1, 2. (a) Omamona opamhepo atatu elipi Jehova e tu pa? (b) Oshike hatu ka kundafana moshitukulwa eshi?

JEHOVA oye omukengeli meshito alishe. (1 Omaf. 29:11, 12) E li Xe omunahole, okwa yandja nehalo liwa omamona opamhepo kwaaveshe ovo ve shii ongushu yao. Inatu pandula tuu eshi Jehova e tu pa omamona opamhepo, oo a kwatele mo (1) Ouhamba waKalunga, (2) oilonga yetu yokuxupifa eemwenyo, nosho yo (3) oshili i na ondilo oyo tai hangwa mEendjovo daye! Ngeenge inatu lungama ohatu dulu okukanifa olupandu letu li na sha nomamona oo ndele hatu a ekelashi. Opo tu kanyatele kuo, otwa pumbwa oku a longifa nawa nokukulika alushe ohole yetu yokukala tu a hole. Jesus okwa ti: “Oko kwa kala emona loye, oko kwa kala yo omutima woye.” — Luk. 12:34.

² Natu ka konakoneni nghee hatu dulu okukulika nokukaleka po ohole nolupandu letu li na sha nOuhamba, noukalele nosho yo noshili. Eshi hatu ningi ngaho, natu dilonge kunghee hatu dulu okukulika ohole yetu yomamona oo opamhepo.

3. Omushingifi oo a popiwa mefaneko laJesus okwa li a halelela okuninga shike opo a likole okawe oko ke na ondilo ihe fi okuyelekwa? (Tala efano pehovelo loshitukulwa.)

³ Lesha Mateus. 13:45, 46. Jesus okwa longifa efaneko li na sha nomushingifi ta kongo okawe. Oule womido omushingifi ka li ha kala a limbililwa okulanda nokulandifa ouwe omafele. Ndele okwa li a mona okawe oko ka li kawa neenghono noka hafifa omutima waye eshi e ka tala. Ashike opo e ka lande okwa li e na okulandifa po oinima yaye aishe. Mbela okawe oko oka li ke na ondilo i fike peni kuye?

4. Ngeenge otu hole Ouhamba waKalunga unene ngaashi omushingifi a li e hole okawe, ohatu ka ninga po shike?

⁴ Oshike hatu lihongo mefaneko olo? Oshili yOuhamba waKalunga oya fa okawe oko ke na ondilo ihe fi okuyelekwa. Ngeenge otu i hole unene ngaashi omushingifi a li e hole okawe, ohatu ka kala twa halelela okweefa po keshe shimwe opo tu kale ova pangelwa vOuhamba. (Lesha Markus 10:28-30.) Natu ka taleni kuvamwe ovo va li va ninga ngaho.

5. Ongahelipi Sakeus a li a ulika kutya okwa tokola okutambula ko Ouhamba waKalunga?

⁵ Sakeus okwa li omukulunhu wovafutifi oo a ninga oshipuna molwaashi okwa li ha nyokoma ovanhu oimaliwa. (Luk. 19:1-9) Eshi omulumenhu oo ehe fi omuyuki a uda Jesus ta udifa kombinga yOuhamba, okwa li a mona kutya osho a uda oshi na ongushu nokwa katuka eenghatu diva. Okwa ingida a ti: “Omwene tala, emona lange ohandi li tukula pokati, ombinga imwe ndi i pe eehepele, ndele ngeenge oku na ou nde mu nyekele ohandi mu shunifile lune.” Okwa li a yandja po oinima aishe oyo e lilikolela moukengeleledi nokweefa po olwisho loinima yopamaliko.

6. Rose okwa li a ninga omalunduluko elipi opo a ninge omupangelwa wOuhamba waKalunga, nomolwashike eshi ningila?

⁶ Omukainhu wedina Rose, eshi a uda kombinga yetumwalaka lOuhamba, okwa hangika ha kufa ombinga moushenge oule womido da ka di longela. Okwa li omupresidende wehangano olo tali kondjifa oufemba womashenge. Eshi Rose a kala ta konakona Ombiibeli, okwa li a mona ongushu yoshili kombinga yOuhamba waKalunga. Ashike okwa li a didilika kutya okwa pumbwa okuninga omalunduluko manene. (1 Kor. 6:9, 10) Omutima waye owa li we mu linyengifa a efe po ondodo yaye mehangano olo noku xulife po ekwatafano laye loushenge. Rose okwa li a ninginifwa mo 2009, nomodula ya ka shikula ko, okwa li a hovela okulonga e li omukokolindjila wondjikilile. Ohole yaye yokuhola Jehova nOuhamba waye oya li ya xwama i dulife omahalo opambelela. — Mark. 12:29, 30.

