1, 2. a) ¿Mbaʼeichagua tesóropa Jehová omeʼẽ ñandéve? b) ¿Mbaʼépa jahecháta ko artíkulope?

JEHOVÁ haʼe pe persóna irrikovéva oĩva ko univérsope. Opa mbaʼe ningo imbaʼe hína (1 Crón. 29:11, 12). Péro haʼe ipojera enterovévandi. ¡Ajépa javyʼaite okomparti haguére ñanendive umi tesóro espirituál! Koʼã tesóro apytépe oike 1) Ñandejára Rréino, 2) pe predikasión, ha 3) umi mbaʼe ijojahaʼỹva jatopáva la Bíbliape. Péro nañañatendéiramo, ikatu mbeguekatúpe ñamboyke koʼã tesóro. Upévare siémpre ñanemanduʼa vaʼerã mbaʼeichaitépa ivalióso ha ñañehaʼã jahayhuve. Jesús heʼi voi vaʼekue: “Cháke pene mbaʼerepy oĩháme, upépe avei oĩta pene korasõ” (Luc. 12:34).

² Jahechamína mbaʼéichapa ikatu jahayhuve ha ñamombaʼeve Ñandejára Rréino, pe predikasión ha pe añetegua oĩva la Bíbliape. Ñahesaʼỹijóvo koʼã mbaʼe, iporã ñapensa jahávo mbaʼépa káda uno ikatu jajapo jahayhuve hag̃ua koʼã tesóro Ñandejára omeʼẽva ñandéve.

3. ¿Mbaʼépa ojapo peteĩ komersiánte ojoguaségui peteĩ pérla? (Ehecha pe taʼanga oĩva iñepyrũme).

³ (Elee Mateo 13:45, 46). Jesús omombeʼu peteĩ istória oñeʼẽva peteĩ kuimbaʼe ojogua ha ovendévare pérla. Peteĩ diápe, ko kuimbaʼe otopa peteĩ pérla iporãitevéva entéro umi pérla haʼe ohecha vaʼekuégui. Haʼe oipotaitereígui ko pérla, ovendepa la orekomíva ikatu hag̃uáicha ojogua. Oime vaʼerã ivaliosoiterei raʼe chupe g̃uarã upe pérla ajeve ojapo upéva.

4. ¿Mbaʼépa ñaĩta dispuésto jajapóvo jahayhúramo pe Rréino?

⁴ ¿Mbaʼépa ñaaprende pe istória Jesús omombeʼu vaʼekuégui? Ñandejára Rréino haʼete peteĩ pérla iporãitereíva. Jahayhúramo pe Rréino, pe kuimbaʼe omombaʼe haguéicha pe pérla otopa vaʼekue, ñaĩta dispuésto jajapóvo oimehaichagua sakrifísio ñañemoĩ hag̃ua Ñandejára Rréino poguýpe (elee Marcos 10:28-30). Jahechamína mbaʼéichapa ojapo upéva mokõi persóna.

5. ¿Mbaʼépa oĩ vaʼekue dispuésto ojapóvo Zaqueo pe Rréino rehehápe?

⁵ Zaqueo haʼe vaʼekue peteĩ impuésto kovraha. Haʼe ou irríko oestafa rupi umi héntepe (Luc. 19:1-9). Peteĩ díape Zaqueo ohendu Jesús oñeʼẽha pe Rréinore, ha ogustaitereígui chupe oĩ voi dispuésto okambiávo heta mbaʼépe. Haʼe heʼi: “¡Péina!, che Ruvicha umi che kosakuéragui la mita ameʼẽ umi imboriahúvape, ha umi pláta aipeʼa vaʼekue pokarẽme che rapichágui, amyengovia cuatro vése”. Zaqueo omyengovia jey umi héntepe la omonda vaʼekue ha ndaitaryryivéi.

6. ¿Mbaʼeichagua kámbiopa ojapo peteĩ ermána, ha mbaʼérepa?

