1, 2. (a) Ko e hā ‘a e koloa fakalaumālie mahu‘inga ‘e tolu meia Sihová? (e) Ko e hā te tau lāulea ki ai ‘i he kupu ko ení?

KO SIHOVA ‘a e Tokotaha koloa‘ia taha ‘i he ‘univēsí. ‘Oku ‘a‘ana ‘a e me‘a kotoa pē. (1 Kal. 29:11, 12) Ka ‘oku nima-homo ‘aupito ‘a Sihova ki he tokotaha kotoa. He hounga‘ia ē ko kitautolu ‘i he lahi ‘o e ngaahi koloa fakalaumālie kuó ne vahevahe mai kiate kitautolú! Ko e hā ‘a e ni‘ihi ‘o e ngaahi koloa ko iá? ‘Oku kau ki ai ‘a e (1) Pule‘anga ‘o e ‘Otuá, (2) ko ‘etau ngāue fakafaifekaú mo e (3) ngaahi mo‘oni mahu‘inga ‘oku ma‘u ‘i he‘ene Folofolá. Ka ‘o kapau he‘ikai ke tau tokanga, ‘e faifai atu pē ‘o lava ke ngalo ‘iate kitautolu ‘a e mahu‘inga ‘o e ngaahi koloa ko ení. ‘Oku fiema‘u ke tau fakamanatu ma‘u pē kiate kitautolu honau mahu‘ingá pea ke fakatupulekina ‘etau ‘ofa ki aí koe‘uhí he na‘e pehē ‘e Sīsū, “ko e feitu‘u ‘oku ‘i ai ho‘omou koloá, ‘e ‘i ai foki homou lotó.”—Luke 12:34.

² Tau vakai angé ki he founga ‘e lava ke tau tauhi ai ke mālohi ‘etau ‘ofa mo e hounga‘ia ‘i he Pule‘angá, ngāue fakafaifekaú, pea mo e mo‘oní. ‘I he‘etau fai iá, fakalaulauloto ki he founga ‘e lava ke ke fakatupulekina fakafo‘ituitui ‘a ho‘o ‘ofa ki he ngaahi koloa fakalaumālie ko ení.

3. Ko e hā na‘e loto-lelei ke fai ‘e he tangata ‘i he talanoa ‘a Sīsuú ke ne fakatau mai ha mata‘itofe ‘e tahá? (Sio ki he ‘uluaki fakatātā ‘i he kupú ni.)

³ Lau ‘a e Mātiu 13:45, 46. Na‘e fai ‘e Sīsū ha talanoa ‘o fekau‘aki mo ha tangata na‘á ne fakatau mai mo fakatau atu ha ngaahi mata‘itofe. ‘I he ‘aho ‘e taha, na‘á ne ‘ilo‘i ha mata‘itofe na‘e mahu‘inga mama‘o ange ia ‘i he ngaahi mata‘itofe kehe kotoa na‘á ne sio ai ki mu‘á. Na‘e fu‘u fiema‘u ‘e he tangatá ‘a e mata‘itofé ‘o ne fakatau atu ‘a e me‘a kotoa pē na‘á ne ma‘ú ke fakatau mai ‘aki ia. ‘E lava ke ke sioloto atu ki he mahu‘inga kiate ia ‘a e mata‘itofé?

4. Ko e hā ‘oku tau loto-lelei ke fai ma‘á e Pule‘angá?

⁴ Ko e hā ‘oku lava ke tau ako mei he talanoa ‘a Sīsuú? Ko e mo‘oni ‘o e Pule‘anga ‘o e ‘Otuá ‘oku hangē ko e mata‘itofe mahu‘inga ko iá. Kapau ‘oku tau ‘ofa ‘i he Pule‘angá ‘o hangē ko e lahi ‘o hono fakamahu‘inga‘i ‘e he tangatá ‘a e mata‘itofé, te tau loto-lelei ai ke tuku ange ‘a e me‘a kotoa koe‘uhí ke tau hoko ko e kakai ‘i he malumalu ‘o e Pule‘angá pea nofo ma‘u ai pē. (Lau ‘a e Ma‘ake 10:28-30.) Tau vakai angé ki he founga na‘e fai pehē ai ha ongo me‘a ‘e toko ua.

