1, 2. (a) Hi swihi swilo swinharhu swa nkoka leswi Yehovha a hi nyikeke swona tanihi rifuwo? (b) Hi ta kambisisa yini exihlokweni lexi?

A KU na munhu la fuweke ku tlula Yehovha evuakweni hinkwabyo. (1 Tikr. 29:11, 12) Leswi a nga Tatana loyi a nga ni malwandla, rifuwo rakwe u ri avela vanhu hinkwavo lava tlangelaka. A swi kanakanisi leswaku ha tlangela swinene leswi Yehovha a hi nyikeke rifuwo ra nkoka leri katsaka (1) Mfumo wa Xikwembu, (2) ntirho wa hina wo chumayela lowu ponisaka vutomi ni (3) ntiyiso wa risima lowu kumekaka eRitweni rakwe! Kambe, loko hi nga tivoneli hi nga sungula ku ka hi nga ha ri tlangeli rifuwo leri Yehovha a hi nyikeke rona kutani ri hi lahlekela. Leswaku rifuwo leri ri nga hi lahlekeli, hi fanele hi ri tirhisa kahle naswona nkarhi ni nkarhi hi kurisa ndlela leyi hi ri rhandzaka ha yona. Yesu u te: “Laha xuma xa n’wina xi nga kona, hi kona laha timbilu ta n’wina ti nga ta va kona na tona.”—Luka 12:34.

² A hi kambisiseni ndlela leyi hi nga swi kombisaka ha yona leswaku ha ri tlangela ni ku ri rhandza rifuwo leri Yehovha a hi nyikeke rona, ku nga Mfumo, ntirho wo chumayela ni ntiyiso. Loko hi ri karhi hi endla tano, anakanyisisa hi leswi u nga swi endlaka leswaku u antswisa ndlela leyi u ri rhandzaka ha yona rifuwo leri.

3. I yini leswi muxavisi wa le xifanisweni xa Yesu a a tiyimisele ku swi endla leswaku a kuma perela ya risima? (Vona xifaniso lexi nga eku sunguleni ka xihloko lexi.)

³ Hlaya Matewu 13:45, 46. Yesu u vulavule hi xifaniso xa muxavisi loyi a a lava tiperela. A swi kanakanisi leswaku hi ku famba ka nkarhi, muxavisi yoloye u xave ni ku xavisa tiperela to tala swinene. Kambe sweswi a a kume perela ya risima swinene leyi endleke leswaku a tsaka. Leswaku a kota ku yi xava, a ta boheka ku xavisa swilo hinkwaswo leswi a ri na swona. Phela perela yoleyo, a yi ri ya risima swinene eka yena!

4. Loko hi rhandza Mfumo wa Xikwembu hilaha muxavisi a a rhandza perela hakona, i yini leswi hi nga ta swi endla?

⁴ Hi dyondza yini eka xifaniso lexi? Ntiyiso wa Mfumo wa Xikwembu wu fana ni perela yoleyo ya risima. Loko hi wu rhandza swinene hilaha muxavisi a a rhandza perela hakona, hi ta endla hinkwaswo leswi hi nga swi kotaka leswaku Mfumo wa Xikwembu wu tshama wu ri wa nkoka eka hina. (Hlaya Marka 10:28-30.) Xiya vanhu vambirhi lava endleke tano.

5. Zakiya u swi kombise njhani leswaku a a tiyimisele ku fumiwa hi Mfumo wa Xikwembu?

⁵ Zakiya a a ri muluvisi lonkulu naswona a a fuwile hikwalaho ko dyelela vanhu. (Luka 19:1-9) Endzhaku ka loko wanuna yoloye wo homboloka a a yingise Yesu loko a chumayela hi Mfumo, u xiye nkoka wa rungula leri a ri tweke kutani hi ku hatlisa u cince mahanyelo yakwe. Kutani u te: “Waswivo! Hafu ya leswi nga swa mina, Hosi, ndzi yi nyika swisiwana, naswona xin’wana ni xin’wana lexi ndzi nga xi tekela munhu hi vukanganyisi ndzi xi vuyisela hi mpimo lowu andzisiweke ka mune.” Zakiya u tlherisele vanhu swilo leswi a va dyelele swona a tlhela a tshika vukanganyisi.

6. Hi kwihi ku cinca loku Rose a ku endleke endzhaku ko dyondza hi Mfumo wa Xikwembu naswona hikwalaho ka yini a endle tano?

