1, 2. (a) Ndi zwifhio zwithu zwiraru zwe Yehova a ri ṋea zwone? (b) Ri ḓo ṱolisisa mini kha ino thero?

A HUNA muthu o pfumaho vhukuma u fhira Yehova ḽifhasini ḽoṱhe. (1 Koron. 29:11, 12) Samusi e Khotsi wa mafunda, o ṋea lupfumo lwawe lwa muya vhoṱhe vhane vha lu dzhiela nṱha. Ri livhuha vhukuma uri Yehova o ri ṋea lwonolo lupfumo, lune lwa katela (1) Muvhuso wa Mudzimu, (2) vhuḓinḓa na (3) ngoho ya ndeme i re Ipfini ḽawe! Fhedzi arali ra sa ṱhogomela, ri nga thoma u sa dzhiela nṱha lwonolo lupfumo nahone zwenezwo zwi ḓo ita uri ri xelelwe ngalwo. U itela uri ri sa xelelwe ngalwo, ri fanela u lu shumisa zwavhuḓi na u bvela phanḓa ri tshi lu funa ngaho engedzeaho. Yesu o ri: “Hune lupfumo lwaṋu lwa vha hone, ndi hune mbilu dzaṋu dza ḓo vha hone.”—Luka 12:34.

² Kha ri ṱolisise nḓila ine ra nga dzula ngayo ri tshi funa na u dzhiela nṱha Muvhuso, vhuḓinḓa na ngoho. Musi ri tshi khou ita nga u ralo, elekanyani nga ha nḓila ine na nga funa ngayo nga ho engedzeaho lwonolo lupfumo lwa muya.

3. Kha tshifanyiso tsha Yesu, muvhambadzi o vha o ḓiimisela u ita mini u itela u wana nungu ya thengo khulu? (Sedzani tshifanyiso tsha u thoma.)

³ Vhalani Mateo 13:45, 46. Yesu o amba nga ha tshifanyiso tsha muvhambadzi we a vha a tshi khou ṱoḓa vhulungu. Lwa miṅwaha minzhi, muvhambadzi o vha a tshi renga na u rengisa malungu manzhi. Naho zwo ralo, ḽiṅwe ḓuvha a wana nungu nthihi ya thengo khulu ye ya ita uri a takale vhukuma. Fhedzi u itela uri a kone u i renga, o vha a tshi fanela u rengisa zwoṱhe zwe a vha e nazwo. Naa ni nga kona u vhona uri yeneyo nungu yo vha i ya ndeme lungafhani khae?

4. Arali ri tshi funa Muvhuso wa Mudzimu nga nḓila i fanaho na ine muvhambadzi a funa ngayo nungu, ri ḓo ita mini?

⁴ Ri guda mini? Ngoho ya Muvhuso wa Mudzimu i fana na yeneyo nungu ya thengo khulu. Arali ri tshi funa Muvhuso nga nḓila i fanaho na ine muvhambadzi a funa ngayo nungu, ri ḓo ḓiimisela u ṱutshela zwoṱhe zwine ra vha nazwo u itela uri ri dzule ri tshipiḓa tsha Muvhuso. (Vhalani Marko 10:28-30.) Ṱhogomelani tsumbo ya vhathu vhavhili vhe vha ita nga u ralo.

5. Saxeo o sumbedza hani uri o ḓiimisela u ṱoḓa Muvhuso wa Mudzimu?

⁵ Saxeo o vha e muhulwane wa vhathelisi nahone o pfumiswa nga u fhura vhathu tshelede. (Luka 19:1-9) Naho zwo ralo, musi onoyo munna a songo lugaho a tshi pfa Yesu a tshi khou funza nga ha Muvhuso, o ṱhogomela uri zwe a vha a tshi khou zwi pfa ndi zwa ndeme nahone a dzhia vhukando nga u ṱavhanya. O ri: “Ndi ḓo kovhela vhashai thundu yanga nga vhukati, nahone tshiṅwe na tshiṅwe tshe nda dzhiela muthu muṅwe na muṅwe nga vhufhura, ndi ḓo mu lifhela tsho andiswa luṋa.” O humisela tshelede ye a vha o i dzhiela vhathu nahone a litsha vhupangwa ha u funa zwithu zwi vhonalaho.

6. Ndi tshanduko dzifhio dze Rose a dzi ita u itela uri a dzule e tshipiḓa tsha Muvhuso wa Mudzimu, nahone ndi ngani o ita nga u ralo?

