1, 2. a) ¿Tlenon yeyi tlen patioj techmaka Jehová? b) ¿Tlenon tikitaskej ipan yejuin tlamachtijli?

XAKAJ kipiya miyek tlen patioj ijkon ken Jehová, pampa nochi itlatki (1 Crón. 29:11, 12). San ika, Jehová melak kuelita kinmakas nochimej tlen kipiya. Melak tiktlasojkamatij ika tikseliaj miyek tlen patioj tlen ualeua itech toTajtsin. ¿Katlejua seki yejon? Se, iTekiuajyo toTajtsin, ome, totenojnotsalis niman yeyi, tlen melauak tiknextiaj ipan iTlajtol. San ika, tla xtotlajpiyaj ika yolik uelis tikilkauaskej ika melak tlasojti yejon tlen patioj. Noneki nochipa matikilnamikikan ika melak tlasojti niman matikueyilikan totlasojtlalis itech yejon, pampa ijkon ken Jesús okijto: “Kampa nenkipiaskej nemoriquezas, no ompa nenkipiaskej nemoyojlo” (Luc. 12:34).

² Aman matikitakan kenon uelis nochipa tiktlasojtlaskej niman tiktlasojkamatiskej Tekiuajyotl, totenojnotsalis niman tlen melauak. Ijkuak tikchiuaskej yejuin, matitlanemilikan kenon toselti uelis tikueyiliskej totlasojtlalis itech yejon tlen patioj ualeua itech toTajtsin.

3. ¿Tlenon okinek kichiuas tlakatl tlen Jesús okiteneuj ipan se neskayotl niman ijkon kikouas se perla? (Xkita tlaixkopinajli kampa peua tlen tomachtijtokej).

³ (Xpoua Mateo 13:45, 46). Jesús okiteneuj se neskayotl itech se tlakatl akin kikouaya niman kinemakaya perlas. Se tonajli, yejua okinexti se perla tlen melak tlasojti xijkon ken okseki perlas tlen yokinnextijka kachtopa. Yejuin tlakatl melak kinekiya yejuin perla niman hasta okinemakak nochi tlen kipiaya niman ijkon kikouas. ¿Uelis tiknemiliskej kenon ixpan yejua melak tlasojtiya yejon perla?

4. ¿Tlenon tiknektoskej tikchiuaskej ipampa Tekiuajyotl tla tiktlasojtlaj?

⁴ ¿Tlenon tomachtiaj itech tlen okiteneuj Jesús? Tlen melauak itech iTekiuajyo toTajtsin ijkon ken yejon perla tlen melak tlasojti. Tla melak tiktlasojtlaj Tekiuajyotl ijkon ken yejon tlakatl akin kitlasojkaitaya perla, tiknekiskej tiktemakaskej nochi tlen nonekis niman ijkon tikpaleuiskej Tekiuajyotl (xpoua Marcos 10:28-30). Matikitakan kenon ome tlaltikpakchanejkej okichiujkej yejon.

5. ¿Tlenon okinek kichiuas Zaqueo ipampa Tekiuajyotl?

⁵ Zaqueo kinechikouiliaya tomin tekiuaj. Yejua okipix miyek tomin pampa kinkajkayauaya tlaltikpakchanejkej niman ijkon kinkuiliaya intomin (Luc. 19:1-9). San ika, se tonajli Zaqueo okikak Jesús ijkuak tlajtouaya itech Tekiuajyotl. Yejua melak okuelitak tlen okikak niman okinek kipatlas nochi inemilis. Yejua okijto: “Xkaki, noTeko, on tlen nikpia tlajkotipan nikinmakas on yejuan mayankej. Niman tla yakaj onikajkayajka para ouel oniktlachtekilij, naupa sa no ijki nikuepilis on kech onikichtekilijka”. Zaqueo okinkuepili tomin akin yokinkuilijka niman okikauj ika kileuis tomin.

6. ¿Tlenon okipatlak se siuatl niman tleka okichiuj?

