1, 2. (a) Ano ang tatlo ka espirituwal nga bahandi nga ginhatag sa aton ni Jehova? (b) Ano ang binagbinagon naton sa sini nga artikulo?

SI Jehova ang pinakamanggaranon sa uniberso. (1 Cron. 29:11, 12) Bangod maalwan sia nga Amay, ginapaambit niya ang iya espirituwal nga mga manggad sa tanan nga nagapabalor gid sa sini. Nagapasalamat gid kita nga ginhatagan kita ni Jehova sing espirituwal nga mga bahandi. Nalakip sa sini (1) ang Ginharian sang Dios, (2) ang aton ministeryo nga nagaluwas sang kabuhi, kag (3) ang hamili nga kamatuoran sa iya Pulong! Pero, kon indi kita maghalong, mahimo nga indi na naton pagpabaloran ini nga mga bahandi, nga daw ginhaboy na naton ini. Para indi ini matabo, dapat gamiton naton ini sing maayo kag padayon naton nga pabaloran ini. Si Jesus nagsiling: “Kon diin ang inyo bahandi, didto man ang inyo tagipusuon.”—Luc. 12:34.

² Binagbinagon naton kon paano naton mapalambo ang aton pagpabalor sa Ginharian, sa ministeryo, kag sa kamatuoran. Samtang ginahimo naton ini, pamalandungi kon ano ang mahimo mo para mapabaloran mo pa gid ining espirituwal nga mga bahandi.

3. Sa ilustrasyon ni Jesus, ano ang handa nga himuon sang negosyante para mapanag-iyahan ang malahalon nga perlas? (Tan-awa ang piktyur sa umpisa sini nga artikulo.)

³ Basaha ang Mateo 13:45, 46. May ginsaysay si Jesus nga ilustrasyon parte sa isa ka negosyante nga nagapangita sang mga perlas. Sa sulod sang madamo nga tinuig, sigurado nga nakabakal kag nakabaligya na sing ginatos ka perlas ini nga negosyante. Pero, pagkakita niya sang isa ka tumalagsahon nga perlas, nalipay gid sia. Para mabakal niya ini, kinahanglan niya ibaligya ang tanan niya nga pagkabutang. Malaragway mo bala kon daw ano ka malahalon ini nga perlas sa iya?

4. Kon ginapabaloran naton ang Ginharian sang Dios pareho sang pagpabalor sang negosyante sa perlas, ano ang himuon naton?

⁴ Ano ang ginatudlo sini sa aton? Ang kamatuoran parte sa Ginharian sang Dios daw pareho sa sining malahalon nga perlas. Kon pabaloran naton ini pareho sang pagpabalor sang negosyante sa perlas, handa kita nga isakripisyo ang tanan para mangin sakop kita sang Ginharian. (Basaha ang Marcos 10:28-30.) Binagbinaga ang duha nga naghimo sini.

5. Paano ginpakita ni Zaqueo nga ginpabaloran niya ang Ginharian sang Dios?

⁵ Si Zaqueo isa ka puno nga manugsukot sing buhis nga nagmanggaranon paagi sa pagpangilkil. (Luc. 19:1-9) Pero, sang mabatian sining indi matarong nga tawo ang ginbantala ni Jesus parte sa Ginharian, nahantop niya kon daw ano ini ka malahalon kag nagdesisyon sia dayon. Nagsiling sia: “Ginuo, ihatag ko sa mga imol ang katunga sang akon pagkabutang. Kag ibalik ko ang apat ka pilo sa kay bisan sin-o nga ginkilkilan ko.” Wala sia nanugon nga madula ang manggad nga natipon niya sa indi maayo nga paagi, kag wala na sia naghandum sang materyal nga mga butang.

6. Ano nga mga pagbag-o ang ginhimo ni Rose para mangin sakop sia sang Ginharian sang Dios, kag ngaa ginhimo niya ini?

⁶ Mga pila ka tuig na ang nagligad, nabatian sang isa ka babayi nga tawgon naton nga si Rose ang mensahe parte sa Ginharian. May karelasyon sia sadto nga isa man ka babayi, kag presidente sia sang organisasyon nga nagatib-ong sang mga kinamatarong sang mga homoseksuwal. Pero, samtang ginatun-an ni Rose ang Biblia, nahantop niya nga malahalon ang kamatuoran parte sa Ginharian sang Dios. Kag narealisar niya nga dapat sia magbag-o. (1 Cor. 6:9, 10) Natandog ang iya tagipusuon, gani naghalin sia sa iya posisyon kag ginbulagan niya ang iya karelasyon. Nabawtismuhan si Rose sang 2009, kag nagregular payunir sia pagkasunod nga tuig. Ang iya gugma kay Jehova kag pagpabalor sa Ginharian mas labaw sangsa bisan ano nga handum sang unod.—Mar. 12:29, 30.