⁶ Sa tsumbo, miṅwahani minzhi yo fhiraho, muṅwe musidzana ane ra ḓo mu vhidza Rose o vha a tshi funana na muthu wa mbeu ine ya fana na yawe musi a sa athu u pfa nga ha mulaedza wa Muvhuso. O vha e murangaphanḓa wa dzangano ḽi lwelaho ndugelo dza vhathu vhane vha ita zwa vhudzekani na vhathu vha mbeu i fanaho. Naho zwo ralo, samusi Rose o vha a tshi khou guda Bivhili, o dzhiela nṱha ngoho ya Muvhuso wa Mudzimu. Fhedzi o ṱhogomela uri u fanela u ita tshanduko khulwane. (1 Vhakor. 6:9, 10) O ṱuṱuwedzea uri a litshe vhuimo hawe kha ḽeneḽo dzangano na u litsha u funana na muthu wa mbeu i fanaho na yawe. Rose o lovhedzwa nga 2009 nahone nga ṅwaha u tevhelaho a thoma u shuma sa muvulanḓila wa tshifhinga tsho ḓalaho. Nḓila ye a vha a tshi funa ngayo Yehova na Muvhuso wawe zwo engedzea vhukuma u fhira nyemulo naho i ifhio ya ṋama.—Marko 12:29, 30.

7. Ri nga dzula hani ri tshi funa Muvhuso wa Mudzimu nga mbilu yoṱhe?

⁷ Vhukuma, vhunzhi hashu ro ita tshanduko vhutshiloni hashu u itela uri ri vhe tshipiḓa tsha Muvhuso wa Mudzimu. (Vharoma 12:2) Naho zwo ralo, a zwi fheleli henefho. Ri fanela u dzula ro fhaṱuwa uri nḓila ine ra funa ngayo Muvhuso i si thithiswe nga zwithu zwi ngaho, u funesa zwithu zwi vhonalaho na mifuda yoṱhe ya u ḓifara luvhi nga zwa vhudzekani. (Mir. 4:23; Mat. 5:27-29) U itela uri ri dzule ri tshi funa Muvhuso wa Mudzimu nga mbilu yoṱhe, Yehova o ri ṋea luṅwe lupfumo lwa thengo khulu.

8. (a) Ndi ngani muapostola Paulo o ṱalusa u huwelela sa “lupfumo ro lu [faraho] nga midzio ya vumba”? (b) Paulo o sumbedza hani uri u dzhiela nṱha vhuḓinḓa hawe?

⁸ Ri fanela u humbula uri Yesu o ri ṋea mushumo wa u huwelela na u gudisa vhaṅwe mafhungo maḓifha a Muvhuso wa Mudzimu.  (Mat. 28:19, 20) Muapostola Paulo o ṱhogomela uri vhuḓinḓa ndi ha ndeme. O ṱalusa vhuḓinḓa ha mulanga muswa sa “lupfumo ro lu [faraho] nga midzio ya vumba.” (2 Vhakor. 4:7; 1 Tim. 1:12) Naho ri songo fhelela, mulaedza une ra u huwelela u nga ita uri ri wane vhutshilo vhu sa fheli na vhane vha ri thetshelesa. Ndi ngazwo Paulo o ri: “Ndi ita zwoṱhe ndi tshi itela mafhungo maḓifha, uri ndi kone u a huwelela kha vhaṅwe.” (1 Vhakor. 9:23) Vhukuma, u funa ha Paulo vhuḓinḓa zwo mu sudzulusela u shuma nga nungo dzoṱhe kha u ita vhafunziwa. (Vhalani Vharoma 1:14, 15; 2 Timotheo 4:2.) Zwenezwo zwo mu thusa u konḓelela musi a tshi tovholwa. (1 Vhathes. 2:2) Ri nga sumbedza hani uri ri funa vhuḓinḓa nga nḓila i fanaho?

9. Ndi dzifhio dziṅwe nḓila dzine ra nga sumbedza ngadzo uri ri dzhiela nṱha vhuḓinḓa?

⁹ Iṅwe nḓila ye Paulo a sumbedza ngayo uri u dzhiela nṱha vhuḓinḓa, ndi nga u vhudza vhaṅwe nga ha Muvhuso musi a tshi wana tshibuli. U fana na vhaapostola na Vhakriste vha u thoma, ri huwelela lu songo dzudzanywaho, fhethu ha vho muthumunzhi na nnḓu na nnḓu. (Mish. 5:42; 20:20) Musi zwiimo zwashu zwi tshi ri tendela, ri wana dziṅwe nḓila dzine ra nga ṱanḓavhudza ngadzo vhuḓinḓa hashu, khamusi nga u shuma sa vhavulanḓila vha u thusa kana vha tshifhinga tsho ḓalaho. Ri nga dovha ra guda luṅwe luambo, u pfulutshela huṅwe fhethu kana u pfulutshela kha ḽiṅwe shango.—Mish. 16:9, 10.

