1, 2. (a) Ano an tulo nga espirituwal nga bahandi nga iginhahatag ha aton ni Jehova? (b) Ano an aton hihisgotan hini nga artikulo?

HI Jehova an pinakariko nga Persona ha uniberso. (1 Kron. 29:11, 12) Sugad nga mahinatagon nga Amay, andam hiya paghatag hin espirituwal nga mga bahandi ha ngatanan nga nakakasabot han daku gud nga bili hito. Mapasalamaton gud kita nga gintatagan kita ni Jehova hin espirituwal nga mga bahandi nga nag-uupod han (1) Ginhadian han Dios, (2) aton ministeryo nga nagtatalwas hin kinabuhi, ngan (3) presyoso nga mga kamatuoran nga makikita ha iya Pulong! Pero kon diri kita mag-iikmat, mahimo mawara an aton apresasyon hini nga mga bahandi ngan ilabog pa ngani ito, siring pa. Basi diri ini mahitabo, kinahanglan gamiton naton ito ngan padayon nga pahilarumon an aton apresasyon hito. Hi Jesus nagsiring: “Kon hain an iyo bahandi, aadto liwat an iyo kasingkasing.”​—Luc. 12:34.

² Hisgotan naton kon paonan-o naton makukultibar ngan matitipigan an aton gugma ngan apresasyon ha Ginhadian, ha ministeryo, ngan ha kamatuoran. Samtang gin-aadman naton ini, pamalandonga kon paonan-o mo mapapahilarom an imo gugma para hinin espirituwal nga mga bahandi.

3. Ha ilustrasyon ni Jesus, ano an andam buhaton han negosyante basi mapalit an presyoso gud nga perlas? (Kitaa an retrato ha tinikangan hini nga artikulo.)

³ Basaha an Mateo 13:45, 46. Hi Jesus naghatag hin ilustrasyon mahitungod hin negosyante nga namimiling hin mga perlas. Ha sulod hin mga katuigan, sigurado nga ginatos na an iya napalit ngan naibaligya nga perlas. Pero hini nga takna, nabilngan niya an usa nga presyoso gud nga perlas. Ngani, han pakakita pa la niya hito, nalipay na gud hiya. Kondi basi mapalit niya ito, kinahanglan niya ibaligya an ngatanan niya nga panag-iya. Nahuhunahuna mo ba kon mationan-o kapresyoso ha iya ito nga perlas?

4. Kon ginpapabilhan gud naton an Ginhadian han Dios pariho han pagpabili han negosyante ha perlas, ano an aton bubuhaton?

⁴ Ano nga leksyon an aton mahibabaroan? An kamatuoran mahitungod han Ginhadian pariho hito nga presyoso gud nga perlas. Kon ginpapabilhan gud naton ito pariho han pagpabili han negosyante ha perlas, andam kita nga bayaan an ngatanan basi magin sakop han Ginhadian ngan magpabilin dida hito. (Basaha an Marcos 10:28-30.) Tagda an duha nga indibiduwal nga nagbuhat hito.

5. Paonan-o iginpakita ni Sakeo nga presyoso gud para ha iya an Ginhadian han Dios?

⁵ Hi Sakeo nga usa nga punoan nga parasukot hin buhis nagin riko tungod ha panlimbong. (Luc. 19:1-9) Pero han hinbatian hinin diri matadong nga tawo an mensahe ni Jesus mahitungod han Ginhadian, nasantop niya an daku gud nga bili hito, salit ginios dayon hiya. Hiya nagsiring: “Kitaa, Ginoo! Ihahatag ko ha mga pobre an katunga han akon mga panag-iya, ngan anoman nga nakuha ko tikang ha bisan hin-o pinaagi han buwa nga akusasyon, ibabalik ko hin upat ka pilo.” Kinaburut-on nga ginbayaan niya an iya mga karikohan nga nakuha tungod ha panlimbong ngan an iya duro nga hingyap ha materyal nga mga butang.

