1, 2. а) Кʹижан се хьзнед рʹӧһʹани Йаһоԝа дайә мә? б) Ве готареда әме дәрһәԛа чь шеԝьр кьн?

НАВА тʹәмамийа гәрдунеда, Йаһоԝа Кәсе лапи дәԝләмәнд ә (1 Дир. 29:11, 12). Әԝ Бавәки дәствәкьри йә, у бь мәрʹдани хьзнед рʹӧһʹани дьдә ԝан һʹәмуйа, йед кӧ әԝан хьзна ԛимәт дькьн. Әм чьԛас жь Йаһоԝа рʹази нә, ԝәки хьзнед рʹӧһʹани дайә мә, мәсәлә, 1) Пʹадшатийа Хԝәде, 2) хьзмәти, 3) у рʹастийед жь Хәбәра ԝи. Ле һәрге әм мьԛати хԝә нәбьн, дькарә ӧса бә кӧ әм ԝан хьзна нәшекьриньн у ахьрийеда ӧнда кьн жи. Сәва әԝ йәк нәԛәԝьмә, лазьм ә әм тʹьме биньн бира хԝә кӧ ԛимәте ԝан чьԛас мәзьн ә, у һʹьзкьрьна хԝә һе ԛәԝи кьн. Иса гот: «Хьзна ԝә кʹидәре бә, дьле ԝәйе жи ль ԝе дәре бә» (Луԛа 12:34).

² Ԝәрә әм шеԝьр кьн, кӧ әм ча дькарьн Пʹадшатийа Хԝәде, хьзмәтийе, у рʹастийе һе ԛимәт кьн у һʹьз бькьн. Ԝәʹде шеԝьркьрьне бьфькьрьн, кӧ хут һун ча дькарьн һʹьзкьрьна хԝә ԛәԝи кьн һьндава ԝан хьзна.

3. Мәтʹәлока Исада, базьрган һазьр бу чь бьда сәва дӧрʹе ԛимәт ԛазанщ кә? (Бьньһерʹә шькле әʹԝльн.)

³ Бьхунә Мәтта 13:45, 46. Иса мәтʹәлока хԝәда дәрһәԛа базьрган гьли кьр, кʹижани кӧ дӧрʹ дьгәрʹийа. Нава салада, бешьк әԝи бь сәда дӧрʹ кʹьрʹибу у фьротьбу. Ле щарәке әԝи дӧрʹәки ӧса бәдәԝ дит, кӧ дьле ԝи гәләк ша бу. Әԝ дӧрʹ гәләк бьһа бу, ле базьрган һазьр бу тʹәмамийа һәбука хԝә жи бьфьрошә, сәва ԝи дӧрʹи ԛазанщ кә. Бьдьнә бәр чʹәʹве хԝә, ԝәки бона ԝи әԝ дӧрʹ чьԛас ԛимәт бу!

4. Һәрге әм Пʹадшатийа Хԝәде һʹьз дькьн, әме һелан бьн чь бькьн?

⁴ Жь ве мәтʹәлоке әм чь дәрсе һин дьбьн? Рʹастийа дәрһәԛа Пʹадшатийа Хԝәде мина ви дӧрʹи гәләк ԛимәт ә. Һәрге әм жи Пʹадшатийа Хԝәде ӧса ԛайим һʹьз дькьн чаԝа базьрган әв дӧрʹ һʹьз дькьр, әме һәр тьшти бькьн сәва Пʹадшатийа Хԝәде ԝар бьн. (Бьхунә Марԛос 10:28-30.) Ԝәрә сәрһатийед дӧ мәрьва шеԝьр кьн, йед кӧ һәма ӧса жи кьрьнә.

5. Зәхайо һазьр бу чь ԛӧрбана бькә сәва Пʹадшатийа Хԝәде?

