1, 2. (a) Gin mwandu mage ma Jehova osemiyowa? (b) Ang’o ma wadwaro nono e sulani?

JEHOVA e ma nigi mwandu mang’eny moloyo ng’ato ang’ata e piny ma ngima. (1 We. 29:11, 12) Nikech en Wuonwa ma oherowa, odwaro ni ji duto ong’e adiera e yo malong’o. Mano kaka wamor ni Jehova osemiyowa mwandu ma wageno ahinya ma gin (1) Pinyruodh Nyasaye, (2) tijwa mar lendo ma reso ngima ji, kod (3) adiera ma beyo ma yudore e Muma! Ka ok watang’, wanyalo chako jwang’o mwandugo ma gikone gilal nono. Mondo kik walalgi, nyaka wati kodgi maber kendo nyaka wadhi nyime herogi. Yesu nowacho niya: “Kama mwandu magu nitie, kanyo bende e kama chunyu nobedie.”—Luka 12:34.

² Koro wadwaro neno kaka wanyalo dhi nyime hero kendo geno Pinyruoth, tijwa mar lendo, kod adiera ma wasepuonjore. Sama wanono weche adekgo, tem ane paro matut kaka in iwuon inyalo dhi nyime nyiso ni igeno mwandu ma Jehova osemiyowagi.

3. Jalok ohala ma ne Yesu owuoyo kuome ne oikore timo ang’o mondo oyud lulu ma nengone tek? (Ne picha manie chak sulani.)

³ Som Mathayo 13:45, 46. Yesu nogoyo ngero e wi jalok ohala moro ma ne manyo kite ma beyo mag lulu. Nenore ni jalok ohalano ne osebedo ka nyiewo kendo uso lulu mang’eny. Kata kamano, noyudo lulu moro ma kende ahinya ma nomore. En mana ni mondo nonyiew luluno, ne chuno ni ous gik moko duto ma ne en-go. Nyaka bed ni luluno ne berne gadier!

4. Wabiro timo ang’o ka wahero Pinyruodh Nyasaye mana kaka jalok ohala ma nohero lulu ma noyudo?

⁴ Ngerono puonjowa ang’o? Ng’eyo ni Pinyruodh Nyasaye en gima nitie adier chalo mana gi lulu ma nengone tek. Ka wahero Pinyruodh Nyasaye gi chunywa duto mana kaka jalok ohala ma nohero lulu ma noyudo, wabiro ikore timo gimoro amora ma wanyalo mondo wabed raia mag Pinyruoth kendo wadhi nyime bedo raia. (Som Mariko 10:28-30.) Ne ane ranyisi mag ji ariyo ma notimo kamano.

5. Zakayo nonyiso nade ni noramo mar bedo raia mar Pinyruodh Nyasaye?

⁵ Zakayo ne en jatend josol osuru ma nomewo nikech nomayo ji pesa e yor mibadhi. (Luka 19:1-9) Kata kamano, ka ne owinjo ka Yesu yalo e wi Pinyruoth, nofwenyo ni weche ma nowinjogo ne gin weche ma beyo ahinya mi nokawo okang’ mapiyo. Nonyiso Yesu niya: “Ruoth, ne! adhi chiwo nus mar giga ne joma odhier, kendo gimoro amora ma namayo ng’ato ang’ata anaduok nyading’wen.” Nodwoko mwandu duto ma ne oyudo e yor mibadhi kendo noweyo bedo ng’at ma ohero choko mwandu.

6. Gin lokruoge mage ma Rose notimo mondo obed raia mar Pinyruodh Nyasaye, to ang’o momiyo notimo kamano?

⁶ Higni moko mokalo, nyako moro ma wabiro luongo ni Rose ne timoga timbe mag nindruok gi nyiri wetene ka ne pok oyalne wach Pinyruoth. Ne en jatend riwruok ma ne kedo ne chwo ma terore gi chwo wetegi kod mon ma terore gi mon wetegi. Kaka Rose ne medo puonjore Muma, noneno kaka adiera ma nopuonjore e wi Pinyruodh Nyasaye ne beyo ma ok nyal pim gi gimoro amora. Kata kamano, nofwenyo ni nyaka notim lokruok moko ma dongo e ngimane. (1 Kor. 6:9, 10) Nong’ado mar wuok e riwruogno kendo noweyo timne mar nindruok gi mon wetene. Notis Rose e higa mar 2009, kendo higa ma noluwo ne obedo painia mapile. Hera ma noherogo Jehova kod Pinyruoth ne duong’ moloyo gombo moro amora mar ringruok ma nonyalo bedogo.—Mar. 12:29, 30.

