1, 2. (a) Jehova okwe tu pa omaliko gopambepo gatatu geni? (b) Otatu ka konakona shike moshitopolwa muno?

JEHOVA oye Omuntu a shiga ko meshito alihe. (1 Ondjal. 29:11, 12) Jehova ngoka ha gandja nehalo ewanawa, oha gandja eliko lyopambepo kwaayehe mboka ye li tala ko li na ondilo. Itashi nyanyudha tuu sho Jehova e tu pa omaliko gopambepo ngoka ga kwatela mo (1) Uukwaniilwa we, (2) iilonga yetu yokuuvitha mbyoka tayi hupitha oomwenyo (3) noshili yi na ondilo ndjoka tayi adhika mOohapu dhe! Ngele inatu kotoka otatu vulu okukala kaatu na olupandu lwomaliko ngoka notashi vulika tu ge ekelehi. Opo tu ga kwate nawa, otu na oku ga longitha nawa nokukokeka aluhe ohole yetu mugo. Jesus okwa ti: “Kokuma nkoka ku na eliko lyoye, oko ku na nomwenyo gwoye wo.” —  Luk. 12:34.

² Natu taleni nkene tatu vulu okukokeka nokukaleka po ohole yetu nosho wo okuulika olupandu omolwUukwaniilwa, uukalele noshili. Sho tatu shi ningi, natu tedhatedhe kunkene tatu vulu okukokeka ohole yetu yokuhola omaliko gopambepo.

3. Omuhalithi gwomeyele lyaJesus okwa li e na ehalo lyokuninga shike, opo a mone okawe kondilo? (Tala kethano lyopetameko.)

³ Lesha Mateus 13:45, 46. Jesus okwa popi kombinga yeyele lyomuhalithi ta kongo uuwe wu na ondilo. Osha yela kutya omuhalithi  okwa kala ha landa noha landitha uuwe wondilo owundji uule womimvo. Ihe ngashingeyi okwa mona okawe ke na ongushu noka li ke mu nyanyudha. Ihe opo e ka lande, okwa li e na okulanditha po kehe shimwe shoka e na. Mbela sho to dhiladhila okawe hono oka li ke na ongushu yi thike peni kuye?

4. Ngele otu hole Uukwaniilwa waKalunga ngaashi omuhalithi e hole okawe, otatu ka ninga po shike?

⁴ Oshike tatu ilongo meyele lyaJesus? Oshili yUukwaniilwa waKalunga oya fa okawe kondilo. Ngele otwa kala tu yi hole ngaashi omuhalithi e hole okawe, otatu ka kala twa hala okweetha po kehe shimwe, opo tu gandje eitulomo kUukwaniilwa. (Lesha Markus 10:28-30.) Natu taleni kuyaali mboka ye shi ninga.

5. Sakeus okwa li ulike ngiini kutya okwa tokola okupititha komeho Uukwaniilwa waKalunga?

⁵ Sakeus okwa li omukuluntu gwaafendelithi, omulumentu omuyamba ngoka a li ha yugu aantu iimaliwa. (Luk. 19:1-9) Sho omulumentu ngoka kee shi omuyuuki u uvu Jesus tu uvitha kombinga yUukwaniilwa, okwa mono kutya shoka a li ta popi kombinga yUukwaniilwa oshi na ondilo e ta katuka onkatu mbalambala. Okwi igidha a ti: “Omuwa, pulakena! Etata lyeliko lyandje otandi ke li pa oohepele, nongele ku na ngoka nde mu yugu nokulongitha iifundja, otandi ke mu shunithila iinima oyo tuu mbyoka lune.” Okwa li e etha po omukalo gwokwiikongela oshimaliwa gwaa li pauyuki nosho wo olwiho lwokuhola omaliko.

6. Omalunduluko geni omukiintu gumwe a li a ningi, opo a ninge omulelwa gwUukwaniilwa waKalunga, nomolwashike e ga ningile?

