1, 2. (a) Ngumiphi imicebo lemitsatfu Jehova lasinike yona? (b) Sitawucoca ngani kulesihloko?

JEHOVA uyinjinga lenkhulu endzaweni yonkhe. (1 Khr. 29:11, 12) NjengaBabe lowephanako, bonkhe labo labafuna kuceba etintfweni letiphatselene naNkulunkulu, ubapha ngesandla lesivulekile. Simbonga kakhulu Jehova ngekusinika umcebo lovela kuye lofaka ekhatsi (1) uMbuso waNkulunkulu, (2) umsebenti wetfu losindzisa kuphila, kanye (3) nemaciniso laligugu laseVini lakhe liBhayibheli! Noma kunjalo, nasingakanaki, singaphelelwa yinjabulo ngalomcebo futsi ugcine usilahlekele. Kute ungasilahlekeli, kufanele siwusebentise kahle futsi sivusetele njalo lutsandvo lwetfu ngawo. Jesu watsi: “Lapho umcebo wenu ukhona khona, kulapho netinhlitiyo tenu titawuba khona.”​—Luk. 12:34.

² Asesicoce ngekutsi singaluhlakulela njani lutsandvo lwetfu siphindze sichubeke sibonga ngeMbuso, ngemsebenti wekushumayela kanye nangeliciniso leliseBhayibhelini. Njengoba sichubeka sicoca, zindla ngekutsi wena ungalujulisa njani lutsandvo lwakho ngalomcebo lovela kuNkulunkulu.

3. Yini lomtsengisi losemfanekisweni waJesu lebekatimisele kuyenta kute atfole lelitje leliligugu? (Buka sitfombe lesisekucaleni kwalesihloko.)

³ Fundza Matewu 13:45, 46. Jesu watjela bafundzi bakhe ngemtsengisi lobekafuna ematje laligugu. Ngekuhamba kweminyaka, lomtsengisi besekatsenge ematje laligugu langemakhulu waphindze wawatsengisa. Noma kunjalo, nyalo besekatfole linye litje lebeliligugu kakhulu. Watsi nje nakalibona wajabula kakhulu. Noma kunjalo, kute alitsenge bekutawudzingeka kutsi atsengise konkhe lebekanako. Uyabona yini kutsi belibaluleke kanganani lelitje kulomtsengisi?

4. Nangabe uMbuso waNkulunkulu siwutsandza ngendlela lomtsengisi latsandza ngayo lelitje leliligugu, yini lesitawuyenta?

⁴ Yini lesiyifundzako kulomfanekiso? Liciniso leMbuso waNkulunkulu lifana nalelitje leliligugu. Nangabe loMbuso siwutsandza njengobe lomtsengisi atsandza lelitje leliligugu, sitawuyekela nobe yini lengasiphatamisa, kute sichubeke sitikhonti taloMbuso. (Fundza Makho 10:28-30.) Asesicoce ngebantfu lababili labakwenta loko.

5. Yini Zakewu layenta kute akhombise kutsi bekatimisele kutfola uMbuso waNkulunkulu?

⁵ Zakewu bekangumtselisi lomkhulu futsi anjinge ngekutsatsa timali tebantfu ngebucili. (Luk. 19:1-9) Noma kunjalo, ngalesikhatsi lendvodza iva loko Jesu bekakufundzisa ngeMbuso, yabona kutsi bekubalulekile loko lebeyikulalele futsi ngekushesha yatsatsa sinyatselo. Zakewu watsi: “Nkhosi, incenye yetintfo tami ngitayipha labeswele, futsi nobe yini lengayitsatsa ngebucili kunobe ngubani ngitayibuyisela seyiphindvwe kane.” Ngenjabulo washiya ingcebo yakhe lebekayitfole ngetindlela letimbi futsi wayekela kutsandza kakhulu umcebo.