5. Ko e hā na‘e loto-lelei ‘a Sākeasi ke fai ma‘á e Pule‘angá?

⁵ Ko Sākeasí ko ha tokotaha tānaki tukuhau ia. Na‘á ne tu‘umālie ‘i he‘ene ma‘u fakamālohi ‘a e pa‘anga mei he kakaí. (Luke 19:1-9) Ka ‘i he ‘aho ‘e taha, na‘e fanongo ai ‘a Sākeasi ki ha malanga ‘a Sīsū ‘o fekau‘aki mo e Pule‘angá. Na‘á ne sai‘ia ‘aupito ‘i he me‘a na‘á ne fanongo aí ‘o ne loto ai ke liliu kakato ‘ene mo‘uí. Na‘á ne pehē: “Vakai! Ko e vaeua ‘o ‘eku koloá, ‘Eiki, te u foaki ia ki he masivá, pea ‘ilonga ha me‘a na‘á ku ma‘u fakamālohi mei ha taha, te u fakafoki ia ‘o liunga fā.” Na‘e fakafoki ‘e Sākeasi ‘a e pa‘anga na‘á ne ‘ave mei he kakaí pea ‘ikai ke ne toe mānumanu.

6. Ko e hā ‘a e ngaahi liliu na‘e fai ‘e ha fefine, pea ko e hā ‘a e ‘uhinga na‘á ne fai pehē aí?

⁶ ‘I he ngaahi ta‘u he kuohilí, na‘e fanongo ai ha fefine ‘o fekau‘aki mo e Pule‘angá, lolotonga ia ‘okú ne nonofo mo ha fefine ‘e taha. Ko e palesiteni foki ia ‘o ha kautaha na‘a nau tau‘i ‘a e totonu ‘a e kau fakasōtomá. Ka ‘i he‘ene ako ‘a e Tohi Tapú ‘o ‘ilo fekau‘aki mo e mahu‘inga ‘o e Pule‘anga ‘o e ‘Otuá, na‘á ne ‘ilo‘i ai ‘oku fiema‘u ke ne fai ha liliu lahi ‘i he‘ene mo‘uí. (1 Kol. 6:9, 10) Koe‘uhí ko ‘ene ‘ofa kia Sihová, na‘á ne mavahe ai mei he kautaha ko iá pea fakangata ‘a ‘ene nonofo mo e fefiné. Na‘á ne papitaiso ‘i he 2009, pea ‘i he ta‘u hono hokó, na‘á ne hoko ai ko ha tāimu‘a tu‘uma‘u. Na‘á ne fai ‘a e liliu lahi ko ení koe‘uhí he na‘e mālohi ange ‘ene ofa kia Sihová ‘i ha fa‘ahinga holi ta‘etaau pē na‘á ne ma‘u.—Mk. 12:29, 30.

7. ‘E lava fēfē ke tau tauhi ke mālohi ‘etau ‘ofa ki he Pule‘anga ‘o e ‘Otuá?

⁷ Ke tau hoko ko e kakai ‘i he malumalu ‘o e Pule‘anga ‘o e ‘Otuá, ko e tokolahi ‘o kitautolu na‘e pau ke liliu kakato ‘etau mo‘uí. (Loma 12:2) Ka ‘oku te‘eki ai ke ‘osi ‘etau faitaú. Kuo pau ke ‘oua na‘a tau faka‘atā ha me‘a ke ne fakavaivai‘i ‘etau ‘ofa ki he Pule‘angá, ‘o hangē ko e ‘ofa ki he ngaahi me‘a fakamatelié pe ko ha ngaahi holi fakaefehokotaki fakasino ta‘etaau pē. (Pal. 4:23; Māt. 5:27-29) Ke tokoni‘i kitautolu ke tau tauhi ke mālohi ‘etau ‘ofa ki he Pule‘anga ‘o e ‘Otuá, kuo ‘omai ai ‘e Sihova kiate kitautolu ha toe koloa mahu‘inga ‘e taha.