7. Ang’o ma nyalo konyowa mondo wadhi nyime hero Pinyruodh Nyasaye?

⁷ En adier ni waduto ne watimo lokruoge mopogore opogore mondo wabed raia mag Pinyruodh Nyasaye. (Rumi 12:2) En mana ni timo lokruoge ne ok orumo gi kanyo. Nyaka watang’ ne gimoro amora ma nyalo monowa dhi nyime hero Pinyruoth, bed ni en gombo mar hero mwandu kata gombo maricho mag nindruok. (Nge. 4:23; Mat. 5:27-29) Mondo wadhi nyime hero Pinyruodh Nyasaye, Jehova osemiyowa gima chielo ma nyalo konyowa e timo kamano.

8. (a) Ang’o momiyo jaote Paulo nowacho ni tijwa mar lendo chalo gi ‘mwandu makende e gik mochue gi lowo’? (b) Paulo nonyiso nade ni nohero tij lendo?

⁸ Yesu nomiyowa tich mar lendo kendo puonjo ji wach maber mar Pinyruodh Nyasaye. (Mat. 28:19, 20) Jaote Paulo nong’eyo gimomiyo tij lendo en tich maduong’.  Nowacho ni tij lendo en kaka ‘mwandu makende e gik mochue gi lowo.’ (2 Kor. 4:7; 1 Tim. 1:12) Kata obedo ni wan mana chuech mag lowo kendo morem, wach ma walando nyalo miyo wayud ngima mochwere kaachiel gi joma walendonegi. Ng’eyo wachno nomiyo Paulo owacho niya: “Atimo gik moko duto nikech wach maber mondo ayale ne jomoko.” (1 Kor. 9:23) Nikech Paulo nohero tij lendo ahinya, notimo kinda mondo olok ji obed jopuonjre Yesu. (Som Jo-Rumi 1:14, 15; 2 Timotheo 4:2.) Mano nomiyo onano kata obedo ni noromo gi akwede mager. (1 The. 2:2) Ere kaka wan bende wanyalo hero tij lendo e okang’ ma kamano?

9. Gin yore mage ma wanyalo nyisogo ni wahero tij lendo?

⁹ Yo achiel ma Paulo nonyisogo ni ohero tij lendo en ni notiyo gi thuolo moro amora mondo owuo gi ji. Mana kaka joote kod Jokristo e ndalo machon notimo, wan bende onego walend sama wan e dijewa wawegi, kuonde ma ji ng’enyie, kod e ot ka ot. (Tich 5:42; 20:20) Wanyalo medo thuolo ma watiyogo e tij lendo kaluwore gi chalwa kuom bedo jopainia makonyo kata jopainia mapile. Wanyalo puonjore dhok machielo, wanyalo dhi lendo e alwora machielo e pinywa, kata dhi e piny machielo.—Tich 16:9, 10.

10. Jehova noguedho nade kinda ma Irene ne nigo mar lando wach maber?

¹⁰ Ne ane ranyisi mar nyaminwa moro ma pok okendi miluongo ni Irene ma wuok e piny Amerka. Nogombo ahinya lendo ne joma wacho dho Russia ma nobiro e pinygi. Ka nochako lendo ne jogo e higa mar 1993, ne nitie grup mar jolendo ma dirom 20 ma ne timo chokruoge gi dho Russia e boma mar New York City. Kuom higni 20 mokalo, Irene osebedo ka lendo ne joma wacho dho Russia. Owacho niya: “Pod ok ang’eyo wacho dho Russia e yo maber ahinya.” Kata kamano, Jehova oseguedho kinda motimo kod kinda mag jomamoko mochiwore e yo ma kamano. Sani nitie kanyakla auchiel mitimee chokruoge gi dho Russia e boma mar New York City. Ji 15 kuom joma Irene nopuonjorego ne obatisi. Moko kuom jogo sani gin jo Bethel, jopainia, kod jodong-kanyakla. Irene wacho niya: “Ok apar ka nitie gimoro amora ma ne anyalo timo ma miya mor moloyo chiwora mondo alend kamano.” To mano kaka Irene nohero tij lendo!