6. Ano nga mga pagbag-o an ginhimo ni Rose basi magin sakop han Ginhadian han Dios, ngan kay ano nga ginbuhat niya ito?

⁶ Pipira ka tuig an naglabay, han hinbatian han usa nga babaye nga aton tatawagon nga hi Rose an mensahe mahitungod han Ginhadian, may-ada hiya karelasyon nga igkasi-babaye. Presidente hiya han usa nga organisasyon nga nagdidepensa han katungod han mga homoseksuwal. Pero han nag-aram hiya han Biblia, nasabtan niya an daku gud nga bili han kamatuoran mahitungod han Ginhadian han Dios. Nasantop niya nga kinahanglan hiya maghimo hin dagku nga pagbag-o. (1 Cor. 6:9, 10) Napagios hiya nga mag-resign ha iya posisyon ngan tapuson an iya sayop nga pakigrelasyon. Nabawtismohan hiya han 2009 ngan nagregular payunir han sumunod nga tuig. Mas hinigugma niya hi Jehova ngan an Iya Ginhadian kay ha bisan ano nga sayop nga hingyap.​—Mar. 12:29, 30.

7. Paonan-o naton matitipigan an aton hilarom nga gugma ha Ginhadian han Dios?

⁷ Oo, damu ha aton an bangin naghimo hin dagku nga pagbag-o ha aton kinabuhi basi magin mga sakop han Ginhadian han Dios. (Roma 12:2) Pero diri dida natatapos an aton mga pangalimbasog. Kinahanglan kita mag-ikmat ha mga butang nga mahimo makagwara han aton gugma ha Ginhadian han Dios, sugad han hingyap ha materyal nga mga butang ngan ha anoman nga imoral nga hingyap. (Prob. 4:23; Mat. 5:27-29) Basi buligan kita nga matipigan an aton hilarom nga gugma ha Ginhadian han Dios, gintatagan kita ni Jehova hin usa pa nga presyoso gud nga bahandi.

8. (a) Kay ano nga iginhulagway ni apostol Pablo an aton ministeryo sugad nga “bahandi ha mga surudlan nga hinimo tikang ha tuna”? (b) Paonan-o iginpakita ni Pablo nga ginpapabilhan niya an iya ministeryo?

⁸ Tigamni nga gintokahan kita ni Jesus nga isangyaw ngan itutdo an maopay nga sumat han Ginhadian han Dios. (Mat. 28:19, 20) Maaram hi apostol Pablo han daku gud nga bili han ministeryo. Iya iginhulagway an ministeryo han bag-o nga  kasabotan sugad nga “bahandi ha mga surudlan nga hinimo tikang ha tuna.” (2 Cor. 4:7; 1 Tim. 1:12) Bisan kon diri kita perpekto nga mga “surudlan,” an mensahe nga aton iginsasangyaw mahimo magresulta hin kinabuhi nga waray kataposan para ha aton ngan hadton namamati ha aton. Tungod hini, hi Pablo nagsiring: “Ginbubuhat ko an ngatanan para ha maopay nga sumat, basi maisangyaw ko ito ha iba.” (1 Cor. 9:23) Oo, an gugma ni Pablo ha ministeryo nagpagios ha iya nga magin maduruto ha pagtutdo ha mga tawo basi magin mga disipulo. (Basaha an Roma 1:14, 15; 2 Timoteo 4:2.) Nakabulig ito ha iya nga mailob an duro nga pagkontra. (1 Tes. 2:2) Paonan-o naton maipapakita an sugad nga gugma ha ministeryo?

9. Ano an pipira nga paagi nga maipapakita naton an aton gugma ha ministeryo?

⁹ Usa nga paagi nga iginpakita ni Pablo an iya gugma ha ministeryo amo an pagin alerto ha mga higayon nga makagsangyaw. Pariho ha mga apostol ngan mga Kristiano han siyahan nga siglo, nagsasangyaw kita ha diri pormal nga paagi, ha publiko, ngan ha balay-balay. (Buh. 5:42; 20:20) Kon igintutugot han aton kahimtang, nangangalimbasog kita nga mapauswag an aton ministeryo, bangin pinaagi ha pag-auxiliary o pagregular payunir. Mahimo liwat kita mag-aram hin iba nga linggwahe, o bumalhin ha iba nga lugar ha aton nasud o ha iba pa ngani nga nasud.​—Buh. 16:9, 10.