8. (a) Ko e hā na‘e fakamatala‘i ai ‘e he ‘apositolo ko Paulá ‘etau ngāue fakafaifekaú ko ha ‘koloa ‘i ha ngaahi ipu ‘umeá’? (e) Na‘e anga-fēfē hono fakahāhā ‘e Paula na‘á ne ‘ofa ‘i he ngāue fakafaifekaú?

⁸ Na‘e ‘omai ‘e Sīsū kiate kitautolu ‘a e ngāue ko hono malanga‘i mo ako‘i ‘a e ongoongo lelei fekau‘aki mo e Pule‘anga ‘o e ‘Otuá. (Māt. 28:19, 20) Na‘e fakamatala‘i ‘e he ‘apositolo ko Paulá ‘a e ngāue fakafaifekaú ko ha koloa ‘oku fa‘o ‘i ha ngaahi ipu ‘umea pe siā ‘umea. (2 Kol. 4:7; 1 Tīm. 1:12) Koe‘uhí ko ‘etau ta‘ehaohaoá, ‘oku tau hangē ai ko e ngaahi siā ‘umea ko iá. Ka ko e  pōpoaki ‘oku tau malanga‘í ‘oku hangē ia ha koloa mahu‘ingá, koe‘uhí ‘oku lava ke tau ma‘u ai ‘a e mo‘ui ta‘engatá pea pehē ki he fa‘ahinga ‘oku fanongo kiate kitautolú. Ko e ‘uhinga ia na‘e pehē ai ‘e Paula: “‘Oku ou fai ‘a e me‘a kotoa pē ma‘á e ongoongo leleí, koe‘uhí ke u vahevahe atu ia ki he ni‘ihi kehé.” (1 Kol. 9:23) Na‘e ngāue mālohi ‘a Paula ke ako‘i ‘a e ni‘ihi kehé ‘o fekau‘aki mo e Pule‘anga ‘o e ‘Otuá. (Lau ‘a e Loma 1:14, 15; 2 Tīmote 4:2.) Ko ‘ene ‘ofa ki he ongoongo leleí na‘e tokoni‘i ai ia ke hokohoko atu ‘ene malangá neongo ‘ene fehangahangai mo e fakatanga kakahá. (1 Tes. 2:2) ‘E lava fēfē ke tau fa‘ifa‘itaki ki he ‘ofa ‘a Paula ‘i he ngāue fakafaifekaú?

9. Ko e hā ‘a e ngaahi founga ‘e ni‘ihi ‘e lava ke fakahāhā ai ‘oku tau ‘ofa ‘i he ngāue fakafaifekaú?

⁹ Ko e founga ‘e taha na‘e fakahāhā ai ‘e Paula na‘á ne ‘ofa ‘i he ngāue fakafaifekaú, ko ‘ene ngāue‘aki ‘a e faingamālie kotoa pē ke lea ai ki he ni‘ihi kehé. Hangē ko Paula mo e mu‘aki kau Kalisitiané, ‘oku tau toe vahevahe atu foki ‘a e ongoongo leleí ki he kakaí mei he fale ki he fale, ‘i he ngaahi feitu‘u fakapule‘angá pea mo ha feitu‘u pē te tau ma‘u nai ai kinautolu. (Ngā. 5:42; 20:20) ‘Oku tau kumi ki ha ngaahi founga ke malanga ai ki he kakai tokolahi taha ‘e ala lavá. Kapau te tau malava, mahalo pē ‘e lava ke tau ngāue ko ha tāimu‘a tokoni pe tāimu‘a tu‘uma‘u. Pe te tau ako nai ha lea kehe, hiki ki ha feitu‘u ‘i hotau fonuá tonu, pe a‘u ‘o hiki ki ha fonua ‘e taha.—Ngā. 16:9, 10.