7. Ongahelipi hatu dulu okukaleka po ohole yokuhola Ouhamba waKalunga nomutima aushe?

⁷ Vahapu vomufye otwa ninga omalunduluko monghalamwenyo yetu opo tu ninge ovapangelwa vOuhamba. (Rom. 12:2) Ndele nande ongaho, oilonga yetu inai pwa. Otu na okukala twa lungamena oinima oyo tai dulu okunyona po ohole yetu, mwa kwatelwa ohole yokuhola oinima yopamaliko nosho yo oluhaelo. (Omayel. 4:23; Mat. 5:27-29) Jehova okwe tu pa vali emona limwe olo li na ondilo ihe fi okuyelekwa opo tu kale tu hole Ouhamba waye nomutima wetu aushe.

8. (a) Omolwashike omuyapostoli Paulus a popya kombinga youkalele wetu u li ngaashi ‘emona hatu li kwatele moitoo yedu?’ (b) Ongahelipi Paulus a li a ulika kutya okwa lenga oukalele waye?

⁸ Didilika kutya Jesus okwe tu pa oshilonga shokuudifa nokuhonga ovanhu onghundana iwa yOuhamba waKalunga. (Mat. 28:19, 20) Omuyapostoli Paulus okwa li a mona kutya oilonga  yokuudifa oya fimanenena. Okwa li a popya kombinga youkalele wehangano lipe li li ngaashi ‘emona hatu li kwatele moitoo yedu.’ (2 Kor. 4:7; 1 Tim. 1:12) Nonande fye oitoo yedu inai wanenena, etumwalaka olo hatu udifa otali dulu oku tu pefa omwenyo waalushe nosho yo ovo hava pwilikine kufye. Paulus okwa ti: “Aishe ohandi ningi omolwevaengeli, naame yo ndi mone oshitukulwa shomulo.” (1 Kor. 9:23) Ohole yaPaulus yokuhola oukalele oye mu linyengifa a longe noudiinini mokuninga ovanhu ovahongwa. (Lesha Ovaroma 1:14, 15; 2 Timoteus 4:2.) Naasho osha li she mu kwafela e lididimikile omapataneko a kwata moiti. (1 Tes. 2:2) Ongahelipi hatu dulu okuulika kutya otu hole oilonga yokuudifa?

9. Omeenghedi dimwe dilipi hatu dulu okuulika olupandu letu li na sha noukalele?

⁹ Onghedi imwe omo Paulus a li a ulika olupandu li na sha noukalele omokukala iha xutwifa omhito yokupopya novanhu. Ngaashi ovayapostoli nOvakriste vonale, nafye ohatu yandje oundombwedi wohangelela, hatu udifa moipafi nosho yo eumbo neumbo. (Oil. 5:42; 20:20) Ngeenge eenghalo detu ode shi pitike, ohatu kongo eemhito tu tamunune mo oukalele wetu, tashi dulika tu kufe oukwafelikokolindjila ile oukokolindjila wondjikilile. Ohatu dulu yo okulihonga elaka limwe, okutembukila koitukulwa imwe moshilongo shetu ile nokuli tu tembukile koilongo imwe. — Oil. 16:9, 10.

10. Irene okwa li a nangekwa noupuna ngahelipi eshi a li a tokola okuudifa onghundana iwa?

¹⁰ Diladila koshihopaenenwa shaIrene, omumwameme ina hombolwa oo e li koUnited States. Okwa li a halelela okuudifila eenhauki odo hadi popi Oshirussia. Eshi a hovela oku di udifila mo 1993, moshilando shaNew York omwa li ashike ovaudifi ve li 20 lwaapo ovo hava popi Oshirussia. Oule womido 20, Irene okwa longa noudiinini moshitukulwa omo hamu popiwa elaka olo. Okwa ti: “Fiyo opaife ihandi popi nawa Oshirussia.” Ashike Jehova okwa nangeka noupuna omhepo yaye youladi nosho yo ovo ve li ngaashi ye. Kunena, moshilando shaNew York omu na omaongalo 6 Oshirussia. Ovanhu 15 vo mwaavo Irene a konakona navo ova ninginifwa. Vamwe vomuvo Ovabetel, ovakokolindjila novakulunhuongalo. Irene okwa ti kutya, “Ngeenge handi diladila komalalakano amwe oo nda li nde litulila po, kape na limwe la li tali dulu okweetela nge ehafo linene li dulife eli.” Okwa li shili a lenga oukalele waye!

