1, 2. а) Йеговӕ нин цӕхуӕн ӕртӕ хӕзнай балӕвар кодта? б) Аци статьяй цӕбӕл дзордзиан?

ДУН-ДУЙНЕЙ Йеговӕй гъӕздугдӕр неке ӕй, уомӕн ӕма алцидӕр уой къохи ӕй (1 Анз. 29:11, 12). Фал Йеговӕ хӕларзӕрдӕ Фидӕ ке ӕй, уомӕ гӕсгӕ еци хӕзнатӕй махӕн дӕр фӕххай кодта ӕма си уой туххӕй хъӕбӕр боз ан. Еци хӕзнатӕмӕ хауй 1) Хуцауи Паддзахадӕ, 2) нӕ лӕггадӕ ӕма 3) Хуцауи Дзурди ци рӕстдзийнадӕ иссирдтан, е. Фал лӕмбунӕг ку нӕ уӕн, уӕд, гӕнӕн ес, ӕма еци хӕзнатӕн мабал аргъ кӕнӕн ӕма сӕ фесафӕн. Цӕмӕй уотӕ ма рауайа, уой туххӕй син гъӕуама идарддӕр дӕр аргъ кӕнӕн, уомӕн ӕма Киристе загъта: «Уӕ хӕзна кӕми уа, уоми уодзӕнцӕ уӕ зӕрдитӕ дӕр» (Лук. 12:34).

² Мадта ӕркӕсӕн, нӕ бон куд ӕй ӕвдесун, Хуцауи Паддзахади, нӕ лӕггади ӕма Библий рӕстдзийнади туххӕй Йеговӕй боз ке ан, уой. Ӕма расагъӕс кӕнӕн, еци хӕзнатӕн никки фулдӕр аргъ кӕнун нӕ бон куд ӕй, уобӕл.

3. Киристе ке кой ракодта, еци лӕг еунӕг згъӕрдор балхӕнуни туххӕй цӕттӕ цӕмӕ адтӕй? (Кӕсӕ хузӕмӕ статьяй райдайӕни.)

³ Бакӕсӕ Матфеййи 13:45, 46. Йесо радзурдта, згъӕрдортӕ (жемчуг) ка агурдта ӕма сӕ ка уӕйӕ кодта, уӕхӕн лӕги хабар. Еу бон иссирдта, уингӕ дӕр ке некӕд ма фӕккодта, уӕхӕн хъазар згъӕрдор. Ӕма цӕмӕй еци згъӕрдор балхӕдтайдӕ, уой туххӕй ниууӕйӕ кодта, цидӕриддӕр имӕ адтӕй, уой. Расагъӕс кӕнӕ, еци дор ин куд хъазар адтӕй!

4. Хуцауи Паддзахадӕн ке аргъ кӕнӕн, е цӕмӕй бӕрӕг уодзӕй?

⁴ Еци хабарӕй цӕбӕл ахур кӕнӕн? Хуцауи Паддзахади туххӕй рӕстдзийнадӕ ӕй хъазар згъӕрдори хузӕн. Ӕма ин мах дӕр, еци нӕлгоймаг згъӕрдорӕн куд аргъ кодта, уотӕ ку аргъ кӕнӕн, уӕд цийфӕнди дӕр ратдзиан, цӕмӕй еци Паддзахади лӕггадгӕнгутӕ исуӕн ӕма алкӕддӕр ӕ дӕлбарӕ уӕн. (Бакӕсӕ Марки 10:28–30.) Ӕркӕсӕн, уотӕ ка бакодта дууӕ уӕхӕн адӕймагей хабармӕ.

5. Закхей Хуцауи Паддзахади туххӕй ци бакодта?

⁵ Закхей адтӕй хъалонӕмбурдгӕнгути хецау. Е адӕнӕй берӕ ӕхца бастъигъта, ӕма уотемӕй исгъӕздуг ӕй (Лук. 19:1–9). Фал еухатт Киристейӕй фегъуста Хуцауи Паддзахади хабар. Е ӕ зӕрдӕмӕ уотӕ багъардта, ӕма исфӕндӕ кодта ӕ цард раййевун. Закхей Йесойӕн загъта: «Хецау, мӕ мулкӕн е ’мбес ратдзӕн мӕгуртӕн, ӕма хӕранӕй кӕмӕй ци байстон, уомӕн ӕй цуппар уӕхӕнемӕй бафеддзӕн». Адӕнӕй цидӕриддӕр ӕхца байста, уой син фӕстӕмӕ равардта ӕма раздӕри хузӕн ӕхцауарзагӕ адӕймаг нӕбал адтӕй.