10. Irene o fhaṱutshedzwa hani nge a ita vhuḓidini ha u huwelela mafhungo maḓifha?

¹⁰ Ṱhogomelani tsumbo ya muṅwe wahashu a siho mbinganoni ane a pfi Irene wa ngei United States. O vha e na lutamo luhulwane lwa u huwelela kha vhathu vhane vha amba Lurussia vhe vha pfulutshela shangoni ḽa hawe. Musi a tshi thoma u ita nga u ralo nga 1993, ho vha hu na tshigwada tsha vhahuweleli vha 20 fhedzi vhane vha amba Lurussia ngei Ḓoroboni ya New York. Lwa miṅwaha i ṱoḓaho u vha 20, Irene o shuma nga nungo dzoṱhe a tshi khou huwelela kha vhathu vhane vha amba lwonolwo luambo. Irene o ri: “Ndi kha ḓi guda lwonolwo luambo.” Naho zwo ralo, Yehova o fhaṱutshedza vhuḓidini hawe na ha vhaṅwe vhane vha ita zwi fanaho. Ṋamusi, hu na zwivhidzo zwa Lurussia zwa rathi ngei Ḓoroboni ya New York. Kha vhathu vhe Irene a guda navho, ho lovhedzwa vha 15. Vhaṅwe vhavho vha shuma Bethele, vhaṅwe ndi vhavulanḓila na vhahulwane vha zwivhidzo. Irene o ri: “Musi ndi tshi humbula nga ha zwipikwa zwe nda vha ndi tshi nga ḓivhetshela zwone, a thi humbuli uri ho vha hu tshi nga vha na tshipikwa tshe tsha vha tshi tshi nga ita uri ndi takale nga yeneyi nḓila.” Irene u dzhiela nṱha vhukuma vhuḓinḓa hawe!

11. Hu vha na mvelelo dzifhio musi ri tshi bvela phanḓa ri tshi huwelela hu sa londwi u tovholwa?

¹¹ Arali ri tshi dzhiela nṱha vhuḓinḓa hashu, ri ḓo fana na muapostola Paulo we a bvela phanḓa a tshi huwelela hu sa londwi u tovholwa. (Mish. 14:19-22) Nga vho-1930 na  mathomoni a vho-1940, vhahashu vha ngei United States vho tovholwa zwihulu. Naho zwo ralo, u fana na Paulo, vho ima vho khwaṱha nahone vha bvela phanḓa na u huwelela. Musi vhavhusi vha tshi lingedza u thivhela mushumo washu, vhahashu vho ya khothe nahone vha kunda milandu minzhi. Nga 1943, Wahashu Nathan H. Knorr o amba zwi tevhelaho nga ha ḽiṅwe gundo ḽe ḽa vha hone Khothe Khulwane ya ngei U.S, a ri: “Eneo magundo o vha hone nge na lwa. Arali vhahuweleli vho vha vha songo konḓelela u ya tsimuni, ho vha hu nga si vhe na mulandu une wa fanela u iswa Khothe Khulwane; fhedzi ro ya nga nṱhani ha vhoiwe, vhahuweleli, vhahashu u mona na shango ḽoṱhe, noṱhe no bvela phanḓa ni sa laṱeli thaula nahone ndi ngazwo ro kunda u tovholwa. Vhathu vha Murena vho kunda nga nṱhani ha uri vho ima vho khwaṱha.” Na vhaṅwe vhahashu vha bvaho kha maṅwe mashango vho ima vho khwaṱha nahone zwo ita uri vha kunde. Vhukuma, u funa hashu vhuḓinḓa zwi nga ita uri ri kunde u tovholwa.

12. No ḓiimisela u ita mini vhuḓinḓani?

¹² Musi ri tshi dzhia vhuḓinḓa sa lupfumo lwa thengo khulu lu bvaho ha Yehova, a ri nga ḓo vhilaedziswa fhedzi nga ha uri ndi awara nngana dzine ra dzi ṅwala kha muvhigo washu. Nṱhani hazwo, ri ḓo ita zwoṱhe zwi re maanḓani ashu “u itela u ṱanziela nga vhuḓalo nga ha mafhungo maḓifha.” (Mish. 20:24; 2 Tim. 4:5) Fhedzi ri ḓo huwelela nga ha mini kha vhaṅwe? Ṱhogomelani luṅwe lupfumo lu bvaho ha Mudzimu.