⁶ Ojapo unos kuánto áño peteĩ kuña ohendu hague pe mensáhe oñeʼẽva pe Rréinore. Upe tiémpope haʼe oreko peteĩ paréha haʼéva kuña avei, ha omoakã peteĩ organisasión odefendéva umi omosexuálpe. Péro ostudia rire la Biblia ha oaprende rire mbaʼeichaitépa ivalióso pe Rréino, ohechakuaa tekotevẽtaha ojapo tuicha kámbio (1 Cor. 6:9, 10). Haʼe ou ohayhu Jehovápe ha oheja pe organisasión omoakã vaʼekue, ha ojedeha iparéhagui. Áño 2009-pe ojevautisa, ha pe ótro áñope ojagarráma iprekursorádo rregulár. Ko kuña ou tuicha okambia pórke ohayhuve Jehovápe omotenonde rangue umi deséo vai oreko vaʼekue (Mar. 12:29, 30).

7. ¿Mbaʼépa jajapo vaʼerã ani hag̃ua ñambotapykue pe Rréino?

⁷ Heta oĩ ñande apytépe ojapóva tuicha kámbio oñemoĩ hag̃ua Ñandejára Rréino poguýpe (Rom. 12:2). Péro upéva ndeʼiséi natekotevẽveimaha ñañehaʼã. Por ehémplo, ñañatende vaʼerã ani hag̃ua umi mbaʼerepy térã umi deséo vai káusare jaju ñambotapykue Ñandejára Rréino (Prov. 4:23; Mat. 5:27-29). Jehová omeʼẽ ñandéve ótro tesóro ivaliosoitereíva jasegi hag̃ua jahayhu pe Rréino ñande pyʼaite guive.

8. a) ¿Mbaʼérepa Pablo okompara pe predikasión tesórore oĩva kambuchípe? b) ¿Mbaʼéichapa Pablo ohechauka ohayhuha pe predikasión?

⁸ Jesús omanda ñandéve japredika ha ñamboʼe hag̃ua pe marandu porã oñeʼẽva Ñandejára Rréinore (Mat. 28:19, 20). Apóstol Pablo okompara ko tembiapo tesóro oĩvare kambuchípe (2 Cor. 4:7; 1 Tim. 1:12). Ñande ñaneimperfékto rupi ñañekomparakuaa pe kambuchíre. Péro pe mensáhe jaraháva haʼe hína peteĩ tesóro pórke omeʼẽ jeikove opaveʼỹva, tahaʼe  ñandéve ha avei umi persóna ñanerendúvape. Upévare Pablo heʼi vaʼekue: “Ajapo opa mbaʼe umi marandu porã rehehápe, ikatu hag̃uáicha apredika che rapichakuérape” (1 Cor. 9:23). Haʼe ombaʼapo jejopy vaʼekue omboʼe hag̃ua umi héntepe pe marandu porã oñeʼẽva Ñandejára Rréinore (elee Romanos 1:14, 15 ha 2 Timoteo 4:2). Pablo ohayhu rupi pe mensáhe, opredika oĩramo jepe opersegi mbaretéva chupe (1 Tes. 2:2). Añetehápe haʼe ohayhu pe predikasión. ¿Mbaʼéichapa ikatu jasegi iñehémplo?

9. ¿Mbaʼéichapa ikatu jahechauka ñamombaʼeha pe predikasión?

⁹ Pablo oaprovecha vaʼekue umi oportunida opredika hag̃ua umi héntepe, péicha ohechauka omombaʼeha pe predikasión. Ojapo haguéicha haʼe ha ambue kristiáno síglo primero guare, ñande avei ikatu jagueraha pe marandu porã ñande rapichakuérape, tahaʼe ogahárupi, umi lugár oĩvehápe hénte térã mamo oĩháme hikuái (Hech. 5:42; 20:20). Jahekákena fórma ikatu hag̃uáicha japredika hetave héntepe. Ha ijáramo ñandéve ikatu voi jajapo ñande prekursorádo auxiliár térã rregulár. Ỹrõ ñaaprendekuaa ótro idióma, java oĩvehápe nesesida, tahaʼe ñande paíspe voi térã ótro tetãme (Hech. 16:9, 10).