10. Ko e hā ‘a e ngaahi ‘aonga na‘e hokosia ‘e Irene koe‘uhi ko ‘ene ngāue mālohi ke vahevahe atu ‘a e ongoongo leleí?

¹⁰ Ko Irene, ko ha tuofefine ta‘emali ‘i ‘Amelika, na‘á ne loto ke vahevahe atu ‘a e ongoongo leleí ki he kakai na‘e lea faka-Lūsiá. Ko ia ‘i he 1993, na‘á ne kau ki ha kulupu lea faka-Lūsia ‘i he Kolo Niu ‘Ioké. ‘I he taimi ko iá, na‘e toko 20 pē nai ‘a e kau malanga ‘i he kulupu ko iá. Hili ‘a e ta‘u ‘e 20, na‘e pehē ‘e Irene, “‘Oku te‘eki ai pē ke fu‘u lelei ‘aupito ‘eku lea faka-Lūsiá.” Neongo ia, kuo tokoni‘i ia ‘e Sihova mo e kau malanga kehé ke nau malanga ki he kakaí ‘i he lea ko iá. Ko e olá, ‘i he ‘ahó ni ‘oku ‘i ai ‘a e fakataha‘anga lea faka-Lūsia ‘e ono ‘i he Kolo Niu ‘Ioké. Na‘e ako Tohi Tapu ‘a Irene mo e kakai tokolahi, pea ko e toko 15 ‘o kinautolu na‘a nau papitaiso. Ko e ni‘ihi ‘o kinautolu ‘oku nau ngāue ko e kau Pēteli, kau tāimu‘a, mo e kau mātu‘a. ‘Oku pehē ‘e Irene, “‘I he taimi ‘oku ou fakakaukau atu ai ki he ngaahi taumu‘a kehe na‘á ku mei tuli ki aí, ‘oku ‘ikai lava ke u sioloto atu ki ha taumu‘a na‘e mei lahi ange ai ‘eku fiefiá.” ‘Oku koloa‘aki mo‘oni ‘e Irene ‘ene ngāue fakafaifekaú!

11. Ko e hā ‘a e ngaahi ola ‘oku hoko ‘i he‘etau hokohoko atu hono fai ‘a e malangá neongo ‘a e fakatangá?

¹¹ Kapau ‘oku tau koloa‘aki ‘etau ngāue fakafaifekaú, te tau hangē ai ko e ‘apositolo ko Paulá ‘o hokohoko atu ‘etau malangá na‘a mo e taimi ‘oku fakatanga‘i ai kitautolú. (Ngā. 14:19-22) Ko e fakatātaá, ‘i he vaha‘a ‘o e ta‘u 1930 ki he 1944, na‘e fakatanga‘i kakaha ai hotau fanga tokoua ‘i ‘Ameliká. Ka na‘e kei hokohoko atu pē ‘enau  malangá. ‘I he taimi na‘e feinga ai ‘a e kau ma‘u mafaí ke ta‘ofi kinautolú, na‘e ‘alu ai hotau fanga tokouá ki he fakamaau‘angá pea na‘a nau ikuna ‘i he ngaahi hopo lahi. ‘I he 1943, na‘e lave ai ‘a Tokoua Knorr ki he taha ‘o ‘etau ngaahi ikuna ‘i he Fakamaau‘anga Lahi ‘o ‘Ameliká. Na‘á ne pehē na‘e ‘ikai ke mei ‘i ai ha ngaahi hopo ke ‘ave ki he Fakamaau‘anga ko iá kapau na‘e ‘ikai hokohoko atu ‘a e malanga ‘a e fanga tokouá. Na‘á ne toe pehē koe‘uhí ko e kei hokohoko atu ‘a e malanga ‘a e fanga tokoua takatakai ‘i he māmaní, na‘a nau fakamo‘oni‘i ai ‘oku ‘ikai ke lavame‘a ‘a e fakatangá. Ko e fanga tokoua ‘i he ngaahi fonua kehé kuo nau toe ikuna ‘i he ngaahi hopo fakalao meimei tatau. ‘Io, ko ‘etau ‘ofa ki he ngāue fakafaifekaú he‘ikai te ne faka‘atā ai ‘a e fakatangá ke ta‘ofi kitautolu mei he malangá.

12. Ko e hā ‘okú ke fakapapau‘i ke faí?

¹² ‘I he‘etau koloa‘aki ‘etau ngāue fakafaifekaú, he‘ikai ai ke tau tokangataha pē ki he lahi ‘o e houa ‘oku tau tohi ‘i he‘etau līpōtí. Te tau fai ‘a e me‘a kotoa pē te tau ala lavá ke tau “faifakamo‘oni faka‘āuliliki ki he ongoongo lelei.” (Ngā. 20:24; 2 Tīm. 4:5) Ka ko e hā ‘a e me‘a te tau ako‘i ki he ni‘ihi kehé? Fakakaukau ki ha toe koloa ‘e taha mei he ‘Otuá.

