1, 2. (a) Iehova ese ita dekenai ia henia dava bada kohudia toi be dahaka? (b) Inai stadi ai dahaka do ita herevalaia?

IUNIVES ibounai dekenai Iehova be kohu momo Tauna. (1 Siv. 29:11, 12) Bona ia be hariharibada Tamana dainai, ia ese ena dava bada kohudia be unai kohu idia laloa bada taudia dekenai ia haria. Ita moale badina Iehova ese ita dekenai inai dava bada kohudia ia henia, (1) Dirava ena Basileia, (2) iseda hahemauri gaukarana, bona (3) iena Hereva lalonai idia noho hereva momokani! To bema ita naria namonamo lasi, unai dava bada kohudia do ita laloa bada lasi. Unai ia vara lasi totona, namona be unai kohu ita gaukaralaidia namonamo bona nega ibounai unai gaudia dekenai iseda ura ita habadaia. Iesu ia gwau: “Umui emui dava bada kohu ia noho gabuna dekenai, emui kudouna danu be unuseniai.”​—Luka 12:34.

² Basileia, haroro gaukara, bona hereva momokani dekenai iseda ura bona moale ita habadaia dalana mani ita herevalaia. Unai ita karaia neganai, unai dava bada kohudia dekenai emu ura oi habadaia dalana mani oi laloa dobu.

3. Iesu ena sivarai lalonai, hoihoi tauna ese dava bada pel nadi ia hoia totona, dahaka ia karaia? (Laulau ginigunana herevalaia.)

³ Mataio 13:45, 46 duahia. Iesu ese pel nadi ia tahudia hoihoi tauna ena sivarai ia gwauraia. Lagani momo lalonai, unai hoihoi tauna ese pel nadi handred momo ia hoia bena ia hoihoilaidia. To hari ia ese dava bada pel nadina ia davaria, unai dainai ia moale bada herea. Unai pel nadi ia hoia totona, ia ese iena kohu ibounai ia hoihoilaia be namo. Mani oi laloa, ia dekenai unai pel nadi be dava bada gauna momokani.

4. Bema Dirava ena Basileia ita ura henia bada, dahaka do ita karaia?

⁴ Unai sivarai amo dahaka ita dibaia? Dirava ena Basileia ena hereva momokani be unai dava bada pel nadina bamona. Bema hoihoi tauna ese pel nadina ia ura henia bada hegeregerena, Basileia ita ura henia, mai lalona ibounai ida gau haida do ita dadaraia, unai amo Basileia henunai ita noho diba. (Mareko 10:28-30 duahia.) Unai bamona idia karaia taudia rua mani ita laloa.

5. Sakaio be Dirava ena Basileia totona dahaka ia karaia?

⁵ Sakaio be takisi gogoa tauna bona koikoi dalanai taunimanima edia kohu ia abia karana amo ia taga. (Luka 19:1-9) To, unai kara maoromaoro lasi tauna ia kamonai Iesu be Basileia ia harorolaia neganai, ia kamonai herevana ia abia dae bona maoromaoro ena kara ia haidaua. Ia gwau: “Lohiabada e, egu kohu ena kahana be ogogami taudia dekenai do lau henia bona bema haida lau doria bona koikoi dalanai gau haida lau abia vadaeni, unai be nega 4 do lau henia lou.” Vadaeni koikoi dalanai ia abia moni ia henia giroa bona mataganigani karana ia dadaraia.

6. Taihu ta be Dirava ena Basileia henunai ia noho totona, dahaka ia karaia, bona dahaka dainai?

⁶ Lagani haida gunanai, hahine ta be Basileia ena sivarai namona ia kamonai neganai, ia be hahine ma ta ida ia loa hebou. Danu, ia be orea ta ena presiden, unai orea ese tatau be hahine bamona bona hahine be tatau bamona idia kara taudia ia durua. To Baibel ia stadilaia neganai, Dirava ena Basileia ena namo ia lalopararalaia. Unai dainai ena lalona ia hadaia iena mauri ia haidaua totona. (1 Kor. 6:9, 10) Gabeai ia karaia gaukarana amo ia doko bona ia tura henia hahinena ia rakatania. Ia be lagani 2009 ai ia bapatiso, bona murina laganina ai regula painia gaukara ia matamaia. Unai ia karaia badina Iehova ia lalokau henia bada bona Basileia ia ura henia.​—Mar. 12:29, 30.

