1, 2. (a) Aye ti mosoro ota wa la Jéhovah amû na e? (b) Nyen la e yeke bâ na yâ ti article so?

JÉHOVAH ayeke na mosoro mingi ahon azo ti dunia kue. Aye kue ayeke ti lo (1 Chron. 29:11, 12). Me Jéhovah amû aye mingi na azo kue. E kiri singila mingi so Jéhovah amû na e amosoro so na popo ni e yeke wara (1) Royaume ti Nzapa, (2) kua ti e ti fango tënë so ayeke sö fini ti azo nga na (3) atâ tënë ti Bible so ayeke ye ti ngangu ngere. Me tongana e sara hange ape, e yeke bâ amosoro so na nene ni ape na e yeke bi ni. Ti ngbâa ti gbu amosoro so ngangu, a lingbi e sara kua na ni nzoni nga e ye ni mingi. Jésus atene: “Ndo so mosoro ti ala ayeke dä, bê ti ala ayeke nga dä.”—Luc 12:34.

² Zia e bâ tongana nyen la e lingbi ti ngbâ ti ye mingi Royaume ti Nzapa, kua ti e ti fango tënë nga na tâ tënë, nga ti ngbâ ti bâ aye so na nene ni. Na ngoi so e yeke bâ tongana nyen la e lingbi ti sara ni, gbu li ti mo na ndö ti ye so mo lingbi ti sara ti ye aye ti mosoro so mingi.

3. Nyen la wadengo buze so Jésus asara tënë ti lo ayeke nduru ti sara ti wara perle so ngere ni ayeke ngangu mingi? (Bâ foto so ayeke na tongo nda ti article so.)

³ Diko Matthieu 13:45, 46. Jésus asara tënë ti mbeni wadengo buze so ayeke gi aperle. Kite ayeke dä ape so, na yâ ti angu mingi, wadengo buze so avo nga lo kä aperle mingi. Ye oko, fadeso lo wara mbeni perle so ayeke pendere mingi so gï na bango ni bê ti lo ayeke na ngia. Me ti tene lo vo ni, a lingbi lo kä aye ti lo kue. Tara ti bâ tongana nyen la perle so ayeke ye ti ngangu ngere mingi na lê ti lo.

4. Tongana e ye Royaume ti Nzapa tongana ti so wadengo buze so aye na perle so lo wara, e yeke sara nyen?

⁴ Nyen la e lingbi ti manda na yâ ti tënë ti Jésus so? Tâ tënë na ndö ti Royaume ti Nzapa ayeke tongana perle ti ngangu ngere so. Tongana e ye ni mingi tongana ti so wadengo buze so aye na perle so, e yeke duti nduru ti dö aye kue ti zia ti ga azo ti gbe ti Royaume ni nga ti ngbâ lakue azo ti gbe ti Royaume ni. (Diko Marc 10:28-30.) Zia e bâ tapande ti azo use so asara tongaso.

5. Nyen la Zachée ayeke nduru ti sara ni ndali ti Royaume?

⁵ Zachée ayeke lani mbeni mokonzi ti azo ti rongo nginza ti impôt so aga zo ti mosoro na lege ti mungo nginza ti azo na likisi (Luc 19:1-9). Ye oko, na ngoi so Zachée, so lo yeke zo ti mbilimbili ape, amä Jésus so ayeke fa tënë na ndö ti Royaume, lo bâ na nene ni ye so lo mä nga lo sara ye hio. Lo tene: “Bâ, mbi yeke mû na awayere ndambo ti aye so mbi yeke na ni, na ye kue so mbi gbu na likisi na maboko ti azo, mbi yeke kiri na ni na ala fani osio.” Lo yeke na ngia ti kiri na amosoro so lo wara na lege ti likisi nga lo zia lege ti sarango bê ti aye ti sese.