7. Ano ang dapat naton himuon para mapabaloran ang Ginharian sang Dios?

⁷ Madamo sa aton ang naghimo sing daku nga pagbag-o para mangin sakop sang Ginharian sang Dios. (Roma 12:2) Pero, dapat padayon ang aton pagbag-o. Dapat mangin alisto kita pirme sa mga butang nga mahimo makadula sang aton pagpabalor sa Ginharian, lakip ang handum sa materyal nga mga butang kag imoral nga mga buhat. (Hulu. 4:23; Mat. 5:27-29) Para padayon naton nga mapabaloran sing bug-os tagipusuon ang Ginharian sang Dios, ginhatagan kita ni Jehova sing isa pa ka malahalon nga bahandi.

8. (a) Ngaa ginlaragway ni apostol Pablo ang aton ministeryo nga “bahandi sa mga suludlan nga daga”? (b) Paano ginpabaloran ni Pablo ang iya ministeryo?

⁸ Dumduma nga ginsugo kita ni Jesus nga magbantala kag itudlo ang maayong balita sang Ginharian sang Dios. (Mat. 28:19, 20) Nahibaluan ni apostol Pablo kon daw ano ka  bilidhon ang ministeryo parte sa bag-o nga katipan. Ginlaragway niya ini nga “bahandi sa mga suludlan nga daga.” (2 Cor. 4:7; 1 Tim. 1:12) Bisan pa indi kita himpit nga mga suludlan nga daga, ang mensahe nga aton ginabantala nagahatag sing paglaum nga kabuhi nga wala sing katapusan para sa aton kag sa nagapamati sa aton. Nahibaluan ini ni Pablo, gani nagsiling sia: “Ginahimo ko ang tanan tungod sa maayong balita agod mabantala ko ini sa iban.” (1 Cor. 9:23) Huo, bangod ginpabaloran ni Pablo ang ministeryo, ginhimo niya ang iya bug-os nga masarangan nga tudluan ang mga tawo para mangin disipulo. (Basaha ang Roma 1:14, 15; 2 Timoteo 4:2.) Nakabulig ini sa iya nga mabatas ang mga pagpamatok. (1 Tes. 2:2) Paano naton mapakita ang pareho sini nga pagpabalor sa ministeryo?

9. Ano ang pila ka paagi nga mapakita naton ang aton pagpabalor sa ministeryo?

⁹ Ang isa ka paagi nga ginpakita ni Pablo ang pagpabalor sa ministeryo amo ang iya kahanda sa pagbantala sa iban sa tagsa ka kahigayunan. Pareho sa mga apostoles kag mga Cristiano sang una, nagabantala kita sing indi pormal, sa pangpubliko nga mga lugar, kag sa mga balay. (Binu. 5:42; 20:20) Kon ginatugot sang aton kahimtangan, mahimo naton mapasangkad ang aton ministeryo, ayhan bilang auxiliary payunir ukon regular payunir. Mahimo man kita magtuon sing iban nga lenguahe, mag-alagad sa iban nga lugar sa aton pungsod, ukon magsaylo sa iban nga pungsod.—Binu. 16:9, 10.

10. Paano ginpakamaayo si Irene sa iya kakugi sa pagbantala sang maayong balita?

¹⁰ Binagbinaga ang halimbawa ni Irene nga isa ka dalaga sa Estados Unidos. Gusto gid niya bantalaan ang mga imigrante nga nagahambal sing Russian. Sang ginsugdan niya ini sang 1993, mga 20 lang ang manugbantala sa Russian nga grupo sa New York City. Mga 20 ka tuig nga nagbantala si Irene sa sini nga lenguahe. “Indi gihapon ako sagad mag-Russian,” siling ni Irene. Pero ginpakamaayo ni Jehova ang iya kakugi kag ang kakugi man sang iban. Subong, may anom na ka Russian nga kongregasyon sa New York City. Kinse sa gintudluan ni Irene sa Biblia ang nabawtismuhan. Ang pila sa ila nangin Bethelite, payunir, kag gulang. Si Irene nagsiling, “Kon ikumparar ko sa iban nga tulumuron nga puede ko kuntani himuon, wala na sing makalabaw sa kalipay nga resulta sang akon pag-alagad.” Ginpabaloran gid niya ang iya ministeryo!

