔw wala vɛrise dɔw koo la. An ka ɲi ka wagati ta k’o kunnafoni kuraw sɛgɛsɛgɛ koɲuman ani ka miiri u kan (Kɛw. 17:11; 1 Tim. 4:15). An ka ɲi k’a ɲini k’a faamu faranfasi min be yen faamuyali kɔrɔ ni faamuyali kura cɛ. An ka ɲi k’a ɲini fana ka faamuyali kura ka miiriya misɛnmanw bɛɛ faamu. O la, an bena o faamuyali kura don koɲuman an ka nafolo marayɔrɔ la. Mun na an ka ɲi k’o jijaliba kɛ?

17, 18. Hakili senu be se k’an dɛmɛ cogo di?

¹⁷ Yezu y’a fɔ ko an ye min kalan, hakili senu be se k’an hakili jigi o la (Zan 14:25, 26). O be se k’an dɛmɛ cogo di n’an be mɔgɔw kalanna tiɲɛn koo la? An ka balimacɛ Peter ka koo lajɛ. Saan 1970 la, a tun be ni saan 19 ye ani a tun ye Betɛli baara daminɛ a ma mɛɛn Angletɛri jamana na. Loon dɔ, a tun be waajuli kɛra soo ni soo. A ye cɛɛ bonbositigi dɔ kunbɛn min be ni saan 50 ɲɔgɔn ye. Peter y’o cɛɛ ɲininga n’a b’a fɛ ka Bibulu faamu. O ye cɛɛ kabakoya ani a ko ale yɛrɛ ye karamɔgɔ ye Yahutu diinan na. Walisa k’a filɛ ni Peter be Bibulu lɔn, a y’a ɲininga ko: “N’ dencɛ, a fɔ n’ ye Daniyɛli ka kitabu sɛbɛra kaan juman lo la?” Peter y’a jaabi ko: “A faan dɔ sɛbɛra Aramekan na.” Peter ko: “O cɛɛ kabakoyara sabu ne tun b’o jaabili lɔn. Nka, ne yɛrɛ kabakoyara ka tɛmɛ ale kan. Ne y’o jaabili lɔn cogo di? N’ sera soo tuma min na, n’ ye kalo tɛmɛninw ka Kɔrɔsili Sangaso ni Réveillez-vous ! lajɛ. A tun sɛbɛra barokun dɔ kɔnɔ ko Daniyɛli ka kitabu faan dɔ sɛbɛra Aramekan na.” (Dan. 2:4). Tiɲɛn na, an ye fɛɛn minw kalan ka kɔrɔ ani k’u mara koɲuman an ka nafolo marayɔrɔ la, hakili senu be se k’an hakili jigi o la.—Luka 12:11, 12; 21:13-15.

¹⁸ An ka Jehova ka kalanw jati fɛɛn nafamanbaw ye. O la, an dusukun bena an lasun k’u fara an ka nafolow kan Alako ta fan fɛ. N’o kalanw tora ka diya an ye ani n’an tora k’u jati fɛɛn nafamanbaw ye, an bena se ka mɔgɔw kalan koɲuman Ala koo la.

19. Jehova ye nafolofɛn minw di an ma, mun na an ka ɲi k’u latanga?

¹⁹ Barokun nin na, an y’a ye ko a kɔrɔtanin lo an ka Jehova ka nafolofɛnw jati fɛɛn nafamanbaw ye. Nka, an ka ɲi k’an yɛrɛ kɔrɔsi walisa Sutana n’a ka duniɲa kana an ka kanuya nagasi o nafolofɛnw koo la. N’an m’an janto an yɛrɛ la, koo nunu be se k’an kunnatiɲɛ: ka baara ɲini min sara ka ca, k’a ɲini ka ɲɛnamaya kɛ faamanya la wala ka wasoya kɛ n’an bololafɛnw ye. Ciden Zan y’an lasɔmi ko duniɲa n’a negelakow ye banta ye (1 Zan 2:15-17). O kama, Jehova ye nafolofɛn minw di an ma, an k’an seko bɛɛ kɛ k’u jati fɛɛn nafamanbaw ye ani k’u latanga.

20. I cɛsirinin lo ka mun lo kɛ walisa k’i ka nafolofɛnw latanga Alako ta fan fɛ?

²⁰ Fɛɛn o fɛɛn be se k’i ka kanuya nagasi Ala ka Masaya koo la, banba k’i mabɔ o la. To ka waajuli kɛ ni kisɛya ye. O baara jati baara nafamanba ye sabu mɔgɔw be kisili sɔrɔ o lo sababu fɛ. I jija ka to k’a ɲini ka tiɲɛn kalanw faamu. O la, i bena a yira ko ‘nafolo min be Ala fɛ sankolo la, i b’o ɲinina. O nafolo nin te cɛn ka ye, a te ban, soonw te se yen, bagabaga te se k’a cɛn. I ka nafolo be yɔrɔ min na, i ka miiriya be o yɔrɔ la fana.’—Luka 12:33, 34.