1, 2. (a) Nĩ mĩthithũ ĩrĩkũ ĩtatũ ya kĩĩroho Jehova atũheete? (b) Nĩ kĩĩ tũkwarĩrĩria gĩcunjĩ-inĩ gĩkĩ?

JEHOVA nĩwe Mũndũ ũrĩa mũtongu biũ igũrũ na thĩ. (1 Maũ. 29:11, 12) Arĩ Ithe witũ mũtaana, akumbatũraga guoko gwake na akahe ũtonga wa kĩĩroho arĩa monanagia nĩ marataũkĩrũo nĩ ũguni waguo. Nĩ tũkoragwo na ngatho nyingĩ mũno tondũ Jehova nĩ atũheete mĩthithũ ya kĩĩroho ĩrĩa nĩ hamwe na (1) Ũthamaki wa Ngai, (2) wĩra witũ wa kũhunjia ũrĩa ũhonokagia mĩoyo, na (3) ma cia goro iria ikoragwo Kiugo-inĩ gĩake. No tũngĩaga kwĩmenyerera, no twĩkore tũkĩagĩra kĩene mĩthithũ ĩyo na tũmĩteanĩrie. Nĩ getha tũrũmie mĩthithũ ĩyo, no mũhaka tũmĩhũthĩre wega na twerũhagie wendo witũ kaingĩ kũmĩerekera. Jesu oigire: “Harĩa mũthithũ wanyu ũrĩ, hau nĩho ngoro cianyu o nacio irĩkoragwo.”—Luk. 12:34.

² Rekei twarĩrĩrie ũrĩa tũngĩkũria na tũtũũrie wendo witũ na ngatho harĩ Ũthamaki, wĩra wa kũhunjia, na harĩ ma cia Bibilia. Tũkĩarĩrĩria gĩcunjĩ gĩkĩ, wĩcũranie ũrĩa ũngĩrikĩria wendo waku harĩ mĩthithũ ĩyo ya kĩĩroho.

3. Nĩ kĩĩ mũhũri biacara ũrĩa ũgwetetwo ngerekano-inĩ ya Jesu eehaarĩirie gwĩka nĩguo egĩre na ruru ya goro? (Rora mbica kĩambĩrĩria-inĩ gĩa gĩcunjĩ gĩkĩ.)

³ Thoma Mathayo 13:45, 46. Jesu aaheanire ngerekano ya mũhũri biacara wethaga ruru. Kwa ihinda rĩa mĩaka mĩingĩ, hatirĩ nganja atĩ mũhũri biacara ũcio nĩ aagũrĩte na akendia ruru nyingĩ. O na kũrĩ ũguo, nĩ aacemanirie na ruru ĩmwe njega mũno ũũ atĩ kũmĩona tu nĩ gwakenirie ngoro yake. No nĩ getha amĩgũre, aabataraga kwendia kĩrĩa gĩothe aarĩ nakĩo. Hihi nĩ wona ũrĩa ruru ĩyo yarĩ ya goro harĩ we?

4. Tũngĩkorũo twendete ma cia Ũthamaki ta ũrĩa mũhũri biacara eendete ruru ĩrĩa ya goro-rĩ, tũgwĩka atĩa?

⁴ Tũngĩĩruta ũndũ ũrĩkũ? Ma ciĩgiĩ Ũthamaki wa Ngai itariĩ ta ruru ĩyo ya goro. Tũngĩenda ma icio ta ũrĩa mũhũri biacara ũcio eendire ruru ĩyo, nĩ tũrĩkoragwo twĩhaarĩirie kũrekereria kĩndũ o gĩothe nĩ getha tũtuĩke na tũtũũre tũrĩ raiya a Ũthamaki. (Thoma Mariko 10:28-30.) Ta wĩcirie ngerekano cia andũ erĩ meekire ũguo.

