1, 2. (a) Ke matlotlo afe a mararo a moya ao Jehofa a re filego ona? (b) Re tlo ahlaahla’ng sehlogong se?

GA GO na motho yo a humilego go swana le Jehofa. (1 Dikor. 29:11, 12) Ka ge e le Tate yo a ratago go fa, o nea batho ka moka mahumo a moya, bao ba lemogago bohlokwa bja ona. Ruri re leboga gore Jehofa o re file matlotlo a moya ao a akaretšago (1) Mmušo wa Modimo, (2) modiro wa rena wa go phološa maphelo le (3) ditherešo tše bohlokwahlokwa tšeo re di hwetšago ka Lentšung la gagwe! Lega go le bjalo, ge e ba re sa hlokomele, re ka tlogela go bontšha gore re tšeela godimo mahumo a a moya, ge e le gabotse, re ka a loba. E le gore re dule re na le ona, re swanetše go a diriša gabotse gomme ka mehla re lwele go a rata le go feta. Jesu o itše: “Moo letlotlo la lena le lego gona, le dipelo tša lena di tla ba gona moo.”—Luka 12:34.

² Anke re ahlaahleng kamoo re ka ratago Mmušo wa Modimo, modiro wa go bolela ditaba tše dibotse le therešo ya Beibele, gotee le kamoo re ka dulago re rata dilo tše le go di tšeela godimo. Ge re dutše re dira bjalo, naganišiša ka seo wena o ka se dirago gore o rate matlotlo a a moya le go feta.

3. Ke’ng seo mmapatši wa seswantšhong sa Jesu a bego a ikemišeditše go se dira e le gore a hwetše perela e bohlokwa kudu? (Bona seswantšho seo se lego mathomong a sehlogo.)

³ Bala Mateo 13:45, 46. Jesu o ile a bolela ka seswantšho sa mabapi le mmapatši yo a bego a tsoma diperela. Go theoša le mengwaga, ga go pelaelo gore mmapatši yo o be a dutše a reka diperela tše makgolo le go di rekiša. Eupša ga bjale o be a hweditše perela e botse kudu yeo e lego gore ge a be a e lebelela o be a thaba kudu. Eupša e le gore a e reke, o be a tla swanelwa ke go rekiša dilo ka moka tšeo a bego a na le tšona. Se se bontšha gore perela yeo e be e le bohlokwa kudu go yena!

4. Ke’ng seo re tlago go se dira ge e ba re rata Mmušo wa Modimo go swana le ka tsela yeo mmapatši a bego a rata perela yeo a bego a e hweditše?

⁴ Re ithuta’ng tabeng ye? Re ithuta gore therešo ya Mmušo wa Modimo e swana le perela yeo e bohlokwahlokwa. Ge e ba re e rata kudu go swana le ka tsela yeo mmapatši a bego a rata perela yeo, re tla tlogela selo se sengwe le se sengwe e le gore re be ba bangwe ba balata ba Mmušo wa Modimo le go dula re le bona. (Bala Mareka 10:28-30.) Anke re boleleng ka batho ba babedi bao ba ilego ba dira sona seo.

5. Sakeo o ile a bontšha bjang gore Mmušo wa Modimo o bohlokwa go feta dilo ka moka?

⁵ Sakeo e be e le molekgetho yo mogolo yo a bego a ikhumišitše ka go radia batho. (Luka 19:1-9) Lega go le bjalo, ge monna yoo wa moradia a be a ekwa Jesu a bolela ka Mmušo wa Modimo, o ile a lemoga gore seo Jesu a bego a se ruta se bohlokwa kudu gomme a sokologa ka yona nako yeo. O ile a re go Jesu: “Morena ke nea badiidi seripa sa dilo tša ka gomme se sengwe le se sengwe seo ke se hlakotšego motho ka go mo latofatša ka maaka, ke se bušetša gane.” Sakeo o ile a se be le bothata bja go tlogela mahumo ao a bego a a hweditše ka boradia le go rata dilo tše di bonagalago.

6. Rose o ile a dira diphethogo dife e le gore e be molata wa Mmušo wa Modimo, gona ke ka baka la’ng a ile a dira diphetogo tšeo?