6. Еу силгоймаг ӕ царди цӕхуӕн ӕййивддзийнӕдтӕ искодта ӕма цӕмӕн?

⁶ Еу силгоймаг Хуцауи Паддзахади хабар ку нӕма базудта, уӕд силгоймаги хӕццӕ лӕг ӕма уоси цард кодта, удта ма адтӕй, гомосексуалистити бартӕбӕл ка тох кодта, уӕхӕн организаций президент дӕр. Фал Библи ахур кӕнун ку райдӕдта, уӕд райдӕдта Хуцауи Паддзахадӕн аргъ кӕнун ӕма ’й балӕдӕрдтӕй, ӕ царди ’й устур ӕййивддзийнӕдтӕ искӕнун ке гъӕуй (1 Кор. 6:9, 10). Еци силгоймаг е ’нӕгъдау цард ниууагъта, удта президент кӕми адтӕй, еци организацийӕй дӕр рандӕ ’й. 2009 анзи райста донаргъуд, иннӕ анз ба райдӕдта пионерӕй лӕггадӕ кӕнун. Йегови берӕ уарзта, ӕма ин еци уарзт бауӕри монцтӕй хъаурӕгиндӕр адтӕй (Мар. 12:29, 30).

7. Ци гъӕуама кӕнӕн, цӕмӕй Хуцауи Паддзахадӕн алкӕддӕр аргъ кӕнӕн?

⁷ Беретӕ ни царди хъӕбӕр устур ӕййивддзийнӕдтӕ искодтонцӕ, цӕмӕй Хуцауи Паддзахади лӕггадгӕнгутӕ иссайуонцӕ (Ром. 12:2). Фал нӕ гъуддаг уобӕл не ’рлӕудтӕй. Гъӕуама идарддӕр дӕр нӕхемӕ кӕсӕн ӕма ма бауадзӕн, цӕмӕй ӕхцай кенӕ ӕнӕгъдау фӕндти туххӕй Хуцауи Паддзахадӕн мабал аргъ кӕнӕн (Ӕмб. 4:23; Матф. 5:27–29). Цӕмӕй уотӕ ма рауайа, уой туххӕй ма нин Йеговӕ еу хъазар хӕзна дӕр равардта.

8. а) Апостол Павел нин нӕ лӕггадӕ, «ӕргъӕ дзаумауи» ке дарай, уӕхӕн хӕзнай хӕццӕ цӕмӕн рабарста? б) Павел ӕ лӕггадӕн аргъ ке кодта, е цӕмӕй бӕрӕг адтӕй?

⁸ Киристе нин бафӕдзахста, цӕмӕй адӕнӕн Хуцауи Паддзахади хабар игъосун кӕнӕн ӕма сӕ ахур кӕнӕн (Матф. 28:19, 20). Апостол Павел загъта, зӕгъгӕ, еци гъуддаг нин ӕй, ӕргъӕ дзаумати ке дарай, уӕхӕн хӕзнай хузӕн (2 Кор. 4:7; 1 Тим. 1:12). Ӕнӕнхӕст ке ан, уомӕ гӕсгӕ мах дӕр ӕнгъезуй рабарун, ӕргъӕй конд дзаумай хӕццӕ. Фал ци хабар игъосун кӕнӕн, е ба ӕй хъазар хӕзнай хузӕн, уомӕн ӕма ӕносон цардмӕ кӕнуй мах дӕр, удта нӕмӕ ка байгъосуй, уони дӕр. Павел дӕр уой туххӕй загъта: «Уони еугурейдӕр кӕнун хуарз хабари туххӕй, цӕмӕй ӕй иннетӕн игъосун кӕнон» (1 Кор. 9:23). Павел Хуцауи Паддзахади хабар иннетӕн зингзӕрдӕй дзурдта. (Бакӕсӕ Ромӕгтӕмӕ 1:14, 15; 2 Тимофеймӕ 4:2.) Ӕ лӕггадӕн уотӕ хъӕбӕр ке аргъ кодта, уой фӕрци карз ӕфхуӕрд ӕййафгӕй дӕр нӕ басастӕй (1 Фес. 2:2). Махӕн ба цума нӕ бон куд ӕй Павели хузӕн нӕ лӕггадӕн аргъ кӕнун?