⁶ Emalembeni lama hundzeke wansati un’wana loyi hi nga ta n’wi vitana Rose a a rhandzana ni wansatikulobye loko a chumayeriwa rungula ra Mfumo. Hi nkarhi wolowo a a ri murhangeri wa nhlangano lowu yimelaka timfanelo ta vanhu lava rhandzanaka ni vanhu va rimbewu leri fanaka. Loko Rose a ri karhi a dyondza Bibele, swi n’wi tsakisile swinene ku dyondza hi Mfumo wa Xikwembu. Kutani u xiye leswaku u fanele a cinca mahanyelo yakwe. (1 Kor. 6:9, 10) Leswi a a swi dyondza eBibeleni swi endle leswaku a tshika ntirho wakwe ni ku tshika ku rhandzana ni wansatikulobye. U khuvuriwe hi 2009, naswona hi 2010 u ve phayona ra nkarhi hinkwawo. A a rhandza Yehovha ni Mfumo wakwe ku tlula swilo hinkwaswo.—Mar. 12:29, 30.

7. I yini leswi hi nga swi endlaka leswaku hi hambeta hi rhandza Mfumo wa Xikwembu?

⁷ A swi kanakanisi leswaku vo tala va hina hi cince ndlela leyi a hi hanya ha yona hikwalaho ka Mfumo wa Xikwembu. (Rhom. 12:2) Kambe ka ha ri ni swo tala leswi hi faneleke hi swi endla. Hi fanele hi tivonela eka swilo leswi nga tsanisaka ndlela leyi hi wu rhandzaka ha yona Mfumo wa Xikwembu, swo tanihi ku rhandza rifuwo ni ku tikhoma ko biha hi tindlela hinkwato leti fambisanaka ni timhaka ta masangu. (Swiv. 4:23; Mat. 5:27-29) Yehovha u hi nyike rifuwo rin’wana leri nga hi pfunaka leswaku hi hambeta hi rhandza Mfumo wa wakwe hi timbilu ta hina hinkwato.

8. (a) Hikwalaho ka yini muapostola Pawulo a a vule leswaku ntirho wa hina wo chumayela i “xuma lexi [nga] eswibyeni swa vumba”? (b) Pawulo u swi kombise njhani leswaku wa wu tlangela ntirho wo chumayela?

⁸ Tsundzuka leswaku Yesu u hi byarhise vutihlamuleri byo chumayela ni ku dyondzisa hi Mfumo wa Xikwembu. (Mat. 28:19, 20) Muapostola Pawulo u wu xiyile nkoka wo chumayela. U hlamusele ntirho wo chumayela hi ntwanano lowuntshwa tanihi “xuma lexi [nga] eswibyeni swa vumba.” (2 Kor. 4:7; 1 Tim. 1:12) Hambileswi hi nga swibya swa vumba leswi nga hetisekangiki, rungula leri hi ri chumayelaka ri nga endla leswaku  hina swin’we ni vanhu lava hi yingisaka hi kuma vutomi lebyi nga heriki. Leswi Pawulo a a tiva mhaka leyi, u te: “Ndzi endla swilo hinkwaswo hikwalaho ka mahungu lamanene, leswaku ndzi ma avela van’wana.” (1 Kor. 9:23) Leswi Pawulo a a rhandza ntirho wo chumayela, swi endle leswaku a hisekela ku endla vadyondzisiwa. (Hlaya Varhoma 1:14, 15; 2 Timotiya 4:2.) Sweswo swi endle leswaku a kota ku tiyisela loko a kanetiwa. (1 Tes. 2:2) Hi nga swi kombisa njhani leswaku na hina hi rhandza ntirho wo chumayela?

9. Hi tihi tindlela tin’wana leti hi nga kombisaka ha tona leswaku ha wu tlangela ntirho wo chumayela?

⁹ Ndlela yin’wana leyi Pawulo a kombiseke ha yona leswaku wa wu tlangela ntirho wo chumayela i ku tshama a lunghekele ku chumayela van’wana. Ku fana ni vaapostola ni Vakreste vo sungula na hina hi chumayela hi xitshuketa, etindhawini ta mani na mani ni hi yindlu ni yindlu. (Mint. 5:42; 20:20) Loko swiyimo swi hi pfumelela hi endla leswi hi nga swi kotaka leswaku hi engetela nkarhi lowu hi wu hetaka hi ri ensin’wini, hi endla tano hi ku teka vuphayona bya nkarhinyana kumbe bya nkarhi hinkwawo. Hi nga tlhela hi dyondza ririmi rin’wana kumbe hi rhurhela endhawini yin’wana kumbe hi rhurhela etikweni rin’wana.—Mint. 16:9, 10.