⁶ Mengwageng e mmalwa e fetilego, kgarebe e itšego yeo re tlago go e bitša Rose, e ile ya botšwa molaetša wa mabapi le Mmušo wa Modimo. Ka nako yeo, Rose o be a ratana le kgarebe e nngwe. Le gona Rose e be e le mopresidente wa mokgatlo wo o bego o lwela gore banna ba go ratana le banna, le basadi ba go ratana le basadi ba amogelwe. Eupša ge Rose a dutše a ithuta Beibele, o ile a bona bohlokwa bja therešo ya Mmušo wa Modimo. O ile a lemoga gore o be a tla swanelwa ke go dira diphethogo bophelong bja gagwe. (1 Bakor. 6:9, 10) Pelo ya gagwe e ile ya mo tutueletša gore a tlogele go ba mopresidente wa mokgatlo woo le go se sa ratana le basadi. Rose o ile a kolobetšwa ka 2009, gomme ngwageng o latetšego a ba mmulamadibogo wa ka mehla. Ke ka baka la’ng Rose a dirile diphetogo tše? Ke ka gobane o be a rata Jehofa le Mmušo wa Gagwe kudu go feta dikganyogo le ge e le dife tša nama.—Mar. 12:29, 30.

7. Re swanetše go dira’ng gore re dule re rata Mmušo wa Modimo ka dipelo tša rena ka moka?

⁷ Ke therešo gore ba bantši ba rena re dirile diphetogo maphelong a rena e le gore re be balata ba Mmušo wa Modimo. (Baroma 12:2) Le ge re dirile bjalo, ga go felele moo. Re swanetše go dula re phafogetše dilo tšeo di ka utswago lerato la rena, e lego dilo tša go swana le go rata dilo tše di bonagalago goba dikganyogo le ge e le dife tša boitshwaro bjo bo gobogilego. (Die. 4:23; Mat. 5:27-29) E le gore re dule re rata Mmušo wa Modimo ka pelo ka moka, Jehofa o re file letlotlo le lengwe le bohlokwa kudu.

8. (a) Ke ka baka la’ng moapostola Paulo a boletše gore modiro wa rena wa go bolela ditaba tše dibotse ke “letlotlo le re le [swerego] ka dibjana tša letsopa”? (b) Paulo o ile a bontšha bjang gore o be a rata modiro wa go bolela ditaba tše dibotse?

⁸ Gopola gore Jesu o re neile mošomo wa go botša batho ditaba tše dibotse tša Mmušo wa Modimo le go ba ruta. (Mat. 28:19, 20) Moapostola  Paulo o ile a lemoga bohlokwa bjo bogolo bja modiro wo. O ile a hlalosa bodiredi bja kgwerano e mpsha e le “letlotlo le re le [swerego] ka dibjana tša letsopa.” (2 Bakor. 4:7; 1 Tim. 1:12) Gaešita le ge re sa phethagala gomme re swana le dibjana tša letsopa, molaetša wo re o botšago batho o ka dira gore rena le bao ba re theetšago re tle re hwetše bophelo bjo bo sa felego. Ka ge Paulo a be a tseba se, o itše: “Ke dira dilo tšohle bakeng sa ditaba tše dibotse, e le gore ke di abelane le ba bangwe.” (1 Bakor. 9:23) Ee, ka ge Paulo a be a rata modiro wa go bolela ditaba tše dibotse, seo se ile sa mo tutueletša go šoma ka thata gore a dire batho barutiwa. (Bala Baroma 1:14, 15; 2 Timotheo 4:2.) E bile seo se ile sa mo thuša gore a kgotlelele kganetšo e šoro. (1 Bathes. 2:2) Rena re ka bontšha bjang gore re rata modiro wa go bolela ditaba tše dibotse?

9. Re ka bontšha ka ditsela dife tše dingwe gore re rata go bolela ditaba tše dibotse?

⁹ Paulo o ile a bontšha ka tsela e nngwe gape gore o be a rata go bolela ditaba tše dibotse. O bontšhitše seo ka go diriša sebaka se sengwe le se sengwe go botša ba bangwe ditaba tšeo. Go swana le baapostola le Bakriste ba lekgolong la pele la mengwaga, le rena re botša batho ditaba tše dibotse ka ntlo le ntlo, mafelong a batho bohle le ka dinako tšohle. (Dit. 5:42; 20:20) Ge maemo a dumela, re nyaka ditsela tša go oketša tirelo ya rena, mohlomongwe ka go tšea bobulamadibogo bja go thuša goba bja ka mehla. Le gona re ka ithuta leleme le lengwe, ra hudugela lefelong le lengwe nageng ya gabo rena, goba mohlomongwe ra hudugela le nageng e šele.—Dit. 16:9, 10.