9. Нӕ лӕггадӕн ке аргъ кӕнӕн, е цӕмӕй бӕрӕг уодзӕй?

⁹ Павел алли фадуатӕй дӕр пайда кодта, цӕмӕй иннетӕн хуарз хабар радзурдтайдӕ. Павел ӕма фиццаг ӕноси киристӕнтти хузӕн абони мах дӕр зингзӕрдӕй игъосун кӕнӕн хӕдзарӕй-хӕдзарӕмӕ ӕма, адӕнбӕл кӕмидӕриддӕр ӕмбӕлӕн, уоми (Гъуд. 5:42; 20:20). Нӕ бон ӕй нӕ лӕггадӕ фӕффулдӕр кӕнун, нӕ уавӕртӕ куд амонунцӕ, уомӕ гӕсгӕ, зӕгъӕн, ӕнхусгӕнӕг кенӕ ӕнхӕстрӕстӕг пионерӕй лӕггадӕ кӕнун. Нӕ бон ма ӕй ӕндӕр ӕвзаг исахур кӕнун ӕма фулдӕр ӕнхус кӕми гъӕуй, уордӕмӕ рандӕ ун, нӕхе бӕсти медӕг кенӕ ӕндӕр бӕсти (Гъуд. 16:9, 10).

10. Йеговӕ Ирэни лӕггадӕн куд райарфӕ кодта?

¹⁰ Еугонд Штаттӕй, еу ӕнӕцуд хуӕри Ирэн, зӕгъгӕ, фӕндадтӕй хуарз хабар игъосун кӕнун, уруссагау ка дзурдта, еци адӕнӕн. Уомӕ гӕсгӕ 1993 анзи райдӕдта Нью-Йорки уруссаг къуармӕ цӕун. Уӕди рӕстӕги си еу 20 игъосунгӕнӕгемӕй ӕндӕр н’ адтӕй. 20 анзей фӕсте Ирэн загъта: «Нур дӕр ма уруссагау дзӕбӕх нӕма дзорун». Фал Йеговӕ еци игъосунгӕнгутӕн райарфӕ кодта, гъема абони Нью-Йорки ес 6 уруссаг ӕмбурди. Ирэн Библи ке хӕццӕ ахур кодта, уонӕй 15 адӕймаги донаргъуд райстонцӕ. Кадӕртӕ си нур ӕнцӕ вефилӕгтӕ, пионертӕ ӕма хестӕр нӕлгоймӕгтӕ. Ирэн зӕгъуй: «Мӕ бон адтӕй мӕ рази ӕндӕр нисӕнттӕ дӕр исӕвӕрун, фал ӕй зонун, еунӕг дӕр мин си уойбӕрцӕ цийнӕдзийнадӕ ке не ’рхастайдӕ». Бӕрӕг ӕй, Ирэн ӕ лӕггадӕ устур хӕзнабӕл ке нимайуй.

11. Нӕ игъосун кӕнуни гъуддаг цийфӕнди ӕфхуӕрд ӕййафгӕй дӕр ке нӕ уадзӕн, е цӕхуӕн пайда ӕрхӕссуй?

¹¹ Нӕ лӕггадӕ хӕзнабӕл ку нимайӕн, уӕд мах дӕр апостол Павели хузӕн нифсгунӕй игъосун кӕндзиан, нӕ нихмӕ ку цӕуонцӕ, уӕддӕр (Гъуд. 14:19–22). Зӕгъӕн, еу  1930–1944 ӕнзти Еугонд Штатти хецауадӕ не ’нсувӕрти нихмӕ хъӕбӕр карзӕй цудӕй. Фал етӕ сӕ игъосун кӕнуни гъуддаг нӕ ниууагътонцӕ. Хецауадӕ сӕ бауорамунмӕ ку гъавта, уӕд ӕнсувӕртӕ тӕрхондонӕмӕ гъаст бадӕттиуонцӕ ӕма берӕ хӕттити тӕрхон рамолиуонцӕ. 1943 анзи ӕнсувӕр Нейтан Норр ӕ радзубундий еци тӕрхӕнттӕй еуей кой ку кодта, уӕд загъта, зӕгъгӕ, ӕнсувӕртӕ сӕ игъосун кӕнуни гъуддаг ку ниууагътайуонцӕ, уӕд Еугонд Штатти Сӕйраг тӕрхондонӕмӕ ке бадӕттӕн, уӕхӕн гъуддӕгтӕ дӕр нӕмӕ н’ адтайдӕ. Уой фӕрци, дан, берӕ ӕндӕр бӕстити дӕр Хуцауи адӕнӕн равардтонцӕ сӕребарӕй игъосун кӕнуни барӕ. Ӕндӕр бӕстити дӕр Йегови Ӕвдесӕнтӕ еци гъуддаги федар ке разиндтӕнцӕ, уой фӕрци берӕ уӕхӕн тӕрхӕнттӕ рамулдтонцӕ. Мадта нӕ лӕггадӕн ку аргъ кӕнӕн, уӕд нӕ игъосун кӕнуни гъуддаг нӕ ниууадздзиан, нӕ нихмӕ ку цӕуонцӕ, уӕддӕр.