11. Ano ang maayo nga mga resulta sang padayon nga pagbantala bisan pa may nagapamatok?

¹¹ Kon pabaloran naton ang aton ministeryo, mangin pareho kita kay apostol Pablo nga nagpadayon sa pagbantala bisan pa may mga pagpamatok. (Binu. 14:19-22) Sang dekada 1930 asta 1940, grabe ang pagpamatok sa aton mga kauturan sa Estados Unidos. Pero, pareho kay Pablo, nangin malig-on sila kag nagpadayon sa pagbantala. Madamo nga beses nga ginpangapinan sang aton mga kauturan sa korte ang aton kinamatarong sa pagbantala. Sang 1943, amo ini ang komento ni  Utod Nathan H. Knorr parte sa isa ka pabor nga desisyon sang U.S. Supreme Court: “Nagdaug kita bangod sa inyo. Kon ang mga manugbantala wala nagpadayon sa pagbantala, wala kuntani sing mga kaso sa Supreme Court; pero bangod kamo nga mga manugbantala, kamo nga mga kauturan sa bilog nga kalibutan nagpadayon kag wala nag-untat, napierde naton ang mga nagapamatok. Ang malig-on nga panindugan sang katawhan sang Ginuo ang nagpaposible sa sini nga kadalag-an.” Ang kalig-on sang aton mga kauturan sa iban nga pungsod nagresulta man sa madamo nga kadalag-an sa korte. Huo, kon ginapabaloran naton ang aton ministeryo, indi kita mapauntat sang mga nagapamatok.

12. Ano ang determinado mo nga himuon sa imo ministeryo?

¹² Kon tamdon naton ang ministeryo nga isa ka malahalon nga bahandi halin kay Jehova, wala kita nagabantala para lang may ireport nga oras. Sa baylo, himuon naton ang aton bug-os nga masarangan ‘nga magpanaksi sing maid-id sa maayong balita.’ (Binu. 20:24; 2 Tim. 4:5) Pero ano ang itudlo naton sa iban? Binagbinaga ang isa pa ka bahandi halin sa Dios.

13, 14. Ano ang “talaguan sing bahandi” nga ginlaragway ni Jesus sa Mateo 13:52, kag paano naton ini masudlan?

¹³ Ang ikatlo nga espirituwal nga bahandi amo ang aton talaguan sang ginpahayag nga mga kamatuoran. Si Jehova ang Dios sang kamatuoran. (2 Sam. 7:28; Sal. 31:5) Bangod maalwan sia nga Amay, ginapaambit niya ang mga kamatuoran sa mga nagakahadlok sa iya. Sugod sang una nga tion nga nabatian naton ang kamatuoran, nakatipon kita sang mga kamatuoran halin sa iya Pulong, ang Biblia, halin sa aton Cristianong mga publikasyon, kag halin sa aton mga kombension, asembleya, kag mga miting kada semana. Sa pagligad sang tion, may ara na kita sang ginlaragway ni Jesus nga “talaguan sing bahandi” nga ginasudlan naton sang daan kag bag-o nga mga kamatuoran. (Basaha ang Mateo 13:52.) Buligan kita ni Jehova nga makatipon sing malahalon kag bag-o nga mga kamatuoran sa aton “talaguan sing bahandi” kon pangitaon naton ini pareho sang pagpangita sa natago nga mga bahandi. (Basaha ang Hulubaton 2:4-7.) Paano naton mahimo ini?

¹⁴ Dapat naton seriosohon ang personal nga pagtuon kag dapat mag-research kita sing maayo sa Pulong sang Dios kag sa aton mga publikasyon. Makabulig ini sa aton nga makita ang mga kamatuoran nga basi “bag-o” sa aton kay subong pa lang naton natun-an. (Jos. 1:8, 9; Sal. 1:2, 3) Ang pinakauna nga isyu sini nga magasin sang Hulyo 1879 nagsiling: “Ang kamatuoran napalibutan sang kabutigan kag halos matabunan ini, pareho sa isa ka gamay nga bulak sa kagulangan nga daw indi na makita bangod sang madabong nga hilamon. Dapat ka manikasog para makita ini. . . . Dapat ka magduko para makuha ini. Indi makontento sa isa lang ka bulak sang kamatuoran. . . . Magpadayon sa pagtipon, magpadayon sa pagpangita.” Huo, dapat kita manikasog nga may kalipay nga dugangan sang mga kamatuoran ang aton talaguan sing bahandi.

15. Ngaa matawag naton nga “daan” ang pila ka kamatuoran, kag diin sa sini ang ginapabaloran mo gid?

¹⁵ Natun-an naton ang pila ka malahalon nga mga kamatuoran sang nagpakig-upod kita sa katawhan sang Dios. Matawag naton ini nga “daan,” kay natun-an naton ini sang nagasugod pa lang kita sa aton Cristianong pagkabuhi. Ano ang nalakip sa sining malahalon nga mga kamatuoran? Natun-an naton nga si Jehova ang aton Manunuga kag Manughatag sing Kabuhi kag may katuyuan sia para sa katawhan. Natun-an man naton nga bangod sa gugma sang Dios, ginhatag niya ang iya Anak bilang halad-gawad para mahilway kita sa sala kag kamatayon. Natun-an pa gid naton nga ang iya Ginharian amo ang magadula  sang tanan nga pag-antos, kag may paglaum kita nga mabuhi sing dayon, may paghidait, kag malipayon bilang mga sakop sini nga Ginharian.—Juan 3:16; Bug. 4:11; 21:3, 4.