10. ¿Mbaʼépa ohupyty Irene oñehaʼãmbaite haguére opredika pe marandu porã?

¹⁰ Irene ningo peteĩ ermána soltéra Estados Unidosgua. Haʼe okompartise pe marandu porã umi persóna oñeʼẽvandi ruso. Áño 1993-pe Irene oapoja peteĩ grúpo oñeʼẽvape ruso oĩva Nueva Yórkpe. Upe tiémpope oĩ vaʼekue 20 puvlikadór rupi pe grúpope. Ohasa rire 20 áño, Irene orrekonose neʼĩraha odominambaite upe idióma. Péro Jehová ovendesi rupi chupe ha umi ótro ermánope, koʼág̃a oĩma 6 kongregasión idióma rúsope Nueva Yórkpe. Quince persóna ostudia vaʼekue la Biblia Irénendi ojevautisa, ha ijapytepekuéra oĩ oservíva Betélpe, haʼéva prekursór ha avei umi oservíva kómo ansiáno. Irene heʼi: “Sapyʼánte apensa ikatúne hague ajapo ótra kósa, péro aikuaa porã ni mbaʼevéicharõ ndavyʼamoʼãiha koʼág̃a avyʼaháicha”. Jahechaháicha, Irene omombaʼeterei pe predikasión.

11. ¿Mbaʼépa oiko ñane ermanokuéra osegi rupi opredika oĩramo jepe ojokoséva chupekuéra?

¹¹ Ñamombaʼéramo pe predikasión jasegíta japredika oĩramo jepe ñandepersegíva, ojapo haguéicha apóstol Pablo (Hech. 14:19-22). Por ehémplo, áño 1930 guive 1944 peve ojepersegi mbarete vaʼekue ñane ermanokuéra Estados Unidosguápe. Upéicharõ jepe haʼekuéra osegi opredika.  Umi autorida ojokosérõ guare pe predikasión, ñane ermanokuéra ogueraha umi káso trivunálpe ha heta vése ogana hikuái. Áño 1943-pe, ermáno Nathan Knorr omensiona peteĩva umi káso ñagana vaʼekue pe Tribunal Supremo de Estados Unídospe. Haʼe heʼi ndaikatumoʼãi hague oñepresenta ni peteĩ káso pe trivunálpe umi ermáno ndopredikavéirire. Avei heʼi umi ermáno oparupigua osegi rupi opredika, ohechauka hague umi opuʼãva ikóntrape ndaikatuiha ojoko chupekuéra. Heta paísrupi oñegana avei koʼãichagua káso umi trivunálpe, ñane ermanokuéra ojepytaso mbarete haguére. Jahechaháicha, ñamombaʼéramo pe predikasión ndajahejamoʼãi mbaʼeve ñandejoko jasegi hag̃ua japredika.

12. ¿Mbaʼépa ñaime desidído jajapo?

¹² Ñamombaʼéramo pe predikasión, nañapensamoʼãi iñimportanteha jajapónte heta óra káda mes. Upéva rangue, ñañehaʼãmbaitéta jaikuaauka “hekoitépe umi marandu porã” (Hech. 20:24; 2 Tim. 4:5). Péro, ¿mbaʼépa la ñamboʼéva japredika jave? Jahechamína ótro tesóro oúva Ñandejáragui.

13, 14. ¿Mbaʼeichagua tesórorepa Jesús oñeʼẽ Mateo 13:52-pe, ha mbaʼéichapa ikatu jatopave jahávo umi tesóro?