⁶ Omimvo dhontumba dha pita, omukiintu gumwe ngoka a li eshenge, okwa li u uvu etumwalaka lyUukwaniilwa. Okwa li omupelesidente gwehangano lyokukondjela uuthemba womashenge. Ihe sho a konakona Ombiimbeli, okwa mono kutya oshili kombinga yUukwaniilwa waKalunga oya dhenga mbanda. Okwa mono kutya oku na okuninga omalunduluko omanene. (1 Kor. 6:9, 10) Omutima gwe ogwe mu inyengitha e ethe po ondondo ye noku hulithe po uushenge. Okwa li a ninginithwa mo 2009, nomomumvo gwa ka landula ko okwa ningi omukokolindjila gwondjigilile. Ohole ye yokuhola Jehova nUukwaniilwa we oya li ya kola yi vule omahalo ge gopanyama. —  Mark. 12:29, 30.

7. Ongiini tatu vulu okukala tu hole Uukwaniilwa waKalunga tashi zi komutima?

⁷ Oyendji yomutse otwa ninga omalunduluko ogendji monkalamwenyo yetu, opo tu ninge aalelwa yUukwaniilwa waKalunga. (Rom. 12:2) Nokuli nando otwa ninga omalunduluko ngono, iilonga yetu yokuuvitha inayi hula. Otu na okukala twa kotokela iinima mbyoka tayi vulu okunkundipaleka ohole yetu ngaashi: ohole yiinima yopamaliko nohole yiipala. (Omayel. 4:23; Mat. 5:27-29) Opo Jehova e tu kwathele tu kale tu hole Uukwaniilwa we tashi zi komutima, okwe tu pa eliko lilwe li na ondilo.

8. (a) Omolwashike omuyapostoli Paulus a hokolola uukalele wetu kutya owa fa ‘uuyamba miiyuma yeloya’? (b) Paulus okwa li u ulike ngiini kutya okwa lenga uukalele?

⁸ Dhimbulukwa kutya Jesus okwe tu pa oshilonga shokuuvitha noshokulonga aantu onkundana ombwanawa yUukwaniilwa waKalunga. (Mat. 28:19, 20) Omuyapostoli Paulus okwa li a mono kutya uukalele owu na ongushu onene. Okwa popi kutya iilonga mbyoka ya pambathana nehangano epe oya fa ‘uuyamba miiyuma yeloya.’ (2 Kor. 4:7; 1 Tim. 1:12) Nonando otu li iiyuma yeloya inaayi kola, etumwalaka ndyoka tatu uvitha otali vulu oku tu petha omwenyo gwaaluhe nosho wo mboka taye tu pulakene. Molwaashoka Paulus shika okwa li e shi shi, okwa ti: “Ayihe otandi yi ningi omolwonkundana ombwanawa, opo nangame ndi yi topole pamwe nayalwe.” (1 Kor.  9:23, NW) Eeno, ohole yaPaulus yokuhola uukalele oye mu inyengitha a longe nuudhiginini mokuninga aantu aalongwa. (Lesha Aaroma 1:14, 15; 2 Timoteus 4:2.) Shoka osha li she mu kwathele i idhidhimikile omahepeko omadhigu. (1 Tes. 2:2) Ongiini tatu vulu okuulika kutya otu hole iilonga yetu yuukalele ngaashi Paulus?

9. Omomikalo dhimwe dhini tatu vulu okuulika kutya otwa pandula iilonga yetu yuukalele?

⁹ Omukalo gumwe ngoka Paulus a li u ulike kutya okwa pandula iilonga yuukalele, oosho a kongo oompito a popye nayalwe. Ohatu uvitha egumbo negumbo nohatu gandja uunzapo womontaneho nowontukuluka, ngaashi aayapostoli nAakriste yonale ya li ya ningi. (Iil. 5:42; 20:20) Uuna oonkalo dhetu tadhi shi pitike, ohatu kongo oompito tu tamunune mo uukalele wetu, tashi vulika tatu shi ningi mokukutha uukwathelikokolindjila nenge uukokolindjila wondjigilile. Ohashi vulika wo tu ilonge elaka lilwe, tu ye kiitopolwa yilwe moshilongo shetu nenge tu tembukile kiilongo yilwe. —  Iil. 16:9, 10.