6. Achangement wa la Rose asara ti ga zo ti gbe ti Royaume ti Nzapa? Lo sara ni ngbanga ti nyen?

⁶ A sara ambeni ngu awe la Rose amä tënë na ndö ti Royaume. Lo yeke lani mbeni wali so ayeke bungbi na mbeni mba ti lo wali. Lo yeke lani président ti bungbi ti azo so ayeke tiri ndali ti droit ti azo so ayeke bungbi koli na koli wala wali na wali. Ye oko, na ngoi so lo manda Bible, lo bâ na nene ni tâ tënë na ndö ti Royaume ti Nzapa. Me lo bâ so a lingbi lo sara ambeni kota changement (1 aCor. 6:9, 10). Bê ti lo apusu lo ti zia kota ndo ti lo ni nga ti zia lege ti bungbingo wali na wali. Rose awara batême na ngu 2009, nga na ngu ti peko, lo ga pionnier permanent. Lo ye Jéhovah nga na Royaume ti lo mingi ahon anzara ti mitele kue.—Marc 12:29, 30.

7. Tongana nyen la e lingbi ti ngbâ ti ye Royaume ti Nzapa na bê ti e kue?

⁷ Tâ tënë, azo mingi na popo ti e asara akota changement na yâ ti gigi ti ala ti ga azo ti gbe ti Royaume ti Nzapa (aRom. 12:2). Atâa so kue, changement ni ade ti hunzi ape. A lingbi e sara hange na aye so alingbi ti sara si e ye Royaume mingi ape, aye tongana nzara ti warango aye ti sese nga na anzara kue ti sarango lango-sioni (aProv. 4:23; Mat. 5:27-29). Ti mû maboko na e ti ngbâ ti ye Royaume ti Nzapa na bê ti e kue, Jéhovah amû na e mbeni ye ti ngangu ngere.

8. (a) Ngbanga ti nyen la bazengele Paul atene so kua ti e ti fango tënë ayeke tongana mbeni “mosoro so [ayeke] na yâ ti ata ti sese”? (b) Tongana nyen la Paul afa so lo ye kua ti fango tënë mingi?

⁸ Girisa ape so Jésus amû na e kua ti fango nzoni tënë nga ti fango ye na ndö ti Royaume ti Nzapa (Mat. 28:19, 20). Bazengele Paul ahinga lani so kua ti fango tënë ayeke ye ti ngangu ngere. Lo tene so kua ti  fango tënë na ndö ti fini mbele ayeke tongana mbeni “mosoro so [ayeke] na yâ ti ata ti sese”. (2 aCor. 4:7; 1 Tim. 1:12). Atâa so e yeke gï asenge zo so e yeke mbilimbili-kue ape, tënë so e yeke fa alingbi ti gue na e nga na azo so amä e ti wara fini ti lakue lakue. Ndani la Paul atene: “Mbi sara ye kue ndali ti nzoni tënë si mbi wara mbage ti mbi dä legeoko na ambeni zo.” (1 aCor. 9:23). Biani, so Paul aye kua ti fango tënë mingi apusu lo ti sara kue ti tene azo aga adisciple. (Diko aRomain 1:14, 15; 2 Timothée 4:2.) Ye so amû lani maboko na lo ti gbu ngangu na yâ ti ngangu kangango lege (1 aThes. 2:2). Tongana nyen la e lingbi ti ye fango tënë tongana Paul?

9. Ambeni lege so e lingbi ti fa so e bâ kua ti fango tënë na nene ni ayeke so wa?

⁹ Mbeni lege so Paul afa so lo bâ kua ti fango tënë na nene ni ayeke so lo gbu alege kue so azi ti fa tënë na azo. Legeoko tongana Paul nga na akozo Chrétien, e yeke fa tënë na alege kue so azi, na ando so azo ayeke dä mingi nga da na da (Kus. 5:42; 20:20). Tongana dutingo ti e amû lege na e, e yeke gi alege ti fa tënë mingi, peut-être na lege so e mû kua ti pionnier auxiliaire wala ti pionnier permanent. E lingbi nga ti manda mbeni yanga ti kodro nde, wala ti gue na mbeni ndo nde na yâ ti kodro ti e wala même ti gue na mbeni kodro nde.—Kus. 16:9, 10.