11. Gin ber mage ma osebedoe nikech kinda ma owete gi nyimine timo e tij lendo kata bed ni isandogi?

¹¹ Ka wahero tij lendo, wabiro dhi nyime tiyo tijno mana kaka Paulo kata bed ni isandowa. (Tich 14:19-22) E higni mag 1930 kod ka ne higni mag 1940 chakore, owete gi nyimine ma ne nitie e piny Amerka noromo gi akwede mager ahinya. To mana kaka  Paulo, ne gichung’ motegno kendo ne ok giweyo tij lendo. Owete ne okedo matek ka giyalo buche e kot mondo omigi ratiro mar lando wach maber. E higa mar 1943, Owadwa Nathan H. Knorr, nowuoyo e wi kes moro ma ne giloyo e kot mamalo e piny Amerka. Nowacho niya: “Waloyo kesni nikech kindau. Ka dine bed ni ok udhi nyime gi lendo, dine ok wabedo gi kes e kot maduong’, to nikech pod udhi nyime gi lendo kendo ok uikoru weyo lendo, mano e ma miyo waloyo akwede kod sand ma kama. To nikech un jotich Ruoth mochung’ motegno, mano e momiyo kot ong’ado bura ma kama.” Kinda ma kamano osemiyo owete manie pinje mamoko bende oloyo buche e kot. Kuom adier, hera ma waherogo tijwa mar lendo e ma miyo wachung’ motegno sama isandowa.

12. Ing’ado mar timo ang’o kodok korka tij lendo?

¹² Ka waneno tijwa mar lendo kaka mwandu ma Jehova omiyowa, ok wabi lendo alenda nikech wadwaro seche ma wandiko e ripot. Kar mano, wabiro timo duto ma wanyalo mondo ‘wachiw neno e okang’ malong’o chuth e wi wach maber.’ (Tich 20:24; 2 Tim. 4:5) Kata kamano, en ang’o monego wapuonj jomoko? Ne ane mwandu machielo ma Nyasaye osemiyowa.

13, 14. ‘Kar keno’ ma Yesu nowuoye e Mathayo 13:52 en ang’o, to ere kaka wanyalo pong’e?

¹³ Mwandu ma chielo ma Nyasaye osemiyowa en adiera ma wasepuonjore. Jehova e wuon adiera. (2 Sa. 7:28; Zab. 31:5) Nikech en wuoro ma jachiwo, opuonjo joma oluore adierago. Nyaka ne wachak puonjore adiera, wasebedo gi thuolo mar medo puonjore adiera mang’eny ma yudore e Muma kod bugewa, kaachiel gi ma wayudo e chokruogewa madongo, mag alwora, kod mag kanyakla. Bang’ kinde, wabedo gi gima Yesu noluongo ni ‘kar keno’ moting’o adiera machon kod adiera manyien. (Som Mathayo 13:52.) Jehova biro konyowa mondo wamed pong’o karwa mar keno gi adiera manyien-go ka wamanyogi gi kinda mana kaka ng’at ma manyo mwandu mopandi. (Som Ngeche 2:4-7.) Ere kaka wanyalo timo kamano?

¹⁴ Nyaka wabed gi chenro maber mar puonjore wan wawegi kendo timo nonro matut e Wach Nyasaye kod e bugewa ma lero Muma. Timo kamano biro konyowa fwenyo adiera moko ma pok wang’eyo. (Jos. 1:8, 9; Zab. 1:2, 3) Ohinga mar Jarito mokwongo ma ne ogo e dho Kisungu e higa mar 1879 e dwe mar Julai, nopimo adiera gi mafua ma jaber manie kind buya mang’eny. Mondo ng’ato oyud mafua kaka mano, chuno ni nyaka omanye gi kinda e kind buyago. To ka oyude, ok onego omor mana gi mafua achielno. Onego odhi nyime manyo maupe mamoko mondo oyudgi mang’eny kaka nyalore. Wan bende ok onego wayue ayueya ka wasepuonjore adiera moko matin. Nyaka wadhi nyime puonjore adiera mamoko mondo wapong’ kar keno marwa.

15. Ang’o momiyo wanyalo wacho ni adiera moko gin machon, to moko kuom adierago ma mori ahinya gin mage?

¹⁵ Ka ne wachako riwore gi Joneno mag Jehova, ne wapuonjore adiera ma beyo. Wanyalo wacho ni gin adiera machon nikech gin adiera ma ne wakwongo ng’eyo ka ne wabedo Joneno kendo wasetiyo kodgi e ngimawa nyaka sani. Moko kuom adierago gin mage? Ne wapuonjore ni Jehova e Jachuechwa, Jachiw-ngima, kendo odwaro ni mondo wadag nyaka chieng’. Ne wapuonjore bende ni nikech hera ma Nyasaye noherowago, nochiwo wuode mondo obednwa kaka misango mondo owarwa e richo  kod tho. Ne wapuonjre ni Pinyruodhe e ma biro tieko chandruoge duto momako dhano kendo ni dhano biro dak nyaka chieng’ ka gin gi kuwe kendo ka gimor e bwo loch mar Pinyruodhno.—Joh. 3:16; Fwe. 4:11; 21:3, 4.

