1, 2. (a) Ne a koloa faka-te-agaga e tolu kolā ne tuku mai ne Ieova ki a tatou? (e) Ne a mea ka mafau‵fau tatou ki ei i te mataupu tenei?

A IEOVA ko te ‵toe tino maumea eiloa i te iunivesi. (1 Nofo. 29:11, 12) E pelā me se Tamana kaimalie, e fakaasi mai eiloa ne ia mo te loto fiafia ana koloa faka-te-agaga ki a latou kolā e iloa ne latou te lotou tāua malosi. Ko oko eiloa i te ‵tou fia‵fia me ne tuku mai ne Ieova a koloa faka-te-agaga, kolā e aofia i ei a (1) te Malo o te Atua, (2) te ‵tou galuega fakaola tino, mo te (3) muna‵tonu tāua i tena Muna! Kae kafai e se fakaeteete tatou, e mafai o galo atu ‵tou loto fakafetai ki koloa tāua konei kae ‵pei atu keatea ne tatou. Ke puke ‵mau ki ei, e ‵tau o fakaaoga faka‵lei ne tatou kae fakamalosi aka faeloa ‵tou fia‵fia ki ei. Ne fai mai a Iesu: “Ko te koga e tuku ei otou koloa, e tuku foki i ei otou loto.”—Luka 12:34.

² Ke na mafau‵fau nei tatou ki te auala e mafai o ati aka kae fakatumau te ‵tou fia‵fia mo te loto fakafetai ki te Malo, te galuega talai, mo te munatonu. I te taimi e fai ei tatou penā, ke mafaufau ‵loto ki te auala e mafai o fakamalosi aka eiloa ne koe a tou fiafia ki koloa faka-te-agaga konei.

3. Se a te mea ne loto fiafia a te tino faipisinisi i te tala fakatusa a Iesu ke fai ko te mea ke maua ne ia a te ‵toe penina tāua? (Onoono ki te ata i te kamataga.)

³ Faitau te Mataio 13:45, 46. Ne fai atu ne Iesu se tala fakatusa e uiga ki se tino faipisinisi telā ne salasala atu ki penina. I te fia o tausaga, e mautinoa eiloa me ne ‵togi kae fakatau atu ne te tino faipisinisi a te fia selau o penina. Kae nei la ko maua ne ia se penina e tasi telā ne ‵kese eiloa tena gali kae ko te kilo atu fua ki ei ne fiafia ei tena loto. Kae ke ‵togi ne ia te penina tenā, ne ‵tau o ‵togi atu ne ia ana mea katoa. E a, e mafai o fakaataata i tou mafaufau a te tāua o te penina tenei ki a ia?

4. Kafai e fia‵fia malosi tatou ki te Malo o te Atua e pelā mo te fiafia malosi o te tino faipisinisi ki te penina, ne a mea ka fai ne tatou?

⁴ Se a te akoakoga mō tatou? A te munatonu e uiga ki te Malo o te Atua se penina tafasili i te tāua. Kafai e fia‵fia malosi tatou ki ei e pelā mo te fiafia malosi o te tino faipisinisi ki te penina tenā, ka loto fia‵fia eiloa tatou o tiaki a mea katoa ko te mea ke fai tatou mo tino ‵nofo tumau mai lalo i te Malo. (Faitau te Maleko 10:28-30.) Mafaufau ki tino e tokolua kolā ne fai penā.

5. Ne fakaasi atu pefea ne Sakaio tena manako malosi ki te Malo o te Atua?

⁵ A Sakaio, ko te pule o tino ‵tae lafoga, telā ne kamata o maumea mai i tupe ne maua i auala sē ‵tonu. (Luka 19:1-9) Kae i te taimi ne lagona ei ne te tagata sē amiotonu tenā a te talaiga a Iesu e uiga ki te Malo, ne iloa ne ia a te tāua malosi o mea ne lagona ne ia kae ne gasuesue fakavave a ia. Ne fai atu a ia: “Kiloke! Ka tuku atu ne au te āfa o aku mea ki tino ma‵tiva, e te Aliki, a ko so se mea ne maua ne au mai so se tino i se auala sē tonu, ka toe fakafoki atu ne au ki ei e fakafa taimi.” Ne fiafia eiloa tou tagata ke tiaki katoatoa atu ana koloa sē ‵lei konā kae ‵kalo keatea mai te kaimanako ki mea faka-te-foitino.