6. Nguluphi lushintjo Rose lalwenta kute abe sikhonti seMbuso waNkulunkulu, futsi kungani akwenta loko?

⁶ Eminyakeni lembalwa leyendlulile, ngesikhatsi lomunye umuntfu lesitambita ngekutsi nguRose, eva ngetindzaba teMbuso, bekadze asitabani. Bekangumengameli wenhlangano lebeyilwela emalungelo ekutsandzana kwebantfu bebulili lobufanako. Noma kunjalo, njengoba Rose abetadisha liBhayibheli, wabona kubaluleka kweliciniso leMbuso waNkulunkulu. Wacaphela kutsi bekufanele ente lushintjo lolukhulu ekuphileni kwakhe. (1 Khor. 6:9, 10) Lutsandvo lebekanalo ngaloko lebekakufundza lwamenta kutsi asishiye sikhundla sakhe futsi ayekele nalobutabani. Rose wabhatjatiswa nga-2009, ngemnyaka lolandzelako waba lihlahlandlela lelivamile. Lutsandvo lwakhe ngaJehova kanye nangeMbuso belucine kakhulu kwendlula nobe ngabe ngusiphi sifiso senyama lebekangaba naso.​—Mak. 12:29, 30.

7. Yini lengasisita kute sichubeke siwutsandza ngenhlitiyo yetfu yonkhe uMbuso waNkulunkulu?

⁷ Kuliciniso kutsi linyenti letfu liye lenta tingucuko letinyenti ekuphileni kuze libe tikhonti teMbuso waNkulunkulu. (Rom. 12:2) Nobe kunjalo, kusekunyenti lokufanele sikwente. Kufanele sihlale siticaphele tintfo letingaphatamisa lutsandvo lwetfu ngeMbuso, letifaka ekhatsi kutsandza umcebo kanye nanome ngabe ngutiphi tifiso tekutiphatsa kabi. (Taga 4:23; Mat. 5:27-29) Kute sichubeke siwutsandza ngenhlitiyo yetfu yonkhe uMbuso waNkulunkulu, Jehova usinikete lomunye umcebo loligugu.

8. (a) Kungani umphostoli Pawula achaza umsebenti wekushumayela njengemcebo “etitjeni telubumba”? (b) Pawula wakhombisa njani kutsi bekawutsandza kakhulu umsebenti wekushumayela?

⁸ Kufanele sikhumbule kutsi Jesu usinikete umsebenti wekushumayela nekufundzisa bantfu tindzaba letimnandzi teMbuso waNkulunkulu. (Mat. 28:19, 20) Umphostoli Pawula wacaphela kutsi umsebenti wekushumayela bewubaluleke kakhulu. Wabita lomsebenti wekushumayela ngekutsi ngumcebo “etitjeni  telubumba.” (2 Khor. 4:7; 1 Thim. 1:12) Nanobe sititja telubumba letinesono, umlayeto lesiwushumayelako ungasiletsela kuphila lokuphakadze kanye nalabo labasilalelako. Pawula akwati loku watsi: “Ngenta tonkhe tintfo ngenca yetindzaba letimnandzi, khona ngitewutihlanganyela nalabanye.” (1 Khor. 9:23) Lutsandvo Pawula lebekanalo lwamenta kutsi asebente matima kute ente bantfu bafundzi. (Fundza Roma 1:14, 15; 2 Thimothi 4:2.) Loko kwamsita kutsi akhutsatelele kuphikiswa lokumatima. (1 Thes. 2:2) Singakhombisa njani kutsi siyawutsandza umsebenti wekushumayela?

9. Ngutiphi tindlela lesingakhombisa ngato kutsi siyawutsandza umsebenti wekushumayela?

⁹ Lenye indlela Pawula lakhombisa ngayo kutsi uyawutsandza umsebenti wekushumayela bekukutsi asebentise onkhe ematfuba lavelako ekushumayela labanye. Njengebaphostoli kanye nemaKhristu angelikhulu lekucala, sishumayela singakahleli, sishumayele etindzaweni tawonkhe wonkhe kanye nasemtini ngemuti. (Imis. 5:42; 20:20) Nangabe timo tetfu tisivumela, sifuna letinye tindlela tekwenta lokunyenti emsebentini wekushumayela ngekutsi sibe ngemahlahlandlela lasitako nobe sibe ngemahlahlandlela lavamile. Singaphindze sifundze lolunye lulwimi, sitfutsele kuletinye tindzawo letinesidzingo lesikhulu sebamemeteli eveni lesikulo nobe siye kulelinye live.​—Imis. 16:9, 10.