13, 14. Ndi “lupfumo” lufhio lwe Yesu a amba nga halwo kha Mateo 13:52, nahone ri nga lu wana hani?

¹³ Lupfumo lwa vhuraru, ndi ngoho yoṱhe ye ra i guda. Yehova ndi Mudzimu wa ngoho. (2 Sam. 7:28; Ps. 31:5) Sa Khotsi wa mafunda, u ṋea yeneyo ngoho vhane vha mu ofha. Musi ri tshi tou thoma u pfa ngoho, ro vha na tshibuli tsha u pfa ngoho Ipfini ḽawe ḽine ḽa vha Bivhili, kha khandiso dzashu dza Vhukriste, mabuthanoni, maguvhanganoni na miṱanganoni ya vhege iṅwe na iṅwe. Nga u ya ha tshifhinga, ro kona u vhulunga zwe Yesu a zwi ṱalusa sa “lupfumo” lwa ngoho ye ra i wana kale na ya zwino. (Vhalani Mateo 13:52.) Yehova u ḓo ri thusa u pfesesa ngoho ntswa arali ra ṱoḓa ngoho u fana na musi ri tshi ṱoḓa lupfumo lwo dzumbiwaho. (Vhalani Mirero 2:4-7.) Ri nga ita hani zwenezwo?

¹⁴ Ri fanela u ḓiḓowedza u fara pfunzo ya muthu nga eṱhe na u ita ṱhoḓisiso nga vhuronwane Ipfini ḽa Mudzimu na kha khandiso dzashu. Zwenezwi zwi ḓo ri thusa uri ri kone u wana ngoho ntswa ye ra vha ri sa i ḓivhi u thomani. (Yosh. 1:8, 9; Ps. 1:2, 3) Thero ya u thoma ya wonoyu magazini wo gandiswaho nga July 1879 yo amba uri, ngoho i fana na luvha ḽo dzumbiwaho vhukati ha tsheṋe nnzhi. Muthu u fanela u ṱoḓa ḽeneḽo luvha nga vhuronwane uri a kone u ḽi wana. Nahone musi o ḽi wana, ho ngo fanela u fushea nga u wana ḽithihi fhedzi. U fanela u bvela phanḓa a tshi ṱoḓa maṅwe maluvha. Nga nḓila i fanaho, a ro ngo fanela u wana ngoho nthihi fhedzi. Ri fanela u ḓiimisela u bvela phanḓa ri tshi ṱoḓa ngoho yo engedzeaho.

15. Ndi ngani ri tshi nga amba uri hu na ngoho ya kale, nahone ndi ifhio iṅwe ya ngoho ine na i dzhiela nṱha vhukuma?

¹⁵ Ro wana ngoho ya thengo khulu musi ri tshi thoma u ḓikonanya na vhathu vha Mudzimu. Yeneyo ngoho i nga ṱaluswa sa ngoho ya kale samusi hu yone ye ra thoma u i guda na u i dzhiela nṱha. Yeneyo ngoho i katela mini? Ro guda uri Yehova ndi Musiki washu na Muṋei wa Vhutshilo nahone u na ndivho nga ha vhathu. Ro dovha ra guda uri Mudzimu o ri ṋea Murwa wawe sa tshiṱhavhelo uri a ri rengulule kha tshivhi na lufu. Ro dovha ra guda uri Muvhuso wawe u ḓo fhelisa tshengelo yoṱhe nahone ri na tshilavhelelwa tsha u tshila tshoṱhe nga mulalo nahone ro takala nga fhasi ha Muvhuso wawe.—Yoh. 3:16; Nzumb. 4:11; 21:3, 4.

16. Ri fanela u ita mini musi ri tshi wana kupfesesele kuswa kwa ngoho?

 ¹⁶ Nga u ya ha tshifhinga, nḓila ine ra pfesesa ngayo vhuporofita ha Bivhili kana maṅwe Maṅwalo i nga shanduka. Musi ho no vha na kupfesesele kuswa, ri fanela u ḓiṋea tshifhinga tsha u vhala eneo mafhungo nga vhuronwane na u elekanya nga hao. (Mish. 17:11; 1 Tim. 4:15) A ro ngo fanela u lwela u sokou ḓivha fhedzi tshanduko yo itwaho, fhedzi ri fanela u livhisa ṱhogomelo kha zwidodombedzwa zwa kupfesesele kwa kale na kupfesesele kuswa. Yeneyi nḓila i ita uri ri kone u pfesesa ngoho ntswa. Ndi ngani ri tshi fanela u ita honoho vhuḓidini?