¹³ ¿Mbaʼépa hína pe tercer tesóro Jehová omeʼẽva ñandéve? Upéva hína pe añetegua ñaaprende vaʼekue. Añetehápe ningo Jehovágui voi ou pe añetegua (2 Sam. 7:28; Sal. 31:5). Ha ojapoháicha peteĩ túa imbaʼeporãva, Jehová okomparti ñanendive pe añetegua. Ñande ñaaprende heta mbaʼe jalee rupi Iñeʼẽ, umi puvlikasión, ha jaha meme rupi rreunionhápe ha asambleahápe. Jaikuaavévo jahávo Ñandejára Ñeʼẽgui haʼete ñambyatýva tesóro, ha umíva apytépe jareko umi “mbaʼe ipyahúva ha itujáva” (elee Mateo 13:52). Jahekáramo pe añetegua haʼeramoguáicha pláta yvyguy, Jehová ñanepytyvõta jatopave hag̃ua umi tesóro oĩva Iñeʼẽme (elee Proverbios 2:4-7). ¿Mbaʼéichapa ikatu jajapo upéva?

¹⁴ Iñimportanteterei ningo ñahesaʼỹijo porã la Biblia ha ñane puvlikasionkuéra. Péichamante jatopáta umi tesóro “ipyahúva”, térã umi mbaʼe ndajaikuaáiva kuri (Jos. 1:8, 9; Sal. 1:2, 3). Pe primer Ñemañaha osẽ vaʼekue julio de 1879-pe, okompara pe añetegua peteĩ yvotyʼi kaʼaguýre okañýva ñana apytépe. Ikatu hag̃uáicha jatopa peichagua yvotyʼi, jajeporeka porã vaʼerã. Ha jatopa rire katu tekotevẽ jajayvy jaipoʼo hag̃ua. Péro upéi nañañekontentái vaʼerã peteĩmíre, síno jasegi vaʼerã jaheka hetave yvoty. Péicha avei nañañekontentái vaʼerã jaikuaa haguére peteĩ mbaʼénte, síno jasegi vaʼerã jaheka pe añetegua.

15. ¿Mbaʼépepa oñehenói tesóro “itujáva”, ha mbaʼépa remombaʼeve umíva apytégui?

¹⁵ Ñañepyrũrõ guare jastudia la Biblia ñaaprende kuri heta mbaʼe ijojahaʼỹva. Ikatu jaʼe umívare haʼeha umi tesóro “itujáva” pórke ñaaprende vaʼekue iñepyrũme. ¿Mbaʼe mbaʼépa hína umíva? Por ehémplo, ñepyrũrã jaikuaa kuri Jehová haʼeha ñande Apohare ha orekoha peteĩ propósito yvyporakuérape g̃uarã. Avei ñaaprende Ñandejára ombou hague itaʼýrape ko yvy ape ári omano hag̃ua ñanderehehápe. Pe sakrifísio rupive ñande ikatúta ñanesãso pe pekádo ha ñemanógui. Avei ñaaprende kuri Ñandejára Rréino rupive opataha umi jehasa asy ha ikatutaha jaikove opa ára g̃uarã vyʼa ha pyʼaguapýpe (Juan 3:16; Apoc. 4:11; 21:3, 4).

16. ¿Mbaʼépa iporã jajapo oñekambia jave oñentende lája peteĩ téxto térã peteĩ profesía?

 ¹⁶ Sapyʼánte oñekambia oñentende lája peteĩ téxto térã peteĩ profesía. Upéicha jave iñimportánte ñahesaʼỹijo porã ha jajepyʼamongeta umi entendimiénto pyahúre (Hech. 17:11; 1 Tim. 4:15). Péro ndahaʼéi ñantendénte vaʼerã mbaʼépepa idiferénte umi entendimiénto koʼag̃agua ha yma guare, síno jajesareko porã vaʼerã umi detálle ipyahúvare. Jajapóramo upéva, haʼetéta ñamoingéva ñande tesóro ryrúpe pe añetegua ñaaprende pyahúva. ¿Mbaʼérepa iporã jajapo upéva?

17, 18. ¿Mbaʼéichapa pe espíritu sánto ikatu ñanepytyvõ?