12. Дӕ федар фӕндӕ ци ӕй?

¹² Нӕ лӕггадӕ, аргъ дӕр кӕмӕн нӕййес, уӕхӕн хӕзнабӕл ку нимайӕн, уӕд айдагъ сахӕттӕбӕл некӕд сагъӕс кӕндзиан. Фал не ’гас хъауритӕй архайдзиан, цӕмӕй «хуарз хабар адӕнӕн бӕстон игъосун кӕнӕн» (Гъуд. 20:24; 2 Тим. 4:5). Фал иннети куд ахур кӕнӕн? Ӕркӕсӕн, никкидӕр ма нӕмӕ Хуцауӕй цӕхуӕн хӕзнатӕ ес, уонӕй еуемӕ.

13, 14. Киристе Матфеййи 13:52 цӕхуӕн «къӕбеци» кой кодта ӕма ӕй нӕ бон куд ӕй идзаг кӕнун?

¹³ Йеговӕ нин ци хӕзнатӕ балӕвар кодта, уонӕй ӕртиккаг ӕй, ци рӕстдзийнадӕ базудтан, е. Йеговӕ ӕй рӕстдзийнади Хуцау (Пс. 31:5). Ӕма хӕларзӕрдӕ ке ӕй, уомӕ гӕсгӕ еци  рӕстдзийнадӕ махӕн дӕр базонун кодта. Берӕ цидӕртӕ базудтан, Библи ӕма нӕ публикацитӕ ке кастан, удта конгресстӕ ӕма ӕмбурдтӕмӕ ке цудан, уой фӕрци. Уотемӕй нин фӕззиндтӕй нӕхе хӕзнати «къӕбец». Еци къӕбец сабургай идзаг кодта, Киристей загъдау, «нӕуӕг ӕма зӕронд» хӕзнатӕй, гъома раги дӕр ӕма ӕрӕги дӕр ке базудтан, еци рӕстдзийнӕдтӕй. (Бакӕсӕ Матфеййи 13:52.) Йеговӕ нин ӕнхус кӕндзӕй, цӕмӕй нӕ хӕзнадонӕ идзаг кӕна. Уой туххӕй ба гъӕуама рӕстдзийнадӕ арф ӕртасӕн, цума римӕхст хӕзнатӕ агорӕн, уотӕ. (Бакӕсӕ Ӕмбесӕндтӕ 2:4–7.) Уой нӕ бон куд ӕй кӕнун?

¹⁴ Гъӕуама Библи ӕма нӕ публикацитӕ ӕдзох ӕма лӕмбунӕг ӕртасӕн. Уотемӕй базондзиан, раздӕр ке нӕ зудтан, уӕхӕн «нӕуӕг» цидӕртӕ (Йес. Н. 1:8, 9; Пс. 1:2, 3). 1879 анзи июли «Гъӕуайгӕнӕн мӕсуги» фиццаг номери рӕстдзийнадӕ барст цудӕй, хӕмпӕлти астӕу ка исирӕзтӕй, уӕхӕн дидинӕги хӕццӕ. Еу уӕхӕн дидинӕг ку иссерай, уӕд уобӕл не ’рлӕудзӕнӕ, фал ма никкидӕр агордзӕнӕ. Уотӕ мах дӕр, рӕстдзийнади дидингутӕй еу ку иссерӕн, уӕд гъӕуама уобӕл ма ӕрлӕууӕн, фал сӕ идарддӕр зингзӕрдӕй агорӕн. Гъе уотемӕй нӕ хӕзнадонӕ нӕуӕг хӕзнатӕй идзаг кӕндзиан.