10. Hi yihi mikateko leyi Irene a yi kumeke hikwalaho ka leswi a a tiyimisele ku chumayela mahungu lamanene?

¹⁰ Anakanya hi xikombiso xa Irene, ku nga makwerhu wa xisati loyi a nga tekiwangiki wa le United States. A a swi navela hi mbilu yakwe hinkwayo ku chumayela valuveri lava a va huma eRhaxiya. Hi 1993 loko a sungula ku chumayela valuveri volavo, a ku ri ni ntlawa wa Xirhaxiya eDorobeni ra New York lowu a wu ri ni vahuweleri va kwalomu ka 20 ntsena. Irene u hete malembe ya kwalomu ka 20 a ri karhi a chumayela vanhu lava vulavulaka Xirhaxiya. U ri: “Nisweswi a ndzi si swi kota kahle ku vulavula Xirhaxiya.” Nilokoswiritano, Yehovha u ma katekisile matshalatshala yakwe ni ya van’wana lava a va tinyiketele ku fana na yena. Namuntlha, ku ni mavandlha ya Xirhaxiya ya tsevu eDorobeni ra New York. Vanhu va 15 lava Irene a dyondzeke na vona Bibele va khuvuriwile naswona van’wana va vona va tirha eBethele, van’wana i maphayona kasi van’wanyana i vakulu. Irene u ri: “A ndzi tshembi leswaku ku ni ntirho wun’wana lowu a wu ta ndzi tisela ntsako ku tlula ntirho wo chumayela.” Hakunene Irene wa wu tlangela swinene ntirho wakwe wo chumayela!

11. Hi byihi vuyelo lebyi vaka kona loko hi chumayela hambiloko hi xanisiwa?

¹¹ Ku fana na muapostola Pawulo, loko hi tlangela ntirho wa hina wo chumayela, hi ta ya emahlweni hi chumayela hambiloko hi xanisiwa. (Mint. 14:19-22) Exikarhi ka va 1930 ku ya eku sunguleni ka va 1940, vamakwerhu va le United States va xanisiwile swinene. Kambe ku fana na Pawulo va hambete va chumayela hi xivindzi. Leswaku va sirhelela mfanelo ya hina yo chumayela, vamakwerhu volavo a va gidela ekhoto. Hi 1943, loko Makwerhu Nathan H. Knorr, a vulavula hi nandzu wun’wana lowu hi wu hluleke eHubyeni  leyi Tlakukeke ya Vuavanyisi ya le United States u te: “Hi kote ku hlula hikwalaho ko tiyimisela ka n’wina. Loko vahuweleri a va nga hambetanga va chumayela, a hi nga ta tengisiwa eHubyeni Leyi Tlakukeke kambe hikwalaho ka leswi n’wina vamakwerhu emisaveni hinkwayo mi yeke emahlweni mi chumayela hambiloko mi xanisiwa hi kote ku hlula. Kambe hikwalaho ka leswi n’wina malandza ya Hosi mi yimeke mi tiyile ni loko mi xanisiwa hi swona leswi endleke leswaku eku heteleleni hi hlula.” Hilaha ku fanaka, ninamuntlha hi kote ku hlula ematikweni man’wana hikwalaho ka leswi vamakwerhu va yeke emahlweni va chumayela hambiloko va xanisiwa. Handle ko kanakana, ndlela leyi hi wu rhandzaka ha yona ntirho wo chumayela yi nga endla leswaku hi hlula ku xanisiwa.

12. Xana u tiyimisele ku endla yini entirhweni wo chumayela?

¹² Loko hi teka ntirho wa hina wo chumayela tanihi rifuwo ra risima leri humaka eka Yehovha, a hi nge tirheli ku kuma tiawara ntsena. Ematshan’weni ya sweswo, hi ta endla hinkwaswo leswi hi nga swi kotaka leswaku hi “nyikela vumbhoni bya rixaladza hi mahungu lamanene.” (Mint. 20:24; 2 Tim. 4:5) Kambe i yini leswi hi faneleke hi swi dyondzisa van’wana? A hi kambisiseni rifuwo rin’wana leri Xikwembu xi hi nyikeke rona.

13, 14. I yini ‘vuhlayiselo bya xuma’ lebyi Yesu a vulavuleke ha byona eka Matewu 13:52 naswona hi nga byi tata njhani?