10. Jehofa o šegofaditše bjang maiteko a Irene a go botša batho ditaba tše dibotse?

¹⁰ Ela hloko mohlala wa Irene, e lego kgaetšedi yo a sa nyalwago wa kua United States. O be a duma go botša bafaladi bao ba bolelago Serussia ditaba tše dibotse. Ge a be a thoma go dira bjalo ka 1993, go be go na le feela bagoeledi ba e ka bago ba 20 sehlopheng sa Serussia kua New York City. Irene o ile a šoma ka thata tšhemong ya leleme leo ka mengwaga e 20. O re: “Gaešita le gona bjale ga ke kgone go bolela Serussia gabotse.” Lega go le bjalo, Jehofa o šegofaditše maiteko a gagwe le a bana babo rena ba bangwe ba go swana le yena. Lehono go na le diphuthego tše tshela tša Serussia kua New York City. Batho ba 15 ba bao Irene a ithutilego le bona Beibele ba ile ba kolobetšwa. Ba bangwe ba bona ba hlankela Bethele, ba bangwe ke babulamadibogo gomme ba bangwe ke bagolo. Irene o re: “Ge ke nagana ka dipakane tše dingwe tšeo nkabego ke ile ka di phegelela, ga go le e tee ya tšona yeo e bego e ka ntlišetša lethabo leo ke nago lona gona bjale.” Ruri Irene o tšeela godimo kudu modiro wa go bolela ditaba tše dibotse!

11. Go ba le mafelelo afe a mabotse ge re tšwela pele re bolela ditaba tše dibotse go sa šetšwe tlaišo?

¹¹ Ge e ba re rata modiro wa go bolela ditaba tše dibotse, re tla swana le moapostola Paulo, ra tšwela pele re bolela ditaba tše dibotse le ge re tlaišwa. (Dit. 14:19-22) Ka bo-1930 le mathomong a bo-1940, bana babo rena ba kua United States ba ile ba lebeletšana le tlaišo e šoro. Lega go le bjalo, go  swana le Paulo, ba ile ba ema ba tiile gomme ba tšwela pele ba bolela ditaba tše dibotse. Bana babo rena ba ile ba ya dikgorong tša tsheko ka makga a mantši e le gore ba lwele tshwanelo ya rena ya go bolela ditaba tše dibotse. Ka 1943, ge Ngwanabo rena Nathan H. Knorr a be a bolela ka molato o mongwe woo ba ilego ba o fenya Kgorongkgolo ya Tsheko ya kua U.S., o itše: “Re fentše dintwa tše ka baka la thušo ya lena. Ge nkabe le ile la tlogela go bolela ditaba tše dibotse, nkabe re sa ya Kgorongkgolo ya Tsheko; eupša ka baka la ge le ile la tšwela pele le bolela ditaba tše dibotse, bana babo rena lefaseng ka moka le bona ba tšwela pele ba di bolela, e bile ba ka se tlogele go di bolela go fihlela ba fenya dikgorong tša tsheko. Go ema ga batho ba Morena ba tiile ke gona go dirago gore mafelelong ba fenye.” Ka ge bana babo rena ba dinageng tše dingwe ba ile ba ema ba tiile, le bona ba ile ba fenya dikgorong tša tsheko. Ee, ge e ba re rata go bolela ditaba tše dibotse, re tla kgona go kgotlelela tlaišo.

12. Maikemišetšo a gago ke afe ge o bolela ditaba tše dibotse?

¹² Ge re lebelela go bolela ditaba tše dibotse e le letlotlo le bohlokwahlokwa leo re le neilwego ke Jehofa, re ka se kgotsofatšwa feela ke gore re dirile diiri tše kae tšhemong. Go e na le moo, re tlo dira sohle seo re ka se kgonago gore re “hlatsele ka botlalo ditaba tše dibotse.” (Dit. 20:24; 2 Tim. 4:5) Eupša ke’ng seo re tlago go se ruta batho? Ela hloko letlotlo le lengwe leo Modimo a re neilego lona.

