1, 2. (a) Anni i tallu nga espiritual nga pakkukua i niyawa ni Jehova nittam? (b) Anni i ikonsidera tam taw nga artikulo?

SI Jehova i pinakamariku nga Persona ta interu uniberso. (1 Cro. 29:11, 12) Bilang i minangngiyawa nga Yama, vuka i palagna nga ibillay i espiritual ira nga kinarikuna turi ta makannammu ta balorna. Talaga mappabalo ittam megafu ta niddan ittam ni Jehova tu espiritual nga kinariku, nelagum ngana i (1) Pappatulan na Dios, (2) makepaliag-inango nga ministerio, anna (3) matagibalor nga kinakurug nga malegan ta Uvovugna! Ngem nu ariattam magimmugug, awayyana malsa i pangappresia tam tatun ira nga minas nga gittana itabbo tam. Tapenu ariattam metabbo yatun, usattam yatun tu mapia anna kanayun nga ponaggan i aya tam para tatun. Kinagi ni Jesus: “Ta nu sitaw i dian na pakkukuanu ira, tari gapa i dian na futunu.”​—Luc. 12:34, NW.

² Ikonsidera tam nu kunnasi mapeggan anna mapattalupaddian i aya anna appresasion ta Pappatulan, ministerio, anna ta kinakurug. Durante nga kuattam yatun, monag nga pannonopan nu kunnasi nga personal nga maponag i aya tatun ta espiritual ira nga pakkukua.

3. Anni i sigga-paran nga kuan na negosiante ta ilustrasion ni Jesus tapenu malà i kuruga mangina nga perlas? (Innan i letratu ta gafu na artikulo.)

³ Bibbigan i Mateo 13:45, 46. Kinagi ni Jesus i tadday nga ilustrasion meyannung ta negosiante nga magaleg tu perlas. Siguradu nga ginatu ngana nga perlas i nagatang anna nelakuna yaw nga negosiante ta aru nga dagun. Ngem egga naleganna nga tadday nga perlas nga kuruga mangina ngem talaga nappagayaya sa turi nasinganna. Ngem tapenu magatanna yatun, kawagan nga ilakuna ngamin i pakkukuana. Manonomu kari nu kunnasi kabalor yatun nga perlas para sa?

4. Nu ayatattam i Pappatulan na Dios kagitta na pangaya na negosiante ta perlas, anni nakuan i kuattam?

⁴ Anni i leksion para nittam? Kagitta natun nga matagibalor nga perlas i kinakurug ta Pappatulan na Dios. Nu ayatattam yatun kagitta na pangaya na negosiante tatun nga perlas, sigga-paran nga isakrifisio i ngamin tapenu mabbalin anna mattalupaddian nga sakup na Pappatulan. (Bibbigan i Marcos 10:28-30.) Innattam i dua nga indibidual nga nangngua tu kunnatun.

5. Kunnasi nipasingan ni Zakeo i determinasionna nga alawatan i Pappatulan na Dios?

⁵ Narriku si Zakeo nga gumakkolekta tu vugi megafu ta pangikil. (Luc. 19:1-9) Ngem, turi ta naginna natun nga ari matunung nga tolay i pangilayyagayya ni Jesus meyannung ta Pappatulan, nalippawana i balor na gigginnanna anna insigida nga nagguyu yaya. Kunna: “Afu, ilimus ku i gaddua na kukuà ta mariga ira. Ay nu egga i tolay nga zinarogas ku, itolì sa tu mami-appa paga i karu na.” Ari ngana yaya narigatan nga iyawa i rikuna nga naggafu ta darogas nga annangngua anna pinanawanna i pakkakkamna ta material.

6. Anni ira nga panguli i kingngua ni Rose tapenu mabbalin tu sakup na Pappatulan na Dios, anna ngatta kingnguana yatun?

⁶ Ta nappasa ira nga dagun, turi ta naginna na tadday nga ngaganattam tu Rose i mensahe na Pappatulan, egga i relasionna ta tadday gapa nga babay. Presidente yaya na organisasion nga makillaban para ta kepangngattan na homoseksual ira. Ngem durante nga gigiammuan ni Rose i Biblia, nakannammuanna i balorna yatun nga kinakurug meyannung ta Pappatulan na Dios. Tapus nalippawana nga mawag i dakal nga panguli. (1 Cor. 6:9, 10) Natukkal i futuna tapenu mar-resign ta posisionna anna nakisinna ta karelasionna. Nabawtisowan si Rose turi 2009, anna nappayunir yaya ta tumunug nga dagun. Mas masikan i pangayana kani Jehova anna ta Pappatulanna anne ta maski anni nga nepattaggan nga pakkaraga.​—Mar. 12:29, 30.