⁵ Зәхайо сәрԝере хәрщгьра бу. Әԝи хԝәрʹа бь хәрще хәлԛе һәбука мәзьн тʹоп кьр у дәԝләти бу (Луԛа 19:1-9). Ле щарәке Зәхайо жь Иса дәрһәԛа Пʹадшатийа Хԝәде бьһист. Әԝи дәрберʹа ԛимәте Пʹадшатийе фәʹм кьр у хԝәст жийина хԝәда гӧһастьна бькә. Әԝи гот: «Хӧдан, әз ва ниве һәбука хԝә дьдьмә фәԛира у мьн нәһәԛи кʹе жи кьрьбә, әзе чар щар ле вәгәрʹиньм». Бәле, Зәхайо дәсте хԝә жь һәбука һʹәрам кʹьшанд у тьмайи һьндава пʹәра жь дьле хԝә дәрхьст.

6. Жьнькәке чь гӧһастьн кьрьн у чьрʹа?

⁶ Чәнд сал пешда, жьнькәке йа кӧ ләзбийән бу, мьзгинийа Пʹадшатийе бьһист. Әԝ пресидента ԝе тʹәшкиләте бу, кʹижан кӧ шәрʹ дькьр ԝәки изьн һәбә мер меррʹа бә, жьн жьнрʹа бә. Гава әԝе жьньке дәстпекьр Кʹьтеба Пироз һин бә, әԝе фәʹм кьр кӧ ԛимәте Пʹадшатийа Хԝәде чьԛас мәзьн ә, у хԝәст жийина хԝә лаптә бьгӧһезә (1 Корн. 6:9, 10). Әԝ жь ԝе тʹәшкиләте дәркʹәт у һәләԛәтийа хԝә тʹәви ләзбийәна ԛәтанд. Әԝ жьньк сала 2009-да һатә ньхӧмандьне, у паши саләке бу пешәнг. Әԝе һʹьзкьрьна хԝә һьндава Йаһоԝа у Пʹадшатийа ԝи, сәр һәр хԝәстьна бәдәнерʹа гьрт (Марԛ. 12:29, 30).

7. Чаԝа әм дькарьн һʹьзкьрьна хԝә һьндава Пʹадшатийа Хԝәде ԛәԝи хԝәй кьн?

⁷ Сәва кӧ бьбьнә бажарванед Пʹадшатийа Хԝәде, гәләка жь мә жийина хԝә лаптә гӧһастьнә (Рʹом. 12:2). Ле паши ве йәке жи әм гәрәке нәсәкьньн. Әм гәрәке нәһельн ԝәки һʹьзкьрьна мә һьндава Пʹадшатийе сьст бә, мәсәлә жь бо һәбуке йан жи жь бо хԝәстьнед бенамуси (Мәтʹлк. 4:23; Мәт. 5:27-29). Ле Йаһоԝа диса хьзнәкә ԛимәт дайә мә, кʹижан кӧ али мә дькә, ԝәки әм һʹьзкьрьна хԝә һьндава Пʹадшатийе ԛәԝи кьн.

8. а) Чьрʹа Паԝлос гот ԝәки хьзмәтийа мә мина «хьзнә нава . . . дәрданед һʹәрʹи» йә? б) Паԝлос ча избат кьр ԝәки әԝ хьзмәтийа хԝә ԛимәт дькә?

⁸ Иса тʹәми да шагьртед хԝә, ԝәки хьзмәт бькьн у мәрьва дәрһәԛа мьзгинийа Пʹадшатийа Хԝәде һин кьн (Мәт. 28:19, 20). Паԝлосе шанди хьзмәти гәләк ԛимәт дькьр. Әԝи хьзмәти бәрамбәр кьр тʹәви «хьзнә нава . . . дәрданед һʹәрʹида» (2 Корн. 4:7; 1 Тимтʹ. 1:12). Рʹаст ә әм гӧнәкʹар ьн у ләма чаԝа дәрданед һʹәрʹи нә, ле мьзгинийа кӧ әм бәла дькьн хьзнә йә. Чьрʹа? Чьмки хьзмәти дькарә жийина һʹәта-һʹәтайе  һьн бьдә мә, һьн жи бьдә ԝан мәрьва йед кӧ гӧһ дьдьнә мә. Ләма жи Паԝлос гот: «Ван һʹәму тьшта әз иди бона Мьзгинийе дькьм, ԝәки әз бьбьмә һәвал-пʹаре дӧа-дьрозгед сәр ԝе» (1 Корн. 9:23). Бәле, Паԝлос хьзмәтийа хԝә гәләк һʹьз дькьр у һʹәму тьшт дькьр кӧ мәрьва бинә сәр рʹийа рʹастийе. (Бьхунә Рʹомайи 1:14, 15; 2 Тимотʹейо 4:2.) Әве йәке али ԝи кьр кӧ ԝәʹде зерандьнед ԛайим әԝи сәбьр кьр у амьн ма (1 Тʹеслн. 2:2). Ле әм ча дькарьн һʹьзкьрьна хԝә һьндава хьзмәтийе нишан кьн?