17, 18. Muya mukhethwa u nga ri thusa hani?

¹⁷ Yesu o funza uri muya wa Mudzimu u nga ita uri ri humbule zwithu zwe ra vhuya ra zwi guda. (Yoh. 14:25, 26) Zwenezwi zwi nga ri thusa hani sa vhahuweleli vha mafhungo maḓifha? Ṱhogomelani zwe zwa itea kha muṅwe wahashu ane a pfi Peter. O vha e na miṅwaha ya 19 nga 1970 nahone o vha a tshi kha ḓi tou bva u vha muraḓo wa Bethele ya ngei Britain. Musi a tshi khou huwelela nnḓu nga nnḓu, o ṱangana na muṅwe munna ane a vha na madebvu. Peter o vhudzisa onoyo munna arali a tshi ṱoḓa u pfesesa Bivhili. Onoyo munna o vha o mangala nahone a amba uri u mufunzi wa kereke ya Vhayuda. U itela u linga Peter, mufunzi o vhudzisa a ri: “Mmbudzeni hafha muṱhannga, bugu ya Daniele yo ṅwalwa nga luambo lufhio?” Peter o ri: “Tshiṅwe tshipiḓa tsho ṅwalwa nga Luaramiki.” Peter o amba uri: “Mufunzi o vha o mangala ngauri ndi ḓivha phindulo—fhedzi ho vha ho mangalesa nṋe! Ndo ḓivha hani phindulo? Musi ndi tshi swika hayani, ndo sedza thero ya magazini wa Tshiingamo na Awake! dza miṅwedzi yo fhiraho nahone nda wana thero ine ya ṱalutshedza uri bugu ya Daniele yo ṅwalwa nga Luaramiki.” * Vhukuma, muya mukhethwa u nga ri thusa uri ri humbule zwithu zwe ra vhuya ra zwi vhala na u zwi vhulunga mbiluni dzashu.—Luka 12:11, 12; 21:13-15.

¹⁸ Arali ri tshi dzhiela nṱha ngoho i bvaho ha Yehova, zwi ḓo ita uri ri kone u humbula zwe ra vhuya ra zwi vhala kale na zwino. Musi u funa hashu na u dzhiela nṱha ngoho i bvaho ha Yehova zwi tshi bvela phanḓa na u engedzea, ri ḓo vha vhahuweleli vha bvelelaho.

19. Ndi ngani ri tshi fanela u tsireledza lupfumo lwashu lwa muya?

¹⁹ Sathane na shango ḽawe vha khou bvela phanḓa vha tshi ita uri ri si dzhiele nṱha zwithu zwa lwa muya zwe ra haseledza nga hazwo kha ino thero. Ri nga si kone u ḓitsireledza kha honohu vhukwila. Arali ra sa ṱhogomela, ri nga kungwa nga zwithu zwi ngaho, mushumo u holelaho vhukuma, u tshila vhutshilo ha vhuphuvhe-phuvhe kana u ṱongisa zwithu zwi vhonalaho zwine ra vha nazwo. Muapostola Yohane o ri humbudza uri ḽino shango ḽi a fhira na nyemulo dzaḽo. (1 Yoh. 2:15-17) Nga zwenezwo, ri fanela u shuma nga nungo dzoṱhe u itela uri ri dzule ri tshi funa na u dzhiela nṱha lupfumo lwa muya.

20. No ḓiimisela u ita mini u itela u tsireledza lupfumo lwaṋu lwa muya?

²⁰ U nga ri ri nga ḓiimisela u ṱutshela zwoṱhe zwine zwa nga ita uri ri si tsha funa nga mbilu yoṱhe Muvhuso wa Mudzimu. Ri bvele phanḓa ri tshi huwelela nga u fhisea nahone ri songo vhuya ra litsha u dzula ri tshi dzhiela nṱha vhuḓinḓa hashu. Kha ri bvele phanḓa ri tshi ḓiimisela u ṱoḓa ngoho i bvaho ha Mudzimu. Musi ni tshi ita nga u ralo, ni ḓo vha ni tshi khou ḓivhulungela “lupfumo . . . lwa ngei ṱaḓulu, hune mbava ya sa sendele tsini nalwo nahone lu sa ḽiwi nga tshifheṱi. Ngauri hune lupfumo lwaṋu lwa vha hone, ndi hune mbilu dzaṋu dza ḓo vha hone.”—Luka 12:33, 34.