5. Zakayo onanirie atĩa wendi wake mũnene wa kwĩgwatĩra Ũthamaki wa Ngai?

⁵ Zakayo aarĩ mũnene wa etia a mbia cia igooti na aagĩte na ũtonga mũnene na njĩra ya ũtunyani. (Luk. 19:1-9) No rĩrĩa mũndũ ũcio ũtaarĩ mũthingu aaiguire Jesu akĩhunjia ũhoro wa Ũthamaki, nĩ aamenyire ũrĩa ũhoro ũrĩa aaiguaga ũrĩ wa goro na akĩoya ikinya atekũrĩa marĩĩgu. Arĩ na gĩkeno oigire ũũ: “Mwathani, nuthu ya indo ciakwa nĩ ngũhe athĩni, na kĩrĩa gĩothe ndunyĩte mũndũ o wothe ngũrĩha maita mana.” Aacokirie ũtonga ũrĩa aagĩte naguo na njĩra ya ũtunyani na agĩtigana na ũkoroku wake kwerekera indo cia thĩ.

6. Nĩ mogarũrũku marĩkũ Rose eekire nĩguo atuĩke raiya wa Ũthamaki wa Ngai, na eekire ũguo nĩkĩ?

⁶ Mĩaka ĩigana ũna mĩhĩtũku, mũndũ ũmwe tũgwĩta Rose nĩ aaiguire ndũmĩrĩri ya Ũthamaki, na hĩndĩ ĩyo nĩ eeingĩranagia na ngomanio cia atumia gwa atumia. Aarĩ mũtongoria wa gĩkundi kĩmwe kĩarũagĩrĩra ihooto cia arĩa meingĩranagia na ngomanio ta icio. O na kũrĩ ũguo, o ũrĩa Rose eerutaga Bibilia, nĩ aamenyire ũguni mũnene wa ma ciĩgiĩ Ũthamaki wa Ngai. Ningĩ nĩ aamenyire atĩ nĩ aabataraga gwĩka ũgarũrũku mũnene. (1 Kor. 6:9, 10) Ngoro yake nĩ yamũtindĩkire atige gaturũa gake na atigane na mĩtugo ya ngomanio cia atumia gwa atumia. Rose aabatithirio mwaka-inĩ wa 2009, na mwaka ũrĩa warũmĩrĩire agĩtuĩka painia wa hĩndĩ ciothe. Wendo wake harĩ Jehova na harĩ Ũthamaki wake warĩ mũnene gũkĩra merirĩria o mothe ma mwĩrĩ.—Mar. 12:29, 30.

7. Tũngĩhota atĩa gũtũũria wendo witũ wa ngoro yothe harĩ Ũthamaki wa Ngai?

⁷ Nĩ ma, aingĩ aitũ nĩ twĩkĩte mogarũrũku manene ũtũũro-inĩ witũ nĩguo tũtuĩke raiya a Ũthamaki wa Ngai. (Rom. 12:2) O na kũrĩ ũguo, hau tiho mũico. No mũhaka tũikare twĩhũgĩte kuumana na indo iria ingĩnyihia wendo witũ harĩ Ũthamaki, o hamwe na kwĩrirĩria indo cia gũkũ thĩ na ngomanio o ciothe itagĩrĩire. (Thim. 4:23; Mat. 5:27-29) Jehova nĩ atũheete mũthithũ ũngĩ wa goro nĩguo atũteithie gũtũũria wendo witũ wa ngoro yothe harĩ Ũthamaki wake.

8. (a) Nĩ kĩĩ gĩatũmire mũtũmwo Paulo oige atĩ ũtungata witũ ũtariĩ ta ‘mũthithũ thĩinĩ wa indo cia rĩũmba’? (b) Mũtũmwo Paulo onanirie atĩa atĩ onaga ũtungata wake ũrĩ mũthithũ wa goro?

⁸ Ririkana atĩ Jesu atũheete wĩra wa kũhunjia na kũrutana ũhoro mwega wa Ũthamaki wa Ngai. (Mat. 28:19, 20) Mũtũmwo Paulo nĩ aamenyaga bata mũnene wa ũtungata. Aataarĩirie ũtungata wĩgiĩ kĩrĩkanĩro kĩrĩa kĩerũ ũrĩ ta “mũthithũ . . . thĩinĩ wa indo cia rĩũmba.” (2 Kor. 4:7; 1 Tim. 1:12) O na gũtuĩka tũrĩ indo cia rĩũmba itarĩ nginyanĩru,  ndũmĩrĩri ĩrĩa tũhunjagia no ĩtũme tũkona muoyo wa tene na tene o hamwe na arĩa matũthikagĩrĩria. Nĩ ũndũ wa kũmenya ũguo, mũtũmwo Paulo oigire: “Njĩkaga maũndũ mothe nĩ ũndũ wa ũhoro ũrĩa mwega, nĩguo ndĩũhunjagĩrie andũ arĩa angĩ.” (1 Kor. 9:23) Wendo wake harĩ ũtungata nĩ wamũtindĩkire gwĩkĩra kĩyo wĩra-inĩ wa gũtua andũ arutwo. (Thoma Aroma 1:14, 15; 2 Timotheo 4:2.) Ũndũ ũcio nĩ wamũteithirie gũkirĩrĩria ũkararia mũnene. (1 Thes. 2:2) Tũngĩonania wendo ta ũcio atĩa harĩ ũtungata?