6. Ne a ‵fuliga ne fai ne Rose ko te mea ke fai a ia mo tino mai lalo i te Malo o te Atua, kae kaia ne ‵fulii ei a ia?

⁶ I nai tausaga ko ‵teka, i te taimi ne lagona ei ne se tino telā ka fakaigoa ne tatou ki a Rose, a te fekau o te Malo, ne ‵nofo fakatauavaga tou fafine mo se fafine. Ne fai tou fafine mo pelesitene o se fakapotopotoga telā e taua atu ki te saolotoga o tino amio fakasotoma. Kae i te taimi ne sukesuke ei a Rose ki te Tusi Tapu, ne iloa ne ia te tāua malosi o te munatonu e uiga ki te Malo o te Atua. Kae ne iloa foki ne ia me ne ‵tau o fai ne ia a ‵fuliga ‵lasi ‵ki. (1 Koli. 6:9, 10) Ona ko te otia o tena loto, ne gasuesue ei a ia ke lisaina mai i tena tulaga kae ke fakagata tena fesokotakiga mo tena famau fafine. Ne papatiso a Rose i te 2009, kae i te tausaga mai tua ifo, ne kamata o tavini atu tou fafine e pelā me se paenia tumau. Ne malosi atu tena alofa ki a Ieova mo tena Malo i lō so se manakoga faka-te-foitino.—Male. 12:29, 30.

7. E fakatumau pefea ne tatou a te fiafia malosi mo te loto kātoa ki te Malo o te Atua?

⁷ E tonu, ko oti ne fai ne te tokoukega o tatou a ‵fuliga i te olaga ko te mea ke fai mo tino mai lalo i te Malo o te Atua. (Loma 12:2) Kae e seki gata atu eiloa i konā a mea e ‵tau o fai. E ‵tau o tumau tatou i te matapula‵pula ki mea kolā ne fia‵fia malosi tatou ki ei, e aofia i ei a te manakoga ki mea faka-te-foitino mo so se manakoga fakatauavaga sē ‵ma. (Faata. 4:23; Mata. 5:27-29) Ke fesoasoani mai i te fakatumauga o te ‵tou fia‵fia malosi mo te loto kātoa ki te Malo o te Atua, ne tuku mai ne Ieova se isi koloa tafasili i te tāua.

8. (a) Kaia ne fakamatala mai ei ne te apositolo ko Paulo te ‵tou galuega talai e pelā me se ‘koloa tāua i loto i mea ne faite ki kele’? (e) Ne fakaasi mai pefea ne Paulo me ne fakatāua malosi ne ia tena galuega talai?

⁸ Masaua me ne ‵tofi aka ne Iesu a tatou ke talai kae akoako atu te tala ‵lei e uiga ki te Malo o te Atua. (Mata. 28:19, 20) Ne iloa ne te apositolo  ko Paulo a te lasi o te tāua o te galuega talai. Ne fakamatala mai ne ia a te galuega talai o te feagaiga fou e pelā me se ‘koloa tāua i loto i mea ne faite ki kele.’ (2 Koli. 4:7; 1 Timo. 1:12) E tiga eiloa e fai fua tatou e pelā me ne mea ne faite ki kele kolā e se ‵lei katoatoa, a te fekau e talai atu ne tatou e mafai o maua ei ne tatou a te ola se-gata-mai kae penā foki mo latou kolā e faka‵logo mai ki a tatou. Ne iloa ne Paulo a te mea tenei telā ne fai mai ei a ia: “E fai ne au a mea katoa mō te tala ‵lei, ko te mea ke mafai o avatu ne au te mea tenā ki nisi tino.” (1 Koli. 9:23) Ao, ne fakaosofia ne te fiafia malosi o Paulo ki te galuega talai ke galue malosi a ia i te faiga o soko. (Faitau te Loma 1:14, 15; 2 Timoteo 4:2.) Ne fesoasoani atu foki te mea tenā ke kufaki a ia i ‵tekemaiga ‵lasi. (1 Tesa. 2:2) E fakaasi atu pefea ne tatou a te fiafia malosi penā ki te galuega talai?

9. Ne a nisi auala e mafai o fakaasi atu ne tatou a te ‵tou loto fakafetai ki te galuega talai?

⁹ A te auala e tasi ne fakaasi mai ne Paulo tena loto fakafetai ki te galuega talai ko te matapulapula faeloa ki avanoaga ke faipati atu ki nisi tino. E pelā mo te kau apositolo mo Kelisiano mua, e talai atu tatou i so se taimi, i koga e tokouke a tino i ei, kae mai fale ki fale. (Galu. 5:42; 20:20) E ‵tusa mo ‵tou fakanofonofoga, e onoono tatou ki auala ke momea aka te uke o ‵tou mea e fai i te galuega talai, kāti mai te tavini atu e pelā me ne paenia lagolago io me ne paenia tumau. E mafai foki o tauloto tatou ki se isi ‵gana, olo atu ki se isi koga i te ‵tou fenua, io me ki se isi fenua.—Galu. 16:9, 10.