7. Kunnasi tam mapattalupaddian nga interu i futu tam ta Pappatulan na Dios?

⁷ Aru nittam i dakal i inulina ta pattolena tapenu mabbalin tu sakup na Pappatulan na Dios. (Roma 12:2) Ngem maski kunnatun, ari paga nabalin i trabahu tam. Mawag nga magalerto ittam ta ganna-gannug nga makari ta pangaya tam, nelagum ngana i material anna i imoral ira nga pakkaraga. (Prov. 4:23; Mat. 5:27-29) Tapenu kanayun nga interu futu i pangaya tam ta Pappatulan na Dios, nangiyawa paga si Jehova tu tanakuan nga matagibalor nga pakkukua.

8. (a) Ngatta tinukoy ni apostol Pablo nga minas ta “banga nga napadday ta pila” i ministerio tam? (b) Kunnasi nipasingan ni Pablo nga tinagibalorna i ministeriona?

⁸ Daddamman nga zinog ittam ni Jesus nga ilayyagayya anna ituddu i mapia nga dumug na Pappatulan na Dios. (Mat. 28:19, 20) Nasingan ni apostol Pablo i dakal nga balor na ministerio. Tinukoyna yaw  bilang minas ta “banga nga napadday ta pila.” (2 Cor. 4:7; 1 Tim. 1:12) Maski imperfekto ittam nga banga, makeyawa yatun tu inango nittam anna ta magginna ta mensahe nga ilayyagayya tam. Ta pakannammu taw, kinagi ni Pablo: “Kuak-ku ngamin danaw megafu ta evanghelio tapenu mesipo ngà ta bendision na.” (1 Cor. 9:23) Wan, napaguyu si Pablo na ayana ta ministerio tapenu mallallappo ta pangngua tu disipulos. (Bibbigan i Roma 1:14, 15; 2 Timoteo 4:2.) Yatun i nakoffun sa tapenu makapagattam ta grabe nga pangokkontra. (1 Tes. 2:2) Kunnasi tam mepasingan i kunnatun nga aya ta ministerio?

9. Anni i karuan nga makua tam tapenu mepasingattam i appresasion ta ministerio?

⁹ Nipasingan paga ni Pablo i appresasionna ta ministerio gukaban na pagalertona ta oportunidad tapenu makiyuvovug ta tanakuan. Kagitta na apostol ira anna ollu-siglo ira nga Cristiano, mallayyagayya ittam ta informal, publiko, anna ta babalay. (King. 5:42; 20:20) Durante nga ipamavulun na situasiottam, magaleg ittam tu tiansa tapenu palawan i ministerio tam, awayyana tu gukaban na passerbi tu auxiliary onu regular payunir. Awayya tam gapa maggigiammu tu tanakuan nga lengguahe, magali ta tanakuan nga lugar ta nasiottam, onu ta tanakuan nga nasion.​—King. 16:9, 10.

10. Kunnasi nabendisionan si Irene ta determinasionna nga ilayyagayya i mapia nga dumug?

¹⁰ Ikonsidera tam i angngarigan na single nga sister nga si Irene ta United States. Talaga makkaraga yaya nga layyagayyan i dayu ira nga maguvovug tu Russian. Nigafuna kuan yatun turi 1993, nga ma-20 laman i publisher ta grupo na Russian-language ta New York City. Ta unag na 20 dagun, talaga nallallappo si Irene tatun nga lengguahe. Inamin ni Irene, “Ari ngà paga tu malalaki nga makiyuvovug ta Russian.” Ngem, binendisionan ni Jehova i pattalikaragna kunne na gapa i tanakuan nga gittana. Ta maddaggun, egga i annam nga Russian congregation ta New York City. Nabawtisowan i 15 ta inistudy ni Irene. Massesserbi i karuan nira bilang Bethelite, papayunir, anna elder ira. Kunni Irene: “Nu nonopakku i tanakuan ira nga goal nga awayyà nakuan gawatan, awan tu manono ku nga mas makeyawa niakan tu pagayaya.” Wan, tagibaloranna i ministeriona!