¹³ Rifuwo ra vunharhu leri Yehovha a hi nyikeke rona i ntiyiso lowu nga eBibeleni. Yehovha i Xikwembu xa ntiyiso. (2 Sam. 7:28; Ps. 31:5) Leswi a nga Tatana la hananaka, u avela hinkwavo lava n’wi chavaka ntiyiso wakwe lowu nga eBibeleni. Ku sukela loko hi twe ntiyiso ro sungula, hi kote ku hlengeleta ntiyiso lowu nga eRitweni ra Xikwembu ku nga Bibele, loko hi hlaya mikandziyiso ya hina, hi ri etinhlengeletanweni ta xifundzha ni ta miganga ni le mihlanganweni ya vandlha. Hi ku famba ka nkarhi, hi sungule ku hlayisa ntiyiso wolowo wa khale swin’we ni ntiyiso lowuntshwa lowu antswisiweke endhawini leyi Yesu a yi vitaneke ‘vuhlayiselo bya xuma,’ ku nga timbilu ta hina. (Hlaya Matewu 13:52.) Yehovha u ta hi pfuna leswaku hi hlengeleta ntiyiso lowuntshwa ‘evuhlayiselweni bya hina bya xuma’ loko ntsena hi wu lavisisa ku fana ni xuma lexi fihliweke. (Hlaya Swivuriso 2:4-7.) Hi nga swi endlisa ku yini leswi?

¹⁴ Hi fanele hi va ni dyondzo ya munhu hi yexe nkarhi ni nkarhi hi tlhela hi endla ndzavisiso eRitweni ra Xikwembu ni le mikandziyisweni ya hina. Leswi swi ta endla leswaku hi tiva ntiyiso “lowuntshwa” lowu khale a hi nga wu tivi. (Yox. 1:8, 9; Ps. 1:2, 3) Nkandziyiso wo sungula wa Xihondzo xo Rindza lowu kandziyisiweke hi July 1879, wu te: “Ntiyiso wu fana ni xiluva lexitsongo xo saseka lexi rhendzeriweke hi khwati. Loko u lava ku kuma xona u fanele u xi lavisisa hi vurhon’wana. . . . Kambe loko u xi kumile a wu fanelanga u tshika ku lavisisa swin’wana.” Hilaha ku fanaka, na hina hi fanele hi tiyimisela ku hlengeleta ntiyiso lowu hi wu dyondzaka eBibeleni evuhlayiselweni bya hina bya xuma kumbe etimbilwini ta hina.

15. Hikwalaho ka yini hi nga vulaka leswaku ntiyiso wun’wana i wa “khale” naswona hi wihi lowu wena u wu tlangelaka swinene?

¹⁵ Hi tive ntiyiso wa risima loko hi sungula ku tihlanganisa ni vanhu va Xikwembu. Hi nga vula leswaku ntiyiso wolowo se i wa “khale” hikuva hi sungule hi tiva wona ni ku wu tlangela loko hi sungula ku va Vakreste. Ntiyiso wolowo wa risima wu katsa yini? Hi dyondze leswaku Yehovha i Muvumbi wa hina tlhelo Munyiki wa vutomi ni leswaku u ni xikongomelo hi vanhu. Hi tlhele hi dyondza leswaku hikwalaho ka leswi Yehovha a hi rhandzaka, u nyikele hi N’wana wakwe leswaku a ta hi kutsula eka xidyoho ni rifu. Nakambe hi dyondze leswaku Mfumo wa Xikwembu wu ta herisa ku xaniseka hinkwako naswona hi ni ntshembo wo tiphina hi vutomi lebyi nga heriki eMfun’weni wolowo.—Yoh. 3:16; Nhlav. 4:11; 21:3, 4.

16. Hi fanele hi endla yini loko ku va ni ku antswisiwa ko karhi eka ndlela leyi a hi titwisisa ha yona tidyondzo tin’wana?

 ¹⁶ Mikarhi yin’wana ndlela leyi hi byi twisisaka ha yona vuprofeta byo karhi bya le Bibeleni kumbe Matsalwa yo karhi yi nga ha antswisiwa. Loko ku va ni ku antswisiwa ko tano, hi fanele hi tinyika nkarhi wo dyondzo rungula rero hi vukheta hi tlhela hi anakanyisisa ha rona. (Mint. 17:11; 1 Tim. 4:15) Hi lava ku ku twisisa kahle ku cinca koloko hi tlhela hi vona ku hambana loku nga kona eka matwisiselo ya khale ni lamantshwa. Loko hi endla tano, hi ta kota ku hlayisa ntiyiso wolowo lowuntshwa evuhlayiselweni bya hina bya xuma. Hikwalaho ka yini swi ri swa nkoka ku endla tano?