7. Dahaka ese ita do ia durua Dirava ena Basileia ita ura henia noho totona?

⁷ Ita momo be iseda mauri ita haidaua, badina ita ura Dirava ena Basileia henunai ita noho. (Roma 12:2) To, gau haida ese iseda ura Basileia dekenai idia koua diba bona unai gaudia ita dadaraia be namo, hegeregere kohu ura henia karana eiava matabodaga uradia. (Aon. 4:23; Mat. 5:27-29) Ita durua totona Iehova ese ita dekenai dava bada kohu ma ta ia henia, unai amo mai kudouna ibounai ida iena Basileia ita ura henia noho diba.

8. (a) Dahaka dainai Paulo ese haroro gaukara be hodu lalonai ia noho dava bada gauna ida ia hahegeregerea? (b) Edena dala ai Paulo ia hahedinaraia ia be haroro gaukara ia laloa bada?

⁸ Iesu ese ita ia hagania Dirava ena Basileia ena sivarai namona ita harorolaia bona hadibaia totona. (Mat. 28:19, 20) Aposetolo Paulo ese iena hesiai gaukarana ia laloa bada. Ia ese kontraka matamatana ena hesiai gaukara be hodu lalonai ia noho dava bada gauna ida ia hahegeregerea. (2 Kor. 4:7; 1 Tim. 1:12) Ena be ita be goevadae lasi,  to ita harorolaia sivaraina be dava bada gauna, badina ita bona ita idia kamonai henia taudia dekenai mauri hanaihanai ia henia. Unai dainai Paulo ia gwau: “Sivarai namona totona gau ibounai lau karaia, unai amo ma haida dekenai sivarai namona lau harorolaia diba.” (1 Kor. 9:23) Oibe, Paulo ese haroro gaukara ia ura henia bada dainai, ia gaukara goada taunimanima be hahediba taudia ai ia halaoa totona. (Roma 1:14, 15; 2 Timoteo 4:2 duahia.) Unai ese ia durua dagedage ia haheaukalaia totona. (1 Tes. 2:2) Paulo hegeregerena, edena dala ai haroro gaukara ita ura henia diba?

9. Edena dala ma haida ai ita hahedinaraia diba ita be haroro gaukara ita ura henia?

⁹ Paulo be haroro gaukara ia laloa bada, bona unai ia hahedinaraia dalana ta be ia noho hegaegae ma haida ia haroro henia totona. Aposetolo taudia bona Keristani ginigunadia bamona, nega idauidau ai, taunimanima momo idia noho gabudiai, bona ruma-ta-ruma-ta ai ita haroro be namo. (Kara 5:42; 20:20) Iseda noho dalana hegeregerena, dala ita tahua iseda haroro gaukara ita habadaia totona, reana ita heduru painia eiava ita regula painia diba. Danu, gado ma ta ita dibaia, eiava hanua o tano ma ta dekenai ita lao diba.​—Kara 16:9, 10.

10. Irene be sivarai namona ia harorolaia dainai, dahaka hahenamo ia abia?

¹⁰ Mani Irene ita laloa. Ia be singul taihu ta bona United States dekenai ia noho. Bona ia ura bada Russia gado ai idia hereva taudia ia haroro henia. Unai dainai lagani 1993 ai, New York Siti dekenai ia noho Russia gado grup ia bamoa matamaia. Unai nega ai, pablisa taudia be 20 sibona. Lagani 20 lalonai, Irene be unai grup ida ia gaukara. Ia gwau: “Russia gado lau do diba namonamo lasi.” To, Iehova ese ia bona idia gaukara goadagoada taudia ma haida ia hanamodia. Unai dainai hari New York Siti ai, Russia gado kongrigeisen ibounai be 6. Irene ese ia stadi henia taudia 15 be idia bapatiso vadaeni. Idia haida be Betele ai idia gaukara, ma haida be idia painia, bona elda maduna idia huaia. Irene ia gwau: “Lau atoa diba tahua gaudia ma haida lau laloa lou neganai, lau diba unai tahua gauna ta ese lau dekenai moale korikorina ia henia diba lasi.” Oibe, ia ese ena haroro gaukara ia laloa bada!