13, 14. Ko e hā ‘a e “tuku‘anga koloa” na‘e ‘uhinga ki ai ‘a Sīsū ‘i he Mātiu 13:52, pea ‘oku anga-fēfē ‘etau fakafonu iá?

¹³ Ko e koloa hono tolu kuo ‘omai ‘e Sihova kiate kitautolú ko e ngaahi mo‘oni kotoa pē kuo tau akó. Ko Sihova ‘a e Matavai ‘o e mo‘oní. (2 Sām. 7:28; Saame 31:5) ‘I hono tu‘unga ko ha Tamai nima-homó, ‘okú ne loto ai ke vahevahe mai ‘a e ngaahi mo‘oni ko ení kiate kitautolu. Ko ia, ‘oku lahi ‘a e ngaahi mo‘oni kuo tau ako fakafou ‘i hono lau ‘ene Folofolá mo ‘etau ‘ū tohí pea ‘i hono ma‘u ‘etau ngaahi fakataha-lahí, ngaahi ‘asemipilií mo e ngaahi fakataha fakauiké. ‘I he lahi ange ‘a e mo‘oni ‘oku tau tānakí, te tau ma‘u ai ‘a e me‘a na‘e ui ‘e Sīsū ko e “tuku‘anga koloa” ‘o e ngaahi mo‘oní ‘a e “ngaahi me‘a fo‘ou mo e ngaahi me‘a motu‘a.” (Lau ‘a e Mātiu 13:52.) ‘E tokoni‘i kitautolu ‘e Sihova ke fakafonu ‘etau “tuku‘anga koloá” kapau te tau kumi ki he ngaahi mo‘oní ‘o hangē ko ‘etau kumi ki ha ngaahi koloa fufuú. (Lau ‘a e Palōveepi 2:4-7.) ‘E lava fēfē ke tau fai ia?

¹⁴ ‘Oku fiema‘u ke tau ako ma‘u pē ‘a e Tohi Tapú mo ‘etau ‘ū tohí pea fai ha fekumi faka‘āuliliki. ‘E tokoni eni ke tau ‘ilo‘i ‘a e ngaahi mo‘oni “fo‘ou,” ‘a e ngaahi mo‘oni na‘e ‘ikai ke tau ‘ilo ki ai ki mu‘á. (Sios.1:8, 9; Saame 1:2, 3) ‘I he fuofua ‘īsiu ‘o e Watch Tower, na‘e pulusi ‘i Siulai 1879, na‘e fakahoa ai ‘a e mo‘oní ki ha matala‘i‘akau ‘oku pulia ‘i he vaó. Ke ma‘u ‘a e matala‘i‘akau ko ení, kuo pau ki ha tokotaha ke ne kumi faka‘āuliliki ia. Pea ‘i he‘ene ‘ilo‘i iá, ‘oku totonu ke ‘oua te ne fiemālie pē ‘i hono ma‘u ‘a e matala‘i‘akau ‘e tahá. ‘Oku totonu ke hokohoko atu ‘ene kumí ke toe ma‘u ha ngaahi matala‘i‘akau lahi ange. ‘I he founga meimei tatau, ‘oku totonu ke ‘oua te tau fiemālie pē ‘i he taimi ‘oku tau ‘ilo‘i ai ha fo‘i mo‘oni pē ‘e taha. ‘Oku totonu ke tau vēkeveke ke hokohoko atu ‘etau kumi ki ha ngaahi mo‘oni lahi ange.

15. Ko e hā ‘oku tau ui nai ai ha ngaahi mo‘oni ‘e ni‘ihi ko e ngaahi mo‘oni “motu‘a,” pea ko fē ‘oku tautefito ho‘o fakamahu‘inga‘í?