⁶ Ikipiya seki xiujtin se siuatl, akin notekaya iuan okse siuatl, okikak itech Tekiuajyotl. Yejua noijki kiyekanaya se organización tlen kitlajtlaniya makimitakan kuajli tlakamej akin noteka iuan tlakamej niman siuamej iuan siuamej. San ika, ijkuak onomachti itech Biblia niman okasikamat ika melak tlasojti iTekiuajyo toTajtsin, okitak ika nonekiya miyek tlen kipatlas ipan inemilis (1 Cor. 6:9, 10). Pampa kitlasojtlaya Jehová, yejua okikauj yejon organización niman okikauj ika noteka iuan okse siuatl. Yejua onoapolakti ipan 2009, niman se xiuitl sakin onochiuj precursora regular. Melak ueyi ken okipatlak inemilis pampa kipiaya melak ueyi itlasojtlalis itech Jehová xijkon ken xkuajli ileuilistli tlen kipiaya (Mar. 12:29, 30).

7. ¿Kenon uelis nochipa tiktlasojtlaskej iTekiuajyo toTajtsin?

⁷ Pampa tiknekiyaj matechyekana iTekiuajyo toTajtsin, miyekej ononek tikpatlaskej miyek tlemach ipan tonemilis (Rom. 12:2). San ika, xompa tlami nochi, noneki matikitakan ika totlasojtlalis itech Tekiuajyotl maka itlaj kipopolos, itlaj ken tlasojtlalistli ipampa tlemach tlen patioj noso ileuilistli itech auilnemilistli (Prov. 4:23; Mat. 5:27-29). Jehová yotechmakak okse tlen melak tlasojti niman ijkon nochipa tikpiyaskej ueyi totlasojtlalis itech iTekiuajyo.

8. a) ¿Tleka okijto Pablo ika totenojnotsalis ken itlaj tlen patioj ipan vasos tlachijchiujtli ika sokitl? b) ¿Kenon Pablo okiteititi ika kitlasojtlaya tenojnotsalistli?

⁸ Jesús yotechnauati matitenojnotsakan niman matitemachtikan itech iTekiuajyo toTajtsin (Mat. 28:19, 20). Pablo, itlatitlankauj Cristo, okijto ika yejuin tekitl ken itlaj tlen patioj ipan vasos noso kontin tlachijchiujtin ika sokitl (2 Cor. 4:7; 1 Tim. 1:12). Pampa titlajtlakolejkej, tejuamej kentla tiyeskiaj yejon kontin tlachijchiujtin ika sokitl. San ika, tlen titenojnotsaj ijkon ken itlaj tlen melak patioj pampa uelis kichiuas matikpiyakan nemilistli tejuamej niman akin techkakij.  Ika yejon, Pablo okijto: “Nochi on nikchiua para on temachtijli yejuan techmaka temakixtilistli ma tekiti ipan inyojlo, niman para ijkon nikselis on tlatiochiualistli yejuan nechtokaroua” (1 Cor. 9:23). Pablo onochikauj kinmachtis oksekimej itech iTekiuajyo toTajtsin (xpoua Romanos 1:14, 15; 2 Timoteo 4:2). Pampa kitlasojtlaya tenojnotsas okipaleui nochipa matenojnotsa maski melak okitlaueltokakej (1 Tes. 2:2). ¿Kenon uelis tikixkopinaskej itlasojtlalis Pablo itech tenojnotsalistli?

9. ¿Kenon uelis tikteititiskej ika tiktlasojtlaj totenojnotsalis?

⁹ Se ken okiteititi Pablo ika kitlasojtlaya tenojnotsas ijkuak nochipa kitejtemouaya kenon kinnojnotsas oksekimej. Ijkon ken Pablo niman akin kachtopa okichiujkej ken Cristo, tejuamej noijki noneki titenojnotsaskej techajchan, kampa nemij miyekej niman san kanon kampa uelis nemiskej tlaltikpakchanejkej (Hech. 5:42; 20:20). Matiktejtemokan kenon uelis tikinnojnotsaskej miyekej tlaltikpakchanejkej. Niman tla tiuelij, matochiuakan precursores auxiliares noso regulares. Noso uelis tomachtiskej okse tlajtojli, tiaskej oksekan tontlapaleuiskej noso hasta tiaskej ipan okse país (Hech. 16:9, 10).