9. Чь щурʹәйи әм дькарьн нишан кьн ԝәки хьзмәтийе һʹьз дькьн?

⁹ Паԝлос хьзмәти гәләк һʹьз дькьр. Әԝи һәр мәщал дьда хәбате сәва мәрьварʹа мьзгинийе гьли кә. Әм жи мина шандийа у Мәсиһийед ԛьрʹна йәке һʹәму щийа мьзгинийе бәла дькьн, мәсәлә дәрва, мал бь бал у щийед кӧ гәләк мәрьв тʹоп дьбьн (Кʹар. Шанд. 5:42; 20:20). Чьԛас дәсте мә те, әм дьхԝазьн һе зедә хьзмәт кьн, мәсәлә, ча пешәнге кʹомәкдар йан ча пешәнге һәртʹьм. Йан жи дьбәкә әм зьмане тʹәзә һин дьбьн, жь шәһәре хԝә дәрбази шәһәрәки дьн дьбьн, йан һәла һе жи ԝәлате дьн (Кʹар. Шанд. 16:9, 10).

10. Хушкәкә мә Ирен чь кʹәрәм станд жь бо хирәта хԝә бәлакьрьна мьзгинийеда?

¹⁰ Дина хԝә бьдьн мәсәла хушкәкә азәп Ирене жь Дәԝләтед Йәкбуйи. Ирене гәләк дьхԝәст ԝан емигрантарʹа йед кӧ сәр зьмане Урьси хәбәр дьдан, мьзгинийе бәла кә. Әԝе сала 1993-да дәстпекьр нета хԝә бинә сери. Ԝи ԝәʹдәйи Нийу Йоркеда сәр зьмане Урьси тʹәне кʹомәк һәбу у ве кʹомеда ԝәкә 20 мьзгинван һәбун. Ирен ида ԝәкә 20 сала дәшта ԝи зьманида хьзмәт дькә. Әԝ гьли дькә: «Әз һʹәта иро бь тʹәмами сәр зьмане Урьси рʹьнд хәбәр надьм». Ле Йаһоԝа хирәта ԝе у мьзгинванед дьн кʹәрәм кьр. Иро Нийу Йоркеда шәш щьват сәр зьмане Урьси һәнә. Панздәһ мәрьвед кӧ Ирене һинбуна Кʹьтеба Пироз тʹәви ԝан дәрбаз дькьр, һатьнә ньхӧмандьне. Һьнәк жь ԝан Бәйтʹәледа хьзмәт дькьн, һьнәк пешәнг ьн у һьнәк рʹуспи нә. Ирен дьбежә: «Һәрге мьн нетед хԝәйә дьн бьанийа сери, мьне тʹӧ щар шабунәкә ӧса нәстанда». Бәле, әԝ хушк хьзмәтийа хԝә гәләк ԛимәт дькә!

11. Чахе әм ԝәʹде пәйкʹәтьна жи мьзгинийе бәла дькьн, әԝ йәк чь бәред баш тинә?