9. Nĩ njĩra irĩkũ imwe tũngĩonania nacio atĩ nĩ twendete ũtungata?

⁹ Njĩra ĩmwe Paulo onanirie nayo atĩ nĩ eendete ũtungata, nĩ gũkorũo ehaarĩirie hĩndĩ ciothe kũhũthĩra mĩeke ĩrĩa yoimĩra kwaria na andũ angĩ. O ta atũmwo na Akristiano a tene, tũhunjagia o na rĩrĩa tũtarĩ ũtungata-inĩ, tũkahunjia kũndũ kwa mũingĩ, na nyũmba kwa nyũmba. (Atũm. 5:42; 20:20) Kũringana na ũrĩa maũndũ maitũ matariĩ, nĩ twethaga njĩra cia kwandandũra ũtungata witũ, hihi tũgatungata tũrĩ painia wa gũteithĩrĩria kana painia wa hĩndĩ ciothe. O na no twĩrute rũthiomi rũngĩ, tũthamĩre gĩcigo-inĩ kĩngĩ bũrũri-inĩ witũ, kana tũthamĩre bũrũri ũngĩ.—Atũm. 16:9, 10.

10. Irene aarathimirũo atĩa nĩ ũndũ wa kĩyo gĩake gĩa kũhunjia ũhoro ũrĩa mwega?

¹⁰ Ta wĩcirie ngerekano ya mwarĩ wa Ithe witũ ũtarĩ mũhiku wĩtagwo Irene kuuma Amerika (US). Aarĩ na wendi mũnene mũno wa kũhunjĩria andũ arĩa maathamĩire bũrũri ũcio na maaragia rũthiomi rwa Russia. Rĩrĩa aambĩrĩirie kũmahunjĩria mwaka-inĩ wa 1993, kwarĩ na ahunjia ta 20 gĩkundi-inĩ kĩa rũthiomi rwa Russia taũni-inĩ ya New York. Kwa ihinda rĩa mĩaka ta 20, Irene akoretwo akĩhunjia na kĩyo gĩcigo-inĩ kĩu. Irene oigaga ũũ: “Ndirĩ ndahota kwaria rũthiomi rũu wega biũ.” O na kũrĩ ũguo, Jehova nĩ arathimĩte kĩyo gĩake na kĩa andũ angĩ take. Ũmũthĩ ũyũ kũrĩ na ciũngano ithathatũ cihũthagĩra rũthiomi rwa Russia taũni-inĩ ya New York. Harĩ andũ arĩa Irene erutĩte nao Bibilia, ikũmi na atano nĩ mabatithĩtio. Amwe ao matungataga Betheli, angĩ magatungata marĩ mapainia, na angĩ marĩ athuri a ciũngano. Irene oigaga, “Ndeciria ũhoro wa mĩoroto ĩngĩ ingĩathingatire, ndionaga ta harĩ o na ũmwe ũngĩandeheire gĩkeno kĩnene gũkĩra kĩrĩa ndĩ nakĩo.” Onaga ũtungata wake ũrĩ wa bata mũno!