10. Irene okwa li a lalekwa nuuyamba ngiini sho a tokola okuuvitha onkundana ombwanawa?

¹⁰ Natu taleni koshiholelwa shaIrene, omumwameme inaa hokanwa gwokoAmerika. Okwa li a halelela oku ka uvithila aatembukilimo Aarusia. Sho a tameke okuuvitha mo 1993, moNew York City, moAmerika omwa li owala mu na aauvithi 20 mboka haya popi elaka lyOshirusia. Irene okwa kala ta longo nuudhiginini uule womimvo 20 lwaampono moshitopolwa moka hamu popiwa elaka ndyoka. Okwa ti: “Natango Oshirusia ihandi shi popi nawa.” Nonando ongawo, Jehova okwe mu yambeke omolwombepo ye yuulaadhi nokwa yambeke wo yalwe mboka ye na uulaadhi wa fa we. Kunena moNew York City omu na omagongalo gahamano gOshirusia. Aantu omulongo nayatano yomwaamboka ya konakona naIrene oya ninginithwa. Yamwe yomuyo Aabetel, aakokolindjila naakuluntugongalo. Irene okwa ti: “Ngele tandi dhiladhila komalalakano galwe ngoka nda li tandi vulu okulalakanena, kandi shi ngele opu na limwe lya li tali vulu okweetela ndje enyanyu enene li vule ndika.” Eeno, odhoshili kutya okwa li a lenga uukalele we.

11. Iizemo yini iiwanawa hayi zi mokutsikila okuuvitha, nonando otatu hepekwa?

¹¹ Ngele otwa kala twa lenga uukalele wetu, otatu ka kala twa fa omuyapostoli Paulus, ngoka a tsikile okuuvitha, nonando okwa li ta hepekwa. (Iil. 14:19-22) Mo 1930 nasha nopetameko lyo 1940 nasha, aamwatate moAmerika oya li ya taalela omapataneko omadhigu. Onkee ano, oya kala ya kakatela uudhiginini wawo ngaashi Paulus, noya tsikile okuuvitha. Opo ya popile uuthemba wetu wokuuvitha, oya kalele po iipotha oyindji moompangu. Mo 1943 omumwatate Nathan H. Knorr sho a popi kombinga yoshipotha shimwe shoka sha li sha sindanwa po kaamwatate mOmpangu yoPombanda  yaAmerika okwa ti: “Omasindano ngaka oga ningwa omolweni. Ando aauvithi oya li inaaya tsikila okuuvitha, ando oshipotha inashi falwa kOmpangu yoPombanda; ihe omolweni, aauvithi, aamwatate muuyuni awuhe otaya tsikile okuuvitha onkundana ombwanawa, nonando otaya hepekwa. Okekwatho lyaJehova, oshigwana she sha vulu okusinda po oshipotha shika.” Aamwatate yokiilongo yilwe nayo oya sindana po iipotha ya fa mbyoka omolwuudhiginini wawo. Odhoshili kutya ohole yetu yokuhola uukalele otayi vulu oku tu kwathela tu sinde omahepeko.

12. Mbela owa tokola okuninga po shike shi na ko nasha nuukalele?

¹² Ngele otwa tala ko uukalele wu li oshinima shi na ongushu sha za kuJehova, itatu ka gandja owala eitulomo “kokuyalula oowili.” Pehala lyaashono, otatu ka ninga oonkambadhala dha mana mo, opo tu ‘uvithe elaka etoye.’ (Iil. 20:24; 2 Tim. 4:5) Mbela otatu ka longa yalwe shike? Natu taleni ishewe keliko limwe ndyoka lya za kuKalunga.

13, 14. ‘Ompungulo’ ndjono Jesus a popya muMateus 13:52 oshike, notu na okupungula mo shike?