10. Ne fakamanuia atu pefea ki a Irene mō tena loto ‵mautakitaki ke fakaasi atu te tala ‵lei?

¹⁰ Mafaufau ki te fakaakoakoga a Irene, se tuagane taka i Amelika. Ne manako malosi tou fafine ke talai atu ki tino ‵fou i te fenua kolā ne faipati faka-Lusia. I te taimi ne kamata ei a ia o fai penā i te 1993, kāti e toko 20 fua a tino talai i te potukau i te ‵gana Lusia i te Fa‵kai o Niu Ioki. Ne galue malosi eiloa a Irene mō se 20 tausaga i te ‵gana tenā. “Koi seki mafai eiloa ne au o faipati faka‵lei i te ‵gana Lusia,” ne taku ‵tonu mai a Irene. Kae ne fakamanuia eiloa ne Ieova tena loto finafinau mo nisi tino e pelā mo ia. I aso nei, ko 6 a fakapotopotoga i te ‵gana Lusia i te Fa‵kai o Niu Ioki. E toko 15 ne papatiso mai i a latou kolā ne fai ne Irene olotou akoga. Ko tavini atu a nisi tino o latou i te Peteli, paenia, kae pelā foki me ne toeaina. E fai mai a Irene, “Kafai e mafaufau au ki nisi fakamoemoega, e se mafai o masaua ne au se mea telā ne maua ei ne au mai i ei a te fiafia lasi.” Ao, ne fakatāua malosi ne ia tena galuega talai!

11. Ne a ikuga ‵lei ne maua mai i te tumau i te talai atu faitalia a fakasauaga?

¹¹ Kafai e fakatāua ne tatou ‵tou galuega talai, ka fai tatou e pelā mo te apositolo ko Paulo, mai te tumau i te talai atu faitalia a fakasauaga. (Galu. 14:19-22) Talu mai te 1930 mo te kamataga o tausaga mai te 1940, ne fe‵paki eiloa ‵tou  taina i Amelika mo fakasauaga faiga‵ta. Kae e pelā mo Paulo, ne ‵mautakitaki latou kae tumau i te talai atu. Ke puipui ‵tou saolotoga, ne taua atu eiloa a taina i taua e uke i mea tau tulafono. I te 1943, a te Taina ko Nathan H. Knorr, ne fai mai e uiga ki se manumaloga e tasi i te Fono Maluga i Amelika: “Ne manumalo eiloa tatou ona ko te otou taua atu. Moi ne seki tumau a tino talai i te galuega talai, penei e seai ne tagi e ave ki te Fono Maluga; kae ona ko koutou, tino talai, taina i te lalolagi kātoa, e tumau eiloa i talai atu kae ka se fakagata aka foki eiloa ne fakasauaga. Ko te manumaloga tenei o tino o te Aliki e ‵tu ‵mautakitaki kae ne maua mai i ei te fakaikuga tenā.” Ko te ‵tu ‵mautakitaki foki o taina i nisi fenua ne iku atu ki manumaloga tai ‵pau. Kae ko te ‵tou fia‵fia malosi ki te galuega talai e mafai o fakatakavale ei a fakasauaga.

12. Se a te mea ne fakaiku aka ne koe e uiga ki tau galuega talai?

¹² Kafai e ‵kilo atu tatou ki te galuega talai e pelā me se koloa tāua mai i a Ieova, ka se mafai o lotoma‵lie fua tatou ki te “lauga o taimi.” I lō te fai penā, ka fai ne tatou a mea katoa e mafai ne tatou “ke tuku atu se molimau katoatoa e uiga ki te tala ‵lei.” (Galu. 20:24; 2 Timo. 4:5) Kae ne a mea ka akoako atu ne tatou ki nisi tino? Mafaufau ki te suā koloa mai te Atua.

13, 14. Se a te “fale koloa” ne fakasino atu ki ei a Iesu i te Mataio 13:52, kae e mafai pefea o faka‵fonu ne tatou?