11. Nĩ moimĩrĩro marĩkũ mega monekaga nĩ ũndũ wa gũthiĩ na mbere kũhunjia o na rĩrĩa kũrĩ na ũkararia?

¹¹ Tũngĩona ũtungata witũ ũrĩ wa bata, tũkũhaana ta mũtũmwo Paulo na tũthiĩ na mbere kũhunjia o na rĩrĩa kũrĩ na ũkararia. (Atũm. 14:19-22) Mĩaka-inĩ ya 1930 na kĩambĩrĩria-inĩ kĩa mĩaka ya 1940, ariũ a Ithe witũ thĩinĩ wa Amerika (US) nĩ maacemanirie na ũkararia mũnene. Ĩndĩ o ta Paulo, matiaregeririe mũrũgamo wao, no maathire na mbere kũhunjia. Nĩguo magitĩre kĩhooto  gitũ gĩa kũhunjia, maarĩ na macira maingĩ igooti-inĩ. Mwaka-inĩ wa 1943, Mũrũ wa Ithe Witũ Nathan H. Knorr akĩarĩrĩria ũhoro wa ũhootani ũmwe thĩinĩ wa Igooti Rĩrĩa Inene rĩa Amerika (U.S) oigire ũũ: “Ũhootani ũrĩa tũgĩte naguo ũhotekete nĩ ũndũ wanyu kwĩrutanĩria mũno. Korũo mũhunjia ndaathire na mbere kũhunjia, gũtingĩrĩ na cira thĩinĩ wa Igooti Rĩrĩa Inene; no nĩ tondũ wee mũhunjia, na aarĩ na ariũ a Ithe witũ thĩinĩ wa thĩ yothe, nĩ mũrathiĩ na mbere na mũkaaga gũtiga nĩkĩo tũrahoota ũkararia ũcio. Nĩ ũhootani ũyũ wa andũ a Mwathani kũrũgama mehandĩte watũma kũgĩe na itua rĩu.” Mũrũgamo o ta ũcio mũrũmu wa ariũ a Ithe witũ mabũrũri-inĩ mangĩ nĩ ũtũmĩte kũgĩe na ũhootani o ta ũcio. Nĩ ma, wendo witũ harĩ ũtungata no ũtoorie ũkararia.

12. Ũtuĩte itua rĩrĩkũ ũhoro-inĩ wĩgiĩ ũtungata waku?

¹² Rĩrĩa tuona ũtungata witũ ũrĩ ta mũthithũ wa goro kuuma kũrĩ Jehova, tũtirĩiganagĩra tu na “gũtara mathaa.” Handũ ha ũguo, tũrĩkaga ũrĩa wothe tũngĩhota nĩguo tũrute “ũira kĩhinyio wĩgiĩ ũhoro ũrĩa mwega.” (Atũm. 20:24; 2 Tim. 4:5) No nĩ ũndũ ũrĩkũ tũkũruta arĩa angĩ? Wĩcirie ũhoro wa mũthithũ ũngĩ kuuma kũrĩ Ngai.

13, 14. Nĩ ‘mũthithũ’ ũrĩkũ Jesu aarĩrĩirie thĩinĩ wa Mathayo 13:52, na tũngĩũiyũria atĩa?

¹³ Mũthithũ wa gatatũ wa kĩĩroho nĩ ma iria iguũrĩtio. Jehova nĩ Ngai wa ũhoro wa ma. (2 Sam. 7:28; Thab. 31:5) Arĩ Ithe witũ mũtaana, nĩ aheaga arĩa mamwĩtigĩrĩte ma ciake. Kuuma rĩrĩa twaiguire ũhoro wa ma riita rĩa mbere, nĩ tũgĩte na mĩeke ya gũcokanĩrĩria ma kuuma Kiugo-inĩ gĩake Bibilia, mabuku-inĩ maitũ ma Gĩkristiano, igomano-inĩ citũ, na kuuma mĩcemanio-inĩ itũ ya o kiumia. Thutha wa ihinda nĩ tũgĩaga na kĩrĩa Jesu eetire ‘mũthithũ’ wa ma njerũ na cia tene. (Thoma Mathayo 13:52.) Jehova nĩ egũtũteithia gũcokanĩrĩria ma njerũ cia goro “mũthithũ-inĩ” witũ angĩkorũo nĩ tũrĩcituĩragia ta ũrĩa gũtuĩragio managĩ marĩa mahitharu. (Thoma Thimo 2:4-7.) Tũngĩka ũguo atĩa?