11. Ena be dagedage ita davaria, to ita haroro noho neganai, dahaka namo ia vara?

¹¹ Bema iseda haroro gaukara ita laloa bada, aposetolo Paulo bamona do ita haroro noho, herevana dagedage ita davaria. (Kara 14:19-22) Hegeregere, lagani 1930 bona 1944 padanai, United States ai, iseda tadikaka be dagedage bada idia davaria. To idia gini goada bona idia haroro noho, aposetolo Paulo bamona. Gavamani ese iseda gaukara idia ura koua neganai, iseda tadikaka be kota dekenai idia lao bona keis momo idia kwalimulaia. Lagani 1943 ai, Tadikaka Nathan H. Knorr ese U.S. Supreme Court ai idia kwalimulaia keis  ta ia herevalaia neganai, ia gwau: “Emui gaukara goadagoada karana dainai inai keis ai kwalimulaia. Bema pablisa taudia be idia haroro noho lasi, Supreme Court ai inai bamona keis do ita karaia lasi; to umui, pablisa taudia dainai, tanobada hegegemadai idia noho tadikaka taihu, be idia haroro noho diba, bona inai gaukara do idia hadokoa lasi, herevana dagedage idia davaria. Lohiabada ena taunimanima be idia gini goada bona inai keis idia kwalimulaia dainai, unai ia vara.” Tano ma haida ai idia noho tadikaka taihu edia gini goada karana dainai, idia danu be keis momo idia kwalimulaia. Oibe, haroro gaukara ita laloa bada dainai, dagedage karana ita kwalimulaia diba.

12. Emu lalona oi hadaia dahaka do oi karaia?

¹² Iseda haroro gaukara be Iehova amo ita abia dava bada gauna ta bamona ita laloa neganai, ripoti ai do ita torea hora sibona do ita laloa lasi. To, iseda goada ibounai ida “sivarai namona, do [ita] gwauraia guguru.” (Kara 20:24; 2 Tim. 4:5) To ma haida dekenai dahaka do ita hadibaia? Dirava amo ita abia dava bada gauna ma ta mani ita laloa.

13, 14. Iesu ese Mataio 13:52 ai ia herevalaia “dava bada kohu haboua rumana” be dahaka, bona unai ruma be edena bamona do ita hahonua?

¹³ Ita abia dava bada kohu ihatoina be ita abia dae hereva momokani ibounai. Iehova be kara momokani Diravana. (2 Sam. 7:28; Sal. 31:5) Ia be hariharibada Tamana dainai, ia idia gari henia taudia dekenai hereva momokani ia hahedinaraia. Unai hereva momokani ita kamonai negana ginigunana amo, ita ese Baibel, iseda buka bona magasin, hebouhebou badadia bona wiki ta ta ai ita karaia heboudia amo hereva momokani momo ita dibaia. Lagani idia hanaia lalonai, ita be Iesu ese ia gwauraia “dava bada kohu haboua rumana” ai hereva momokani gunadia bona matamatadia ita haboua. (Mataio 13:52 duahia.) Bema unai hereva momokani be idia hunia kohudia hegeregerena ita tahua, Iehova ese ita do ia durua iseda “dava bada kohu haboua rumana” lalonai hereva momokani matamatadia ita haboua totona. (Aonega Herevadia 2:4-7 duahia.) Edena bamona unai do ita karaia?

¹⁴ Namona be nega ibounai Baibel bona iseda pablikeisen ita stadilaia bona hetahu ita karaia namonamo. Unai ese ita do ia durua hereva momokani “matamatadia” ita davaria totona. (Ios. 1:8, 9; Sal. 1:2, 3) July 1879 ai Gima Kohorona ginigunana idia halasia neganai, inai hereva ia noho, ia gwau: “Hereva momokani be tano gagaena ai ia tubu flaoaflaoa bamona, unai flaoaflaoa be idia tubu haraga ava dikadia ese idia hagegea bona kahirakahira idia hamasea. Unai flaoaflaoa oi davaria totona, namona be oi tahua namonamo. . . . Bema oi davaria, oi igo diho bona oi abia. To, hereva momokani ena flaoaflaoa tamona sibona oi abia lasi. . . . Flaoaflaoa momo herea oi tahua bona gogoa be namo.” Oibe, namona be iseda “dava bada kohu haboua rumana” lalonai Dirava ena hereva momokani momo ita haboua.

15. Dahaka dainai ita gwau diba hereva momokani haida be “gunadia,” bona edena oi ura henia bada?

¹⁵ Baibel ita stadilaia matamaia neganai, dava bada hereva momokani haida ita dibaia. Ita gwau diba unai be hereva momokani “gunadia,” badina idia be ita dibaia hereva momokani ginigunadia. Idia haida be dahaka? Ita dibaia gauna be Iehova be iseda Havaraia Tauna bona Mauri Henia Tauna, bona ia be mai ena palani taunimanima totona. Ita dibaia gauna ma ta be Dirava be mai lalokau ida iena Natuna be mauri davalaia boubouna bamona ia henia, unai amo kara dika bona mase amo ita ia ruhaia. Ma danu, ita diba iena Basileia ese hisihisi ibounai do ia haorea bona mai maino bona moale  ida Basileia ena lohia henunai do ita noho hanaihanai.​—Ioa. 3:16; Apok. 4:11; 21:3, 4.