10. ¿Tlenon tlateochiualistin yokipix Irene pampa yonochikauj tenojnotsas?

¹⁰ Se tokniuj itoka Irene, akin iselti nemi niman chanej Estados Unidos, kinekiya kinnojnotsas akin tlajtouaj ruso. Kuakon ipan xiuitl 1993, opeuj tlapaleuiya ipan se grupo ika tlajtojli ruso ipan Nueva York. Ipan yejon tonaltin, san nemiyaj 20 tenojnotskej ipan yejon grupo. Aman, 20 xiuitl sakin, Irene kijtoua: “Ok xnitlajtoua ruso ken noneki”. San ika, Jehová yokipaleui yejua niman oksekimej matenojnotsakan ika yejon tlajtojli. Ika yejon, ipan yejuin tonajli onka chikuasen tlanechikoltin ika tlajtojli ruso ipan Nueva York. Irene yonomachti Biblia iuan miyekej tlaltikpakchanejkej niman 15 yonoapolaktijkej. Sekimej itech yejuamej tlapaleuiyaj ken betelitas, precursores niman tlayekankej. Irene kijtoua: “Ijkuak niknemilia okse tlen uelis nikchiuaskia, xueli niknextia itlaj okse tlen ueliskia ijkin nechyolpaktis”. ¡Irene melak kitlasojkaita itenojnotsalis!

11. ¿Tlenon kuajli onkisa ijkuak xtijkauaj ika titenojnotsaj maski techtlaueltokaj?

¹¹ Tla tiktlasojkaitaj totenojnotsalis, tochiuaskej ijkon ken Pablo niman xtijkauaskej ika titenojnotsaskej maski ijkuak techtlaueltokaskej (Hech. 14:19-22). Se neskayotl, itech xiuitl 1930 niman 1944, tokniuan ipan Estados Unidos melak okitlaueltokakej. San ika, xokikajkaujkej tenojnotsaskej. Ijkuak tekiuajkej okiyejyekojkej kinteltiskej tokniuan oyajkej ipan tribunal niman miyekpa otetlankej. Ipan xiuitl 1943, tokniuj Nathan H. Knorr otlajto itech se ken otetlankej ipan Tribunal Supremo de Estados Unidos. Yejua okijto ika xueliskia panos yejuin tla tokniuan kikajkauaskiaj ika tenojnotsaskej. Noijki okijto ika ipampa yejuin, miyekej tokniuan  ipan nochi tlaltikpaktli xkikajkaua ika tenojnotstokej niman teititiaj ika xkinteltia maski kintlaueltokaj. Tokniuan ipan oksekime países noijki ijkon yotetlankej ipan tribunales. Kema, totlasojtlalis itech tenojnotsalistli kichiuas ika maka matikajkauakan titenojnotsaskej maski techtlaueltokaj.

12. ¿Tlenon yotiknemili tikchiuas?

¹² Ijkuak tiktlasojkaitaj totenojnotsalis, xsan tajmanaskej itech kech horas tikchiuaj ipan se metstli. Tajmanaskej ika tikchiuaskej nochi tlen tiueliskej niman ijkon kuajli tiktetomiliskej “yejon kuajli tlajtoltin itech iueyiteiknelilis toTajtsin” (Hech. 20:24, TNM; 2 Tim. 4:5). San ika ¿tlenon tikinmachtiskej oksekimej? Matikitakan okse tlen patioj techmaka toTajtsin.

13, 14. ¿Tlenon yejon “tlen patioj” okiteneuj Jesús ipan Mateo 13:52 niman kenon tikchiuaskej mamiyekiya?