11. Oidjemo iwa ilipi hai di mokutwikila okuudifa nonande ope na omapataneko?

¹¹ Ngeenge otwa lenga oilonga yetu yokuudifa, ohatu ka kala twa fa omuyapostoli Paulus, mokutwikila okuudifa kutya nee ope na omapataneko. (Oil. 14:19-22) Mo 1930 nomo 1940 lwaapo, ovamwatate ova li va taalela omapataneko a kwata moiti moUnited States. Ngaashi  Paulus, ova li va pama nova twikila okuudifa. Opo va amene oufemba wetu wokuudifa, ovamwatate ova kala nokupopila omufika wetu komhangu lwoikando. Mo 1943, omumwatate Nathan H. Knorr eshi va findana mOmhangu yoPombada mo-U.S. okwa popya a ti: “Omafindano aeshe oo okwa ningwa omolwokukondja kweni. Ngeno ovaudifi kava li hava i moukalele, ngeno inapa kala pe na oibofa mOmhangu yoPombada; ndele omolweni, ovamwatate mounyuni aushe otava twikile okuudifa nopehe na okusholola nonande ope na omapataneko. Efindano olo ole ya po omolwoshiwana shOmwene osho sha kala sha kanyatela oudiinini washo.” Natango ovamwatate vokoilongo imwe ova kondja noudiinini nosha etifa omafindano a tya ngaho. Onghee hano, ohole yetu yokuhola oukalele otai dulu okufinda omapataneko.

12. Owa tokola toko okuninga shike shi na sha noukalele woye?

¹² Ngeenge otwa kala hatu tale ko oukalele ngaashi emona la dja kuJehova li na ondilo, itatu ka kala ashike hatu i moukalele nelalakano lokuvalula eevili. Ponhele yaasho, ohatu ka longifa eenghono detu tu ninge keshe shimwe opo tu ‘hepaulule evaengeli longhundana iwa.’ (Oil. 20:24; 2 Tim. 4:5) Ndele mbela oshike hatu ka honga vamwe? Natu ka konakoneni vali emona limwe la dja kuKalunga.

13, 14. ‘Elimba’ olo la popiwa kuJesus muMateus 13:52 oshike, nongahelipi hatu dulu okutuvikila mo?

¹³ Emona lopamhepo etitatu oli li odjo oyo hai holola oshili. Jehova oKalunga koshili. (2 Sam. 7:28; Eps. 31:5) E li Xe omunahole, okwa honga ovo have mu tila oshili. Oshikando shotete twa uda oshili, otwa li twa mona omhito yokumona oshili okupitila mEendjovo daye, Ombiibeli, moishangomwa yetu yopaKriste, moyoongalele nosho yo mokwoongala kwokoshivike. Oule wefimbo, otwa tuvikila oshili ikulu nai ipe “melimba” letu olo la popiwa kuJesus. (Lesha Mateus 13:52.) Jehova ote ke tu kwafela tu tuvikile oshili ipe i na ondilo ‘momalimba etu’ ngeenge otwa kala hatu kongo oshili ngaashi omamona a holekwa (Lesha Omayeletumbulo 2:4-7.) Ongahelipi hatu dulu okuninga ngaho?

¹⁴ Otu na okukulika ehalo lokukonakona paumwene nokuninga omapekapeko mEendjovo daKalunga nomoishangomwa yetu. Osho otashi ke tu kwafela tu ude ko oshili “ipe” meityo omo twa li tuhe i shii nale. (Jos. 1:8, 9; Eps. 1:2, 3) Oshungonangelo yotetetete, oyo ya nyanyangidilwe muJuli 1879, oya tile: “Oshili oya fa okangala kawa ka dingililwa koimbodi ihapu.” Opo u ka mone, ou na okukala to talaatala. . . . Ngeenge owe ke litu poima, ou na okupetama u ka toole po. Ino kala ashike wa wanenwa kokangala koshili kamwe. . . . Kala nokukonga nokwoongela oungala vahapu va tya ngaho.” Natu kale twa halelela okuyadifa elimba letu nehongo loshili.

15. Omolwashike hatu dulu kutya oshili yonhumba ‘oikulu,’ noshili ikulu ilipi wa lenga unene?

¹⁵ Otwa mona oshili i na ondilo oshikando shotete eshi twa hovela okweendafana noshiwana shaKalunga. Oshili oyo otaku dulu okutiwa kutya ‘oikulu’ molwaashi otwe i shiiva nokuulika olupandu eshi twa hovela okukala nonghalamwenyo yopaKriste. Oshili oyo ya fimanenena oya kwatela mo shike? Otwe lihonga kutya Jehova oye Omushiti wetu nOmuyandjimwenyo nonokutya oku na elalakano li na sha novanhu. Otwe lihonga yo kutya Kalunga okwa longekida pahole ekuliloyambo lOmona waye opo tu manguluke ko koulunde nefyo. Ohatu lihongo yo kutya Ouhamba otau ka xulifa po okumona oixuna akushe notu na eteelelo loku ka kala fiyo alushe tu na ombili notwa hafa koshi yepangelo lOuhamba waKalunga. — Joh. 3:16; Eh. 4:11; 21:3, 4.