¹¹ Һәрге әм хьзмәтийа хԝә ԛимәт дькьн, әме мина Паԝлос ԝәʹде пәйкʹәтьна жи хьзмәт бькьн (Кʹар. Шанд. 14:19-22). Жь сала 1930 һʹәта ԝәкә сала 1944, хушк-бьред Дәԝләтед Йәкбуйида ԛайим дьһатьнә зерандьне. Ле әԝана мина Паԝлос ԛәԝи дьсәкьнин у хьзмәтийа хԝә нәдьданә сәкьнандьне. Сәва кӧ дәԝләт изьне бьдә ԝәки әм аза мьзгинийе бәла  кьн, бьра әԝ шьхӧл дьданә диԝане у гәләк щар әԝана сәр кʹәтьн. Сала 1943-да, бьред мә Диԝана Һәрә Мәзьнда йа Дәԝләтед Йәкбуйида сәр кʹәтьн, у Нейтан Нор дәрһәԛа ве йәке мьзгинванарʹа ӧса гот: «Әԝ сәркʹәтьн бь сайа хирәта ԝә йә. Һәрге мьзгинвана бәрдәԝам нәкьра хьзмәт кьн, ԛә тʹӧ шьхӧл ԝе нәчуйа ве Диԝана Һәрә Мәзьн. Ле чьмки һун мьзгинванно, демәк хушк-бьред нав тʹәмамийа дьнйайеда, нәсәкьнинә, ԝә избат кьр, ԝәки тʹӧ пәйкʹәтьн рʹе ԝә нагьрә. Әԝ сәркʹәтьн йа щьмәʹта Хӧдан ә, кʹижан кӧ ԛәԝи дьсәкьнә у ләма сәр дькʹәвә». Ԝәлатед дьнда жи хушк-бьра ԛәԝи дьсәкьньн у диԝанада сәр кʹәтьнә. Бәле, һәрге әм хьзмәтийе һʹьз дькьн, тʹӧ тьшт рʹе мә нагьрә кӧ бәрдәԝам кьн хьзмәт кьн.

12. Хьзмәтийеда һун дьхԝазьн бьгьһижьнә чь нете?

¹² Һәрге әм хьзмәтийа хԝә ԛимәт дькьн, әме тʹӧ щар пәй «сьһʹәта» нәкʹәвьн. Әме һәр тьшти бькьн чь дәсте мәва те, сәва хьзмәтийа хԝә биньн сери (Кʹар. Шанд. 20:24; 2 Тимтʹ. 4:5). Ле хьзмәтийеда әме мәрьва чь һин кьн? Ԝәрә шеԝьр кьн кӧ Хԝәде диса чь хьзнә дайә мә.

13, 14. Чь йә «хьзнә» кӧ Иса Мәтта 13:52-да готьбу, у әм ча әԝе хьзне зедә дькьн?

¹³ Хьзна сьсийа әԝ һәйә хьзна ԝан рʹастийа кʹижана әм педьһʹәсьн. Йаһоԝа йә Хԝәдейе рʹастийе (2 Сам. 7:28; Зәб. 31:5). У әԝ мина бавәки мәрʹд, әԝан рʹастийа мәрьвед хԝәдехофрʹа әʹйан дькә. Әм гәләк рʹастийа пеһʹәсийан жь Хәбәра Хԝәде, жь әʹдәбйәтед мә, жь щьватед мәзьн, у щьватед һәр һʹәфтийе. У чьԛас дьчә, «хьзна мә» пе рʹастийед кәвьн у тʹәзә зедә дьбә. (Бьхунә Мәтта 13:52.) Һәрге әм мина хьзнәкә вәшарти рʹастийа бьгәрʹьн, Йаһоԝа ԝе али мә бькә, ԝәки әм «хьзна» хԝә пе рʹастийед тʹәзә зедә кьн. (Бьхунә Мәтʹәлок 2:4-7.) Ле ча әԝан рʹастийа бьгәрʹьн?