11. Anni i positibo nga resulta na tulu-tuloy nga pangilayyagayya maski ta pameppersigi?

¹¹ Nu tagibalorattam i ministerio tam, meyarig ittam kani apostol Pablo, nga nattulu-tuloy ta pangilayyagayya maski nu mapeppersigi. (King. 14:19-22) Turi ta dekada 1930 anna ta gafu na dekada 1940, neparubang i wawwaragi tam ta United States ta grabe nga pangokkontra. Ngem, kagitta ni Pablo, nattalupaddian ira nga matuyag anna nibala-balayudda i pallayyagayya. Tapenu maprotektan i kepangngattattam nga  kuan yatun, aru nga kaso i nilabanadda. Turi ta 1943, kinagi ni Brother Nathan H. Knorr meyannung ta pangaffu ta kaso ta U.S. Supreme Court: “I viktoria ira ay megafu ta pakillabannu. Nu ari nattulu-tuloy i publisher ira ta ministerio, awan nakuan tu maski anni nga kaso ta Supreme Court; ngem megafu yatun ta sikamu nga publisher anna wawwaragi ta interu mundo ay nattulu-tuloy anna ari nappaffu ta pameppersigi. Megafu ta matuyag nga taddag na totolay na Yafu, nerattal gabbalaman yatun nga desision.” Navviktoria gapa i wawwaragi ta tanakuan nga nasion. Wan, affutan na aya tam ta ministerio i pameppersigi.

12. Anni i determinasiommu nu meyannung ta ministeriom?

¹² Nu imammatattam nga nabalor nga pakkukua nga naggafu kani Jehova i ministerio, ariattam makontento ta basta “pappasan laman i tiempo.” Kuattam lallagu i adde na mawayya tam ta ‘pangilammuyag ta Mapia nga Dumug.’ (King. 20:24; 2 Tim. 4:5) Ngem anni i ituddu tam ta tanakuan? Ikonsidera i tadday paga nga pakkukua nga naggafu ta Dios.

13, 14. Anni i “aggipappannan” nga tinukoy ni Jesus ta Mateo 13:52, anna kunnasi tam nga pannuan yatun?

¹³ I mekatallu nga pakkukua tam ay i nonnug tam ira nga nammuan nga kinakurug. Si Jehova i Dios na kinakurug. (2 Sam. 7:28; Juan 17:17) Bilang minangngiyawa nga Yama, ibillena i kinakurug ta maganassing sa. Tagga ta ollu tam naginna i kinakurug, egga i oportunidad tam nga unnugan i kinakurug nga naggafu ta Biblia, ta publikasiottam ira, kombensiottam, asembli, anna ta linigguan nga study. Ta pappasa na tiempo, napeggan ittam tu gitta na tinukoy ni Jesus nga “aggipappannan” na dana anna bagu ira nga tuddu. (Bibbigan i Mateo 13:52) Uffunan ittam ni Jehova nga unnugan i nabalor ira nga bagu nga tuddu ta ‘aggipappannattam’ nu alegattam yatun ira nga kinakurug nga gittana nakatagu nga minas. (Bibbigan i Proverbio 2:4-7.) Kunnasi tam kuan yatun?

¹⁴ Egga nakuan i makasta nga personal study tam anna usitakkattam tu mapia i Biblia anna i publikasiottam ira. Makoffun yaw tapenu masingattam i kinakurug nga gittana “bagu” megafu ta ariattam dati nga ammu. (Jos. 1:8, 9; Sal. 1:2, 3) Mabibbig ta pinaka-ollu nga isyuna yaw nga magazina nga nepublisa turi Hulio 1879: “I kinakurug ay kagitta na ordinario nga lappaw ta tana-tana na pattolay, nga napalevutan anna maggi ngana nga makallabban na paddakal na kaddo na kinaladdug. Tapenu malegammu yatun, kawagan nga kanayummu nga sifutan. . . . Nu apammu, kawagammu maddukag. Ariammu makontento ta tadday laman nga lappaw na kinakurug. . . . Magunnug paga, magaleg paga.” Wan, makkaraga ittam nakuan nga lannappan i aggipappannattam tu kinakurug ira nga naggafu ta Dios.

15. Ngatta makagi tam nga “dana” i karuan nga kinakurug, anna anni i karuan nga talaga tagibalorannu?

¹⁵ Nadiskubre tam i karuan nga nabalor ira nga kinakurug turi ta gafu tam nakikavulu ta totolay na Dios. Awayyana nga makagi yatun nga “dana,” megafu ta nammuattam ngana anna naappresia tam ta gafu na pabbalittam nga Cristiano. Anni i nelavu tatun nga nabalor nga kinakurug? Nammuattam nga si Jehova i Namaratu anna Mangiyawa-Inango anna egga i gakkagna para ta totolay. Nammuattam paga nga meddu nga niyawa na Dios i Anana bilang sakrifisio nga tavvu tapenu mapalubbangattam ta tagaruli anna patay. Nagigiammu tam paga nga pangultimuan na Pappatulanna i ngamin nga ziga-riga anna egga i iddanama tam nga mattolay tu mannanayun ta memammo  anna magayaya ta pammaguray na Pappatulan.—Juan 3:16; Nep. 4:11; 21:3, 4.