¹⁷ Jesús heʼi vaʼekue Ñandejára espíritu ikatuha ñanepytyvõ ñanemanduʼa hag̃ua umi mbaʼe ñaaprende vaʼekuére ymave (Juan 14:25, 26). ¿Mbaʼéichapa upéva ikatu ñanepytyvõ japredika jave? Ñapensamína mbaʼépa oiko vaʼekue peteĩ ermáno héravare Peter. Áño 1970-pe haʼe orekórõ guare 19 áño oñepyrũ ombaʼapo Betel de Gran Bretáñape. Peteĩ jey Peter osẽrõ guare opredika de kása en kása otopa peteĩ karaíre orekóva várva, ha oporandu chupe ontendesemiépa la Biblia omboʼéva. Ko karai ningo rravíno térã maéstro judío, upévare oñesorprendete voi peteĩ mitãrusu omboʼese haguére chupe Ñandejára Ñeʼẽ. Otantea hag̃ua Peter oikuaáva, pe karai oporandu chupe: “Eremína chéve, ¿mbaʼe idiómape piko ojeskrivi raʼe pe lívro de Daniel?”. Peter heʼi chupe: “Oĩ párte ojeskrivi vaʼekue araméope”. Peter omombeʼu: “Pe rravíno opyta ijurujái ohendúvo aikuaaha la oporandúva chéve, péro che la añesorprendevéva. ¿Moõgui piko che aguenohẽ upéva? Aha rire ógape arrevisa umi rrevísta Ñemañaha ha ¡Despertad! osẽ ramovéva, ha atopa peteĩ artíkulo omyesakãva Daniel ojeskrivi hague araméope” (Dan. 2:4, nóta). Jahechaháicha, pe espíritu sánto ikatu ñanemomanduʼa peteĩ informasión jaleéma vaʼekue ha ñañongatúva peteĩ tesóroicha (Luc. 12:11, 12; 21:13-15).

¹⁸ Jahayhúramo umi mbaʼe ñaaprendéva la Bíbliagui ha jaagradese Jehovápe, ñambohetavéta umi tesóro jarekómava voi. Jajapóramo upéva, ñandekatupyryvéta ñamboʼe hag̃ua ótrope.

19. ¿Mbaʼérepa ñañangareko vaʼerã umi tesóro Ñandejára omeʼẽvare ñandéve?

¹⁹ Ko artíkulope jahecha iñimportantetereiha ñañangareko umi tesóro Ñandejára omeʼẽvare ñandéve. Upearã tekotevẽ ñañatende ani hag̃ua Satanás térã imúndo káusare jaju nañamombaʼevéi koʼã tesóro. Nañañatendéiramo, ikatu hína ñaganase hetaiterei pláta, jarekoseterei heta lúho térã jajechaukase. Apóstol Juan heʼi vaʼekue ko múndo ha umi mbaʼe oikuaveʼẽva koʼẽrõite opataha (1 Juan 2:15-17). Upévare, ñamombaʼékena siémpre umi tesóro oúva Jehovágui ha ñañangareko umívare.

20. ¿Mbaʼépa rejapóta reñangareko hag̃ua umi tesóro Ñandejára omeʼẽvare ndéve?

²⁰ Ñamboykékena opa mbaʼe ikatúva ñanemokangy ani upéva káusare jaju nañamombaʼevéi Ñandejára Rréino. Jajedesidíkena ñamombaʼetaha pe predikasión ha kyreʼỹme ñañeʼẽtaha pe marandu porãre. Avei ñañehaʼãmbaite jaikuaa porãve mbaʼépa omboʼe la Biblia. Péicha jajapóramo ñambyatýta tesóro “yvágape”. “Upépe ningo ndaikatúi oike mondaha” ni ndoʼumoʼãi ñandehegui vícho. Jesús heʼi vaʼekue voi ñande tesóro oĩháme, upépe avei oĩtaha ñane korasõ (Luc. 12:33, 34).