16. Ano ang dapat naton himuon kon may ginbag-o sa aton paghangop sa kamatuoran?

¹⁶ May mga tion nga ang aton paghangop sa isa ka tagna sa Biblia ukon sa pila ka teksto kinahanglan bag-uhon. Kon may bag-o nga mga paghangop, dapat naton ini tun-an sing maayo kag pamalandungan. (Binu. 17:11; 1 Tim. 4:15) Indi bastante nga hibaluon lang naton ang mga pagbag-o. Dapat naton hangpon sing maayo ang mga detalye sa sini nga mga pagbag-o. Kon himuon naton ini, makasiguro kita nga ang bag-o nga kamatuoran mabutang gid sa aton talaguan sing bahandi. Ano ang mga benepisyo sang aton mga panikasog?

17, 18. Paano makabulig sa aton ang balaan nga espiritu?

¹⁷ Gintudlo ni Jesus nga ang espiritu sang Dios magapahanumdom sa aton sang aton mga natun-an. (Juan 14:25, 26) Paano ini makabulig sa aton bilang mga manunudlo sang maayong balita? Binagbinaga ang eksperiensia ni Peter. Sang 1970 sang 19 anyos sia, nangin Bethelite sia sa Britanya. Samtang nagapamalaybalay sia, naistorya niya ang isa ka lalaki nga mga 50 anyos kag may burangos. Ginpamangkot sia ni Peter kon bala gusto niya nga mahangpan ang Biblia. Daw nakibot ang lalaki kag ginsilingan niya si Peter nga Judiyo nga mga rabbi ang nagaistar sa ginduaw niya nga balay. Para testingan si Peter, namangkot ang rabbi, “To, sa ano abi nga lenguahe ginsulat ang Daniel?” Nagsabat si Peter, “Ang bahin sini ginsulat sa Aramaiko.” “Nakibot ang rabbi nga nabal-an ko ang sabat,” hinumdom ni Peter. “Pero mas nakibot ako! Paano ko nabal-an ang sabat? Pagpauli ko, gintan-aw ko ang mga isyu sang Ang Lalantawan kag Magmata! sang nagligad nga binulan. May nakita ako nga artikulo nga nagapaathag nga ang Daniel ginsulat sa Aramaiko.” (Dan. 2:4, footnote) Huo, ang balaan nga espiritu makapahanumdom sa aton sang mga nabasa naton sang una nga ara sa aton talaguan sing bahandi.—Luc. 12:11, 12; 21:13-15.

¹⁸ Kon pabaloran naton ang kaalam halin kay Jehova, ang aton tagipusuon magapahulag sa aton nga padayon nga sudlan sang daan kag bag-o nga mga kamatuoran ang aton talaguan sing bahandi. Samtang mas ginapabaloran pa gid naton ang kaalam halin kay Jehova, mas mangin maayo pa gid kita nga mga manunudlo.

19. Ngaa dapat naton amligan ang aton espirituwal nga mga bahandi?

¹⁹ Wala nagauntat si Satanas kag ang iya kalibutan nga paluyahon ukon dulaon ang aton pagpabalor sa espirituwal nga mga bahandi nga ginbinagbinag naton sa sini nga artikulo. Indi kita maghunahuna nga indi kita maapektuhan sang mga pagsulay. Mahimo nga masulay kita sang trabaho nga daku ang sueldo, sang handum nga magkabuhi sing masulhay, ukon sang bugal nga ipadayawdayaw ang materyal nga manggad. Ginpahanumdom kita ni apostol Juan nga ini nga kalibutan nagataliwan kag amo man ang kailigbon sini. (1 Juan 2:15-17) Gani, dapat manikasog gid kita nga amligan ang aton pagpabalor sa espirituwal nga mga manggad.

20. Ano ang determinado mo nga himuon para maamligan ang imo espirituwal nga mga bahandi?

²⁰ Mangin handa nga isakripisyo ang bisan ano nga mahimo makadula sang imo bug-os tagipusuon nga pagpabalor sa Ginharian sang Dios. Padayon sa pagbantala sing makugi, kag padayon nga pabalori ang aton ministeryo nga nagaluwas sang kabuhi. Mangin mapisan sa pagpangita sing mga kamatuoran halin sa Dios. Samtang ginahimo mo ini, makatipon ka sing “bahandi sa langit, diin wala sing kawatan nga nagapalapit ukon sing sapatsapat nga nagapang-ut-ot. Kay kon diin ang inyo bahandi, didto man ang inyo tagipusuon.”—Luc. 12:33, 34.