10. Irene wabusiswa njani ngekutimisela kwakhe kufundzisa labanye tindzaba letimnandzi?

¹⁰ Cabanga nga-Irene, longudzadze longakashadi waseMelika. Bekanesifiso lesijulile sekushumayela tihambi lebetikhuluma lulwimi lwaseRussia. Nakacala kutishumayela nga-1993, bekunelicembu lebamemeteli labangu-20 lebebakhuluma lulwimi lwaseRussia edolobheni laseNew York. Sekuphele iminyaka lengu-20 Irene solo asebenta matima kulensimu lenebantfu labakhuluma lolulwimi. Irene utsi: “Solo ngisengakakwati kulukhuluma kahle lolulwimi lwaseRussia.” Nanobe kunjalo Jehova uwubusisile umoya wakhe wekutimisela kanye nalabo labenta njengaye. Lamuhla sekunemabandla lasitfupha lasebentisa lulwimi lwaseRussia edolobheni laseNew York. Labangu-15 kulabo Irene lebekafundza nabo liBhayibheli babhatjatisiwe. Labanye babo bakhonta eBethel, labanye bangemahlahlandlela kantsi labanye bangemadvodza lamadzala elibandla. Irene utsi: “Nangicabanga ngaleminye imigomo, kute umgomo lengicabanga kutsi ngabe ngitibekele wona lebewunganginiketa injabulo lenkhulu kwengca lona.” Irene uwutsatsa njengaloligugu umsebenti wekushumayela.

11. Ngumiphi imiphumela lemihle leba khona nangabe sichubeka sishumayela nanobe siphatfwa kabi?

¹¹ Nangabe siwutsandza umsebenti wekushumayela, sitawufanana nemphostoli Pawula lowachubeka ashumayela nanobe bekaphatfwa kabi. (Imis. 14:19-22) Ngabo-1930 kuya ekucaleni kwabo-1940, bazalwane baseMelika babhekana nekuphikiswa lokumatima. Nanobe kunjalo, njengaPawula, baba nesibindzi  futsi bachubeka bashumayela. Labazalwane babhekana nemacala lamanyenti lebebabekwe wona kuze bavikele lilungelo letfu lekushumayela. Nga-1943, umzalwane Nathan H. Knorr nakakhuluma ngekuphumelela kulelinye licala lebelisenkantolo lephakeme yaseMelika, watsi: “Lemphumelelo itfolakele ngenca yekuba nesibindzi kwenu. Kube bekute ummemeteli lobekaya kuyoshumayela, ngabe kute licala lelibe khona enkantolo lephakeme; kodvwa ngenca yekutsi ummemeteli, bazalwane emhlabeni wonkhe basachubeka nekushumayela futsi ngeke bayekele ngenca yekutsi baphatfwa kabi. Sincobe ngenca yekutsi bantfu baNkulunkulu baye bachubeka nekuba nesibindzi.” Kutimisela lokufanako kwalabanye bazalwane kulamanye emave kuletse imiphumela lefanako. Kuliciniso kutsi nangabe siwutsandza umsebenti wekushumayela singakuncoba kuphatfwa kabi.

12. Yini lotimisele kuyenta mayelana nemsebenti wekushumayela?

¹² Nangabe umsebenti wekushumayela siwubheka njengemcebo loligugu lovela kuJehova, angeke sijatjuliswe nje kuphela sikhatsi lesisentile nasishumayela. Kunaloko, sitakwenta konkhe lokusemandleni etfu kute ‘sifakaze ngetindzaba letimnandzi.’ (Imis. 20:24; 2 Thim. 4:5) Ngako-ke, yini lesitawubafundzisa yona labanye? Cabanga ngalomunye umcebo lovela kuNkulunkulu.

13, 14. Uyini ‘lomcebo’ Jesu lakhululma ngawo kuMatewu 13:52, futsi singawugcwalisa njani?