¹³ Nochi tlen melauak yotomachtijkej ika yeyi tlen patioj tlen Jehová yotechmakak. Tlen melauak ualeua itech Jehová (2 Sam. 7:28; Sal. 31:5). ToTajtsin kineki techmakas yejon tlen melauak pampa kuelita kitemakas tlen kipiya. Ika yejon, yotomachtijkej miyek itech yejon tlen melauak ijkuak tikpouaj iTlajtol, toamatlajkuiloluan, ijkuak tiauej ipan uejueyimej tlanechikoltin niman ipan tlanechikoltin tlen tikinpiyaj nochi semanas. Ijkon yotomachtijtiajkej miyek tlen melauak, niman ueli tikpiyaj tlen Jesús okitokayoti “tlen patioj” itech tlen melauak “tlen yenkuik niman tlen xyenkuik” (xpoua Mateo 13:52). * Tla tiktejtemouaj tlen melauak ijkon ken tiktejtemos tlen patioj iyantika, Jehová techpaleuis matikpiyakan miyek “tlen patioj” (xpoua Proverbios 2:4-7). * ¿Kenon tikchiuaj yejon?

¹⁴ Noneki tomachtiskej Biblia niman toamatlajkuiloluan nochipa niman matikasikamatikan tlen tomachtiaj. Yejuin techpaleuis matiknextikan “yenkuik” tlen melauak tlen xtikmatiyaj (Jos. 1:8, 9; Sal. 1:2, 3). Kachtopa revista itech Amatl Tekakistilijketl, okis ipan julio xiuitl 1879, okijto ika tlen melauak kentla se xochitl tlen iyantika itsajlan miyek xkuajli xiujtli. Tla yakaj kinekij kinextis se xochitl, noneki melak kuajli kitejtemos. Niman ijkuak kinextis, xkipaktis kipiyas san se xochitl. Noneki xnokajkauas ika kitejtemos niman ijkon kinextis miyek xochitl. Noijki ijkon, xsan noneki tipakiskej san ika se tlamachtijli tlen melauak tlen yotiknextijkej. Noneki nochipa matiktejtemojtokan miyek okseki tlen melauak.

15. ¿Tleka uelis tiktokayotiskej seki tlen melauak “tlen xyenkuik”, niman katlejua melak tiktlasojkaita tejua?

¹⁵ Ijkuak opeuj tomachtiaj Biblia, otikixmatkej seki tlen melauak tlen kualtsin. Uelis tiktokayotiskej tlen melauak “xyenkuik” pampa yejon tlen kachtopa otikixmatkej. ¿Katlejua seki itech tlen melauak yotikixmatkej? Kachtopa, otikixmatkej ika Jehová yejua akin otexchijchiuj niman tlenon kichiuas ipampa tlaltikpakchanejkej. Noijki yotomachtijkej ika toTajtsin okuajtitlan ikonetsin ipan tlaltikpaktli niman ijkon mamikiki ken se tlaxtlauijli tlen techmakixtiskia itech tlajtlakojli niman mikilistli. Niman noijki yotomachtijkej ika iTekiuajyo toTajtsin kipopolos nochi tlajyouilistli niman ika uelis tinemiskej nochipa ipan tlaltikpaktli ika yolseuilistli niman  pakilistli (Juan 3:16; Apoc. 4:11; 21:3, 4).

16. ¿Tlenon noneki tikchiuaskej ijkuak nopatla ken tikasikamatij tlen melauak itech Biblia?

¹⁶ Kemantika, nopatla ken tikasikamatij se teotlajtojli noso se texto itech Biblia. Ijkuak yejon panoua, melak noneki matikxelokan tiempo tomachtiskej niman titlanemiliskej itech yenkuik tlamachtijli (Hech. 17:11; 1 Tim. 4:15). Xsan noneki tikasikamatiskej tleka tlen yenkuik xsan noijki ken tikasikamatiyaj yeuejkaui, noijki noneki kuajli matikitakan nochi tlamachtijli itech tlen aman tikasikamatij. Tla tikchiuaj yejuin, techpaleuis mamiyekiya tlamachtiltin tlen melauak itech Biblia ipan tonemilis. ¿Tleka melak techpaleuis tla tochikauaj tikchiuaskej yejon?

17, 18. ¿Kenon uelis techpaleuis espíritu santo?