10. Paonan-o ginbendisyonan hi Irene tungod han iya determinasyon nga isangyaw an maopay nga sumat?

¹⁰ Tagda an ehemplo han solo nga sister nga hi Irene, nga taga-Estados Unidos. Hingyap gud niya nga magsangyaw ha dayo nga mga residente nga nagyayakan hin Ruso. Han nagtikang hiya ha pagbuhat hito han 1993, mga 20 pa la an magwarali ha grupo nga nagyayakan hin Ruso ha New York City. Ha sulod hin mga 20 ka tuig, nangalimbasog hi Irene nga mahibaro hito nga linggwahe. Hiya nagsiring: “Diri pa gihapon ako maopay magyakan hin Ruso.” Pero ginbendisyonan ni Jehova an iya kadasig pati na an iba nga may sugad nga kadasig. Yana, unom na an kongregasyon nga nagamit hin Ruso nga linggwahe ha New York City. Kinse han gindumarahan ni Irene hin pag-aram ha Biblia an nabawtismohan. An pipira ha ira nag-aalagad sugad nga Bethelite, payunir, ngan tigurang. Hi Irene nagsiring: “Kon iba nga tumong an akon ginpangalimbasogan nga makab-ot, diri ako maaram kon magigin sugad ba ako kamalipayon.” Oo, ginpapabilhan gud niya an iya ministeryo!

11. Ano an mag-opay nga resulta kon padayon kita nga nagsasangyaw bisan pa han pagtimaraot?

¹¹ Kon ginpapabilhan naton an aton ministeryo, padayon kita nga magsasangyaw bisan pa han mga pagtimaraot, pariho kan apostol Pablo. (Buh. 14:19-22) Han dekada han 1930 ngan 1940, inatubang hin duro nga pagkontra an aton kabugtoan ha Estados Unidos. Pero pariho kan Pablo, nagpabilin hira nga marig-on ngan padayon nga nagsangyaw. Basi mapanalipdan an aton katungod ha pagsangyaw, damu nga kaso ha korte an gin-atubang han kabugtoan. Han 1943, hi Bugto Nathan H. Knorr nagsiring mahitungod han usa nga kadaogan ha  Korte Suprema han Estados Unidos: “Nagdadaog kita tungod han iyo pakig-away. Kon waray mga magwarali nga nagsasangyaw, waray kita mga kaso ha Korte Suprema; pero tungod ha iyo, mga magwarali, mga kabugtoan ha bug-os nga kalibotan, nga nagpapadayon ngan diri naundang ha pagsangyaw, napipirde naton an mga pagtimaraot. Ini nga kadaogan resulta han pagin marig-on han katawohan han Ginoo.” An pagin marig-on liwat han kabugtoan ha iba nga nasud nagresulta hin mga kadaogan ha korte. Oo, kon hinigugma naton an ministeryo mahimo naton madaog an pagtimaraot.

12. Ano an imo determinasyon may kalabotan ha imo ministeryo?

¹² Kon ginhuhunahuna naton an ministeryo sugad nga presyoso gud nga bahandi tikang kan Jehova, diri kita makukontento nga basta la “makaoras.” Lugod, bubuhaton naton an ngatanan basi ‘bug-os nga matuman an pagsangyaw han maopay nga sumat.’ (Buh. 20:24; 2 Tim. 4:5) Pero ano an aton itututdo ha iba? Hisgotan naton an usa pa nga bahandi nga iginhahatag ha aton han Dios.

13, 14. Ano an “burutangan han bahandi” nga iginhuhulagway ni Jesus ha Mateo 13:52, ngan paonan-o naton ito masusudlan?