¹⁵ ‘I he taimi na‘e kamata ai ‘etau ako ‘a e Tohi Tapú, na‘a tau ‘ilo ai ha ngaahi mo‘oni fakaofo ‘e ni‘ihi. ‘Oku tau ui nai ia ko e ngaahi mo‘oni “motu‘a” koe‘uhí na‘a tau ‘uluaki ako ia. Ko e hā ‘a e ni‘ihi ‘o e ngaahi mo‘oni ko iá? ‘I he kamatá, na‘a tau ako ai ko Sihova ‘a hotau Tokotaha-Fakatupú pea ‘oku ‘i ai ‘ene taumu‘a ki he fa‘ahinga ‘o e tangatá. Na‘a tau toe ako ai na‘e foaki mai ‘e he ‘Otuá hono ‘Aló ki māmani ke pekia ko ha feilaulau huhu‘i, koe‘uhí kae lava ke tau tau‘atāina mei he angahalá mo e maté. Pea na‘a tau ako ai ko e Pule‘anga ‘o e ‘Otuá te ne fakangata ‘a e faingata‘a kotoa pē pea te tau lava ai ‘o mo‘ui ta‘engata ‘i he māmaní ‘i he melino mo e fiefia.—Sione 3:16; Fkh. 4:11; 21:3, 4.

16. Ko e hā ‘oku fiema‘u ke tau fai ‘i he taimi ‘oku fakatonutonu ai ‘etau mahino ki he ngaahi mo‘oni Fakatohitapú?

 ¹⁶ ‘I he taimi ‘e ni‘ihi, ‘e fakatonutonu nai ai ‘etau mahino ‘o fekau‘aki mo ha kikite Fakatohitapu pe ko ha konga Tohi Tapu. ‘I he‘ene hoko iá, ‘oku mahu‘inga ke tau vahe‘i ha taimi ke ako ai ‘a e fakatonutonu ko iá pea fakalaulauloto ki ai. (Ngā. 17:11; 1 Tīm. 4:15) ‘Oku ‘ikai ke ngata pē ‘i he fiema‘u ke tau mahino‘i ‘a e faikehekehe tefito ‘i he mahino motu‘á mo e mahino fo‘oú, ka ‘oku toe fiema‘u ke tau tokanga ki he ngaahi fakaikiiki ‘o e mahino fo‘oú. Ko e ako faka‘āuliliki peheé te ne fakapapau‘i mai ai ‘oku hoko ‘a e mo‘oni fo‘oú ko e konga ia ‘o ‘etau ngaahi mo‘oni Fakatohitapu kuo tau tānakí. Ko e hā ‘oku lelei ai ke tau fai ha ngaahi feinga peheé?

17, 18. ‘E lava fēfē ke tokoni‘i kitautolu ‘e he laumālie mā‘oni‘oní?

¹⁷ Na‘e ako‘i mai ‘e Sīsū ko e laumālie ‘o e ‘Otuá ‘e lava ke ne tokoni‘i kitautolu ke tau manatu‘i ‘a e ngaahi me‘a na‘a tau ako ‘i he kuohilí. (Sione 14:25, 26) ‘E lava fēfē ke tokoni eni kiate kitautolu ‘i he taimi ‘oku tau malanga‘i ai ‘a e ongoongo leleí? Fakakaukau ki he hokosia ‘a ha tokoua ko Peter. ‘I he 1970, na‘á ne ta‘u 19 ai pea na‘á ne toki hū pē ‘o ngāue ‘i he Pēteli ‘i Pilitāniá. Na‘e malanga ‘a Peter mei he fale ki he fale pea na‘á ne fetaulaki ai mo ha tangata na‘e kava pea ki‘i matu‘otu‘a. Na‘á ne ‘eke ki he tangatá pe te ne loto ke mahino‘i ‘a e Tohi Tapú. Ko e tangatá ko ha lāpai Siu ia, pea na‘á ne ‘ohovale ‘i he pehē ‘e he ki‘i talavou ko ení te ne lava ‘o ako‘i ange kiate ia ‘a e Tohi Tapú. Ke ‘ahi‘ahi‘i ‘a Peter, na‘e ‘eke ange ‘e he lāpai ko ení: “Ko ia leka, ko e hā ‘a e lea na‘e hiki ai ‘a e tohi Taniela?” Na‘e pehē ‘e Peter, “Ko e konga ai na‘e hiki ia ‘i he lea faka-Alameá.” “Ko e lāpai ko ení,” ‘i he manatu ‘a Peter, “na‘á ne ‘ohovale ‘i he‘eku ‘ilo‘i ‘a e talí—ka na‘á ku ‘ohovale lahi ange au! Na‘e anga-fēfē ‘eku ‘ilo‘i ‘a e talí? ‘I he taimi na‘á ku foki ai ki ‘api peá u vakai‘i ‘a e makasini Taua Le‘o mo e ‘Ā Hake! ‘o e ngaahi māhina ki mu‘á, na‘á ku ma‘u ai ha kupu ‘oku fakamatala‘i ai ko e tohi Tanielá na‘e hiki ia ‘i he lea faka-Alameá.” (Tan. 2:4, fakamatala ‘i lalo) ‘Io, ‘oku lava ke tokoni‘i kitautolu ‘e he laumālie mā‘oni‘oní ke tau manatu‘i ha fakamatala pē kuo tau lau pea fa‘o ki he‘etau tuku‘anga koloa ‘i he kuohilí.—Luke 12:11, 12; 21:13-15.