16. Ang’o monego watim sama olernwa adiera moro e yo mopogore gi kaka ne wang’eye chon?

¹⁶ Nitie kinde ma inyalo med lernwa tiend adiera moko kata weche moko mokor e yo mopogore gi kaka ne wang’eyogi chon. Sama olernwa adierago e yo momedore, onego wakaw thuolo mar puonjore wechego e yo malong’o kendo paro matut kuomgi. (Tich 17:11; 1 Tim. 4:15) Sama watimo kamano, onego watem mondo wawinj nyaka tiend pogruok matindo tindo ma omed lergo wachno mopogore gi kaka ne ilere chon. Ka watimo kamano, wabiro bedo gadier ni wamedo adiera manyien-go e karwa mar keno. Ang’o momiyo kinda ma kamano ok en kayiem?

17, 18. Roho maler nyalo konyowa nade?

¹⁷ Yesu nowacho ni roho maler mar Nyasaye nyalo konyowa mondo wapar gik ma wasepuonjore. (Joh. 14:25, 26) Mano nyalo konyowa nade sama walando wach maber ne ji? Ne ane ranyisi mar owadwa moro miluongo ni Peter. Ne en mana jahigni 19 kende ka nochako tiyo e Bethel ma Britain e higa mar 1970. Chieng’ moro ka nolendo ot ka ot, ne oromo gi ng’at moro ma opidho tike. Peter nopenjo ng’atno kabe doher puonjore Muma. Ng’atno nobuok monyiso Peter ni odno ne en od jopuonj mag din Jo-Yahudi. Ng’atno notemo Peter kopenje kama: “Koro wuoda, nyisa ane, bug Daniel ne ondik e dhok mane?” Peter nodwoko niya: “Bathe moko nondik e dho Aram.” Peter medo wacho niya: “Ng’atno nobuok ni ne ang’eyo wachno, to an bende ne abuok! Ne ang’eyo nade ni mano e dwoko? Ka ne adok ot ma asomo Ohinga mar Jarito kod Amkeni! mag dweche moko mokalo, ne ayudo sula moro ma lero ni bug Daniel ne ondik e dho Aram.” * En adier ni roho maler nyalo paronwa gik ma wasepuonjore kendo ma wakano maber e karwa mar keno.—Luka 12:11, 12; 21:13-15.

¹⁸ Ka wageno rieko ma Jehova miyowa, chunywa biro chwalowa mondo wadhi nyime kano adiera duto manyien kod machon e karwa mar keno. Kaka wamedo geno kendo hero rieko mowuok kuom Jehova, e kaka wabiro medo bedo jopuonj molony.

19. Ang’o momiyo nyaka warit mwandu ma Nyasaye omiyowa?

¹⁹ E sulani, wasepuonjore ni Jehova omiyowa mwandu mang’eny monego wagen ahinya. Kata kamano, Satan kod pinye marachni temo ahinya mondo giketh mwandu ma wagenogo. Riekni ma Satan tiyogo nyalo makowa. Gombo mar bedo gi tich maber, ngima maber, kata gombo mar bedo gi mwandu mag pinyni nyalo galowa. Jaote Johana paronwa ni pinyni kalo kaachiel gi gombone. (1 Joh. 2:15-17) Kuom mano, nyaka watim kar ma wanyalo mondo wadhi nyime rito kendo geno mwandu ma Nyasaye osemiyowa.

20. Iyiero mar timo ang’o mondo irit mwandu ma Nyasaye osemiyi?

²⁰ Ikri weyo gimoro amora ma nyalo moni hero Pinyruodh Nyasaye gi chunyi duto. Dhi nyime hero tijwa mar lendo ma reso ngima ji kendo itim kamano gi kinda. Dhi nyime puonjori adiera manie Muma. Ka itimo kamano, ibiro loso ‘mwandu ma ok rum e polo, kama jakuo ok sudie machiegni kendo kudni ok cham. Nimar kama mwanduni nitie, kanyo bende e kama chunyi nobedie.’—Luka 12:33, 34.