¹³ Umcebo wesitsatfu lesinawo ngemaciniso lesifundziswe wona. Jehova unguNkulunkulu weliciniso. (2 Sam. 7:28; Hla. 31:5) NjengaBabe lowephanako, ubafundzisa liciniso labo labamesabako. Kusukela ngalesikhatsi sicala kuva liciniso, sibe nelitfuba lekutitfolela emaciniso laseVini laNkulunkulu, liBhayibheli, etincwadzini tetfu tebuKhristu, emihlanganweni yetfu yesifundza neyesigodzi kanye nasemihlanganweni yetfu yamaviki onkhe. Ngekuhamba kwesikhatsi sibese sitfola naku Jesu lakuchaza ngekutsi ‘ngumcebo’ wemaciniso lamadzala nalamasha. (Fundza Matewu 13:52.) Jehova utasisita kutsi sikhone kubutsela emaciniso lamasha laligugu ‘kulomcebo’ wetfu nangabe siwafunisisa kungatsi sifunisisa umcebo lofihliwe. (Fundza Taga 2:4-7.) Singakwenta njani loko?

¹⁴ Kufanele sihlakulele umkhuba lomuhle wekutadisha liBhayibheli futsi sicwaninge ngekucophelela etincwadzini tetfu. Loko kutasisita kutsi sitfole emaciniso lokungenteka masha ngemcondvo wekutsi asikase sesiwafundze. (Josh. 1:8, 9; Hla. 1:2, 3) Magazini wekucala weSicongosekulindza sangaJuly 1879, watsi: “Liciniso lifana nembali lencane lesehlane, litungeletwe futsi cishe liminyetelwe kukhula kwelukhula lwekutsandza tintfo letisezingeni lelisetulu letikhona kulesimiso. Nangabe ulitfola linakekele. . . . Nangabe ufuna kulitfola yenta konkhe longakwenta kute ulitfole. Ungajatjuliswa kwati nje emaciniso lambalwa.  . . . Chubeka ucongelela nalamanye emaciniso.” Kufanele sikulangatelele kungeta lwati loluvela kuNkulunkulu etingcodvweni tetfu.

15. Kungani singahle sitsi lamanye emaciniso “madzala,” futsi ngumaphi wena lowatsandza kakhulu?

¹⁵ Ngesikhatsi sicala kutihlanganisa nebantfu baNkulunkulu satfola emaciniso laligugu. Lamaciniso singawachaza njengalawo lamadzala ngoba atintfo lesatati saphindze satijabulela nasisacala kuhamba endleleni yebuKhristu. Lamaciniso laligugu afaka ekhatsi ini? Safundza kutsi Jehova unguMdali wetfu neMniki-kuphila nekutsi unenjongo ngesintfu. Saphindze safundza nekutsi Nkulunkulu ngelutsandvo lwakhe wasilungiselela sihlengo ngeNdvodzana yakhe kute sikhululwe esonweni nasekufeni. Ngetulu kwaloko safundza nekutsi uMbuso waNkulunkulu utakucedza konkhe kuhlupheka kanye nekutsi sinelitfuba lekuphila phakadze ngekuthula nangekujabula  ngaphansi kwekubusa kweMbuso wakhe.​—Joh. 3:16; Semb. 4:11; 21:3, 4.

16. Yini lokufanele siyente nangabe sitfola kucondza lokusha kwemaciniso?

¹⁶ Ngekuhamba kwesikhatsi, indlela lesicondza ngayo tiphrofetho letiseBhayibhelini noma letinye tincenye temiBhalo ingashintja. Nangabe sitfola kucondza lokusha, kufanele sitinike sikhatsi sekukutadisha ngekucophelela loko kwatiswa futsi sizindle ngako. (Imis. 17:11; 1 Thim. 4:15) Akukafanele sifune nje kucondza lushintjo lolukhulu lwemaciniso kuphela kodvwa kufanele sifune kucondza ngisho nemehluko lomncane walamaciniso lamadzala nalawo lamasha. Nangabe senta kanjalo sitawube siwacongelele kahle emaciniso lamasha kute siwagcine etingcodvweni tetfu. Kungani lemetamo lemikhulu kangaka izuzisa?