¹⁸ Kapau ‘oku tau ‘ofa mo hounga‘ia ‘i he ngaahi mo‘oni ‘oku tau ako meia Sihová, te tau loto ke hokohoko atu hono tānaki ia ki he‘etau tuku‘anga koloá. Ko e lahi ange ‘etau fai ení, ko e lahi ange ia ‘etau ongo‘i mateuteu ke ako‘i ‘a e ni‘ihi kehé.

19. Ko e hā ‘oku fiema‘u ai ke tau malu‘i ‘etau ngaahi koloa fakalaumālié?

¹⁹ ‘I he kupu ko ení, kuo tau ako ai ‘a e mahu‘inga kiate kitautolu ke tau fakamahu‘inga‘i ‘a e ngaahi koloa fakalaumālié. Ka kuo pau ke tau mātu‘aki tokanga ke ‘oua na‘a tau faka‘atā ‘a Sētane mo e māmani ko ení ke ne fakavaivai‘i ‘etau ‘ofa ki he ngaahi koloa ko ení. Kapau he‘ikai ke tau tokanga, ‘e lava ke fakalelu‘i kitautolu ‘e he ngaahi me‘a hangē ko e tala‘ofa ki ha ngāue ‘oku pa‘anga lahi hono totongí, faka‘ānaua ki ha mo‘ui tu‘umālie pe holi ke fiehā‘aki ‘etau ngaahi me‘a fakamatelié. ‘Oku fakamanatu mai ‘e he ‘apositolo ko Sioné, ko e māmani ko ení mo e ngaahi me‘a kotoa ‘okú ne tu‘uaki maí kuo vavé ni ke mole atu. (1 Sio. 2:15-17) Ko e ‘uhinga ia ‘oku fiema‘u ai ke tau hounga‘ia ai pē ‘i he‘etau ngaahi koloa fakalaumālié pea malu‘i ia.

20. Ko e hā ‘okú ke fakapapau‘i ke fai ke malu‘i ai ho‘o ngaahi koloa fakalaumālié?

²⁰ Loto-lelei ke tukuange ha me‘a pē ‘e lava ke ne fakavaivai‘i ho‘o ‘ofa ki he Pule‘anga ‘o e ‘Otuá. Fakapapau‘i ke faivelenga ‘i he ngāue fakamalangá, pea ‘oua ‘aupito na‘a mole ho‘o ‘ofa ki he ngāue fakafaifekaú. Hanganaki kumi ki he ngaahi mo‘oni Fakatohitapú. ‘I ho‘o fai peheé, te ke fa‘oaki ai ha ‘koloa ‘i he langí, ‘a e feitu‘u ‘oku ‘ikai ofi ai ha kaiha‘a pea ‘oku ‘ikai keina ‘e ha ané. He ko e feitu‘u ‘oku ‘i ai ho‘omou koloá, ‘e ‘i ai foki homou lotó.’—Luke 12:33, 34.