¹⁴ Әм гәрәке тʹьме Хәбәра Хԝәде у әʹдәбйәтед мә бьхуньн, у кʹур леколин бькьн. Тʹәне бь ԝи щурʹәйи әме бьвиньн ԝан рʹастийа, кʹижан кӧ ԝе бона мә «ну» бьн, демәк кʹижан кӧ мә бәре ньзаньбу (Йешу 1:8, 9; Зәб. 1:2, 3). Журнала «Бьрща Ԛәрәԝьлийеда» кӧ щара пешийе сала 1879 Тирмәһеда һатә дәрхьстьне, дьһатә готьне: «Рʹасти, әԝ һәйә мина кӧлирка бьчʹук, кʹижан кӧ чоле мәзьн дьбә, у дәр доре ԝе зиԝанед дәрәԝийе мәзьн дьбьн у нав хԝәда ле вәдьшерьн. Һәрге һун дьхԝазьн әԝе кӧлирке бьвиньн, һун гәрәке рʹьнд бьгәрʹьн. . . . Гава ԝә әԝ дит, лазьм ә бьсәкьньн у һьлдьн. Ле тʹәне бь ве кӧлиркәке рʹастийе, тʹер нәбьн. . . . Диса йед дьн бьгәрʹьн, нәсәкьньн һе зедә тʹоп кьн». Бәле, әм гәрәке тʹьме бәрдәԝам кьн рʹастийед ԛимәт бьгәрʹьн у хьзна хԝә зедә кьн.

15. Чьрʹа сәр һьнә рʹастийа әм дькарьн бежьн ча «кәвьн», у һун кʹижан рʹастийе лап зәʹф ԛимәт дькьн?

¹⁵ Чахе мә пешийе дәстпекьр Кʹьтеба Пироз һин бьн, әм рʹастийед гәләк ԛимәт пеһʹәсийан. Әм дькарьн бежьн ԝәки әԝ рʹасти бона мә ида «кәвьн» ьн, чьмки әԝан тьшта әм дәстпекеда пеһʹәсийанә. Мәсәлә, әм пеһʹәсийан кӧ Йаһоԝа Әʹфьрандаре мә йә у ӧса жи дәрһәԛа ԛьрара ԝи һьндава инсанәте. Әм ӧса жи пеһʹәсийан ԝәки Хԝәде жь һʹьзкьрьне Кӧрʹе хԝә ԛӧрбан кьр, сәва кӧ әм жь гӧнә у мьрьне хьлаз бьн. Ӧса жи әм пеһʹәсийан ԝәки Пʹадшатийа Хԝәде ԝе һʹәму кӧл-дәрда бьдә һьлдане у паше әме бькарьбьн әʹдьлайеда у бәхтәԝарийеда бьжин (Йуһʹн. 3:16; Әʹйан. 4:11; 21:3, 4).

16. Әм чь гәрәке бькьн гава фәʹмкьрьна рʹастийе те гӧһастьн?

 ¹⁶ Щара, фәʹмкьрьна мә һьндава пʹехәмбәртийа йан жи рʹезед жь Кʹьтеба Пироз дькарә бе гӧһастьне. Гава әм әԝан гӧһастьна дьстиньн, һьнге лазьм ә әм әве информасйайе кʹур леколин бькьн у сәр бьфькьрьн (Кʹар. Шанд. 17:11; 1 Тимтʹ. 4:15). Әм гәрәке зәлал фәʹм бькьн кӧ чь фьрԛи һәйә ортʹа фәʹмкьрьна бәре у йа тʹәзәда, һьн тьштед мәзьнда, һьн жи тьштед һурда. Ԝи щурʹәйи әме хьзна хԝә пе рʹастийед ну зедә кьн. Ле гәло чь кʹар һәйә ве йәкеда?

17, 18. Рʹӧһʹе пироз дькарә чьда али мә бькә?