16. Oshike twa pumbwa okuninga po ngeenge opa ningwa omalunduluko e na sha neudeko loshili?

 ¹⁶ Omafimbo nomafimbo, eudeko letu li na sha nomaxunganeko opaMbiibeli ile noitukulwa yopamishangwa ohali pepalekwa. Ngeenge ouyelele owa pepalekwa, otwa pumbwa okukufa efimbo opo tu konakone ouyelele oo noukeka nokudilonga kuo. (Oil. 17:11; 1 Tim. 4:15) Ihatu kala ashike twa halelela okuuda ko omalunduluko manene oo a ningwa po ndele ohatu kala yo twa hala yo okuuda ko eyooloko olo li li pokati keudeko likulu naali lipe. Monghedi ya tya ngaho, ohatu tuvikile eudeko la pepalekwa ‘melimba’ letu. Omolwashike eenghendabala da tya ngaho tadi ti sha?

17, 18. Ongahelipi omhepo iyapuki hai tu kwafele?

¹⁷ Jesus okwa honga kutya omhepo yaKalunga otai ke tu dimbulukifa oinima oyo twe lihonga nale. (Joh. 14:25, 26) Osho otashi ke tu kwafela ngahelipi tu li ovaudifi vonghundana iwa? Natu ka konakoneni oshimoniwa shomumwatate Peter. Mo 1970 okwa li e na omido 19 nokwa li a hovela okulonga kObetel moBritain. Efiku limwe ofimbo a li ta udifa eumbo neumbo, okwa li a shakena nomulumenhu womido dopokati e na eendjedi dihapu. Peter okwa li a pula omulumenhu oo ngeenge okwa hala okuuda ko Ombiibeli. Shikumwifi, omulumenhu okwa nyamukula ta ti kutya e li okwa li eumbo lovahongi Ovajuda. Opo omuhongi a tale po Peter okwe mu pula a ti kutya, “Omumati wange, embo laDaniel ola li la shangwa melaka lilipi?” Peter okwa nyamukula a ti kutya, “Oshitukulwa shimwe osha li sha shangwa mOshiaramea.” Peter okwa ti: “Omuhongi okwa li a kuminwa enyamukulo lange ashike ka li a kumwa a fa nge! Mbela enyamukulo onde li shiiva ngahelipi? Eshi nda shuna keumbo onda tala mOshungonangelo nomo-Awake! yeemwedi da pita, nonda li nda mona mo oshitukulwa tashi yelifa kutya embo laDaniel ola li la shangwa mOshiaramea.” (Dan. 2:4) Oshoshili kutya omhepo iyapuki otai dulu oku tu dimbulukifa oinima oyo twa lesha nale notwe i tuvikila melimba letu. — Luk. 12:11, 12; 21:13-15.

¹⁸ Ngeenge otwa lenga ounongo oo hau di kuJehova, omutima wetu otau ke tu linyengifa tu yadife elimba letu noshili ipe naai ikulu. Eshi hatu ende hatu kulike ohole nolupandu letu li na sha nounongo waJehova, ohatu ka kala twe lilongekida nawa tu li ovahongi veendjovo daKalunga.

19. Omolwashike tu na okwaamena omamona e tu opamhepo?

¹⁹ Satana nounyuni waye alushe ohava kongo omhito yokunghundipaleka ile okunyona po olupandu letu li na sha nomamona opamhepo oo twa kundafana moshitukulwa eshi. Inatu lya olusha lokuha hangwa komakonda oo Satana ha longifa. Ohatu dulu okuyulwa noupu komaheka aye e na sha noilonga tai futu nawa, okukala twa hala okukala nonghalamwenyo youdjeko ile okukala twa hala okukala tu na oinima yopamaliko yondilo. Omuyapostoli Johannes okwe tu dimbulukifa kutya ounyuni ou otau xulu po pamwe nokahalu kao. (1 Joh. 2:15-17) Onghee hano, otu na okulonga noudiinini opo tu amene ohole yetu nolupandu letu li na sha nomamona opamhepo.

20. Owa tokola toko okuninga po shike opo u amene omamona oye opamhepo?

²⁰ Kala wa halelela okweefa po oinima aishe oyo tai dulu oku ku ningifa uha kale u hole Ouhamba waKalunga nomutima woye aushe. Twikila okuudifa nouladi, ino efa po olupandu loye li na sha noilonga yokuxupifa eemwenyo. Twikila okuninga omapekapeko e na sha noshili oyo ya denga mbada. Ngeenge owa ningi ngaho, oto ke lilikolela “emona meulu ihali xulu po, omo ihamu hange omulunga nonhwishi itai nyonauna. Osheshi oko kwa kala emona loye, oko kwa kala yo omutima woye.” — Luk. 12:33, 34.