¹³ A te tolu o koloa faka-te-agaga ko te pogai o muna‵tonu ne maua ne tatou. A Ieova ko te Atua o te munatonu. (2 Samu. 7:28; Sala. 31:5) E pelā me se Tamana kaimalie, e fakaasi atu ne ia a muna‵tonu ki a latou kolā e ma‵taku ki a ia. Mai te taimi ne lagona ei ne tatou a te munatonu, ne maua ne tatou te avanoaga ke fakaputu a muna‵tonu mai tena Muna, ko te Tusi Tapu, mai ‵tou tusi faka-Kelisiano, kae penā foki mai i ‵tou fono i tausaga katoa, mo fakatasiga i te vaiaso. I te ‵tekaatuga o taimi, e ati aka ne tatou a te mea telā ne fakamatala mai ne Iesu e pelā me se “fale koloa” o muna‵tonu mua mo muna‵tonu ‵fou. (Faitau te Mataio 13:52.) Ka fesoasoani mai a Ieova ke fakaputu aka a muna‵tonu tāua kae ‵fou ki loto i ‵tou “fale koloa” māfai e ‵sala atu tatou ki ei e pelā eiloa māfai e ‵sala atu ki koloa ‵funa. (Faitau te Faataoto 2:4-7.) E mafai pefea o fai ne tatou te mea tenā?

¹⁴ E ‵tau o ati aka ne tatou a te faiga o sukesukega totino ‵lei kae iloilo faka‵lei aka eiloa ki te Muna a te Atua kae penā foki ki ‵tou tusi. Ka fesoasoani mai te mea tenei ke maua a muna‵tonu kolā e mafai o “‵fou” i se auala telā e seki iloa aka eiloa muamua ne tatou. (Iosu. 1:8, 9; Sala. 1:2, 3) Ne fai mai penei i te lōmiga muamua o te mekesini tenei, telā ne ‵lomi i a Iulai 1879: “A te munatonu e fai pelā me se tamā pulalakau fatauva telā e ola i te koga lavaki, e fakatamilo kae toeitiiti ko ola sai‵tia i va o mouku ola vale o akoakoga ‵se. Kafai e maua ne koe, kāti ne salasala faka‵lei atu eiloa koe. . . . Kafai ne maua ne koe, kāti ne punou ifo koe o puke. Ke se lotomalie fua koe ki se pulalakau e tasi o te munatonu. . . . Fakaputu mai ke uke atu.” Ao, e ‵tau o loto fia‵fia tatou ke faka‵fonu ‵tou fale koloa totino ki muna‵tonu mai te Atua.

15. Kaia e mafai o fakasino atu tatou ki nisi muna‵tonu e pelā me ne “mea mua,” kae ne a nisi muna‵tonu e fakatāua malosi ne koe?

¹⁵ Ne maua ne tatou a nisi muna‵tonu tāua i te taimi ne kamata o ‵kau atu muamua tatou ki tino o te Atua. Ne mafai o fai a mea konei e pelā me ne “mea mua,” ona ko te mea ne iloa kae fakatāua ne tatou mai te kamataga o ‵tou olaga Kelisiano. Ne a mea e aofia i muna‵tonu tāua penā? Ne tauloto tatou me i a Ieova ko te ‵tou Mafuaga mo te Tino ne tuku mai ne ia te ola kae e isi foki sena fuafuaga mō tino. Ne tauloto foki tatou me ne fakatoka ne ia mo te alofa a te taulaga togiola a tena Tama ko te mea ke fakasaoloto ei tatou mai te agasala mo te mate. Ne toe tauloto ne tatou me ka fakagata atu ne tena Malo a logo‵maega katoa kae ko maua foki ne tatou a te fakamoemoega  ke ola ki te se-gata-mai i te filemu mo te fiafia mai lalo i te pulega a te Malo.—Ioa. 3:16; Faka. 4:11; 21:3, 4.

16. Ne a mea e ‵tau o fai ne tatou māfai ko isi se fakamafuliga ki te malamalama i se munatonu?

¹⁶ I nisi taimi, e mafai o fakamafuli ‵tou malamalama i se valoaga i te Tusi Tapu io me ko nisi fuaiupu faka-te-Tusi Tapu. Kafai ko tuku mai a vaegā malamalama ‵fou penā, e ‵tau o fakaaoga se taimi tai leva ke sukesuke faka‵lei ki te fakamatalaga kae mafaufau ‵loto ki ei. (Galu. 17:11; 1 Timo. 4:15) E taumafai tatou ke malamalama faka‵lei i fakama‵fuliga ‵lasi kae penā foki mo tamā ‵kesega i te malamalama mua mo te malamalama fou. I te auala tenei, e fakamautinoa aka ei ne tatou me e tausi faka‵lei eiloa ne tatou a te munatonu fou i ‵tou fale koloa totino. Kaia e aoga ei a vaegā taumafaiga penā?