¹⁷ Иса һин дькьр ԝәки рʹӧһʹе Хԝәдейи пироз дькарә бинә бира мә тьштед кӧ әм бәре һин бунә (Йуһʹн. 14:25, 26). Ле гәло ԝәʹде хьзмәтийе ча әԝ дькарә кери мә бе? Дина хԝә бьдьнә сәрһатийа бьраки мә, бь наве Питер. Сала 1970 әԝ 19 сали бу у тʹәзә дәстпекьр Бәйтʹәла Британйайеда хьзмәт кә. Щарәке әԝи мал бь мал хьзмәт дькьр у рʹасти мерәки ԝәкә 50 сали һат, рʹуйе кʹижани бәрдайи бу. Питер жь ԝи мерьки пьрси кӧ гәло әԝ нахԝазә Кʹьтеба Пироз фәʹм бькә. Питер әʹщебмайи ма чахе әԝи мерьки жерʹа гот ԝәки әԝ мамостайе Щьһу йә. Әԝи мерьки дьхԝәст Питер бьщерʹьбинә, у пьрсәкә ӧса да ԝи: «Ижа кӧрʹе мьн, һәла бежә кʹьтеба Данийел сәр кʹижан зьмани һатә ньвисаре?» Питер щаба хԝә да: «Пʹарәкә ве кʹьтебе сәр зьмане Арамайи һатә ньвисаре». Питер тинә бира хԝә: «Әԝ мамоста әʹщебмайи ма кӧ мьн щаба ве пьрсе заньбу, ле әз хԝәха жь ԝи зедәтьр әʹщебмайи мам! Ле мьн жь кʹӧ заньбу щаба ԝе пьрсе? Чахе әз һатьм мале мьн журналед «Бьрща Ԛәрәԝьлийе» у Һʹьшйар Бьн! йед ԝан пашԝәхтийа гәрʹийа у мьн готарәк дит кʹидәре кӧ дьһатә шьровәкьрьне ԝәки кʹьтеба Данийел сәр зьмане Арамайи һатийә ньвисаре». * Бәле, рʹӧһʹе пироз дькарә бинә бира мә ԝан тьшта, чь кӧ мә бәре хԝәндийә у хьзна мәйә рʹӧһʹанида һатийә хԝәйкьрьне (Луԛа 12:11, 12; 21:13-15).

¹⁸ Һәрге әм әԝан рʹастийед кӧ жь Йаһоԝа педьһʹәсьн, һʹьз дькьн у ԛимәт дькьн, әме бьхԝазьн хьзна хԝә пе рʹастийед тʹәзә у кәвьн зедә кьн. Чьԛас зәʹф әм әве йәке бькьн, һаԛас баш әме бькарьбьн мәрьвед дьн һин кьн.

19. Чьрʹа әм гәрәке хьзна хԝә хԝәй кьн?

¹⁹ Шәйтʹан у дьнйа ԝи дьхԝазьн ԝәки әм хьзнед рʹӧһʹани ԛимәт нәкьн. Ләма әм гәрәке һаш жь хԝә һәбьн сәва һʹьзкьрьна хԝә ӧнда нәкьн. Һәрге әм фәсал нибьн, һʹьш-аԛьле мә дькарә һәрʹә алийе нәрʹаст. Мәсәлә, әм дькарьн пәй пʹәра кʹәвьн. Бәʹса хәбәре, кәсәк хәбатәкә баш соз бьдә мә у әм һʹьш-аԛьле хԝә бьдьнә сәр ве йәке кӧ пʹәре ԛальм чекьн. Йан жи дьбәкә әме тʹәне сәр ве йәке бьфькьрьн, кӧ чаԝа дәԝләмәнд бьн у рʹьһʹәт бьжин, йан жи пе һәбука хԝә ԛӧрʹә бьн. Йуһʹәннайе шанди тинә бира мә ԝәки әԝ дьнйа у чь кӧ теда һәйә ԝе дәрбаз бьн (1 Йуһʹн. 2:15-17). Ләма жи, әм гәрәке мьԛати хԝә бьн сәва хьзна хԝәйә рʹӧһʹани ӧнда нәкьн.

20. Һун ча дьхԝазьн хьзна хԝәйә рʹӧһʹани хԝәй кьн?

²⁰ Нәһельн ԝәки тьштәки һʹьзкьрьна ԝә һьндава Пʹадшатийа Хԝәде сьст кә. Бь хирәт мьзгинийе бәла кьн у хьзмәтийе һʹьз бькьн. Бь дьл у щан бьгәрʹьн рʹастийед жь Кʹьтеба Пироз. Гава һун ӧса бькьн, һуне «хьзна» ль әʹзмана тʹоп кьн. «Ль ԝе дәре нә дьзе незик бе у нә жи ԝе бьзузе бьхԝә. Чьмки хьзна ԝә кʹидәре бә, дьле ԝәйе жи ль ԝе дәре бә» (Луԛа 12:33, 34).