10. Aye ti nzoni wa la Irene awara ndali ti so lo sara ngangu ti fa nzoni tënë na azo?

¹⁰ Gbu li ti mo na ndö ti tapande ti Irene, mbeni ita-wali kumbamba na États-Unis. Lo ye lani mingi ti fa tënë na azo so aga gango so ayeke tene yanga ti Russe. Na ngoi so lo komanse ti sara ni na ngu 1993, groupe so ayeke tene yanga ti Russe na New York City ayeke lani gï na awafango tënë 20. Irene afa tënë ngangu na yâ ti territoire so ngu 20 tongaso. Lo tene: “Ade mbi tene yanga ti Russe mbilimbili-kue ape.” Ye oko, Jéhovah airi tënë nzoni na ndö ti bibe so lo na ambeni ita ayeke na ni ti yapu ti fa tënë. Laso, acongrégation ti Russe ayeke omene na New York City. Azo bale-oko na oku so Irene amanda Bible na ala awara batême. Ambeni asara kua na Béthel, ambeni ayeke apionnier nga ambeni ayeke a-ancien. Irene atene: “Tongana mbi gbu li ti mbi na ndö ti ambeni ye nde so mbi lingbi lani ti gi ti sara, mbi bâ so mbeni oko ti aye ni so alingbi ti ga na mbi mara ti ngia so ape.” Lo ye biani kua ti lo ti fango tënë mingi.

11. Aye ti nzoni wa la aga ndali ti so e ngbâ ti fa tënë atâa so a sara aye ti ngangu na e?

¹¹ Tongana e ye kua ti e ti fango tënë, e yeke sara ye tongana bazengele Paul, e yeke ngbâ ti fa tënë atâa kangango lege (Kus. 14:19-22). Na yâ ti angu 1930 nga na tongo nda ti angu 1940, aita ti États-Unis atingbi na ngangu kangango lege. Me tongana Paul, ala gbu ngangu nga ala ngbâ ti fa tënë. Ti  bata droit ti e ti fa tënë, aita ni ague na atënë ni na ada-ngbanga, na ala sö benda na yâ ti angbanga mingi. Na ngu 1943, Ita Nathan Knorr asara tënë ti songo benda ti e na gbele Kota Da-ngbanga ti États-Unis. Lo tene so tongana awafango tënë angbâ lani ti fa tënë ape, a yeke gue na tënë oko na gbele Kota Da-ngbanga ape. Lo tene nga so ndali ti angbanga so a fâ so, aita mingi na yâ ti dunia kue ayeke fadeso na liberté ti fa tënë. Aita na yâ ti ambeni kodro asö benda nga tongaso na gbele ada-ngbanga. Biani, so e ye fango tënë mingi e yeke zia pëpe si sarango ye ti ngangu akanga lege na e ti fa tënë.

12. Nyen la mo leke na bê ti mo ti ngbâ ti sara na yâ ti kua ti mo ti fango tënë?

¹² Tongana e bâ kua ti fango tënë tongana mbeni mosoro so Jéhovah amû na e, e yeke fa tënë gï pëpe ti wara mbeni ngbonga ti zia na lê ti rapport ti e. Me e yeke sara ye kue so e lingbi ti sara “ti fa nda ti tënë ni kue na ndö ti nzoni tënë”. (Kus. 20:24; 2 Tim. 4:5). Me tënë ti nyen la e yeke fa na azo? Zia e bâ mbeni mosoro nde so Nzapa amû na e.

13, 14. Gogoro wa la Jésus asara tënë ni na Matthieu 13:52? Nyen la e lingbi ti sara ti tene gogoro ni so asi?