13, 14. ‘Bobolokelo bja letlotlo’ bjo Jesu a boletšego ka bjona go Mateo 13:52 ke eng, gona re bo tlatša bjang?

¹³ Letlotlo la boraro la moya ke ditherešo tšeo Modimo a re utolletšego tšona. Jehofa ke Modimo wa therešo. (2 Sam. 7:28; Ps. 31:5) Ka ge e le Tate yo a ratago go fa, o ruta bohle bao ba mmoifago ditherešo tša gagwe. Go tloga ge re be re ekwa therešo la mathomo, re bile le sebaka sa go kgoboketša ditherešo tšeo di lego ka Lentšung la gagwe e lego Beibele, ka dikgatišong tša rena tša Bokriste, dikopanong tša rena tše dikgolo le tše dinyenyane le dibokeng tša rena tša beke le beke. Ge nako e dutše e eya, re ba le seo Jesu a se hlalositšego e le ‘bobolokelo bja letlotlo’ bja ditherešo tša kgale le tše mpsha. (Bala Mateo 13:52.) Jehofa o tla re thuša go tsenya ka ‘bobolokelong bja rena bja matlotlo’ ditherešo tšeo tše difsa ge e ba re di tsoma bjalo ka ge eka re tsoma matlotlo a utilwego. (Bala Diema 2:4-7.) Ditherešo tšeo re di tsoma bjang?

¹⁴ Re swanetše go ba le thuto e botse ya motho ka noši le go dira nyakišišo ka šedi ka Lentšung la Modimo le ka dikgatišong tša rena. Seo se tla re thuša go hwetša ditherešo tšeo re ka rego ke tše difsa ka kgopolo ya gore re be re sa di tsebe. (Josh. 1:8, 9; Ps. 1:2, 3) Tokollo ya mathomothomo ya makasine wo, yeo e gatišitšwego ka July 1879, e itše: “Go swana le letšobana leo le golago ka gare ga mefoka lešokeng, therešo le yona e ka gare ga maaka ao a lego kgauswi le go e bipa. Gore o hwetše letšobana leo, o swanetše go ntšha mahlo dinameng. . . . Ge o le hweditše, o swanetše go inama gore o le kge. O se ke wa fo kgotsofatšwa ke gore o kgele letšobana letee. . . . Dula o tsoma a mangwe. Go bjalo le ka therešo yeo e lego ka Lentšung la Modimo.” Re swanetše go dula re nyaka go tlatša bobolokelo bja matlotlo a rena ka ditherešo tša Modimo.

15. Ke ka baka la’ng re ka bolela ka ditherešo tše dingwe gore ke “dilo tša kgale,” gona ke dife tšeo di go kgahlago kudu?

¹⁵ Re hweditše ditherešo tše bohlokwahlokwa ge re be re thoma go kopanela le batho ba Modimo. Re ka bolela gore ditherešo tšeo ke “dilo tša kgale” ka kgopolo ya gore re thomile go di tseba le go di tšeela godimo ge re be re thoma go ba Bakriste. Tše dingwe tša ditherešo tšeo ke dife? Re ithutile gore Jehofa ke Mmopi wa rena le Monei wa Bophelo le gore o na le morero ka batho. Le gona re ithutile gore Modimo ka lerato o re neile Morwa wa gagwe gore a re hwele e le gore a re lopolle sebeng le lehung. Go oketša moo, re ithutile gore Mmušo wa Modimo o tla fediša mathata ka moka  le gore re na le kholofelo ya go tlo phela ka mo go sa felego ka khutšo le ka lethabo ge Mmušo woo o tla be o buša.—Joh. 3:16; Kut. 4:11; 21:3, 4.

16. Re swanetše go dira’ng ge ditherešo tše itšego di hlaloswa lefsa?

¹⁶ Nako le nako tsela yeo re kwešišago boporofeta bjo itšego bja Beibele goba ditemana tše dingwe tša Mangwalo e ka fetošwa. Ge diphetogo tšeo di dirwa, re swanetše go ipha nako ya go ithuta tšona ka kelohloko le go naganišiša ka tšona. (Dit. 17:11; 1 Tim. 4:15) Ga re nyake feela go kwešiša diphethogo tše dikgolo tšeo di dirwago, eupša re nyaka le go kwešiša kamoo tlhaloso ya kgale e fapanago ka gona le e mpsha. Ge re dira bjalo, re tla kgona go tsenya therešo e mpsha ka bobolokelong bja rena bja matlotlo. Ke ka baka la’ng re swanetše go dira bjalo?