¹³ Eliko lyopambepo etitatu, olyo oshili ndjoka twi ilonga. Jehova oye Kalunga koshili. (2 Sam. 7:28; Eps. 31:5) E li Tate ha gandja, okwa pa mboka haye mu tila oshili. Okuza kethimbo sho tu uva oshili oshikando shotango, otwa li twa mono ompito yokwiilonga oshili mOohapu dhe, Ombiimbeli, miileshomwa yetu yopaKriste, piigongi iinene niishona nosho wo pokugongala kwetu kwokoshiwike. Mokweendela ko kwethimbo, ngele oshili ya koko mutse, otatu ka kala twa fa ‘ompungulo’ yiinima iipe niikulu ndjoka ya popiwa kuJesus. (Lesha Mateus 13:52.) Jehova ote ke tu kwathela tu pungule oshili ndjoka ompe “mompungulo” yetu, ngele otwa kala tatu yi kongo ngaashi omuntu ta kongo eliko lya holekwa. (Lesha Omayeletumbulo 2:4-7.) Mbela ongiini tatu vulu oku shi ninga?

¹⁴ Otu na okukala hatu konakona Ombiimbeli pandjigilile nokuninga omapekapeko nuukeka mOohapu dhaKalunga nomiileshomwa yetu. Shika otashi ke tu kwathela tu tseye oshili “ompe” ndjoka tashi vulika kaatwa li tu shi nale. (Jos. 1:8, 9; Eps. 1:2, 3) Oshitopolwa shotango shoshifo shoka sha nyanyangidhwa muJuli 1879 osha ti: “Oshili oya fa ongala onshona ombwanawa ndjoka ya mena mombuga noyi li mokati komawu ngoka ge yi thininika kaayi koke nawa. Ngele owe yi mono, oto ka ninga oonkambadhala wu yi gamene, nongele owa hala yi ninge po yoye, owu na oku yi kutha po. . . . Ino kala owala wa gwanenwa kongala yimwe, ndjoka tayi faathanithwa noshili. . . . Ihe tsikila oku dhi konga odhindji.” Odhoshili kutya otu na okukala twa halelela okupungula oshili yaKalunga mompungulo yetu.

15. Omolwashike tashi vulika tu tye kutya iinima yimwe mbyoka twi ilonga petameko ‘iikulu,’ noyinipo yomuyo twa lenga?

¹⁵ Sho twa tameke okweendathana noshigwana shaKalunga, otwi ilongo iinima yimwe yoshili yi na ongushu. Iinima mbyoka otashi vulika tu tye ‘iikulu,’ molwaashoka oyo twi ilongo petameko. Mbela iinima mbyono oya kwatela mo shike? Otwi ilonga kutya Jehova oye Omushiti gwetu noye Omugandji gwomwenyo noku nine aantu elalakano. Otwi ilonga wo kutya omolwohole ye, okwe tu pa ekuliloyambo lyOmwana, opo tu manguluke mo muulunde nomeso. Otwi ilonga wo kutya Uukwaniilwa we otawu ka hulitha po okumona iihuna nosho wo kutya otu na etegameno lyokukala nomwenyo sigo aluhe twa nyanyukwa notu na ombili kohi yepangelo lyUukwaniilwa. —  Joh. 3:16; Eh. 4:11; 21:3, 4.

16. Oshike tu na okuninga uuna twa pewa uuyelele uupe kombinga yoshili?

¹⁶ Omathimbo nomathimbo, euvoko lyetu  lyokuuva ko omahunganeko gOmbiimbeli nenge omanyolo gontumba ohashi vulika lyi lunduluke. Uuna pwa holoka uuyelele uupe, otu na okukonga ethimbo tu wu konakone nawa nokutedhatedha kuwo. (Iil. 17:11; 1 Tim. 4:15) Ihatu kala owala twa hala okuuva ko nawa omalunduluko omanene, ihe ohatu kala wo twa hala okuuva ko nuulunduluko uushona mboka wa ningwa pokati kuuyelele uukulu naamboka uupe. Kungawo, otatu pungula uuyelele woshili uupe mompungulo yetu. Omolwashike okuninga ngawo ku na oshilonga?