17, 18. Moya lowo kwetsima wu nga hi pfuna njhani?

¹⁷ Yesu u vule leswaku moya lowo kwetsima wa Xikwembu wu ta hi pfuna leswaku hi tsundzuka swilo leswi hi swi dyondzeke. (Yoh. 14:25, 26) Xana leswi swi nga hi pfuna njhani tanihi vachumayeri va mahungu lamanene? Anakanya hi leswi humeleleke makwerhu la vuriwaka Peter. Hi 1970 a ri ni malembe ya 19 naswona a ha ku sungula ku tirha eBethele ya le Britain. Siku rin’wana loko a chumayela hi yindlu ni yindlu, u kume wanuna un’wana loyi a a ri ni malebvu lamakulu. Peter u vutise wanuna yoloye loko a swi tsakela ku dyondzeriwa Bibele. Wanuna yoloye u hlamarile, ivi a vula leswaku yena i mufundhisi naswona ndyangu wakwe wu nghena kereke. Kutani leswaku a kota ku vona loko Peter a ri tiva rungula ra Bibele u n’wi vutise a ku: “Ndzi byele la mufana, xana buku ya Daniyele a yi tsariwe hi ririmi rihi?” Peter u hlamule a ku: “Xiphemu xin’wana xa yona a xi tsariwe hi Xiaramu.” Peter u ri: “Mufundhisi yoloye u hlamarile hileswi a ndzi tiva nhlamulo ya xivutiso xakwe kambe na mina sweswo swi ndzi hlamarisile swinene! A ndzi tivutisa leswaku ndzi yi tive njhani nhlamulo yoleyo. Loko ndzi fika ekaya ndzi kambisise Xihondzo xo Rindza ni Xalamuka! swa tin’hweti leti hundzeke kutani ndzi kume xihloko xin’wana lexi a xi vula leswaku buku ya Daniyele a yi tsariwe hi Xiaramu.” (Dan. 2:4) Hakunene moya lowo kwetsima wu ta hi pfuna leswaku hi tsundzuka swilo leswi hi tshameke hi swi hlaya nileswi hi swi hlayiseke evuhlayiselweni bya hina bya xuma.—Luka 12:11, 12; 21:13-15.

¹⁸ Loko hi tlangela vutlhari lebyi humaka eka Yehovha, timbilu ta hina ti ta hi susumetela ku hlayisa ntiyiso wa khale ni wa sweswi evuhlayiselweni bya hina bya xuma. Loko hi ya hi tlangela ni ku rhandza vutlhari lebyi humaka eka Yehovha, hi ta va vachumayeri va Mfumo lava humelelaka.

19. Hikwalaho ka yini hi fanele hi hlayisa rifuwo leri Yehovha a hi nyikeke rona?

¹⁹ Sathana ni vanhu vakwe va lava ku herisa ndlela leyi hi ri tlangelaka ha yona rifuwo leri Yehovha a hi nyikeke rona, leri hi buleke ha rona exihlokweni lexi. Sweswo a hi nge swi balekeli. Mitirho leyi holelaka swinyawula, ku lava ku hanya vutomi bya vulovolovo kumbe ku bombisa rifuwo, swi nga tsanisa ndlela leyi hi ri tlangelaka ha yona rifuwo leri Yehovha a hi nyikeke rona. Muapostola Yohane u hi tsundzuxa leswaku misava leyi ya hundza ni ku navela ka yona. (1 Yoh. 2:15-17) Hikokwalaho, hi fanele hi endla hinkwaswo leswi hi nga swi kotaka leswaku hi rhandza, hi hlayisa ni ku tlangela rifuwo leri Yehovha hi nyikeke rona.

20. I yini leswi u tiyimisele ku swi endla leswaku u hlayisa rifuwo leri Yehovha a ku nyikeke rona?

²⁰ Tiyimisele ku tshika swilo hinkwaswo leswi nga herisaka ndlela leyi u rhandzaka Mfumo wa Xikwembu ha yona. Hambeta u chumayela hi ku hiseka ni ku tlangela ntirho wa hina wo chumayela lowu ponisaka vutomi. Tikarhatele ku ya emahlweni u lavisisa ntiyiso lowu humaka eRitweni ra Xikwembu. Loko u endla tano, u ta va u tihlayisela ‘xuma ematilweni, laha khamba ri nga tshineliki ni laha nsumba yi nga dyiki kona. Hikuva laha xuma xa wena xi nga kona, hi kona laha mbilu ya wena yi nga ta va kona.’—Luka 12:33, 34.