¹³ Ota mosoro so Jéhovah amû na e ayeke atâ tënë kue so e hinga awe. Jéhovah ayeke Nzapa ti tâ tënë (2 Sam. 7:28; Ps. 31:5). So lo yeke Babâ so ayeke mû ye mingi na zo, lo fa atâ tënë ti lo na azo so akpe mbeto ti lo. Ti londo na ngoi so e mä lani tâ tënë ti kozoni, e wara lege ti zia ambeni tâ tënë na ndö ni na lege so e yeke diko Bible nga na ambeti ti e, e yeke gue na akota bungbi nga yenga oko oko e yeke gue na abungbi. Tongana ngoi ayeke hon, e yeke wara ye so Jésus airi ni “gogoro ti mosoro” ti angbene tâ tënë nga na afini ni. (Diko Matthieu 13:52.) Tongana e gi atâ tënë so tongana mosoro so ahonde, Jéhovah ayeke mû maboko na e ti bungbi afini pendere tâ tënë na yâ ti “gogoro ti mosoro” ti e. (Diko aProverbe 2:4-7.) E yeke sara ni tongana nyen?

¹⁴ A lingbi e manda Bible nga na ambeti ti e lakue nga e gi nda ti ye nzoni na yâ ni. Tongana e sara tongaso, a yeke mû maboko na e ti hinga atâ tënë so alingbi ti duti “afini ye” na lege so e hinga ni kozo ape (Jos. 1:8, 9; Ps. 1:2, 3). Kozo article ti Tour ti Ba Ndo so a sigi na ni na juillet 1879 ahaka tâ tënë na mbeni fleur so ahonde na yâ ti asioni pere. Ti wara mara ti fleur so, a lingbi zo agi ni nzoni si. Nga tongana lo wara ni, a lingbi lo ngbâ gï na ti so lo wara so ape. A lingbi lo ngbâ ti gi ti wara gbâ ti afleur ni. Legeoko nga, a lingbi terê ti e anzere gï ndali ti tâ tënë oko so e wara ape. A lingbi e ngbâ ti gi ti wara gbâ ti atâ tënë.

15. Ngbanga ti nyen la e tene ambeni tâ tënë ayeke “angbene” ni? Ati so wa la mbilimbili mo bâ ni na nene ni mingi?

¹⁵ Na ngoi so e komanse ti manda Bible lani, e manda ambeni pendere tâ tënë. E lingbi ti iri ni “angbene” tâ tënë ndali ti so e manda ni kozo. Ambeni ngbene tâ tënë ni ayeke so wa? E manda lani so Jéhovah ayeke lo so asara aye kue, na lo la lo mû na e fini nga lo leke na bê ti lo ti sara mbeni ye ndali ti azo. E manda nga lani so, na ndoye, Jéhovah amû ye so a futa ti zi azo, so ayeke sacrifice ti Molenge ti lo, tongaso si a lingbi ti zi e na gbe ti siokpari na kuâ. E manda encore so Royaume ti lo ayeke hunzi ande apasi kue nga e yeke na beku ti ngbâ na fini lakue lakue na siriri nga na ngia na gbe ti komandema ti Royaume ni.—Jean 3:16; Apoc. 4:11; 21:3, 4.

16. Nyen la a lingbi e sara tongana a changé lege so e mä na yâ ti mbeni tâ tënë?

¹⁶ Ngoi na ngoi, a lingbi ti changé yâ ti  lege so e mä na yâ ti mbeni prophétie ti Bible wala mbeni versê. Tongana changement so asi, a lingbi e mû ngoi ti manda ni nzoni nga ti gbu li ti e na ndö ni (Kus. 17:11; 1 Tim. 4:15). A lingbi e gi ti mä gï yâ ti kota changement ni ape, me e gi nga ti hinga anzene nzene tënë na ndö ti kangbi so ayeke na popo ti fini tënë ni na ti so e hinga ni kozo. Tongana e sara tongaso, e yeke zia biani fini tâ tënë ni na yâ ti gogoro ti mosoro ti e. Ngbanga ti nyen la a yeke kota ye ti sara a-effort so?

17, 18. Yingo vulu alingbi ti mû maboko na e tongana nyen?