¹⁷ Jesús otemachti ika iespíritu santo toTajtsin uelis techpaleuis matikilnamikikan tlen yotomachtijkej yeuejkaui (Juan 14:25, 26). ¿Kenon uelis techpaleuis espíritu santo ijkuak titenojnotsaj? Xtlanemili itech tlen ipan onochiuj se tokniuj itoka Peter. Ipan xiuitl 1970, yejua kipiaya 19 xiuitl niman san kemach yopeujka tlapaleuiya ipan Betel tlen onka Gran Bretaña. Peter tenojnotstinemiya techajchan niman okinextito se tlakatl akin tentsone iueyi katka. Kuakon okitlajtolti yejon tlakatl tla kuelitaskia kasikamatis Biblia. Yejon tlakatl katka judío niman xueli kineltokaya ika se telpochtli kinemiliaya kimachtis itech Biblia. Pampa yejon tlakatl kinekiya kitlatlatas Peter, okitlajtolti: “Xnechijli, telpochtli, ¿ika tlenon tlajtojli onoijkuilo amoxtli Daniel?”. Yejua okinankili: “Seki onoijkuilo ika tlajtojli arameo”. Peter kilnamiki: “Yejon tlakatl melak otlamojkaitak ika onikmat ken niknankilis, san ika, ¡xijkon ken nejua! ¿Kenon onikmat tlen onechtlajtolti? Ijkuak oninokuep nochan niman onikitak revistas Amatl Tekakistilijketl niman ¡Despertad! itech metstin tlen yopanoka, oniknexti se tlamachtijli tlen kijtouaya ika Daniel onoijkuilo ika Arameo” (Dan. 2:4, nota). Kema, iespíritu santo toTajtsin uelis techpaleuis matikilnamikikan tlen yotikpoujkaj niman kentla tlen patioj yotikejyeujka yeuejkaui (Luc. 12:11, 12; 21:13-15).

¹⁸ Tla tiktlasojtlaj tlen melauak tlen yotikixmatkej itech Jehová niman tiktlasojkamatij yejon, tiknekiskej tikmiyekiliskej yejon tlamachtijli itech tlen patioj tikpiyaj. Ijkuak melak tikchiuaskej yejuin, melak techyektlalis kuajli matikinmachtikan oksekimej.

19. ¿Tleka melak noneki matiktlajpiyakan tlen patioj techmaka toTajtsin?

¹⁹ Ipan yejuin tlamachtijli, yotomachtijkej ika melak ueyi kijtosneki matiktlasojkaitakan tlen patioj techmaka toTajtsin. San ika, melak noneki maka matijkauilikan ika Satanás niman tlen kiyekana makichiuakan mapopoloui totlasojtlalis itech tlen tiktlasojkaitaj. Tla xtotlajpiyaj, uelis peuas techyoltilanas ijkuak techtekiuiltiskej se tekitl kampa techtlaxtlauiliskej miyek tomin noso tinemiskej ika miyek tlemach tlen patioj. Juan, itlatitlankauj Cristo, otechmelajkaijli ika tlen onka ipan yejuin tlaltikpaktli niman tlen techtekiuiltia xok uejkauis popoliuis (1 Juan 2:15-17). Ika yejon, melak noneki nochipa matiktlasojkamatikan niman matiktlajpiyakan tlen patioj techmaka toTajtsin.

20. ¿Tlenon yotiknemili tikchiuas niman ijkon tiktlajpiyas tlen patioj techmaka toTajtsin?

²⁰ Matiknekikan tikmapeuaskej nochi tlen uelis kichiuas mapopoliui totlasojtlalis itech Tekiuajyotl. Matiknekikan titenojnotsaskej ika yolchikaualistli niman maka keman matikpolokan totlasojtlalis itech totenojnotsalis. Nochipa matiktejtemokan tomachtiskej okseki tlen melauak itech Biblia. Ijkuak tikchiuaskej yejuin, tiksentlaliskej “riquezas ne iluikak [...], niman kampa on tlachteketl xuelis kalakis nion itlakuanyo konixpolos. Tla ijkon, tej, kampa nenkipiaskej nemoriquezas, no ompa nenkipiaskej nemoyojlo” (Luc. 12:33, 34).