15. Рӕстдзийнадӕ цӕхуӕн гъуддӕгти туххӕй базудтан, уонӕй еуӕй-еуети «зӕронд» исхонӕн цӕмӕн ес ӕма дин уӕлдай хъазар кӕцитӕ ’нцӕ?

¹⁵ Библи ахур кӕнун ку райдӕдтан, уӕд берӕ гъуддӕгти туххӕй рӕстдзийнадӕ базудтан. Еци гъуддӕгтӕ исхонӕн ес «зӕронд», уомӕн ӕма тӕккӕ фиццаг уони базудтан, зӕгъӕн, не Сфӕлдесӕг Йеговӕ ке ӕй ӕма имӕ адӕни туххӕй дессаги фӕндӕ ке ес, уой. Уомӕй уӕлдай ма базудтан, Хуцау ӕ Фурти зӕнхӕмӕ ке рарвиста, цӕмӕй ӕ цард нивонди ӕрхастайдӕ ӕма адӕни тӕрегъӕд ӕма мӕлӕтӕй фӕййервӕзун кодтайдӕ. Удта ма базудтан, Хуцауи Паддзахадӕ гъезӕмӕрттӕн кӕрон ке искӕндзӕй ӕма ӕносмӕ зӕнхӕбӕл фӕрнӕй ӕма амондгунӕй ке цӕрдзиан (Иоан. 3:16; Рарг. 4:11; 21:3, 4).

16. Библий пахампарӕдтӕ кенӕ кӕцидӕр стихтӕ ӕндӕрхузи лӕдӕрун ку райдайӕн, уӕд ци гъӕуама бакӕнӕн?

¹⁶ Рӕстӕгӕй-рӕстӕгмӕ Библий пахампарӕдтӕ кенӕ кӕцидӕр стихтӕ ӕндӕрхузи лӕдӕрун райдайӕн. Ӕма уӕд гъӕуама рӕстӕг иссерӕн, цӕмӕй еци ӕййивддзийнӕдтӕмӕ лӕмбунӕг ӕркӕсӕн ӕма сӕбӕл расагъӕс кӕнӕн (Гъуд. 17:11; 1 Тим. 4:15). Цӕхуӕндӕр стих кенӕ пахампарадӕ раздӕр куд лӕдӕрдтан ӕма ’й нур куд лӕдӕрӕн, айдагъ уой балӕдӕрун фагӕ нӕй, фал гъӕуама лӕмбунӕг рартасӕн, ӕндӕрхузи лӕдӕрун ӕй цӕмӕн райдӕдтан, уой. Лӕмбунӕг ку ӕртасӕн, уӕд, нӕ хӕзнадонӕ Хуцауи Дзурди нӕуӕг хӕзнатӕй идзаг кӕндзиан. Уотӕ архайун хуарз цӕмӕн ӕй?

17, 18. Сугъдӕг хъаурӕ нин куд ӕнхус кӕндзӕй?