¹⁴ No mũhaka tũkoragwo na mũtaratara mwega wa wĩruti witũ kĩũmbe na tũthuthuragie na kinyi Kiugo kĩa Ngai na mabuku maitũ. Ũndũ ũcio nĩ ũgũtũteithia kuona ma iria ingĩkorũo irĩ “njeru” na njĩra ya atĩ tũtiraciũĩ hau kabere. (Josh. 1:8, 9; Thab. 1:2, 3) Riuma rĩa mbere rĩa ngathĩti ĩno rĩrĩa rĩacabirũo Julaĩ 1879, rĩoigire ũũ: “O ta kahũa kanini karakũra werũ-inĩ wa ũtũũro, ũhoro wa ma ũrigicĩirio na ũrĩ hakuhĩ kũhatĩkwo nĩ ria rĩa mahĩtia rĩrĩa rĩcanũkĩte wega. Nĩguo ũkone no mũhaka ũikare ũgĩethaga. . . . Nĩguo wĩgĩĩre nako no mũhaka ũinamĩrĩre ũkoe. Ndũkaiganĩre na kahũa kamwe ka ũhoro wa ma. . . . Tũũra wethaga, caria tũngĩ.” No mũhaka tũkoragwo na wendi wa kũiyũrĩrĩria mũthithũ witũ wa ma cia Ngai.

15. Nĩ kĩĩ kĩngĩtũma ma imwe ciĩrũo nĩ “cia tene,” na nĩ ma irĩkũ imwe ta icio wonaga irĩ cia bata?

¹⁵ Nĩ twamenyire ma cia goro rĩrĩa twambĩrĩirie kũnyitanĩra na andũ a Ngai. Ma icio no ciĩrũo nĩ “cia tene,” na njĩra ya atĩ tũkoretwo tũcimenyete na tũgacitĩa kuuma rĩrĩa twambĩrĩirie ũtũũro witũ wa Gĩkristiano. Ma icio cia goro nĩ ta irĩkũ? Nĩ twerutire atĩ Jehova nĩwe Mũũmbi witũ na nĩwe Mũtũhei muoyo na atĩ nĩ akoragwo na muoroto harĩ andũ. Ningĩ nĩ twerutire atĩ nĩ ũndũ wa wendo, Ngai nĩ aatũheire Mũriũ arĩ igongona rĩa ũkũũri nĩguo tuohorũo kuuma kũrĩ mehia na gĩkuũ. Ũndũ ũngĩ twerutire nĩ atĩ Ũthamaki wake nĩ ũkaniina mĩnyamaro yothe na atĩ tũrĩ na kĩĩrĩgĩrĩro gĩa gũgatũũra tene na tene tũrĩ na thayũ na gĩkeno rungu rwa wathani wa Ũthamaki.—Joh. 3:16; Kũg. 4:11; 21:3, 4.

16. Twagĩrĩirũo gwĩka atĩa rĩrĩa twamũkĩra ũtaũku mwerũ wa ma cia Bibilia?

 ¹⁶ Rĩmwe na rĩmwe, ũtaũku witũ wĩgiĩ ũrathi wa Bibilia kana wa gĩcunjĩ kĩngĩ kĩa Maandĩko no ũrũngwo. Rĩrĩa ũtaũku mwerũ warutwo, nĩ twagĩrĩirũo kuoya ihinda kwĩruta ũhoro ũcio wega na gwĩcũrania ũhoro waguo. (Atũm. 17:11; 1 Tim. 4:15) Twendaga gũtaũkĩrũo wega biũ nĩ ũgarũrũku ũrĩa mũnene na nginya o na tũũndũ tũrĩa tũnini twĩgiĩ ngũrani ya ũtaũku wa tene na ũcio mwerũ. Na njĩra ĩyo, nĩ tũkũhota kũiga wega ma icio njerũ mũthithũ-inĩ witũ. Gwĩkĩra kĩyo ũguo kũngĩkorũo na ũguni nĩkĩ?

17, 18. Roho mũtheru ũngĩtũteithia atĩa?