16. Anni i mawag nga kuattam nu makalawa ittam tu panguli ta pakalippawa ta kinakurug?

¹⁶ Egga ira i tiempo nga manguli i pangalippawa tam ta profesiya ira na Biblia onu ta karuan nga teksto na Biblia. Nu egga i mallawan tu bagu nga pakalippawa, mangiyawa nakuan ittam tu tiempo nga gigiammuan tu mapia i informasion anna pannonopan yatun. (King. 17:11; 1 Tim. 4:15) Alippawatattam nakuan tu mapia ari laman tu i dakal ira nga panguli, nu ari, kunne na gapa ta baddi nga nadduman na dana nga pakalippawa anna ta bagu. Nu kunnatun, siguradu nga mepappattam i bagu nga kinakurug ta aggipappannattam. Ngatta importante yatun ira nga appursigi?

17, 18. Kunnasi ittam uffunan na masanto nga espiritu?

¹⁷ Nituddu ni Jesus nga metoli na espiritu na Dios ta nono tam i gannug ira nga nagigiammu tam. (Juan 14:25, 26) Kunnasi makoffun yatun nittam nga mangituddu tu mapia nga dumug ta totolay? Ikonsidera tam i ekspiriensa ni brother Peter. Turi ta 1970 anna 19 anios yaya, kapepegafuna nga masserbi ta Bethel ta Britain. Durante nga mallayyagayya yaya, nasimmuanna i barbas sarado nga lalaki nga ma-50 edadna. Niyavu ni Peter ta lalaki nu kayàna alippawatan i Biblia. Nakaddag i lalaki anna kinagina nga tadday yaya nga Judio nga rabbi. Tapenu purueban si Peter, niyavuna: “Along, anni nga lengguahe nga netura i libru na Daniel?” Kunna gapa ni Peter: “Egga i partena yatun nga netura ta Aramaiko.” Neraddamman ni Peter, “Nakaddag i rabbi megafu ta ammù i tabbag—ngem ari tu kagitta na nikakaddag ku! Kunnasì nammuan i tabbag? Turi ta milubbe ngà anna inusito ku i Passifusifutan anna Gumising! ta nappasa ira nga vulan, nalegakku i artikulo nga nangipakanawag nga netura i karuan nga parte na Daniel ta Aramaiko.” (Dan. 2:4, ftn.) Wan, metoli na masanto nga espiritu ta nono tam i nappasa ira nga nabibbig tam anna memmugug nga nepappan ta aggipappannattam.​—Luc. 12:11, 12; 21:13-15.

¹⁸ Nu tagibalorattam i sirib nga naggafu kani Jehova, mapaguyu ittam na futu tam nga pannuan i aggipappannattam tu kinakurug​—bagu anna dana. Durante nga dumakal i aya anna appresasiottam ta sirib ni Jehova, mas mabbalin ittam tu malalaki nga mangituddu.

19. Ngatta ta immugurattam i espiritual ira nga pakkukua tam?

¹⁹ Tulu-tuloy nga pakkafian anna daralan ni Satanas anna na mundona i appresasiottam ta espiritual ira nga pakkukua tam nga nagigiammu taw nga artikulo. Ari ittam melisi taw ira nga taktika. Mabi tam laman nga matenta na makakkasta nga trabahu, pannono ta magarbu nga istilu na pattolay, onu pakkaraga nga ipara-parayag i material ira nga kinariku. Nitabarang ni apostol Juan nittam nga mapawan i mundo tuange ta pakkaragana. (1 Juan 2:15-17) Yatutta, mappursigi ittam nga immuguran i pangaya tam anna protektan i pangiddu anna appresasiottam ta espiritual ira nga kinariku.

20. Anni i determinasiommu tapenu memmuguran i espiritual ira nga pakkukuam?

²⁰ Sigga-paran nga isakrifisio i anni laman nga maketali ta interu futu nga aya ta Pappatulan na Dios. Tulu-tuloy nga matalikarag nga mallayyagayya, ari vuluvuga nga pawanan i appresasion ta makepaliag-inango nga ministerio tam. Mappursigi nga alegan i kinakurug nga naggafu ta Dios. Durante nga kuammu yatun, makepappan ka tu “kukua ira ta langi, nga tari ay ari makoko anna madaral na angi. Ta nu sitaw i dian na pakkukuanu ira, tari gapa i dian na futunu.”​—Luc. 12:33, 34, NW.