¹³ An ikatulo nga espirituwal nga bahandi amo an iginpahayag nga mga kamatuoran nga aton natirok. Hi Jehova an Dios han kamatuoran. (2 Sam. 7:28; Sal. 31:5) Sugad nga mahinatagon nga Amay, iya iginpapahayag an mga kamatuoran ha Biblia ha mga may kahadlok ha iya. Tikang han hinbaroan naton an kamatuoran, nagkaada kita higayon nga tirukon an mga kamatuoran tikang ha iya Pulong, ha aton mga publikasyon, ngan ha mga kombensyon, asembleya, ngan sinemana nga mga katirok. Paglabay han panahon, nagkaada kita han iginhuhulagway ni Jesus nga “burutangan han bahandi” han daan ngan bag-o nga mga kamatuoran. (Basaha an Mateo 13:52.) Bubuligan kita ni Jehova nga makatirok hin presyoso ngan bag-o nga mga kamatuoran ha aton “burutangan han bahandi” kon padayon kita nga mamimiling hito sugad hin tinago nga mga bahandi. (Basaha an Proberbios 2:4-7.) Paonan-o naton ito bubuhaton?

¹⁴ Kinahanglan magkaada kita maopay nga rutina ha personal nga pag-aram ngan pagsaliksik ha Pulong han Dios ngan ha aton mga publikasyon. Mabulig ini ha aton nga mahibaroan an mga kamatuoran nga bangin “bag-o” ha aton tungod kay waray pa naton ito mahibaroi hadto. (Jos. 1:8, 9; Sal. 1:2, 3) An siyahan nga gowa hini nga magasin nga iginpublikar han Hulyo 1879, nagsiring: “An kamatuoran, pariho hin gutiay nga bukad ha kamingawan nga puno hin buhi nga mga linarang nga napapalibotan ngan haros natatabonan han marabong nga banwa han kasaypanan. Kon karuyag mo ito makita, kinahanglan magin mabinantayon ka. . . . Kon karuyag mo magkaada hito, kinahanglan mo dumuko basi makuha ito. Ayaw kakontento ha usa nga bukad han kamatuoran. . . . Padayon ha pagtirok, pagbiling hin dugang pa.” Oo, kinahanglan magin determinado kita nga magtirok hin mga kamatuoran ha aton surudlan han bahandi.

15. Kay ano nga mahimo naton tawagon nga “daan” an pipira nga kamatuoran, ngan ano an pipira hito nga imo gud ginpapabilhan?

¹⁵ Nahibaroan naton an pipira han presyoso gud nga mga kamatuoran han nagtikang kita pakig-upod ha katawohan han Dios. Angayan gud nga ihulagway ito sugad nga “daan,” tungod kay hinbaroan ngan ginpabilhan naton ito tikang han nagin Kristiano kita. Ano an nahiuupod hito nga presyoso nga mga kamatuoran? Hinbaroan naton nga hi Jehova an aton Maglalarang ngan Humaratag-han-Kinabuhi ngan may-ada hiya katuyoan para ha katawohan. Hinbaroan liwat naton nga mahigugmaon nga igintagana han Dios an halad-lukat han iya Anak basi magkaada kita higayon nga matalwas tikang ha sala ngan kamatayon. Ngan nahibaroan naton nga wawad-on han iya Ginhadian an ngatanan nga pag-antos ngan may-ada kita paglaom nga magkinabuhi hin mamurayawon ngan malipayon ha waray kataposan ilarom han pagmando han Ginhadian han Dios.​—Juan 3:16; Pah. 4:11; 21:3, 4.

16. Ano an kinahanglan naton buhaton kon may igintututdo ha aton nga bag-o nga pagsabot ha usa nga kamatuoran?

 ¹⁶ Ha panapanahon, bangin magkaada kita bag-o nga pagsabot ha usa nga tagna ha Biblia o ha pipira nga teksto ha Kasuratan. Kon igintututdo ha aton ito nga mga pagbag-o, kinahanglan maggahin kita hin panahon basi pag-adman ito hin maopay ngan pamalandungon ito. (Buh. 17:11; 1 Tim. 4:15) Nangangalimbasog kita nga masabtan hin maopay diri la an dagku nga pagbag-o kondi pati liwat an gudtiay nga kaibahan han daan ngan han bag-o nga pagsabot. Hini nga paagi, makakasiguro kita nga nahisusulod gud naton an bag-o nga kamatuoran ha aton burutangan han bahandi. Kay ano nga mapulsanon an pagbuhat hito?