17, 18. Moya o mokgethwa o ka re thuša bjang?

¹⁷ Jesu o rutile gore moya wa Modimo o ka re gopotša dilo tšeo re ithutilego tšona. (Joh. 14:25, 26) Ka ge re botša ba bangwe ditaba tše dibotse, seo se ka re thuša bjang? Nagana ka mohlala wa ngwanabo rena yo mongwe yo a bitšwago Peter. Ka 1970 o be a na le mengwaga e 19 gomme a sa tšwa go thoma go hlankela legaeng la Bethele kua Brithania. Ka letšatši le lengwe ge a be a bolela ditaba tše dibotse ka ntlo le ntlo, o ile a kopana le monna yo a bego a na le ditedu tše ditelele. Peter o ile a botšiša monna yoo ge e ba a ka rata go ithuta Beibele. A maketše, monna yoo o ile a botša Peter gore o tsene ka lapeng la baruti ba Bajuda. Monna yoo o ile a leka Peter go bona ge e ba a tseba Mangwalo ka go mmotšiša gore: “Mpotše mo mošemane ke wena, mathomong puku ya Daniele e be e ngwadilwe ka leleme lefe?” Peter o ile a araba ka gore: “Karolo e nngwe ya yona e be e ngwadilwe ka Searama.” Peter o gopola ka gore: “Moruti yoo o ile a makatšwa ke gore ke tsebile karabo—eupša yo a bego a maketše le go feta ke nna! Ke ile ka ipotšiša gore ke tsebile bjang karabo! Ge ke fihla gae, ke ile ka lebelela dimakasine tša Morokami le Phafoga! tša dikgweding tše di fetilego gomme ka hwetša sehlogo seo se hlalosago gore mathomong puku ya Daniele e be e ngwadilwe ka Searama.” (Dan. 2:4) Ee, moya o mokgethwa o ka re gopotša dilo tšeo re kilego ra ithuta tšona le tšeo re di tsentšego ka bobolokelong bja rena bja matlotlo.—Luka 12:11, 12; 21:13-15.

¹⁸ Ge e ba re tšeela godimo bohlale bjo Jehofa a re neago bjona, dipelo tša rena di tla re tutueletša go tlatša bobolokelo bja rena bja matlotlo ka ditherešo tša Beibele—tše mpsha goba tša kgale. Ge re dutše re rata kudu bohlale bjo Jehofa a re neago bjona le go bo tšeela godimo, re tlo kgona go ruta batho ditaba tše dibotse.

19. Ke ka baka la’ng re swanetše go šireletša matlotlo a rena a moya?

¹⁹ Ka mehla Sathane le batho ba gagwe ba nyaka gore lerato leo re ratago matlotlo a moya ao re boletšego ka ona sehlogong se le fole, goba ba nyaka gore re se sa a rata. Se se ka diragalela yo mongwe le yo mongwe wa rena. Re ka tanywa gabonolo ge re ka tshepišwa mošomo wa maemo, go phela bophelo bja maemo, goba go nyaka go bontšha ba bangwe gore re a ikgona. Moapostola Johane o re gopotša gore lefase le le a feta le kganyogo ya lona. (1 Joh. 2:15-17) Ka gona re swanetše go šoma ka thata gore re dule re rata mahumo a moya le go a tšeela godimo, go e na le go rata dilo tša lefase.

20. O tlo dira’ng gore o šireletše mahumo a gago a moya?

²⁰ Tlogela selo se sengwe le se sengwe seo se ka go šitišago go rata Mmušo wa Modimo ka pelo ka moka. Tšwela pele o bolela ditaba tše dibotse ka mafolofolo, gomme o dule o tšeela godimo modiro wa rena wa go phološa maphelo. Tšwela pele o tsoma ditherešo tšeo di lego ka Lentšung la Modimo. Ge o dutše o dira bjalo, o tla ipolokela “letlotlo le le sa felego le ka mohla magodimong moo lehodu le sa fihlego le moo tshwele e sa jego. Gobane moo letlotlo la [gago] le lego gona, le [pelo ya gago e] tla ba gona moo.”—Luka 12:33, 34.