17, 18. Umoya longcwele ungasisita njani?

¹⁷ Jesu wafundzisa kutsi umoya longcwele waNkulunkulu ungasisita kutsi sikhumbule loko lesikufundzile. (Joh. 14:25, 26) Loko kungasisita njani njengebafundzisi betindzaba letinhle? Cabanga ngaloko lokwenteka kumzalwane longuPeter. Nga-1970, nakaneminyaka lengu-19 budzala wacala kuyokhonta eBethel leseBrithani. Ngesikhatsi ashumayela emtini ngemuti, wahlangana nelijaha lebeselikhulile lebelinesilevu lesidze. Peter walibuta kutsi belingatsandza yini kucondza loko lokushiwo liBhayibheli. Lokwammangalisa, lelijaha lamtjela kutsi lendlu lebelikuyo bekuyindlu yaboRabi bemaJuda. Kute avivinye lwati lwaPeter, loRabi wambuta watsi: “Ngitjele-ke mfana wami, incwadzi yaDanyela yabhalwa ngaluphi lulwimi?” Peter wamphendvula watsi: “Incenye yayo yabhalwa ngelulwimi lwesi-Aramu.” Peter utsi: “LoRabi wamangala kutsi bengiyati imphendvulo, kodvwa nami ngamangala kutsi ngikhonile kumphendvula ngemphendvulo lengiyo! Bengiyati njani imphendvulo? Nangifika ekhaya ngibuka bomagazini lebebaphume etinyangeni letendlulile lokuSicongosekulindza kanye nePhaphama!, ngatfola sihloko lebesichaza kutsi incwadzi yaDanyela beyibhalwe ngelulwimi lwesi-Aramu.” (Dan. 2:4) Liciniso, umoya longcwele ungasikhumbuta loko lesikufundzile sakugcina etingcondvweni tetfu.​—Luk. 12:11, 12; 21:13-15.

¹⁸ Nangabe sikutsandza kuhlakanipha lokuvela kuJehova sitawushukumiseleka kutsi sengete lwati etingcondvweni tetfu ngemaciniso lamadzala nalamasha. Njengoba sichubeka sikhombisa kutsi siyamtsandza Jehova futsi sibonga ngekuhlakanipha kwakhe, sitawuba bafundzisi labakahle.

19. Kungani kufanele sivikele umcebo wetfu lovela kuNkulunkulu?

¹⁹ Sathane nelive lakhe batimisele kucedza indlela lesiwujabulela ngayo lomcebo lovela kuNkulunkulu lesicoce ngawo kulesihloko. Asikagomeki kulokuhlasela kwabo. Singatitfola sesitsatsekile nasetsenjiswe umsebenti lotasiniketa imali lenyenti, nekuba nemaphupho ekuphila imphilo lesezingeni lelisetulu, kanye nekuba nesifiso sekutfola tintfo letikhangiswako. Umphostoli Johane usikhumbuta kutsi lelive liyendlula kanye netifiso talo. (1 Joh. 2:15-17) Ngako-ke, kufanele sisebente kamatima kute sivikele lutsandvo lwetfu kanye nekubonga kwetfu ngemfundvo levela kuNkulunkulu.

20. Yini lotimisele kuyenta kute uvikele umcebo wakho lovela kuNkulunkulu?

²⁰ Balekela noma yini lengaphatamisa lutsandvo lonalo ngeMbuso waNkulunkulu. Chubeka ushumayela ngenkhutsalo futsi ungayekeli kujabulela umsebenti wekushumayela losindzisa kuphila. Timisele kuchubeka ucwaninga emaciniso lavela kuNkulunkulu. Njengoba uchubeka ukwenta loku, utawube ucongelela “lokungumcebo losezulwini longapheli, lapho emasela angeke agcekeze khona ebe, nemvunya ungeke udle khona. Ngobe lapho umcebo wenu ukhona khona, kulapho netinhlitiyo tenu titawuba khona.”​—Luk. 12:33, 34.