¹⁷ Jesu aarutanire atĩ roho wa Ngai no ũtũririkanie maũndũ marĩa twĩrutĩte. (Joh. 14:25, 26) Ũndũ ũcio ũngĩtũteithia atĩa tũrĩ arutani a ũhoro ũrĩa mwega? Ta wĩcirie ngerekano ya mũrũ wa Ithe witũ wĩtagwo Peter. Mwaka-inĩ wa 1970, aarĩ na mĩaka 19 na aakoretwo ambĩrĩria gũtungata thĩinĩ wa Betheli ya Ngeretha. Akĩhunjia nyũmba kwa nyũmba, nĩ aacemanirie na mũndũrũme ũmwe wa mĩaka ta 50 warerete nderu nene. Peter oririe mũndũ ũcio kana no ende gũtaũkĩrũo nĩ Bibilia. Mũndũrũme ũcio onanirie nĩ amaka na akĩmwĩra atĩ ĩyo yarĩ nyũmba ya arutani a ndini ya Kĩyahudi. Nĩguo agerie Peter, mũrutani ũcio aamũririe, “Mũriũ, ibuku rĩa Danieli rĩandĩkirũo na rũthiomi rũrĩkũ?” Peter aamũcokeirie akĩmwĩra, “Gĩcunjĩ kĩmwe kĩandĩkirũo na rũthiomi rwa Kĩaramu.” Peter oigaga, “Mũrutani ũcio nĩ aamakire mũno tondũ wa kuona nĩ ndoĩ macokio ma kĩũria kĩu, no niĩ nĩ niĩ ndamakire makĩria! Ndamenyire atĩa macokio macio? Rĩrĩa ndainũkire na ngĩrora ngathĩti cia Mũrangĩri na Arahũkai! cia mĩeri ĩrĩa yahĩtũkĩte, nĩ ndonire gĩcunjĩ gĩataaragĩria atĩ ibuku rĩa Danieli rĩandĩkĩtwo na rũthiomi rwa Kĩaramu (rũthiomi rwa Suriata).” (Dan. 2:4) Roho mũtheru no ũtũteithie kũririkana maũndũ marĩa tũthomete na tũkaiga mũthithũ-inĩ witũ.—Luk. 12:11, 12; 21:13-15.

¹⁸ Tũngĩoya na ũritũ ũũgĩ ũrĩa uumĩte kũrĩ Jehova, ngoro citũ nĩ igũtũtindĩka tũiyũrĩrĩrie mũthithũ witũ wa ma iria njerũ na iria cia tene. O ũrĩa tũgũthiĩ tũkũrĩtie wendo witũ na ngatho citũ harĩ ũũgĩ wa Jehova, noguo tũgũkorũo tũthagathagĩtwo wega tũrĩ arutani.

19. Twagĩrĩirũo kũgitĩra mĩthithũ itũ ya kĩĩroho nĩkĩ?

¹⁹ Shaitani na thĩ yake marerutanĩria mũno gũtũma tũtige kuona mĩthithũ ya kĩĩroho ĩrĩa twarĩrĩria gĩcunjĩ-inĩ gĩkĩ ĩrĩ ya bata. O na ithuĩ no tũhutio nĩ mĩtego ĩyo yake. No tũheenererio nĩ ciĩranĩro cia wĩra mwega, iroto cia ũtũũro wa kĩrathi kĩa igũrũ, kana merirĩria ma mwĩyonanio wa ũtonga wa kĩĩmwĩrĩ. Mũtũmwo Johana atũririkanagia atĩ thĩ ĩno nĩ gũthira ĩrathira o hamwe na mwĩrirĩrio wayo. (1 Joh. 2:15-17) Nĩ ũndũ ũcio, no mũhaka twĩrutanĩrie biũ kũmenyerera indo iria twendete na kũgitĩra wendo witũ na tũtũũrie ngatho citũ harĩ ũtonga wa kĩĩroho.

20. Ũtuĩte itua rĩa gwĩka atĩa nĩguo ũgitĩre ũtonga waku wa kĩĩroho?

²⁰ Korũo wĩhaarĩirie kũrekereria kĩndũ o gĩothe kĩngĩtũma wendo waku harĩ Ũthamaki wa Ngai wage gũkorũo ũrĩ wa ngoro yothe. Thiĩ na mbere kũhunjia na kĩyo, na wĩrutanĩrie gũtũũria wendo waku harĩ wĩra wa kũhunjia ũrĩa ũhonokagia muoyo. Thiĩ na mbere gwetha ma cia Ngai na kĩyo. Weka ũguo, ũgũkorũo ũkĩĩigĩra mũthithũ ‘kũrĩa igũrũ, kũu gũtarĩ mũici ũngĩkuhĩrĩria na gũtarĩ memenyi cingĩrĩa. Nĩ gũkorũo harĩa mũthithũ waku ũrĩ, hau nĩho ngoro yaku o nayo ĩrĩkoragwo.’—Luk. 12:33, 34.