¹⁷ Киристе куд дзурдта, уомӕ гӕсгӕ сугъдӕг хъаурӕ нин нӕ зӕрдӕбӕл ӕрӕфтаудзӕй, кӕддӕр ке базудтан, еци хабӕрттӕ (Иоан. 14:25, 26). Е нин  хуарз хабар игъосун кӕнгӕй куд банхус кӕндзӕй? Ӕркӕсӕн, еу ӕнсувӕр Питэри хабармӕ. 1970 анзи 19-анздзудӕй райдӕдта Британий Вефили лӕггадӕ кӕнун. Питэр хӕдзарӕй-хӕдзарӕмӕ ку игъосун кодта, уӕд рамбалдӕй еу 50-анздзуд рехӕгун нӕлгоймагбӕл ӕма ’й бафарста, нӕ дӕ фӕндадтайдӕ Библи хуӕздӕр базонун, зӕгъгӕ. Еци нӕлгоймаг дзиуиттаг раввин разиндтӕй ӕма имӕ хъӕбӕр дессаг фӕккастӕй, уӕхӕн ӕригон биццеу ин Библи амонунмӕ ке гъавуй, е. Ӕма ӕй цӕмӕй ракъаха, уой туххӕй ӕй бафарста: «Хуарз мӕ биццеу, зӕгъай мин мадта Данели киунугӕ кӕци ӕвзагбӕл финст ӕрцудӕй?» Питэр ин дзуапп равардта: «Ӕ еу хай финст ӕрцудӕй арамейаг ӕвзагбӕл». «Раввин хъӕбӕр фӕддес ӕй, ке ӕй зудтон, уобӕл,– зӕгъуй Питэр,– фал уомӕй хъӕбӕрдӕр ба мӕхуӕдӕг дес кодтон, кӕцӕй ӕй зудтон, уобӕл. Нӕхемӕ ку ’рцудтӕн, уӕд фӕстаг мӕйти «Ӕригъал уотӕ!» ӕма «Гъӕуайгӕнӕн мӕсуги» номертӕмӕ нӕуӕгӕй ӕркастӕн ӕма еци статья иссирдтон. Финст си адтӕй, Данели киунугӕ арамейаг ӕвзагбӕл финст ке ’рцудӕй, уой туххӕй» (Дан. 2:4) *. Бӕрӕг ӕй, сугъдӕг хъаурӕ нин багъӕуаги нӕ зӕрдӕбӕл ӕрлӕуун кӕндзӕй, раздӕр ке бакастан ӕма нӕ хӕзнадони ке ниввардтан, уой (Лук. 12:11, 12; 21:13–15).

¹⁸ Кӕд Йеговӕй ци рӕстдзийнадӕ базудтан, уомӕн аргъ кӕнӕн ӕма си уой туххӕй боз ан, уӕд нӕ хӕзнадонӕ идарддӕр дӕр идзаг кӕндзиан. Куд фулдӕр хӕзнатӕ ӕмбурд кӕнӕн, уотӕ иннети ахур кӕнунмӕ дӕр хуӕздӕр арӕхсдзиан.

19. Хуцауӕй лӕвӕрд хӕзнатӕ цӕмӕн гъӕуама гъӕуай кӕнӕн?

¹⁹ Аци статьяй базудтан Хуцауӕй лӕвӕрд хӕзнатӕн аргъ кӕнун куд ӕхсидзгӕ ӕй, уой. Фал гъӕуама хъӕбӕр лӕмбунӕг уӕн, цӕмӕй Сайтани ӕма аци дуйней фудӕй еци хӕзнатӕн минкъийдӕр аргъ кӕнун ма райдайӕн. Лӕмбунӕг ку нӕ уӕн, уӕд нӕ сагъӕстӕ фулдӕр уодзӕнцӕ, ӕхцагин кустбӕл ӕма гъӕздуг цардбӕл кенӕ нӕ есбонӕй нӕхе куд растауӕн, уобӕл. Апостол Иоанн разӕнгард кодта, цӕмӕй макӕд иронх кӕнӕн, аци дуйней цидӕриддӕр ес, етӕ ке фӕййевгъуйдзӕнцӕ, уой (1 Иоан. 2:15–17). Мадта гъӕуама Хуцауӕй лӕвӕрд хӕзнатӕн аргъ кӕнӕн ӕма сӕ гъӕуай кӕнӕн.

20. Цӕмӕй Хуцауӕй лӕвӕрд хӕзнатӕ багъӕуай кӕнай, уой туххӕй дӕ куд архайун гъӕуй?

²⁰ Хуцауи Паддзахадӕн минкъийдӕр аргъ ке туххӕй кӕндзиайтӕ, еци гъуддӕгтӕй уӕхе исуӕгъдӕ кӕнтӕ. Алкӕддӕр зингзӕрдӕй игъосун кӕнтӕ ӕма уӕ лӕггадӕн минкъийдӕр аргъ кӕнун ма райдайетӕ. Идарддӕр дӕр Библий хӕзнатӕ лӕмбунӕг агоретӕ. Уотӕ ку кӕнайтӕ, уӕд уӕ хӕзнатӕ уодзӕнцӕ «уӕлӕрвти – уоми сӕмӕ давӕг хӕстӕг нӕ цӕуй ӕма сӕ румпӕг нӕ хуӕруй. Уӕ хӕзна кӕми уа, уоми уодзӕнцӕ уӕ зӕрдитӕ дӕр» (Лук. 12:33, 34).