17, 18. Ombepo ondjapuki ohayi tu kwathele ngiini?

¹⁷ Jesus okwe tu longa kutya ombepo yaKalunga otayi ke tu dhimbulukitha iinima mbyoka twi ilonga. (Joh. 14:25, 26) Ongiini shika tashi vulu oku tu kwathela tu li aauvithi yonkundana ombwanawa? Natu taleni koshimoniwa shomumwatate gwedhina Peter. Mo 1970 okwa li e na omimvo 19, nokonima owala yokathimbo okwa ka longa koBetel yaBritania. Manga a li tu uvitha egumbo negumbo, okwa tsakaneke omulumentu gwomimvo dhopokati. Peter okwa pula omulumentu ngele okwa hala okutseya Ombiimbeli. Omulumentu okwa li a kumwa, e te mu yamukula kutya egumbo moka e li olyoorabbi Aajuda. Opo oorabbi ya makele Peter, gumwe okwe mu pula a ti: “Te tii, mumati gwandje, embo lyaDaniel olya nyolwa melaka lini?” Peter okwa yamukula a ti: “Iitopolwa yimwe yalyo oya nyolwa mOshiaramea.” Peter ota ti: “Omurabbi okwa li a kumwa sho ndi shi eyamukulo, ihe ongaye nee nda li nda kumwa unene. Eyamukulo onde li tseya ngiini mbela? Sho nda yi kegumbo e tandi tala miifo yOshungolangelo no-Awake! yoomwedhi dha zi ko, onda mono mo oshitopolwa sha yelitha kutya Daniel okwa nyolwa mOshiaramea.” (Dan. 2:4) Odhoshili kutya ombepo ondjapuki oyo hayi tu dhimbulukitha iinima mbyoka twa lesha nale e tatu yi pungula mompungulo yetu. —  Luk. 12:11, 12; 21:13-15.

¹⁸ Ngele otwa kala twa lenga uunongo mboka wa za kuJehova, omitima dhetu otadhi ke tu inyengitha tu udhithe ompungulo yetu oshili ndjoka twa kala tu shi nale naandjoka opo tatu tseya. Sho ohole yetu nolupandu lwetu okupandula uunongo waJehova tayi koko, otatu ka kala aalongi yonkundana ombwanawa yu unganekwa nawa.

19. Omolwashike tu na okugamena omaliko getu gopambepo?

¹⁹ Satana nuuyuni we otaya tsikile oku tu nkundipaleka nenge okuyona po olupandu lwetu lwomaliko gopambepo ngoka twa kundathana moshitopolwa shika. Natse otatu vulu okupukithwa kuSatana. Otatu vulu okukwatwa ko kiilonga hayi futu nawa, okulalakanena onkalamwenyo yuuzeko nenge okukala twa hala okwiitangela iinima yopamaliko. Omuyapostoli Johannes okwe tu dhimbulukitha kutya uuyuni niinima ayihe yi li mo mbyoka aantu ye yi hokwa, otayi hulu po. (1 Joh. 2:15-17) Onkee ano, otu na okulonga nuudhiginini tu gamene ohole yetu nolupandu lwetu lwomaliko gopambepo.

20. Owa tokola okuninga shike wu gamene omaliko goye gopambepo?

²⁰ Kala wu na ehalo okweetha po kehe shimwe shoka tashi vulu okupiyaganeka ohole yoye tayi zi komutima yokuhola Uukwaniilwa waKalunga. Tsikila okuuvitha nuulaadhi, ngoye ino etha po nando olupandu lwoye lwuukalele wetu mboka tawu hupitha oomwenyo. Tsikila okukonga oshili yaKalunga wi itula mo. Uuna tamu ningi ngawo, otamu ilikolele ‘eliko megulu ndyoka ihaali hulu po, moka ihaamu yi aafuthi noothithi itadhi vulu oku li yona po, oshoka kokuma nkoka ku na eliko lyoye, oko ku na nomwenyo gwoye wo.’ —  Luk. 12:33, 34.