17, 18. E fesoasoani mai pefea te agaga tapu ki a tatou?

¹⁷ Ne akoako mai a Iesu me e mafai o fakamasaua mai ne te agaga tapu o te Atua a mea ne tauloto ne tatou. (Ioa. 14:25, 26) E fesoasoani mai pefea te mea tenei ki a tatou e pelā me ne faiakoga o te tala ‵lei ki tino katoa? Mafaufau ki te tala o se taina e igoa ki a Petelu. I te 1970, ko 19 ana tausaga kae ne kamata o tavini atu i te Peteli i Peletania. I te taimi ne talai atu ei mai fale ki fale, ne fetaui a ia mo se tagata tai matua malie kae e isi sena talafa. Ne fesili atu a Petelu ki te tagata me e fia malamalama a ia i te Tusi Tapu. Ne mata poi tou tagata kae fai mai me i te fale tenā se fale o se faiakoga Iutaia (se lapi). Ke tofotofo aka a Petelu, ne fesili atu a te lapi, “Toku toe, se a te ‵gana ne tusi i ei te tusi o Tanielu?” Ne tali atu Petelu, “Ne tusi se vaega i ei i te ‵gana Alamaika.” Ne fai mai ne Petelu ana mea ne masaua: “Ne poi te lapi me ne iloa ne au te tali—kae ko au ne poi malosi atu! Ne iloa pefea ne au te tali? I te taimi ne fanatu ei au ki te fale kae ne onoono au ki Faleleoleo Maluga mo Awake! o masina mai mua atu i ei, ne maua ei ne au se mataupu telā ne fakamatala mai i ei me ne tusi a Tanielu i te ‵gana Alamaika.” (Tani. 2:4) Ao, e mafai o fakamasaua mai ne te agaga tapu a mea ne fai‵tau muamua ne tatou kae tausi faka‵lei i ‵tou fale koloa.—Luka 12:11, 12; 21:13-15.

¹⁸ Kafai e fakatāua ne tatou a te poto mai i a Ieova, ka fakamalosi aka tatou ne ‵tou loto ke faka‵fonu ‵tou fale koloa ki muna‵tonu—mea ‵fou mo mea mua. I te taimi e gasolo aka eiloa o lasi atu ‵tou a‵lofa mo te loto fakafetai ki te poto o Ieova, ka toka ‵lei tatou ke fai mo faiakoga ki tino katoa.

19. Kaia e ‵tau ei o puipui faka‵lei ‵tou koloa faka-te-agaga?

¹⁹ E taumafai faeloa a Satani mo tena lalolagi o fakavāivāi io me fakagata te ‵tou loto fakafetai ki koloa faka-te-agaga ne sau‵tala tatou ki ei i te mataupu tenei. E se puipui eiloa tatou mai i auala faitogafiti konei. E mafai o faka‵segofie tatou ne folafolaga e uiga ki se galuega e lasi te ‵togi i ei, moemiti ki se olaga fai valevale, io me ko te manakoga ki te fakamatamata i koloa faka-te-foitino. Ne fakamasaua mai eiloa ne te apositolo ko Ioane me ka fakaseai atu te lalolagi tenei mo ana manakoga. (1 Ioa. 2:15-17) Tela la, e ‵tau o ga‵lue malosi tatou ke puipui ‵tou manakoga mo ‵tou fia‵fia malosi mo te loto fakafetai ki koloa faka-te-agaga.

20. Ne a mea ne fakaiku aka ne koe ke ko te mea ke puipui faka‵lei ou koloa faka-te-agaga?

²⁰ Ke loto fiafia o tiaki so se mea telā e mafai o sui ki ei a te ‵tou a‵lofa mo te loto kātoa ki te Malo o te Atua. Tumau i te talai atu mo te loto finafinau, kae ke mo a ma galo atu te ‵tou loto fakafetai ki te ‵tou galuega fakaola tino. Tumau eiloa mo te fiafia malosi o salasala atu ki muna‵tonu a te Atua. Kafai e fai ne koe a te mea tenei, ka ati aka ei ne koe a “te koloa tāua o te lagi telā e se mafai o pala, e se oko atu ki ei a tino kai‵soa kae se katia foki ne manu. Me ko te koga e tuku ei otou koloa, e tuku foki i ei otou loto.”—Luka 12:33, 34.