¹⁷ Jésus afa lani so yingo ti Nzapa alingbi ti dabe ti e na aye so e manda kozo awe (Jean 14:25, 26). Ye so alingbi ti mû maboko na e tongana nyen na ngoi so e yeke fa nzoni tënë? Gbu li ti mo na ndö ti ye so asi na mbeni ita-koli so iri ti lo ayeke Peter. Na ngu 1970 lo yeke lani na ngu 19 na lo komanse ti sara kua na Béthel ti Grande-Bretagne ade ti ninga ape. Na ngoi so lo yeke fa tënë da na da, lo tingbi na mbeni koli so ayeke na ngu 50 tongaso na so ayeke na gbâ ti kuä ti yanga. Peter ahunda koli ni wala lo ye ti mä yâ ti Bible. Koli ni ayeke lani mbeni kota zo ti nzapa ti aJuif, li ti lo akpe ti bâ so mbeni molenge-koli apensé so lo lingbi ti mû maboko na lo ti mä yâ ti Bible. Ti tara Peter, lo hunda lo, lo tene: “Molenge ti mbi, eskê mo hinga yanga ti kodro so a sû na mbeti ti Daniel?” Peter akiri tënë, atene: “A sû mbeni mbage ni na yanga ti Araméen.” Na ngoi so Peter adabe ti lo na lisoro ni, lo tene: “Li ti kota zo ti nzapa ni akpe so mbi hinga kiringo tënë ni; me li ti mbi akpe ahon ti lo. Mbi hinga kiringo tënë ni tongana nyen? Na ngoi so mbi kiri na yanga-da na mbi gi nda ti ye na ndö ti tënë ni na yâ ti a-Tour ti Ba Ndo nga na a-Réveillez-vous ! ti anze so ahon ade ti ninga ape, mbi wara mbeni article so afa so a sû mbeti ti Daniel na yanga ti Araméen.” (Dan. 2:4, kete tënë na gbe ni.) Biani, yingo vulu alingbi ti dabe ti e na aye so e diko ni kozo na e bata ni nzoni na yâ ti gogoro ti mosoro ti e.—Luc 12:11, 12; 21:13-15.

¹⁸ Tongana e ye mingi atâ tënë so Jéhovah afa na e nga e kiri singila ndali ni, e yeke ngbâ ande ti zia ni na yâ ti gogoro ti mosoro ti e. Tongana e sara ni lakue, e yeke bâ so e lingbi ti fa ye na azo nzoni.

19. Ngbanga ti nyen la a lingbi e bata nzoni amosoro so Jéhovah amû na e?

¹⁹ Satan na dunia ti lo ayeke gi lakue ti sara si e bâ na nene ni pëpe amosoro so Jéhovah amû na e so e sara tënë na ndö ni na yâ ti article so. Akode so lo yeke sara na kua alingbi ti gbu e. A lingbi ti duti ngangu ape ti tene tënë ti mbeni nzoni kua ti nginza, nzara ti dutingo na aye ti ngangu ngere, wala nzara ti sarango baba ti akungba so zo ayeke na ni agboto lê ti e. Bazengele Jean amû wango na e atene so dunia so nga na aye so ayeke na yâ ni ayeke hon fafadeso (1 Jean 2:15-17). Tongaso, a lingbi e sara ngangu ti ngbâ ti ye mingi aye ti mosoro so Jéhovah amû na e nga e ngbâ ti bâ ni na nene ni.

20. Nyen la mo leke na bê ti mo ti sara ti bata nzoni amosoro so Jéhovah amû na mo?

²⁰ Duti nduru ti zia lege ti aye kue so alingbi ti sara si mo ye na bê ti mo kue pëpe Royaume ti Nzapa. Ngbâ ti yapu na fango tënë, na zia lâ oko ape si ndoye ti mo teti kua ti e ti fango tënë so ayeke so fini ti azo adë. Ngbâ ti gi atâ tënë ti Bible. Tongana mo sara ni, mo yeke bungbi ‘mosoro na yayu, ndo so zo ti nzi ayeke si nduru dä pëpe nga makongo ti tengo bongo ayeke te ni pëpe. Ndali ti so ndo so mosoro ti mo ayeke dä, bê ti mo ayeke nga dä.’—Luc 12:33, 34.