16. Hereva momokani ta dekenai diba matamatana ita abia neganai, dahaka ita karaia be namo?

¹⁶ Nega ta ta ai, iseda laloparara Baibel ena peroveta hereva ta eiava siri haida dekenai idia haidaua diba. Unai bamona diba matamatadia ita abia neganai, namona be nega ita atoa ita stadilaia namonamo bona ita laloa dobu totona. (Kara 17:11; 1 Tim. 4:15) To, ita abia diba gunana bona diba matamatana edia idau ita lalopararalaia sibona be hegeregere lasi, namona be ita abia diba matamatana ita lalopararalaia namonamo. Bema unai bamona ita karaia, hereva momokani matamatadia be iseda dava bada kohudia haboua rumana lalonai ita atoa namonamo diba. Dahaka dainai unai bamona ita karaia be namo?

17, 18. Lauma helaga ese edena dala ai ita ia durua?

¹⁷ Iesu ia gwau Dirava ena lauma ena heduru amo ita ese ita dibaia vadaeni gaudia do ita laloa lou. (Ioa. 14:25, 26) Sivarai namona ita harorolaia neganai, unai ese edena bamona ita ia durua diba? Tadikaka Peter ena ekspiriens mani ita laloa. Lagani 1970 ai, iena mauri lagani be 19 neganai, Britain ena Betele ai ia gaukara matamaia. Ruma-ta-ruma-ta dekenai ia haroro noho lalonai, mauri lagani 50 bamona tauna mai ena besoso ia hedavari henia. Peter ese unai tauna ia nanadaia bema ia ura Baibel ena hereva ia lalopararalaia. Unai tauna ia hoa, badina ia be Iuda ena rabi tauna. Peter tohoa totona, ia henanadai: “Egu natuna e, Daniela bukana be edena gado ai idia torea?” Peter ia haere: “Iena kahana haida be Aramia gado ai idia torea.” Peter ia laloa lou: “Unai rabi tauna ia hoa, badina haere lau diba​—lau danu lau hoa bada! Unai haere be edena bamona lau diba? Ruma dekenai lau giroa lou neganai, hua gunana ena Watchtower bona Awake! magasin lau sekedia, bona atikol ta ese ia hahedinaraia Daniela bukana be Aramia gado ai idia torea.” (Dan. 2:4) Momokani, lauma helaga ese ita ia durua diba guna ita duahia bona iseda dava bada kohu haboua rumana lalonai ita atoa gaudia ita laloa lou totona.​—Luka 12:11, 12; 21:13-15.

¹⁸ Bema Iehova amo ia mai aonegana ita laloa bada, do ita ura hereva momokani​—matamatadia bona gunadia​—amo iseda dava bada kohu haboua rumana ita hahonua. Iseda lalokau bona moale Iehova ena aonega dekenai ia bada neganai, do ita hegeregere ma haida ita hadibaia totona.

19. Dahaka dainai iseda dava bada kohudia ita gimaia be namo?

¹⁹ Satani bona ena tanobada be idia ura bada iseda lalokau ita herevalaia dava bada kohudia dekenai idia hamanokaia eiava hadikaia. Bona ita dekenai unai ia vara diba. Bema ita naria namonamo lasi, dava bada moni gaukara do ita tahua, kohu momo maurina do ita noholaia, eiava iseda kohu ita heagilaia diba. Aposetolo Paulo ia gwau inai tanobada bona ena ura be do ia ore. (1 Ioa. 2:15-17) Unai dainai namona be ita abia dava bada kohudia ita laloa bada bona gimaia.

20. Emui dava bada kohudia oi gimaia totona dahaka do oi karaia?

²⁰ Namona be Dirava ena Basileia totona ita hahedinaraia lalokauna ia hamanokaia diba gaudia ita dadaraia. Ita haroro goadagoada noho, bona iseda lalokau haroro gaukara totona ita haboioa lasi. Bona ita hekwarahi noho Dirava amo idia mai hereva momokani ita tahudia totona. Bema unai oi karaia, oi be “guba dekenai idia ore diba lasi dava bada kohudia” oi haboua noho. “Unuseniai henaohenao tauna do ia vareai lasi bona manumanu ese do ia ania lasi. Umui emui dava bada kohu ia noho gabuna dekenai, emui kudouna danu be unuseniai.”​—Luka 12:33, 34.