17, 18. Paonan-o kita mabubuligan han baraan nga espiritu?

¹⁷ Hi Jesus nagsiring nga maipapahinumdom ha aton han espiritu han Dios an mga butang nga aton hinbaroan. (Juan 14:25, 26) Paonan-o ini makakabulig ha aton sugad nga mga magturutdo han maopay nga sumat? Tagda an eksperyensya han bugto nga hi Peter. Han 1970, han 19 anyos hiya, bag-o la hiya nga Bethelite ha Britanya. Samtang nagsasangyaw ha balay-balay, may nakaistorya hiya nga barangason nga edaran nga lalaki. Ginpakianhan ni Peter an lalaki kon karuyag niya nga masabtan an Biblia. Medyo nakalasan an lalaki, ngan ginsidngan hiya nga an balay nga iya ginbisita, balay hin Judio nga rabbi. Basi sarihan hi Peter, ginpakianhan hiya han rabbi, “Sige daw Idoy, ha ano nga linggwahe iginsurat an libro han Daniel?” Hi Peter binaton, “An pipira nga bahin hito iginsurat ha Aramaiko.” “Nahipausa an rabbi kay maaram ako han baton,” siring ni Peter, “pero waray ako mahipausa hito! Kay ano nga maaram ako han baton? Han inuli ako ha balay ngan ginbasa ko an gowa han An Barantayan ngan Pagpamata! han naglabay nga bulan, may nabasa ako nga artikulo nga nagsasaysay nga an pipira nga bahin han libro han Daniel iginsurat ha Aramaiko.” * Oo, maipapahinumdom ha aton han baraan nga espiritu an mga impormasyon nga nabasa naton hadto ngan nahisulod ha aton burutangan han bahandi.​—Luc. 12:11, 12; 21:13-15.

¹⁸ Kon ginpapabilhan naton an kinaadman tikang kan Jehova, mapapagios kita nga pun-on hin daan ngan bag-o nga mga kamatuoran an aton burutangan han bahandi. Samtang naghihilarom an aton gugma ngan apresasyon ha kinaadman ni Jehova, nagigin kwalipikado gud kita sugad nga mga magturutdo.

19. Kay ano nga kinahanglan naton panalipdan an aton espirituwal nga mga bahandi?

¹⁹ Padayon nga nangangalimbasog hi Satanas ngan an iya kalibotan nga paluyahon o wad-on an aton apresasyon ha espirituwal nga mga bahandi nga aton ginhisgotan hini nga artikulo. Kon diri kita mag-iikmat, mahimo kita masulay han mga tanyag nga trabaho nga may daku nga sweldo, magarbo nga pagkinabuhi, o hingyap nga magkaada materyal nga mga karikohan. Ginpapahamangnoan kita ni apostol Juan nga mawawara ini nga kalibotan pati an mga hingyap hini. (1 Juan 2:15-17) Salit kinahanglan mangalimbasog kita nga panalipdan an aton gugma ngan apresasyon ha espirituwal nga mga bahandi.

20. Ano an determinado mo buhaton basi mapanalipdan an imo espirituwal nga mga bahandi?

²⁰ Magin andam ha pagbaya ha bisan ano nga mahimo makagwara han imo hilarom nga gugma ha Ginhadian han Dios. Padayon nga magin madasigon ha pagsangyaw, ngan ayaw gud tuguti nga mawara an imo apresasyon ha aton ministeryo nga nagtatalwas hin kinabuhi. Padayon nga magin maduruto ha pagsaliksik han mga kamatuoran ha Biblia. Kon bubuhaton mo ini, makakatirok ka hin “bahandi ha langit” diin ‘didto waray kawatan nga makakahirani ngan waray mga insekto nga makakapangutkot. Kay kon hain an imo bahandi, aadto liwat an imo kasingkasing.’​—Luc. 12:33, 34.